1. Was hot Kot sayn troye tiiner in te friirixe tsayte xtark kemacht?

 TI TROYE mënxe in te Piipel sin ofts wii xtark pexrip. Awer tii hon sich net imer xtark kexpiirt. Tsum payxpiil, als mool hot te kheenich Tawi kexpiirt tas eyer “soo xtark wii een përich” waar; awer anere mool, hot eyer “angst kriit”. (Psal. 30:7) Kot sayn kayst hot fiil kraft fer Samsan kep, awer tee wust tas oone tiise kayst, teet eyer ‘sayn kraft ferliire un soo xwach wii ti anere mëner wëre’. (Rich. 14:5, 6; 16:17) Tiise troye mënxe waare xtark ploos wayl se kraft fon Kot kriit hon.

2. Wii soo waar te aphostel Phaul xtark un xwach kewees? (2 Korinter 12:9, 10)

² Te aphostel Phaul hot aach erkhënt tas eyer must kraft fon Yeehoowa kriin. (Lees 2 Korinter 12:9, 10.) b Soo wii fiile fon uns, hat Phaul kesuntheet propleeme. (Kal. 4:13, 14) Als mool waars xweyer fer tëm tas richtiches mache. (Rom. 7:18, 19) Un anere mool, hot eyer sich unruych un ëngstlich kexpiirt. (2 Kor. 1:8, 9) Awer wën Phaul xwach waar, is eyer xtark kep. Wii? Yeehoowa hot tëm ti neetich kraft kep un tëm xtark kemacht.

3. Was fer frooche tuun mer in tiise artikel antworte?

³ Yeehoowa ferxprecht uns aach xtark lose. (1 Phe. 5:10) Awer fer tiise hilef kriin, mise mer unser teel mache. Tsum  payxpiil: een motoer khan kraft fer een khare kepe tas eyer foran keet. Awer te xofeer mus sayn teel mache: te khare akseleriire. Kraat soo, is Yeehoowa fërtich fer uns ti neetich kraft kepe. Awer meyer mise uns aan xtrenge fer nutse too tefun kriin. Was kept uns Yeehoowa fer uns xtark mache? Was mise meyer mache fer nutse too tefun kriin? Fer ti antworte fine, xtutiire mer wii Yeehoowa 3 persoone keholef hot: te profeet Yoonas, Maria — Yeesus sayn mama —, un te aphostel Phaul. Meyer siin aach wii Yeehoowa sayn tiiner hayt se taach wayter in eenliche aate ferxtërkt.

4. Wii khene mer kraft fon Yeehoowa kriin?

⁴ Een aat wii mer khene Yeehoowa sayn kraft kriin, is torich tas kepeet. Fer unser kepeete antworte, khan Yeehoowa uns ti “iwermeesich kraft” kepe. (2 Kor. 4:7) Meyer khene aach ferxtërkt sin wën mer Kot sayn Wort leese un too triwer noo tenke. (Psal. 86:11) Kot sayn pexeet, woo in te Piipel xteet, is xtark. (Hep. 4:12) Wëns tuu tsu Yeehoowa peetst un sayn Wort leest, kriist tuu ti neetich kraft fer aus hale, fer tayn frooheet hale orer fer een xweyer flicht erfiile. Kuk wii Yeehoowa te profeet Yoonas ferxtërkt hot.

5. Warom praycht te profeet Yoonas koraaj?

⁵ Te profeet Yoonas praycht koraaj kriin. Kot hat tëm een xweyer flicht kep, awer Yoonas hot pang kriit un is uf een xif tsu een aner plats aus keris. Tes weeche, hon tee un ti layt im xif sayn leepe neekst ferloer weeche een xtorm. Wii ti xifsmëner Yoonas im meer kexmis hon, hot een mechtich kroos fix tëm uner xlikt. Yoonas waar in een xreklich plats — te maache fom fix. Wii meecht eyer sich kexpiirt hon? Fiilaycht hot eyer am aanfang ketenkt tas eyer xtërpe teet un tas Yeehoowa tëm im xtich kelos hat. Yoonas wërt wool sich aarich ëngstlich kexpiirt hon.

