1-2. Tëm noo 1 Timóteo 6:20, was hot Timoteus kriit?

MEYER tuun eftas lose tas anere uf phase unsere tinge woo weyert fer uns hon. Tsum payxpiil, fiilaycht tuust tuu tayn kelt in een pank tuun. Wën mer es mache, meyer waarte tas unser kelt in sicherheet playpt un tas es net ferloer orer kextool wërt. Soo, meyer ferxteen was petayt etwas, woo weyert fer uns hot, fer yemant anere fertraue.

² Lees 1 Timóteo 6:20. * Te aphostel Phaul hot Timoteus erinert tas eyer hat etwas kriit woo fiil weyert hat — ti kenau khëntnis fon Kot sayn propoos fer ti mënxheet. Yeehoowa hot aach Timoteus fertraut te priwilëj fer ‘tas wort preetiche’ un ‘ti tiinst fon een preeticher mache’. (2 Tim. 4:2, 5) Phaul hot Timoteus uf kemuut fer uf phase was tëm fertraut waar. Yeehoowa hot uns fertraut tinge woo fiil weyert hon, soo wii eyer fer Timoteus kemacht hat. Was sin tiise tinge? Un weeche was sole mer te xats woo Yeehoowa uns kexenkt hot xitse?

3-4. Weeche was fer uersache hon ti piiplixe woerheete soo fiil weyert?

³ Mit kuutheet, Yeehoowa xenkt uns ti kenau khëntnis iwer ti woerheete woo in sayn Wort, ti Piipel, xteen. Tiise woerheete hon soo fiil weyert, wayl tii tuun uns in lërne wii  een kuut froyntxaft mit Yeehoowa hon un tuun aus leye was pringt woere frooheet im leepe. Wën mer tiise woerheete aan nëme un aan wëne, sin mer fon te falxe inlërnunge un imoraalixe praktixe pefrayt. (1 Cor. 6:9-11)

⁴ Ti piiplixe woerheete hon fiil weyert weeche een aner uersach: Yeehoowa tuut se taytlich tsayche ploos fer teemuutiche layt woo ‘ti richtich muut hon’. (Atos 13:48) Tii tuun aan nëme tas Yeehoowa penutst ‘te troy un ferninftiche sklaaw’ fer tiise woerheete hayt in lërne. (Mat. 11:25; 24:45) Weyer es net meechlich tiise piiplixe woerheete aleen ferxteen un niks khomt am weenichs ticht fon te selwich weyert hon. (Pro. 3:13, 15)

5. Was noch hot Yeehoowa uns fertraut?

⁵ Yeehoowa hot uns aach fertraut ti eere fer anere in lërne ti woerheet iwer tëm un sayn propoos. (Mat. 24:14) Ti pexeet woo mer preetiche hot fiil weyert — tas heleft ti layt teel fon Yeehoowa sayn familye wëre un kept tëne ti keleechenheet fer tas eewiche leepe kriin. (1 Tim. 4:16) Ekaal op mer khene fiil orer weenich in te preetich xafe, meyer sin am mit helfe in te wichtichste aarwayt woos hayt kept. (1 Tim. 2:3, 4) Was fer een eere is Yeehoowa sayn mitaarwayter sin! (1 Cor. 3:9)

6. Was is pasiirt mit welche woo hon net mee weyert kep fer te priwilëj fer Kot sayn mitaarwayter sin?

⁶ In Timoteus sayn taache, etliche kriste hon net mee weyert kep fer te priwilëj fon Kot sayn mitaarwayter sin. Wayl Temas ti welt keliipt hot, hot eyer uf kep fon te eere fer mit Phaul tiine. (2 Tim. 4:10) Siit es aus tas Fijëlo un Hermoxenes hon sayn tiinst im xtich kelos, wayl tii hate pang tas tii teete ti selwich yachtung wii Phaul mit mache. (2 Tim. 1:15) Himeneu, Aleksanter un Fileto sin aphostate kep un hon ti woerheet hiner kelos. (1 Tim. 1:19, 20; 2 Tim. 2:16-18) Torich een tsayt, hon al tiise mëner Yeehoowa keliipt, awer tii hon net mee kemërekt was wërklich weyert hat.

7. In was fer aate fersuucht Satanaas tas mer mache was eyer wil?

⁷ Wii fersuucht Satanaas tas mer uf kepe fon te xats woo Yeehoowa uns fertraut hot? Kuk etliche aate wii eyer tas macht. Eyerst, eyer penutst ti ferkniichung un ti mídia fer se mache tas mer tenke un uns aan xtele in een aat tas mer lamsam fon te woerheet uf kepe. Tsweet, torich ti unertrikung fon koleke orer yachtung, Satanaas fersuucht uns mit pang lose tas mer noo lose preetiche. Triit, tee fersuucht uns uf hëtse ti inlërnunge fon te aphostate heere un tas mer soo ti woerheet im xtich lose. (1 Tim. 6:20, 21)

