1. Wii xpiirt sich een persoon wën een keliipte tesasosiirt is?

IS YEMANT woos tuu liipst tesasosiirt kep? Tas khan uns mechtich traurich lose. Een xwester woo Hilda * heest, saat: “Ich waar mit mayn man xon 41 yoore kehayrat. Wën eyer kextorep is, hon ich ketenkt tas es waar tas xlimste tings woo khent mit mich pasiire. Awer wën mayn soon tesasosiirt kep is, un sayn fraa un khiner kelos hot, tas waar wërklich fiil, fiil xlimer fer mich kewees.”

2-3. Tëm noo Psalm 78:40, 41, wii xpiirt sich Yeehoowa wën sayn tiiner tëm im xtich lose?

² Tenk aan wii traurich meecht Yeehoowa sich kexpiirt hon wën ti engele — woo teel fon sayn familye waare — tëm im xtich kelos hon. (Yuu. 6) Un xtel tich mool foer wii traurich eyer kep is wii ti israeliiter, sayn liipe folek, sich noo un noo keeche tëm repeliirt hon. (Lees Psalm 78:40, 41.) * Tan, say tich sicher: unser liipliche Fater im himel wërt aach aarich traurich wën yemant woos tuu liipst tëm im xtich lost. Tee ferxteet ti phayn woos tuu am xpiire pist. Un tee tuut tich liiplich uf muute un uner xtitse.

³ Awer, was khene mer mache fer Yeehoowa sayn hilef kriin wën yemant woo mer liipe lost noo tëm tiine? Wii khene mer anere in te kemaynt helfe woo mache tiise xweyer situatsyoon mit? Tas is was mer in tiise artikel lërne tuun. Awer eyerst, wole mer siin fon was fer sorte nekatiiwe ketanke sole mer uns wech hale.

4. Wii xpiire sich fiile eltere wën een soon orer tochter Yeehoowa im xtich lost?

⁴ Wën een soon orer tochter Yeehoowa im xtich lost, rechne ti eltere eftas: ‘Ich khent mee kemacht hon fer mayn liipe  khint helfe in te woerheet plaype.’ Noo tas sayn soon tesasosiirt kep is, hot een pruuter, woo Luke heest, kesaat: “Ich hon ketenkt tas es mayn xult waar. Ich hon xlechte treem too triwer kehat. Als mool, hon ich mayn hërts wee kexpiirt un ich hon keprilt.” Elizabeth, een xwester woo een eenlich situatsyoon mit kemacht hot, hot eftas ketenkt: “Woo waar mayn feeler kewees? Ich hon kexpiirt tas ich hat net kenuuch kemacht fer mayn soon lërne Yeehoowa liipe.”

5. Weer hot ti xult wën yemant Yeehoowa im xtich lost?

⁵ Meyer mise imer traan tenke: Yeehoowa hot fer yeete eene fon uns een fray wile kexenkt. Es wil saan tas meyer khene raus suuche ep mer Tëm aan heere tuun orer net. Tsum payxpiil: etliche khiner hate eltere woo net een kuut payxpiil waare; noch soo, hon se raus kesuucht Yeehoowa tiine un troy tsu tëm plaype. Anere hate eltere woo sich aan kextrengt hon fer tëne lërne Yeehoowa liipe; awer noo heyer, wën se kroos kewakst sin, hon se raus kesuucht Yeehoowa im xtich lose. Was lërne mer too temit? Yeehoowa tiine, orer net, is een ëntxlus woo yeete persoon mache mus. (Yos. 24:15) Tan, wëns tuu traurich pist wayl tayn soon orer tochter noo kelos hot Yeehoowa tiine un tuu mënst tas es tayn xult is, say tich sicher: tas is net woer! Khëmpf keeche tiise ferkheerte ketanke!

6. Wii khan een yunge persoon sich xpiire wën sayn muter orer fater Yeehoowa im xtich lost?

⁶ Als mool, lost een fater orer muter ti woerheet un soo kaar sayn familye im xtich. (Psal. 27:10) Tas khan aarich traurich fer ti khiner sin, woo sayn eltere imer wii een payxpiil kesiin hon. Esther sayn fater is tesasosiirt kep; tii saat: “Ich hon eftas keprilt, wayl ich hon kemërkt tas tee waar sich net ploos fon te woerheet am ap lënke; tee wolt fer kërn Yeehoowa im xtich lose. Ich liipe mayn papa. Tes weeche, wën eyer tesasosiirt waar, hon ich mich imer soriche mit tëm kemacht. Ich hon soo kaar als mool panik atake kriit.”