6. Tëm noo Yoonas 2:1, 2, 7, was hot Yoonas ferxtërkt wii eyer im maache fom kroose fix waar?

⁶ Was hot Yoonas kemacht fer kraft kriin wii eyer aleen im maache fom fix waar? Tee hot kepeet. (Lees Yoonas 2:1, 2, c 7. d) Opwool Yoonas Yeehoowa net aan keheert hot, hot eyer sich peroyt un waar sich sicher tas Kot sayn teemuutich kepeet heere teet. Yoonas hot aach aan te Xrifte triwer noo ketenkt. Warom khene mer tas saan? Sayn kepeet in Yoonas kapitel 2, penutst fiile wërter woo aach in te Psalme xteen. (Tsum payxpiil, ferklaych Yoonas 2:2, 5 mit Psalm 69:1; 86:7.) Es is taytlich tas eyer tiise wërse kuut kekhënt hot un tii hon tëm ti sicherheet kep tas Yeehoowa tëm helfe teet. Yeehoowa hot Yoonas keret un xpeeter waar eyer fërtich fer sayn flicht aan nëme un erfiile. (Yon. 2:10–3:4)

7-8. Wii hot Zhiming kraft kriit in een xweyer tsayt?

⁷ Yoonas sayn payxpiil khan uns helfe wën mer xwiirichkheete mit mache. Tsum payxpiil: Zhiming, e eene pruuter in Taiwan, hot xlime kesuntheet propleeme. Etliche fon sayn parente tuun tëm aach xlecht pehantele weeche sayn klaape aan Yeehoowa. Tee peet un xtutiirt fer Kot sayn kraft kriin. Tee erkhënt: “Als mool, wën propleeme foer khome, xpiire ich mich soo ëngstlich tas ich mich net peruyche khan fer mayn perseenlich  xtuutyum mache.” Awer Zhiming traut uf Yeehoowa fer hilef kriin. “Eyerst tuun ich peete — saat eyer. — Tan tuun ich mayn fones aan un ti liiter horiche. Als mool singe ich in layse xtim pis ich mich peruyche. Tan fange ich aan se xtutiire.”

⁸ Tas perseenlich xtuutyum hot Zhiming in unkewaartne aate ferxtërkt. Tsum payxpiil, Zhiming must een ërnst sirurxii mache. Noo te sirurxii, hot een krankexwester tëm kesaat: “Tuu host weenich roote pluut tseele; soo must tuu een pluut transfusyoon kriin.” In te nacht foer sayn sirurxii, hat Zhiming iwer een xwester kelees woo ti selwich sirurxii kemacht hat. Ti numer roote pluut tseele fon te xwester waar kleener wii tëm sayns. Noch soo, hot ti xwester ti pluut transfusyoon net aan kenom un is peser kep. Tiise speryens hot Zhiming ferxtërkt fer troy plaype.

9. Was khanst tuu mache wëns tuu tich ëngstlich xpiirst weeche een propleem? (Kuk aach ti pilter.)

⁹ Wëns tuu een propleem host, tuust tuu tich als mool tsu ëngstlich xpiire fer se peete? Tuust tuu als mool tich tsu miit xpiire fer se xtutiire? Eriner tich tas Yeehoowa tayn situatsyoon perfekt ferxteet. Soo kaar wëns tuu een keweenlich kepeet machst, khanst tuu tich sicher sin tas Kot tich ti neetich kraft kept. (Ëfe. 3:20) Wëns xweyer fer tich is leese un xtutiire wayls tuu krank, miit orer ëngstlich pist, khanst tuu ti autyos fon te Piipel orer fon unser puplikatsyoone horiche. Tuu khanst aach eene fon unser musike heere orer een wiiteo im jw.org kuke. Yeehoowa wil tich xtark mache. Tee kept tich kraft wëns tuu tsu tëm peetst un antworte fer tayn kepeete suuchst in te Piipel un in al ti anere tinge woo eyer fersoricht.

10. Wii tuun unser priiter un xwestere uns ferxtërke?

¹⁰ Yeehoowa khan unser priiter un xwestere penutse fer uns ferxtërke. Tii khene uns “fiil troost” kepe wën mer een propleem orer een xweyer flicht hon. (Kol. 4:10, 11) Hauptseechlich in “unruyche tsayte”, prayche mer fraaynte hon. (Xpr. 17:17) Wën mer uns xwach xpiire, khene ti priiter uns kepe was mer prayche, uns treeste un uns uf muute  Kot wayter tiine. Mërk mool wii Maria — Yeesus sayn mama — fon te anere ferxtërkt kep is.

