1-2. Was is ti ferpiinung tswixich ti wërter fon Eclesiastes 11:6 un ti preetich aarwayt?

IN WELCHE lënter, wën ti layt ti kuute oter heere, tii wole mee iwer tas wise — tas is kraat was se am waarte waare. In anere lënter, ti layt tuun weenicher interes tsayche in Kot orer in te Piipel. Un woos tuu woonst? Wii tuun ti layt sich aan xtele? Es is ekaal wii tuun se sich aan xtele, Yeehoowa wil hon tas meyer wayter preetiche pis wan eyer saat tas ti aarwayt fërtich is.

² Yeehoowa hot xon pextimt wanee tuut ti preetich aarwayt fërtich sin un wanee ‘tas ën khomt’. (Mat. 24:14, 36) Eep tas pasiirt, wii khene mer ti wërter “los net tayn hënt ruue” aan wëne? * (Lees Eclesiastes 11:6.) *

3. Iwer was tuun mer in tiise artikel xpreche?

³ Te letste artikel hot kexprooch iwer fier tinge woo mer prayche mache fer kuute fixer fon mënxe wëre. (Mat. 4:19) Tiise artikel tuut xpreche iwer tray aate wii mer khene unser pextimung fer se preetiche ferxtërke, een tuun ti xwiirichkheete woo mer mit mache. Meyer tuun lërne warom is es wichtich (1) uns in te preetich aarwayt traan hale, (2) ketultich sin un (3) een xtarke klaape hale.

4. Warom prauche mer uns traan hale aan te aarwayt woo Yeehoowa uns kep hot?

⁴ Yeesus hot fer sayn tisipele kesaat wii teete ti layt sin un was teet in te letste taache pasiire. Tee wust tas tiise tinge khente ti tisipele sayn acht ap lënke fon te preetich aarwayt. Weeche tas, hot eyer sayn tisipele aan kesaat: “Playpt wachsam.” (Mat. 24:42) In Noee sayn taache, weeche fiile tinge, ti  layt waare net wilich fer acht kepe fer was Noee tëne kesaat hat. (Mat. 24:37-39; 2 Ped. 2:5) Ti selwiche tinge khente unser acht hayt ap lënke. Tes weeche, meyer wole uns traan hale aan te aarwayt woo Yeehoowa uns kep hot.

5. Tëm noo Atos 1:6-8, pis woo hin teet ti preetich aarwayt keen?

⁵ Hayt, meyer wërklich prauche uns traan hale aan te kuute oter fom Raych preetiche. Yeesus hot foer raus kesaat tas tiise aarwayt teet, noo sayn toot, wayter keen un teet noch mee layt aan trefe. (João 14:12) Noo Yeesus sayn toot, welche fon sayn tisipele sin tsurik fer sayn aarwayt fon fixer kang. Tëm noo Yeesus sayn ufxtaye, hot eyer fer sayn tisipele een wunerlich fixeray kep. Tee hot tiise keleechenheet penutst fer fest xtele tas sayn flicht wii fixer fon mënxe waar wichticher wii yeete aner aarwayt. (João 21:15-17) Pisye foer Yeesus tsum himel kang is, hot eyer fer sayn tisipele kesaat tas tiise preetich aarwayt, woo eyer aan kefang hat, teet sich ferprayte un noch fiil wayter noo Israël sayn rënte keen. (Lees Atos 1:6-8.) * Phaar yoere tëm noo, hot Yeesus een wisyoon fer te aphostel Yoohan kep fer tëm tsayche was teet im “taach fom Hër” pasiire. * Eene fon tiise tinge woo Yoohan kesiin hot waar wunerlich kewees: unich ti engele sayn lënkung, ti “eewiche kuute notisye” waare am kepreeticht sin fer “yeete natsyoon, xtam, xprooch un folek”. (Apo. 1:10; 14:6) Es is taytlich was Yeehoowa sayn wile fer uns hayt is: tas mer een teel hon in tiise kroos preetich aarwayt pis wan es fërtich is.

