1. Was fer kuut tsiil khene mer xtele wën mer elter wëre?

WËN mer elter wëre, fiilaycht tenke mer: ‘Yets, sin ich net mee soo nutslich fer Yeehoowa wii ich friier waar.’ Es is woer tas, im xtant, hon mer hayt weenicher kraft wii friier. Awer, meyer khene ti apiliteete un kluucheet woo mer mit te yoore kriit hon, penutse fer ti yunge helfe nutslicher fer Yeehoowa sayn Orkanisatsyoon wëre un mee flichte aan nëme. Een pruuter woo xon fiile yoore elteste is, hot kesaat: “Wii ich net mee soo fiil fer Yeehoowa mache khont weeche mayn elter, waar ich petanklich tas kwape yunge priiter fërtich waare fer tiise aarwayt mache.”

2. Iwer was tuun mer in tiise artikel xpreche?

² Im letste artikel, hon mer kexproch iwer wii khene ti yunge nutse kriin wën se froyntxaft mit elter layt hon. In tiise artikel, tuun mer siin wii ti elter woo teemuutich sin, woo sayn krense erkhëne un woo petanklich un krooshërtslich sin, khene peser mit te yunge um keen un, soo, ti kans kemaynt helfe.

3. Tëm noo Filiper 2:3, 4, was is teemuut, un wii khan tas een krist helfe?

³ Wën ti elter layt wole ti yunge helfe, mise se teemuutich sin. Een teemuutich persoon siit ti anere kreeser wii sich. (Lees Filiper 2:3, 4.) * Wën ti elter teemuutich sin, tuun se was wichtiches ferxteen: ofts, kepts mee wii een aat fer een aarwayt fërtich pringe tëm noo was ti Piipel saat. Tes weeche, tenke se net: ‘Friier hon mer tas soo kemacht, un tas mus wayter soo kemacht wëre.’ (Ekl. 7:10) Kewis, khene se mit te yunge teele was se friier kelërnt hon, un tas tuut ti yunge helfe. Awer tii ferxteen  tas “ti welt wii mer hayt khëne, is sich am ënere” un im xtant mise se lërne ti tinge in naye aate mache. (1 Kor. 7:31)

4. Was is eenlich tswixich ti aanxtelung fon te lewiiter un fon te sirkuyt superintentente?

⁴ Elter layt woo teemuutich sin, erkhëne tas se khene net mee soo fiil mache wii se friier kemacht hon. Kuk mool, tsum payxpiil, ti sirkuyt superintentente. Wën se 70 yoore alt wëre, wëre se in kelaat fer in een aner insetsung xafe. Tas khan xweyer sin. Tii hon sayn insetsung keliipt un tii waare froo tas tii khonte sayn priiter tiine; kewis, teete se kërn wayter in tiise aarwayt plaype. Awer tii ferxteen tas yunge priiter sin neetich fer tiise flicht uf phase. Opwool se net mee ti kemaynte pesuuche, tuun se helfe un uf muute ti kemaynt woo se hin kexikt kep sin. Soo, sayn aanxtelung is eenlich wii ti lewiiter sayns in tëm friirixe Israël. Wën se 50 yoore alt kep sin, miste se noo lose im tapernakel tiine. Tiise elter lewiiter waare froo, ekaal ti flicht woo se hate. Tii hon flaysich kexaft aan te aarwayt woo se kriit hon un hon aach sayn pestes kemacht fer ti yunge helfe. (Nuu. 8:25, 26)

5. Was lërnst tuu mit Dan un Katie?

⁵ Kuk mool tas payxpiil fon Dan, woo hot 23 yoore wii sirkuyt superintentent ketiint. Wii Dan 70 yoore alt kep is, sin tee un sayn fraa Katie wii spetsyaale pyoneere in kesetst kep. Wii keets tëne in sayn nay insetsung? Dan saat tas noch nii hot eyer soo fiil se tuun kehat. Tee phast sayn flichte in te kemaynt uf, helft ti  priiter tas se khene ministeryaale tiiner sin, un iipt anere fer in te xtat un in te katee preetiche. Elter priiter, ekaal ep teyer in te fol tsayt tiinst sayt orer net, teyer khent fiil mache fer ti priiter helfe. Wii? Tuut aych traan keweene mit ayre nay situatsyoon, xtelt naye tsiile, un halt aych traan aan was teyer mache khent, net aan was teyer net mache khent.