7. Was xpiirt Yeehoowa noo een yung woo een muter orer fater hot woo tesasosiirt kep is?

⁷ Yunge, is tayn muter orer fater tesasosiirt kep? Meyer xpiire tayn phayn in unser hërts. Say tich aach sicher tas Yeehoowa ferxteet wii fiil tas tich wee mache tuut. Tee liipt tich un tee is froo tas tuu tëm wayter troy tiinst. Un meyer — tayn priiter un xwestere in te kemaynt — sin aach froo mit tich. Eriner tich tas ti ëntxlise fon tayn eltere sin tëne sayns, net tayns. Un wii mer foer heyer kesiin hon, Yeehoowa hot fer yeete persoon ti frayheet kep fer se raus suuche tëm tiine orer net. Un yeete eene woo tetikiirt un ketaaft is, mus sayn “aychne last fon responsapiliteet nëme”. (Kal. 6:5, noote)

8. Was khene ti troye mitkliiter fon te familye mache soo lang wii se waarte sayn keliipte tsurik tsu Yeehoowa khome? (Kuk aach te khaste “ Khom retuer tsu Yeehoowa”.)

⁸ Wën yemant woos tuu liipst Yeehoowa im xtich lost, is tsum ferxteen tas tuu hofst tas eyer retuer tsu Yeehoowa khomt. Awer, pis tas pasiirt, was khanst tuu mache? Mach tayn pestes fer tayn klaape xtark hale. Soo, kepst tuu een kuut payxpiil fer ti anere in tayn familye un fiilaycht soo kaar fer tee woo tesasosiirt kep is. Tuu kriist aach ti neetich kraft fer tayn phayn  aus hale. Awer, was khanst tuu mache fer tayn klaape xtark hale? Wole mer iwer etliche xrite xpreche.

9. Wii khanst tuu kraft fon Yeehoowa kriin? (Kuk aach te khaste “ Tekste woo khene tich treeste wën een keliipte persoon Yeehoowa im xtich lost”.)

⁹ Hal een kuut kaystlich rutiin. Es is seer important tas tuu wayter tich selepst un tayn familye ferxtërkst. Wii khanst tuu tas mache? Tuu imer ti Piipel leese, too triwer tenke un in te fersamlunge keen. Tas tuut tich helfe Yeehoowa sayn kraft kriin. Joanna sayn fater un xwester hon ti woerheet kelos; tii saat: “Ich xpiire mich in ruu wën ich ti piiplixe kexichte leese, soo wii Apikaiil, Estër, Yoop, Yoosef un Yeesus sayns. Tëne sayn payxpiile muute mich uf un helfe mich mee positiiw tenke. Noch etwas woo mich kraft kept, sin ti spetsyaale liiter fon unser site.”

10. Wii khan te Psalm 32:6-8 tich helfe wëns tuu mechtich traurich pist?

¹⁰ Xprech mit Yeehoowa iwer ales was tich unruych lost. Wëns tuu aarich traurich pist, los net noo se peete. Ferlang wayter fer unser liipe Kot tas eyer tich helft ti situatsyoon siin wii eyer se siit. Un ferlang tëm aach fer tich “ferxtëntnis kepe un tich in lërne im weech woos tuu keen solst”. (Lees Psalm 32:6-8.) * Kewis, fer Yeehoowa saan was tuu wërklich xpiirst, khan aarich xweyer sin. Awer tee ferxteet tayn phayn. Tee liipt tich aarich fiil un wil hon tas tuu tayn hërts tsu tëm uf machst. (Eeks. 34:6; Psal. 62:7, 8)

11. Tëm noo Hepreeyer 12:11, warom sole mer aan Yeehoowa sayn liiplich tisipliin traue? (Kuk aach te khaste “ Ti tesasosyasyoon — een pewaysung fon Yeehoowa sayn liip”.)