11. Warom praycht Maria ferxtërkt sin?

¹¹ Maria must ferxtërkt sin. Te engel Kapryël hot kesaat tas se een khint kreecht, opwool se noch net ferhayrat waar. Maria wërt wol aarich ëngstlich kep sin. Tii hat noch khee khiner ketsoo, awer tii teet uf phase te puup woo te Mesias wëre teet. Opwool se noch net sëks kemacht hat, must se fer Yoosef saan tas se xwanger waar. Sicher tas weyer aarich xweyer. (Luk. 1:26-33)

12. Tëm noo Lukas 1:39-45, wii hot Maria ti neetich kraft kriit?

¹² Wii is Maria ferxtërkt kep fer tiise unkeweenlich un xweyer flicht uf phase? Tii hot hilef fon te anere kesuucht. Tii hot, tsum payxpiil, mee informatsyoone fer Kapryël ferlangt. (Luk. 1:34) “Klaych tëm noo, is Maria xnel tsu te përich rechyoon kang, tsu een xtat in Yutaa.” Tii wolt Elisapët, sayn parentin, pesuuche; un tiise pesuuch hot sich peloont. Elisapët hot Maria keloopt un Yeehoowa hot se inspiriirt een ufmuutich profetsii aus xpreche iwer Maria sayn khint woo uf te welt khome teet. (Lees Lukas 1:39-45.) f Maria hot kesaat: “[Yeehoowa] hot mechtiche tinge mit sayn aarm kemacht.” (Luk. 1:46-51) Yeehoowa hot Maria ferxtërkt torich Kapryël un Elisapët.

13. Was is mit Dasuri pasiirt wii se hilef fon te priiter ferlangt hot?

¹³ Soo wii Maria, khanst tuu aach ferxtërkt wëre fon tayn priiter un xwestere. Dasuri, een xwester in Poliiwya, must ferxtërkt sin. Sayn papa is aarich krank kep un es waar khee hofnung tas eyer peser wëre teet. Wën tee im krankehaus waar, wolt se tëm imer uf phase. (1 Tim. 5:4) Tas waar net laycht. Tii saat: “Fiil mool, hon ich kexpiirt tas ich net mee aus hale khent.” Am aanfang, hot se net hilef fon te anere ferlangt. “Ich wolt net ti priiter xteere — saat se. — Ich hon ketenkt: ‘Es is Yeehoowa woo mich helfe tuut.’ Awer too hon ich kemërkt tas wën ich mich wayt wech fon te anere kehal hon, waar ich am fersuuche mayn propleeme aleen resolwiire.” (Xpr. 18:1) Dasuri hot ëntxlist fer phaar fraaynte xraype un sayn situatsyoon aus leye. Tii saat: “Ich khan kaar net aus leye wii fiil mayn priiter mich ferxtërkt hon. Tii hon uns ese keprung un xeene Piipel tekste mit mich keteelt. Es is soo kuut wise tas mer net aleen sin. Meyer sin al teel fon Yeehoowa sayn kroos familye — een familye woo wilich is fer tich helfe, mit tich prile un uf tayn sayt khëmpfe.”

14. Warom mise mer ti hilef fon te elteste aan nëme?

¹⁴ Yeehoowa ferxtërkt uns aach torich ti elteste. Tii sin wii kexenke woo Kot penutst fer uns ferxtërke un uf muute. (Isa. 32:1, 2) Soo, wëns tuu tich ëngstlich xpiirst, xprech mit een elteste too triwer. Wën se tich hilef aan piite, nëm tas aan. Yeehoowa khan tëne penutse fer tich xtark mache.

15. Was fer hofnung hon ti kriste?

¹⁵ Meyer khene fiil kraft kriin fon unser piiplixe hofnung. (Rom. 4:3, 18-20) Wii kriste,  etliche fon uns hofe eewiche leepe im himel kriin; anere hofe in een xeen paratiis fer imer uf te eyert leepe. Ti hofnung ferxtërkt uns fer ti proope aus hale, ti kuute notisye preetiche un unerxiitliche flichte in te kemaynt erfiile. (1 The. 1:3) Tiise selwich hofnung hot te aphostel Phaul ferxtërkt.