6. Warom is es kuut unser krense erkhëne? Mach een ferklaychung.

⁶ Yemant woo sayn krense erkhënt, tuut net fon sich selepst mee waarte wii eyer mache khan; tes weeche, playpt eyer froo un flaysich. (Xpr. 11:2) Meyer khene soo een sort persoon ferklayche mit yemant woo een khare përich ruf tsus faart. Te xofeer mus een nitricher kang nëme fer wayter përich ruf faare. Tsiimlich sicher, tuut eyer lamsamer keen, awer tee faart wayter foran. In te selwich aat, een persoon woo sayn krense erkhënt, wees ti tsayt fer een “nitricher kang nëme”; tii ferxteet tas, soo, khan se wayter Yeehoowa tiine un ti anere helfe. (Fili. 4:5)

7. Was tsaycht tas Parsilay sayn krense erkhënt hot?

⁷ Kuk mool tas payxpiil fon Parsilay. Wii eyer 80 yoore alt waar, hot te kheenich Tawi tëm in kelaat fer eene fon sayn aanreeter sin. Parsilay hot sayn krense erkhënt; tee wust tas eyer khont net fiil mache weeche sayn elter. Tes weeche, hot eyer te kheenich Tawi sayn inlaatung net aan kenom un hot te yunge Kimaan aan kepoot fer uf tëm sayn plats keen. (2 Sam. 19:35-37) Soo wii Parsilay, sin ti elter mëner froo wën se khene ti yinger priiter ti aarwayt mache lose.

8. Wii hot Tawi ketsaycht tas eyer sayn krense erkhënt hot wii eyer te thempel paue wolt?

⁸ Te kheenich Tawi hot aach sayn krense erkhënt un een xeen payxpiil fer uns kelos. Te wunx fon sayn hërts waar een haus fer Yeehoowa paue. Awer Yeehoowa hot tëm kesaat tas te yunge Salomon teet tiise aarwayt mache. Tawi hot Yeehoowa sayn ëntxlus aan kenom un hot kemacht ales was eyer khont fer ti paueray uner xtitse. (1 Kro. 17:4; 22:5) Tee hot net ketenkt: ‘Salomon is yung un hot weenich speryens; es weyer peser wën ich ti aarwayt mache teet.’ (1 Kro. 29:1) Tawi wust kans kenau: ti paueray teet ploos kuut ap laafe weeche Yeehoowa sayn seechen, net weeche ti elter orer speryens fon tëne woo ti paueray kefiirt hon. Ti elter hayt tsu taach khene Tawi noo mache un wayter xtram fer Yeehoowa xafe, soo kaar wën sayn flicht keënert wërt. Tii wise aach tas Yeehoowa tuut ti yunge seechne woo ti aarwayt am mache sin woo se friier kemacht hon.

9. Wii hot Shigeo ketsaycht tas eyer sayn krense erkhënt hot?

⁹ Kuk mool tas payxpiil fom pruuter Shigeo, yemant woo sayn krense erkhënt hot. In 1976, wii eyer 30 yoore alt waar, is eyer in kesetst kep fer in een Filyaal Komisyoon tiine. In 2004, is eyer te kortenatoer fon te Filyaal Komisyoon kep. Xpeeter, hot eyer kemërkt tas eyer net mee soo xtark wii friier waar un tas eyer must mee tsayt hon fer ti aarwayt fërtich pringe. Tee hot iwich tiise sache kepeet un ketenkt iwer warom es peser weyer tas eene yunge pruuter te kortenatoer weyer. Hayt tsu taach, is Shigeo net mee te kortenatoer fon te Filyaal Komisyoon, awer tee tuut wayter mit te anere mitkliiter xafe. Ti payxpiile fon Parsilay, te kheenich Tawi un Shigeo lose es klaar: yemant woo teemuutich is un woo sayn krense erkhënt, halt sich traan aan was ti yunge xon wise, xtats tenke tas tii mise noch fiil lërne. Tee siit tëne, net wii faynte, awer wii mitaarwayter. (Xpr. 20:29)

10. Wii tuun ti elter priiter ti yunge in te kemaynt siin?

¹⁰ Ti elter layt siin ti yunge wii een kexenk fon Yeehoowa — een kexenk woo se aarich tanke. Mit te tsayt, wërt ti elter priiter sayn kraft xweecher; awer tii sin petanklich tas es yunge kept woo sayn kraft penutse wole un woo fërtich sin fer ti aarwayt mache un ti kemaynt tiine.