 ¹¹ Tuu ti elteste sayn ëntxlus pay xteen. Ti tesasosyasyoon is een aat wii Yeehoowa yemant liiplich tisipliniirt. Es is ti pest aat fer ale kaar helfe, too tepay ti persoon woo noo kelos hot Yeehoowa tiine. (Lees Hepreeyer 12:11.) * Manich mool, wën een persoon tesasosiirt is, khan yemant in te kemaynt saan: ‘Ti elteste hon net te richtich ëntxlus kemacht!’ Awer, tenk traan: in te meyerst tsayt, wil tiise persoon net xpreche iwer tas xlechtes woo tee woo tesasosiirt kep is, kemacht hot. Meyer mise ferxteen tas mer net ales iwer ti situatsyoon wise. Tan, trau tas ti elteste in te jutikatiiw komisyoon hon sayn pestes kemacht fer ti piiplixe oryentiirunge aan wëne un “fer Yeehoowa” richte. (2 Kro. 19:6)

12. Was fer kuute resultaate hon etliche kriit wayl se Yeehoowa sayn tisipliin pay kextan hon?

¹² Wëns tuu ti elteste sayn ëntxlus pay xteest fer tayn keliipte tesasosiire, fiilaycht khanst tuu tëm helfe retuer tsu Yeehoowa khome. Elizabeth, iwer weem mer foer heyer kexproch hon, saat: “Es waar aarich xweyer khee mee keselxaft hon mit unser folyëriche soon. Awer wii eyer tsurik tsu Yeehoowa khom is, hot eyer erkhënt tas eyer fertiint hot tesasosiirt wëre. Noo heyer, hot eyer aach kesaat tas eyer fiile kuute lisyoone kelërnt hot. Tas hot mich keholef fiil weyert fer Yeehoowa sayn tisipliin kepe.” Mark, Elizabeth sayn man, saat aach: “Xpeeter, hot unser puup mich kesaat tas etwas woo tëm uf kemuut hot retuer khome, is tas mer kemacht hon kraat was mer mache selte. Ich sin mechtich froo tas Yeehoowa uns keholef hot folich sin.”

13. Was khan tich helfe mit te phayn um keen?

¹³ Fertseel mit froynte woo ferxteen wiis tuu tich finst. Fertrayp tsayt mit priiter woo speryens hon un woo khene tich helfe net ti hofnung ferliire. (Xpr. 12:25; 17:17) Joanna, iwer weem mer foner traan kexproch hon, saat: “Ich hon mich aleen kexpiirt. Awer, es hot mich fiil keholef mit froynte xpreche woo ich ketraut hon.” Un wën yemant in te kemaynt tich was saat woo xtats tich helfe, tich oone muut lost? Was khanst tuu mache?

14. Warom mise mer uns “wayter naner aus hale un krooshërtslich fertsaye”?

¹⁴ Say ketultich mit tayn priiter un xwestere. Meyer khene net waarte tas ale kaar imer tas richtich tings saan. (Tya. 3:2) Meyer sin al imperfekt. Tan, tuu tich net ferxreke wën yemant wees net was se saan, orer wën se tich was saan woo tich wee macht, opwool se es net wolte. Tenk traan aan te aphostel Phaul sayn aanreet: “Tuut aych wayter naner aus hale un krooshërtslich fertsaye, soo kaar wën yemant uersache hot fer sich keeche een aner peklaae.” (Kol. 3:13) Te soon fon een xwester is tesasosiirt kep; tii leet aus: “Etliche priiter hon fersuucht tas richtich tings mache, awer in een imperfekt aat. Yeehoowa hot mich keholef tëne fertsaye.”  Wii khan ti kemaynt ti troye mitkliiter fon een familye helfe? Wole mer yets lërne.

15. Was khene mer mache fer ti familye helfe fon yemant woo tesasosiirt kep is?

¹⁵ Say kuut un froyntlich mit te mitkliiter fon te familye woo troy keplip sin. Een xwester woo Miriam heest saat tas, noo sayn pruuter tesasosiirt kep is, is se ëngstlich kep fer in te fersamlunge keen. Tii leet aus: “Ich hat pang iwer was ti layt saan teete. Awer, es waare fiil priiter kewees woo aach traurich waare mit was pasiirt is. Un tii hon net xlecht iwer mayn pruuter kexproch. Weeche tëne, praucht ich net mit mayn traurichkheet aleen um keen.” Een aner xwester hot kesaat: “Noo tas unser soon tesasosiirt kep is, hon liipliche froynte uns ketreest. Etliche hon fertseelt tas se wuste net was se saan. Welche hon mit mich keprilt; un anere hon een ufmuutich priif fer mich kexikt. Was se kemacht hon, hot mich fiil keholef!”