16. Warom must te aphostel Phaul kraft kriin?

¹⁶ Phaul must kraft kriin. In sayn priif fer ti korinter, hot eyer sich mit een xwach leet waase ferklaycht. Tee waar ‘uner trikt, wust net was se mache, waar keyacht un runer kexmis’. Als mool waar soo kaar sayn leepe ins kefoer. (2 Kor. 4:8-10) Phaul hot tiise wërter kexrip torich sayn 3^te misyoneer rees. Un noo tas xraype, hot eyer noch mee xwiirichkheete mit kemacht. Torich te rest fon te rees, hot een krup layt tëm atakiirt, tee is im meer neekst uner kang un is in kexpërt kep.

17. Tëm noo 2 Korinter 4:16-18, was hot Phaul ferxtërkt fer ti proope aus hale?

¹⁷ Phaul hot sich aan sayn hofnung traan kehal un soo hot eyer kraft kriit fer aus hale. (Lees 2 Korinter 4:16-18.) g Tee hot fer ti korinter kesaat tas, opwool sayn fiisix khërper am ferkeen waar, teet eyer net oone muut too teweeche wëre. Phaul hot sich aan sayn futuer traan kehal; sayn hofnung fon eewiche leepe im himel waar “wunerlich kroos”. Tes weeche waar eyer wilich fer kwalkee proop aus hale fer ti peloonung kriin. Phaul hot too triwer ketenkt un soo, hot eyer kexpiirt tas eyer “yeete taach nay” kep is.

18. Wii tuut ti hofnung Tihomir un sayn familye ferxtërke? 

¹⁸ Tihomir, eene pruuter in Pulkaarya, is ferxtërkt kep torich sayn hofnung fer te futuer. Phaar yoore tsurik, is sayn yinger pruuter, Ivan, in een unfal kextorep. Tes  weeche is Tihomir aarich traurich kep. Fer aus hale, tuun eyer un sayn familye sich iwerleye wii wërt es sin wën ti toote uf xtaye. Tee leet aus: “Meyer fertseele, tsum payxpiil, iwer woo mer Ivan trefe tuun, was mer tëm khooche tuun, weem mer in laate tuun fer ti eyerst fest noo sayn ufxtaye un was mer tëm iwer ti letste taache saan tuun.” Tihomir saat tas sich traan hale aan tiise hofnung ferxtërkt sayn familye fer wayter aus hale un ti tsayt waarte wën Yeehoowa sayn pruuter uf ruuft.

19. Wii khanst tuu tayn hofnung xtërker lose? (Kuk aach tas pilt.)

¹⁹ Wii khanst tuu tayn hofnung xtërker lose? Wën tayn hofnung is uf te eyert fer imer leepe, lees iwer wii ti Piipel tas Paratiis pexraypt un tenk too triwer noo. (Isa. 25:8; 32:16-18) Xtel tich mool foer wii tas leepe in te nay welt wërt. Iwerlee tich tat. Weem siist tuu? Was heerst tuu? Wii xpiirst tuu tich? Fer tich helfe tas mache, kuk ti pilter fom Paratiis in unser puplikatsyoone orer ti musik foerxtelunge, soo wii Kot sayn naye welt, Ëntlich friit! orer Xtel tich mool ti xeene tsayt foer. Wën ti hofnung fon te nay welt fest in unser ketanke is, wëre unser propleeme ‘laycht un tuun khorts tsayt hale’. (2 Kor. 4:17) Ti hofnung woo Yeehoowa tich kept, tuut tich xtark mache.

20. Soo kaar wën mer uns xwach xpiire, wii khene mer kraft kriin?

²⁰ Soo kaar wën mer uns xwach xpiire, “torich Kot kriin mer kraft”. (Psal. 108:13) Yeehoowa hot xon fersoricht was tuu praychst fer kraft fon tëm kriin. Tes weeche, wëns tuu hilef praychst fer een flicht erfiile, fer een proop aus hale orer fer tayn frooheet hale, peet tsu Yeehoowa un suuch sayn oryentiirung torich tas perseenlich xtuutyum. Tuu ti hilef fon tayn priiter un xwestere aan nëme. Hool imer tsayt fer iwer tayn hofnung tenke. Soo ‘wërst tuu mit te kanse macht kextërkt, torich Kot sayn hërlich macht, tas tuu imer mit ketult un frooheet aus hale khanst’. (Kol. 1:11)