11. Wii tuut Rut 4:13-16 tsayche tas ti elter layt khene seechen kriin wën se ti hilef fon yunge aan nëme?

¹¹ In te Piipel, Noemi is een xeen payxpiil fon een elter persoon woo petanklich waar un woo hilef fon een yunge persoon aan kenom hot. Wii Noemi sayn puup kextorep is, hot se Rut — sayn xwiichertochter un woo yets een witfraa waar — uf kemuut tsurik fer sayn familye keen. Awer Rut wolt net Noemi im xtich lose. Tes weeche, is se tsurik mit tëne pis Petleheem kang. Noemi waar seer froo tas Rut mit tëne khom is, un tii hot tëne sayn hilef aan kenom. (Rut 1:7, 8, 18) Tas hot fiile seechen fer ti tswaay fraae keprung. (Lees Rut 4:13-16.) * Elter layt woo teemuutich sin, mache Noemi sayn payxpiil noo.

12. Wii hot te aphostel Phaul sayn petanklichkheet ketsaycht?

¹² Te aphostel Phaul waar petanklich weeche ti hilef woo eyer fon te priiter kriit hot. Tsum payxpiil: tee hot tanke xeen fer ti filiper kesaat weeche ti kexenke woo se tëm kexikt hate. (Fili. 4:16) Tee hot aach ketsaycht tas eyer  petanklich waar fer ti hilef woo Timoteus tëm kep hat. (Fili. 2:19-22) Un een mool, wii se tëm wii inkexpërtne tsu Roma am nëme waare, sin etliche priiter khom fer tëm uf muute; too, hot eyer Kot ketankt weeche tëne. (Aph. 28:15) Phaul waar een persoon woo fol kraft waar; tee is tausente kiloometer kereest fer se preetiche un ti kemaynte ferxtërke. Soo wii soo, waar eyer teemuutich un hot ti hilef fon sayn priiter un xwestere aan kenom.

13. Wii khene ti elter tsayche tas se petanklich weeche ti yunge sin?

¹³ Elter, es kept fiile aate wii teyer khent ayre petanklichkheet fer ti yunge fon ayre kemaynt tsayche. Een aat is tëne sayn hilef aan nëme: tas khan een karona sin, orer wën se sich aan piite fer uf tayn plats im merkaate keen orer anere neetiche tinge fer tich mache. Tenk aan tas traan: tëne sayn hilef is een aat wii Yeehoowa tich liip tsaycht. Un im xtant tuust tuu soo kaar een xtark froyntxaft paue mit tëne woo tich helfe. Een aner tings woos tuu mache khanst, is tayn yunge froynte imer helfe tichter pay Yeehoowa khome. Saa tëne aach tas tuu froo pist tas yunge priiter sin mee am mache fer in te kemaynt helfe. Tuu aach wilich sin fer tsayt mit tëne aus kepe un fer iwer tayn speryense fertseele. Soo, ‘tsaychst tuu fer Yeehoowa tas tuu petanklich pist’ weeche ti yunge woo eyer tsu te kemaynt ketsoo hot. (Kol. 3:15; Yoo. 6:44; 1 The. 5:18)

14. Wii hot te kheenich Tawi krooshërtslichkheet ketsaycht?

¹⁴ Te kheenich Tawi hot aach een aner wichtich kwaliteet ketsaycht; een kwaliteet woo ti elter mise hon — ti krooshërtslichkheet. Tee hot fiil fon sayn aychne kelt un weyertliche tinge kep fer ti paueray fom thempel uner xtitse. (1 Kro. 22:11-16; 29:3, 4) Tee hot tas kemacht opwool eyer wust tas es teet pekhant wëre wii Salomon sayn thempel. Was lërne mer too temit? Im xtant, khene mer net mee aan te paueray projëkte fon Yeehoowa sayn Orkanisatsyoon xafe wayl mer khee mee kraft hon. Awer mer khene tii wayter uner xtitse torich unser kontripuytsyoone, tëm noo was unser situatsyoon erlaupt. Un meyer khene aach ti yunge helfe mit unser speryens, woo mer torich ti yoore kriit hon.