6. Wii khene mer uns traan hale in te preetich aarwayt?

 ⁶ Meyer khene uns aan te preetich aarwayt traan hale wën meyer traan tenke aan ales was Yeehoowa is am mache fer uns helfe. Tsum payxpiil, eyer kept uns fiil kaystlich esmitel, puplikatsyoone in papiir orer eletroonix, autios un wiiteos, un prokrame woo meyer khene torich ti internet kuke. Tenk mool: in unser ofitsyaal site, hon mer informatsyoone in mee wii tausent xprooche! (Mat. 24:45-47) In een welt woo keteelt is weeche ti politik, ti relichyoone un ti ekonomii, mee wii 8 milyoone fon Yeehoowa sayn tiiner uf te kans welt sin een familye woo wërklich eenich is. Tsum payxpiil, am fraytaachs, 19^te April fon 2019, hon Yeehoowa sayn Tsayer fon te kans welt sich fersamelt fer een wiiteo iwer een Piipel tekst fer te taach kuke. Am nachts fon tiise taach, hon 20.919.041 layt sich fersamelt fer tas Aantenke fon Yeesus sayn toot fayre. Was fer een priwilëj is tiise wunerliche ewënte siin un een teel aan tëne mache! Wën mer aan tas traan tenke, xpiire mer uns muutich fer uns traan hale in te preetich aarwayt.

7. Wii tuut Yeesus sayn payxpiil uns helfe wayter uns traan hale in te preetich aarwayt?

⁷ Een aner aat wii mer khene uns traan hale in te preetich aarwayt, is Yeesus sayn payxpiil noo keen. Tee hot niks kelos sayn acht ap lënke fon tsaye iwer ti woerheet kepe. (João 18:37) Wën Satanaas ‘ale rechiirunge fon te welt un tëne sayn hërlichkheet’ fer Yeesus aan kepoot hot, is Yeesus net in tiise fersuuchung rin kefal. Un Yeesus hot aach net aan kenom wën ti anere wolte tëm wii kheenich in setse. (Mat. 4:8, 9; João 6:15) Tee is net influëntsiirt kep fon tëm wunx fon materyaalixe tinge hon. Tee hot aach net erlaupt tas ti xroo yachtung tëm xtiil hale teet. (Luc. 9:58; João 8:59) Wën unser klaape keproopt is, te aphostel Phaul sayn aanreet khan uns helfe wayter uns traan hale in te preetich aarwayt. Tee hot ti kriste uf kemuut fer Yeesus sayn payxpiil noo keen, tas tii ‘teete net miit wëre un uf kepe’. (Heb. 12:3)

8. Was is ketult un warom is es soo wichtich hayt?

⁸ Ketult is ti apiliteet fer ruych waarte pis tas een situatsyoon sich ënert. Meyer prayche ketultich sin in unerxiitliche situatsyoone — tsum payxpiil, wën mer wole tas een xlim situatsyoon tsum ën khomt orer ti erfiilung siin fon een wunx woo meyer xon een lang tsayt hon. Te profeet Apakuk wolt tas ën fom wiolëns in Yuuta siin. (Hab. 1:2) Yeesus sayn tisipele hon kewaart tas tas Raych teet ‘pletsich tsum foer xayn khome’ un tëne rete fon te romaanix unertrikung. (Luc. 19:11) Un meyer tuun wërklich waarte ti tsayt woo Kot sayn Raych tuut ti xlechtichkheet wech xafe un een nay welt fon kerechtichkheet pringe. (2 Ped. 3:13) Awer, meyer mise ketultich sin un Yeehoowa sayn pextimt tsayt waarte. Kuk etliche aate wii Yeehoowa uns in lërnt ketultich sin.

9. Was fer payxpiile tsayche tas Yeehoowa ketultich is?

⁹ Yeehoowa is tas perfëkt payxpiil fon ketult. Eyer hot fer Noee kenuuch tsayt kep fer ti arich paue un fer een ‘preeticher fon kerechtichkheet’ sin. (2 Ped. 2:5; 1 Ped. 3:20) Yeehoowa hot Apraham keheert wii eyer noo un noo kefroot hot iwer ti ëntxlus woo Yeehoowa kemacht hat fer ti pewooner fon te xlechte xtëte fon Sotooma un Komoora fernichte. (Gên. 18:20-33) Fer hunerte yoere, Yeehoowa waar mechtich ketultich mit te untroy natsyoon fon Israël. (Nee. 9:30, 31) Hayt, meyer siin tas Yeehoowa wayter ketultich is. Eyer kept kenuuch tsayt fer tii woo eyer tsiit, ‘sich peroye’. (2 Ped. 3:9; João 6:44; 1 Tim. 2:3, 4) Wën mer tenke aan Yeehoowa sayn payxpiil, hon mer kuute uersache fer ketultich sin soo lang wii mer wayter preetiche  un in lërne. Tee tuut aach uns in lërne wii ketultich sin torich een ferklaychung woo in sayn Wort xteet.