8. Was lërnst tuu fon te speryens fon een pruuter woo Daniel heest?

 ⁸ Wën mer net uf phase, khente mer lamsam fon te woerheet uf kepe. Kuk ti speryens fon Daniel, * woo hot video games keliipt. Tee leet aus: “Ich hon aan kefang video games xpiile wën ich waar unkefeer 10 yoer alt. Am aanfang, was ich kexpiilt hon, hot khee xaate kemacht. Awer ich hon lamsam aan kefang video games xpiile woo waare wiolënt un hate mit temonismus se tuun.” Am ën, waar Daniel unkefeer 15 xtune te taach am video games xpiile. Tee saat: “Kans tiif, ich wust tas ti sorte video games woo ich am xpiile waar un wii fiil tsayt ich mit tas fertraypt hon, waar am mich fon Yeehoowa ap lënke. Awer ich waar am mich selepst rom xpreche fer se klaape tas ti piiplixe printsiipye hon net fer mich kekilt.” Ti ferkniichunge khente lamsam mache tas mer fon te woerheet uf kepe. Wën es pasiirt, khene mer ferliire ti tinge — woo soo fiil weyert hon — woo Yeehoowa uns kep hot.

9. Tëm noo 1 Timóteo 1:18, 19, mit weem hot Phaul Timoteus ferklaycht?

⁹ Lees 1 Timóteo 1:18, 19. * Phaul hot Timoteus mit een soltaat ferklaycht un hot tee uf kemuut “wayter te kuute kriich khëmpfe”. Phaul waar net am xpreche iwer eene kriich keeche mënxliche soltaate, awer eene kaystliche kriich. In was aate sin ti kriste wii soltaate woo in een kriich khëmpfe? Was fer kwaliteete prayche mer ëntwikele wii Kristus sayn soltaate? Wole mer noo kuke finef lisyoone woo mer khene mit Phaul sayn ferklaychung lërne. Tiise lisyoone tuun uns helfe fest aan te woerheet krayfe.

10. Warom prauche mer een xtark liip tsu Kot hon?

¹⁰ Tuu een xtark liip tsu Kot hon. Eene kuute soltaat is leaal. Tee tuut mit ale kewalt khëmpfe fer se xitse yemant woo eyer liipt orer etwas woo eyer weyert xetst. Phaul hot Timoteus uf kemuut Kot tiine mit tiife respëkt un leaale liip. (1 Tim. 4:7) Woo kreeser unser liip tsu Kot, woo kreeser unser wunx fer fest aan te woerheet krayfe. (1 Tim. 4:8-10; 6:6)

11. Warom prauche mer uns miie fer tas richtiches mache?

¹¹ Tuu tich miie fer tas richtiches mache. Eene soltaat mus sich miie fer imer fërtich fer te kriich sin. Timoteus khont kaystlich fërtich plaype wayl eyer hot Phaul sayn aanreet aan kenom un xtram kexaft fer fon te ferkheerte winxe aus rayse, kuute kwaliteete ëntwikele, un sich mit te priiter samele. (2 Tim. 2:22) Tas hot aanxtrengung ferlangt. Meyer prauche uns aach aan xtrenge fer te kriich keeche ti ferkheerte winxe kewine. (Rom. 7:21-25) Un noch, meyer prauche xtram xafe fer ti alt persoonlichkheet aus tsiie un ti nay persoonlichkheet aan tsiie. (Efé. 4:22, 24) Un wën mer miit siin, am ën fon een lang taach, fiilaycht prauche mer uns tswinge fer in te fersamlunge keen. (Heb. 10:24, 25)

12. In was fer aate khene mer unser apiliteet fer ti Piipel penutse ferpesere?

¹² Eene soltaat praucht iipe wii sayn wafe penutse. Fer kexik sin, tee praucht imer iipe. Kraat soo, meyer prauche kexik wëre in Kot sayn Wort penutse. (2 Tim. 2:15) Welche fon te apiliteete woo mache uns kexik sin, lërne mer in te fersamlunge. Awer wën mer wole anere in reete tas ti piiplix woerheet fiil weyert hot, prauche mer wii kewoonheet hon  ti Piipel reeklich xtutiire. Meyer prauche Kot sayn Wort penutse fer unser klaape ferxtërke. Too tepay is mee wii ploos ti Piipel leese. Meyer prauche triwer noo tenke aan was mer leese un unersuuchunge in unser puplikatsyoone mache, tas mer khene tan ti Piipel richtich ferxteen un aus leye. (1 Tim. 4:13-15) Soo tuun mer fërtich sin fer Kot sayn Wort penutse fer anere in lërne. Tas petayt mee wii ploos phaar wersikele fon te Piipel leese — meyer wole tas tii woo uns heere, te tekst ferxteen un mërke wii tas in sayn leepe phast. Wën mer ti Piipel reeklich xtutiire, khene mer peser Piipel leerer wëre. (2 Tim. 3:16, 17)

13. Tëm noo Hebreus 5:14, warom prauche mer foersichtich sin?

¹³ Say foersichtich. Eene soltaat mus wise wii een kefeerlich situatsyoon xon foer siin un sich fon tëne wech hale. Meyer mise aach lërne wii ti kefeerliche situatsyoone xon foer siin un uns fon tëne wech hale. (Pro. 22:3; lees Hebreus 5:14. *) Tsum payxpiil, mer prauche unser ferkniichung mit kluucheet raus suuche. Telewisyoon prokrame un fiilme tuun eftas imoraalix aanxtelung tsayche. Tiise aanxtelung tuut Kot pelaytiche un — xpeeter orer friier — tuut uns xaate mache. (Efé. 5:5, 6)