15. Was fer weyertliche kexenke hot te aphostel Phaul fer Timoteus kep?

¹⁵ Kuk mool yets tas payxpiil fon krooshërtslichkheet woo te aphostel Phaul kelos hot. Tee hot Timoteus in kelaat fer mit tëm in sayn misyoneere reese keen. Un Phaul hot een aner kexenk fer tiise yunge man kep: tee hot tëm ketsaycht ti aate wii eyer kepreeticht un in kelërnt hot. (Aph. 16:1-3) Tiise iipung hot Timoteus keholef een kuute preeticher un leerer fon te kuute notisye sin. (1 Kor. 4:17) Tan, hot Timoteus penutst was Phaul tëm in kelërnt hat fer anere iipe.

16. Warom tuut Shigeo anere iipe?

¹⁶ Ti elter hayt tenke net: ‘Wën ich ti yunge iipe fer ti aarwayt woo ich imer in te kemaynt kemacht hon, tuun ich net mee nutslich sin wayl tii hoole mayn plats.’ Tsum payxpiil: Shigeo, iwer weem mer foer heyer kexproch hon, hot iipung fer ti yunge mitkliiter fon te Filyaal Komisyoon torich ti yoore kep. Tee hot tas kemacht wayl soo khont eyer ti aarwayt fom Raych im lant woo eyer tiint helfe. Was fer waar te resultaat fon sayn iipung? Wii eyer khont net mee kortenatoer sin, waar eene pruuter — woo kuut keiipt waar — fërtich fer uf tëm sayn plats xafe. Shigeo is xon mitkliit fon te Filyaal Komisyoon mee wii 45 yoore un tee tuut wayter penutse was eyer kelërnt hot  fer ti yunge priiter helfe. Soo sorte priiter sin wërklich een seechen fer Kot sayn folek!

17. Tëm noo Lukas 6:38, was khene ti elter fer ti anere kepe?

¹⁷ Elter priiter un xwestere, teyer sayt een pewaysung tas Yeehoowa mit klaape troy tiine is ti pest aat fer se leepe. Ayre payxpiil tuut taytlich tsayche tas ti piiplixe oryentiirunge lërne un in unser leepe aan wëne, loont sich. Teyer hot mit ayre aychne aue kesiin wii ti tinge friier kemacht kep sin; awer teyer ferxteet aach tas es neetich is sich ënere tëm noo te situatsyoon. Teyer, elter woo aych kraat ketaaft hot, khent aach fiil mache fer ti anere helfe. Teyer khent fertseele iwer wii Yeehoowa khëne lërne in tiise moment fon ayre leepe hot aych froo kelos. Sicher, tuun ti yunge kërn ayre speryense un ti lisyoone woo teyer kelërnt hot heere. Khan ma saan tas ayre khop een khaste fol speryense is. Wën teyer wayter tas fer ti anere fertseelt — es wil saan, wën teyer “imer kepe” tuut —, tuut Yeehoowa aych raychlich seechne. (Lees Lukas 6:38.) *

18. Wii khene ti elter un ti yunge sich naner helfe?

¹⁸ Wën unser liipe elter tichter pay te yunge khome, khene tii sich naner uner xtitse. (Rom. 1:12) Yeete eene hot etwas weyertliches woo te aner net hot. Ti elter hon ti kluucheet un ti speryens woo se torich ti yoore kriit hon. Ti yunge hon kraft un muut. Wën ti elter un yunge mitsamer wii froynte xafe, pringe se eer fer unser liipliche Fater im himel un tuun aach ti kans kemaynt helfe.