16. Wii khan ti kemaynt wayter uner xtitse ti familye fon yemant woo tesasosiirt is?

¹⁶ Tuu wayter uner xtitse ti mitkliiter fon te familye woo troy keplip sin. Yets, mee wii noch nii, prayche se tas tuu tëne uf muutst un liipst. (Hep. 10:24, 25) Als mool, hon ti familye fon yemant woo tesasosiirt waar kemërkt tas etliche priiter in te kemaynt wolte net mee mit tëne xpreche, wii wën se aach tesasosiirt weyere. Los tas net pasiire! Hauptseechlich ti yunge woo een muter orer fater hon woo tesasosiirt is, prayche keloopt un uf kemuut wëre. Maria sayn man hot Yeehoowa un ti familye im xtich kelos; tii saat: “Etliche priiter sin in unser haus khom un hon ese fer uns kekoch. Tii hon mich aach keholef mit mayn khiner xtutiire. Tii hon mayn phayn kexpiirt un aach mit mich keprilt. Un wën ti anere falxe kexichte iwer mich fertseelt hon, hon se mich kexitst. Tii hon mich fiil uf kemuut!” (Rom. 12:13, 15)

17. Was khene ti elteste mache fer se treeste tii woo traurich sin?

¹⁷ Elteste, penutst yeete keleechenheet fer ti familye fon yemant woo tesasosiirt is, ferxtërke. Tëne treeste is ayre ekstra flicht. (1 The. 5:14) Kept te eyerste xrit fer tëne uf muute foer un noo te fersamlunge. Pesuucht tëne un peet mit  tëne. Xaft mit tëne in te preetich aarwayt, un laat se als mool in fer in ayre familye aanpeetung mit helfe. Ti elteste mise Yeehoowa sayn xeefche woo traurich sin uf phase un tëne mitlayt un liip tsayche. (1 The. 2:7, 8)

18. Tëm noo 2^te Pheeter 3:9, was wil Kot hon fer tii woo noo kelos hon tëm tiine?

¹⁸ (Lees 2^te Pheeter 3:9.) * Yeehoowa winxt net “tas yemant fernicht wërt, awer winxt tas se al sich peroye”. Soo kaar wën yemant een xweyer sint macht, hot tëm sayn leepe noch fiil weyert foer Yeehoowa. Tenk imer traan tas Yeehoowa hot, weeche yeete eene fon uns, een hooch prays petsaalt: tas leepe fon sayn liipe Soon. Mit liip, fersuucht Yeehoowa tii woo tëm im xtich kelos hon helfe retuer tsu tëm khome. Un tee hoft tas se raus suuche tas mache. Tas is kans taytlich im kexicht woo Yeesus fertseelt hot iwer te ferloerne soon. (Luk. 15:11-32) Fiile woo ti woerheet im xtich kelos hon, sin xpeeter retuer khom tsu sayn liipliche Fater im himel. Un ti priiter un xwestere hon se hërtslich wilkhom. Elizabeth, iwer weem mer foer heyer kexproch hon, hot sich mechtich kefrayt wii sayn soon noch mool in te kemaynt aan kenom waar. Tii saat: “Ich sin froo tas fiile uns uf kemuut hon unser hofnung net ferliire.”

19. Warom khene mer wayter aan Yeehoowa traue?

¹⁹ Meyer khene imer uf Yeehoowa traue. Tee kept uns nii mools een oryentiirung woo uns xaate macht. Kot is een krooshërtsliche un mitlaytiche Fater; tee hot een tiif liip fer tii woo tëm aan peete un liipe. Tan, say tich sicher: tee lost tich net im xtich wëns tuu traurich pist; tee kept tich wayter “ti iwermeesich kraft”. (Hep. 13:5, 6; 2 Kor. 4:7) Mark, iwer weem mer foner traan kexproch hon, saat: “Yeehoowa hot uns nii mools im xtich kelos. Tee is imer ticht pay uns wën mer xwiirichkheete mit mache.” Yawool, tuu khanst troy plaype un tayn hofnung hale soo kaar wën yemant woos tuu liipst Yeehoowa im xtich lost.