10. Was tuut tas payxpiil fon tëm pauer in Tiago 5:7, 8 uns lërne?

¹⁰ Lees Tiago 5:7, 8. * Tas payxpiil fon tëm pauer, woo phast een plantaaj uf, tuut uns lërne wii ketultich sin. Es is wërklich woer tas welche plantse tuun xnel wakse, awer ti meyerste plantse — hauptseechlich tii woo friichte kepe — tuun fiil taure pis se fërtich fer ti ërntung sin. In Israël tas hot neekst 6 moonate ketauert. Te pauer hot sayn soome keplantst noo ti eyerste reene in mite Oktooper, un hot te plantaaj keënt noo ti letste reene in mite April. (Mar. 4:28) Meyer wëre kluuch wën mer te pauer sayn ketult noo mache. Awer tas is net imer laycht.

11. Wii tuut ti ketult uns in te preetich aarwayt helfe?

¹¹ Oft mools, imperfëkte mënxe wole klaych resultaate fon sayn aanxtrengung hon. Awer, wën mer wole tas unser kaate friichte kept, meyer mise tëm mit acht uf phase — too tepay tsakere, plantse, mit hake putse un kiise. Wën mer wole tisipele mache, mer mise aach xtram xafe. Es nëmt tsayt fer ti unkraut — ti xlechte kwaliteete — fon unser xtutënte aus rope, un tëne lërne liiplich sin un khee unerxiit tswixich ti layt mache. Unser ketult tuut uns helfe net oone muut plaype wën ti layt uns net heere wole. Awer, aach wën ti layt wilich sin fer uns horiche un lërne, meyer mise ketultich sin. Meyer khene net een Piipel xtutënt tswinge sayn klaape ëntwikele. Soo kaar Yeesus sayn tisipele waare eftas lamsam fer se ferxteen was eyer tëne in kelërnt hot. (João 14:9) Meyer thërfe uns erinere tas mer khene plantse un kiise, awer Kot macht es wakse. (1 Cor. 3:6)

12. Wii khene mer ketult tsayche fer unser parente woo net Yeehoowa sayn Tsayer sin?

 ¹² Es khan xweyer fer uns ketultich sin wën mer preetiche fer parente woo net Yeehoowa sayn Tsayer sin. Tas printsiipye woo in Eclesiastes 3:7 xteet khan uns helfe. Es saat: “Kepts een tsayt fer ruych plaype un een tsayt fer se xpreche.” Unser kuute aanxtelung khan fer uns xpreche, awer in te selwich tsayt, mise mer imer fërtich sin fer iwer ti woerheet mit tëne xpreche. (1 Ped. 3:1, 2) Meyer mise flaysich preetiche un in lërne, awer mer sole mit al ketultich sin — tepay unser parente.

13-14. Was fer payxpiile fon ketult khene mer noo mache?

¹³ Meyer khene lërne wii ketultich sin mit te payxpiile fon te troye tiiner woo in te Piipel xteen un fon te troye tiiner hayt. Apakuk wolt tas ën fon te xlechtichkheet siin, awer tee hot ketult ketsaycht wii eyer kesaat hot: “Ich tuun xteen uf mayn wachter plats plaype.” (Hab. 2:1) Te aphostel Phaul hot kesaat tas eyer wolt sayn preetich aarwayt “fërtich pringe”. Soo wii soo, tee hot wayter mit ketult een ‘komplët tsaye fon te kuute notisye kep.’ (Atos 20:24)

¹⁴ Kuk mool tas payxpiil fon een ferhayrat pheyerche woo hot ti Xileat Xuul kemacht. Tii waare fer een lant kexikt woo weenich Yeehoowa sayn Tsayer hot, un woo ti meyerste layt net kriste sin. Kans weenich layt wolte fon te Piipel lërne. Uf aner sayt, sayn koleke fon te Xileat Xuul, woo waare uf anere lënter am tiine, hon fertseelt iwer al ti layt woo waare am ti Piipel mit tëne xtutiire, un woo se am helfe waare Yeehoowa sayn Tsayer wëre. Awer tas pheyerche hot wayter ketultich kepreeticht, toch wën ti meyerste layt in sayn teritoryum teete net heere. Ëntlich mool — noo acht yoer — hon se ti frayt kriit fon eene fon sayn Piipel xtutënte siin ketaaft wëre. Was tuun tiise payxpiile fon friier un fon hayt uns lërne? Tiise troye tiiner sin net lamsam kep un hon net sayn hënt ruue kelos, un Yeehoowa hot tëne sayn ketult peloont. Wole mer noo mache “tii woo, torich te klaape un ti ketult, ti ferxpreche ërpe.” (Heb. 6:10-12)