14. Wii hot foersichtich sin Daniel keholef?

¹⁴ Daniel, iwer weem mer kraat kexprooch hon, hot aan kefang se mërke tas video games xpiile, woo wiolënt un woo mit temonismus se tuun hate, waar een propleem. Tee hot artikele in te Watchtower Library unerkesuucht woo teete tëm helfe mit tiise propleem um keen. Was fer waar te resultaat? Tee hot noo kelos xlechte video games xpiile. Tee hot sayn kontrakte in online video games ap kesaat, un hot sayn keselxaft mit te anere xpiiler ap kexnit. Daniel saat: “Xtats video games xpiile, hon ich aan kefang tinge traus mache un tsayt mit te froynte fon te kemaynt fertraype.” Daniel tuut yets wii pyoneer un elteste tiine.

15. Warom falxe kexichte sin soo kefeerlich?

¹⁵ Soo wii Timoteus, meyer mise aach mërke wii kefeerlich sin ti falxe informatsyoone woo ti aphostate aus teele. (1 Tim. 4:1, 7; 2 Tim. 2:16) Tsum payxpiil, fiilaycht tii fersuuche falxe kexichte iwer unser priiter aus teele,  orer tswayfele in unser khop plantse iwer Yeehoowa sayn orkanisatsyoon. Soo hinerlistiche informatsyoone khente unser klaape ferxweeche. Meyer thërfe uf phase fer net fon tiise propakante petroo wëre. Weeche was? Wayl weer tiise sort kexichte aus teelt, sin “mëner mit fersautne ferxtant un woo net ti woerheet hon”. Sayn tsiil is “lënkst naner keen un tsënke”. (1 Tim. 6:4, 5) Tii wole tas mer aan sayn liieray klaape un tas mer net mee uf unser priiter traue.

16. Fon was fer tinge, woo khene unser acht ap lënke, mise mer uns wech hale?

¹⁶ Playp wech fon tinge woo khene tayn acht ap lënke. Wii eene “kuute soltaat fon Yeesus Kristus”, Timoteus praucht sich aan te preetich aarwayt traan hale xtats materyaalixe tinge suuche orer sayn acht fer anere tsiile kepe. (2 Tim. 2:3, 4) Soo wii Timoteus, meyer thërfe nii net lose tas te wunx fer materyaalixe tinge hon uns ap lënkt. “Te hinerlistich kraft fon te raychtum” khan ferxtrike unser liip tsu Yeehoowa, unser petanklichkheet fer Kot sayn Wort, un unser wunx fer iwer tëne mit anere xpreche. (Mat. 13:22) Meyer mise unser leepe keweenlich hale un unser tsayt un kraft penutse fer ‘tas Raych im eyerste plats wayter suuche’. (Mat. 6:22-25, 33)

17-18. Was khene mer mache fer unser froyntxaft mit Yeehoowa xitse?

¹⁷ Say fërtich fer xnel etwas mache. Eene soltaat praucht foer pleene was tuut eyer mache fer sich xitse. Wën mer wole ti tinge woo Yeehoowa uns fertraut hot xitse, mer thërfe xnel aan krayfe wën mer etwas kefeerlich siin. Was khan uns helfe tas mache? Mer thërfe xon foer pleene wii tuun mer uns aan xtele foer etwas woo uns xaate mache khan.

¹⁸ Fer es ferklayche: wën ti layt in een ewënt keen, tii wëre ofts ferlangt fer ti tichste ausweech fine foer tas tas prokram aan fangt. Weeche was? Soo khene se fiks ap haue wën, pletsich, kefeerliche situatsyoone foer khome. In te selwich aat, meyer khene xon foer pleene was fer “ausweech” tuun mer hoole wën mer etwas kefeerliches pletsich trefe — etwas imoraalix, mit xroo wiolëns orer aphostasii — wii mer te TV orer fiilme kuke, orer wën mer ti internet penutse. Wën mer uns perayte fer was pasiire khent, khene mer etwas xnel mache fer unser froyntxaft mit Yeehoowa xitse un wayter rayn foer sayn aue plaype. (Sal. 101:3; 1 Tim. 4:12)

19. Was fer seechen tuun mer kriin wën mer uf phase ti tinge woo Yeehoowa uns fertraut hot?

¹⁹ Meyer mise uf phase ti tinge woo Yeehoowa uns kep hot, woo fiil weyert hon — ti piiplixe woerheete un te priwilëj fer iwer tëne tsu te anere in lërne. Wën mer soo mache, tuun mer een sauwer kewise hon, een leepe woo woere petaytung hot, un ti frooheet fon anere helfe Yeehoowa khëne lërne. Mit tëm sayn hilef, kriin mer es uf phase ales woo Yeehoowa uns fertraut hot. (1 Tim. 6:12, 19)