Tiise interesant tekst saat: “Wëns tuu siist, in tayn prowins, ti unertrikung fon te aarm un ti unfolichkheet fon te kerechtichkheet un fon was richtich is, tuu tich net ferxroke kepe. Wayl tee woo ti autoriteet hot, is fon yemant mit kreeser autoriteet peopacht, un iwer tëne kepts noch anere woo een noch heecher xtel hon.” (Ecl. 5:8)

Wën mer net triwer noo tenke aan was Yeehoowa iwer tas mënt, siits aus tas tiise wersikel xprecht ploos iwer mëner woo autoriteet in een rechiirung hon. Awer, hinich tiise wërter, kepts een woerheet iwer Yeehoowa woo uns treest un uf muut.

Eclesiastes 5:8 xprecht iwer eene rechiirente woo tuut ti aarme unertrike un tuut se unkerecht pehantele. Tiise rechiirente sol sich erinere tas eyer is, woerxaynlich, peopacht fon yemant woo een heecher xtel orer kreeser autoriteet wii sayns hot. Un, fiilaycht, es kept anere woo hon noch heecher xtele. Es is traurich tas, in mënxliche rechiirunge, fiilaycht al tiise rechiirente sin uneerlich un ti keweenliche layt tuun weeche sayn unkerechtichkheet layte.

Awer, soo kaar wën siits aus tas es khee ausweech kept, khene mer ketreest wëre wën mer uns erinere tas Yeehoowa ‘peopacht soo kaar tii woo autoriteet hon’ in mënxliche rechiirunge. Meyer khene tsu Kot aan hale un unser last iwer tëm xmayse. (Sal. 55:22; Fil. 4:6, 7) Meyer wise tas ‘Yeehoowa sayn aue keen iwer ti kans eyert, fer mit sayn kraft helfe tii woo tëm mit sayn kans hërts tiine’. (2 Crô. 16:9)

In khortse wërter, Eclesiastes 5:8 tuut uns erinere ti woer situatsyoon fon te mënxe in te rechiirunge: kepts imer yemant mit kreeser autoriteet. Noch wichticher, tiise wersikel tuut uns helfe triwer noo tenke tas Yeehoowa is ti heechste, yawool, ti Ale Heechste Autoriteet. Eyer tuut yets rechiire torich sayn Soon, Yeesus Kristus, te Kheenich fom Raych. Te Ale Mechtiche, woo ales peopacht, is kans kerecht un soo is aach sayn Soon.