15. Was is een aat wii te klaape unser pextimung fer se preetiche ferxtërkt?

¹⁵ Te klaape ferxtërkt unser pextimung fer net unser hënt ruue lose. Kuk mool een fon tswaay aate. Eyerst, meyer klaape aan tëm pexeet woo mer preetiche, tan mer wole iwer tas fertseele mit wii fiil layt es meechlich is. Meyer traue aan te ferxpreche woo in Kot sayn Wort xteen. (Sal. 119:42; Isa. 40:8) Meyer siin ti piiplixe profetsiie am sich hayt erfiile. Mer hon xon kemërkt wii tas leepe fon te layt wërt peser wën se piiplixe aanreete aan wëne. Tas ales lost uns noch sicher tas ti kuute oter fom Raych sin een pexeet woo ale mise heere.

16. Tëm noo Salmo 46:1-3, wii tuut unser klaape aan Yeehoowa unser pextimung fer se preetich ferxtërke, un wii tuut te klaape aan Yeesus uns aach helfe?

¹⁶ Kuk mool yets ti tsweet aat. Meyer klaape aan Yeehoowa, ti kwel fon tëm pexeet woo mer preetiche, un aan tëm woo eyer wii Kheenich fom Raych in kesets hot: Yeesus. (João 14:1) Ekaal unser situatsyoon, Yeehoowa tuut imer unser sicher plats un kraft sin. (Lees Salmo 46:1-3.) * Un noch, meyer sin uns sicher tas Yeesus is ti preetich aarwayt fom himel am fiire, mit te macht un autoriteet woo Yeehoowa tëm kep hot. (Mat. 28:18-20)

17. Kep een payxpiil woo tsaycht warom prauche mer wayter preetiche.

 ¹⁷ Te klaape lost uns noch sicher tas Yeehoowa tuut unser aanxtrengung seechne, fiilaycht in een aat woo mer net waarte tuun. (Ecl. 11:6) Tsum payxpiil, yeete taach tausente layt tuun foer unser puplikatsyoone displays un khareche laafe. Is tas wërklich een kuut aat fer se preetiche? Kans sicher! Te Nosso Ministério do Reino fon Nofemper 2014 hot fertseelt iwer een yung meete woo in te uniwersiteet waar un wolt een xuul aarwayt iwer Yeehoowa sayn Tsayer mache. Tii khont net een Raych Saal fine, awer tii hot unser puplikatsyoone displays in te uniwersiteet kefun, un aach informatsyoone fer sayn xuul aarwayt mache. Am ën, tii hot sich wii Yeehoowa sayn Tsayer ketaaft un is yets een rekulaar pyoneerin. Soo sorte speryense tuun uns uf muute wayter preetiche, wayl tii tsayche tas es kept noch layt woo prauche tas pexeet fom Raych heere.

18. Weeche was khene mer uns sicher sin tas ti preetich aarwayt wërt in te richtich tsayt fërtich?

¹⁸ Meyer khene uns sicher sin tas ti preetich aarwayt wërt in te richtich tsayt fërtich. Tenk traan aan was is in Noee sayn taache pasiirt. Yeehoowa hot pewayst tas eyer te perfëkt Tsaytmayster is — eyer hot te kans kontrol iwer ti tsayt. Unkefeer 120 yoer foer tas Sintfluut, Yeehoowa hat xon pextimt wanee tas pasiire teet. (Gên. 6:3) Phaar yoere tëm noo, Yeehoowa hot Noee kexikt tas arich paue. Torich unkefeer 40 orer 50 yoer foer tas Sintfluut, Noee hot wayter xtram kexaft. Opwool ti layt tëm net kehoricht hon, eyer hot wayter kepreeticht tas pexeet fer ti layt aan saan, pis wan Yeehoowa kesaat hot tas es ti tsayt waar fer ti tiere aan te arich rin tuun. Tan, uf ti richtich tsayt, “Yeehoowa hot ti teer tsu kemacht”. (Gên. 6:3; 7:1, 2, 16)

19. Was khene mer waarte wën mer net unser hënt ruue lose?

¹⁹ Klaych, tuut Yeehoowa ti preetich aarwayt tsum ën pringe. Tan, eyer tuut Satanaas sayn sisteem fernichte un een nay kerecht welt pringe. Pis tan, wole mer noo mache ti payxpiile fon Noee, Apakuk, un noch anere woo hon net sayn hënt ruue kelos. Wole mer wayter uns aan tëm preetich traan hale, ketultich sin, un eene xtarke klaape aan Yeehoowa un uf sayn ferxpreche hale.