1. Wii khene troye mënxe Yeehoowa aan siin?

YEEHOOWA hot een kroos familye woo tëm aan peet, too tepay sin Yeesus — “te eyerst kepoerne fon ales woo kemacht kep is” — un fiile engele. (Kol. 1:15; Psal. 103:20) Wii Yeesus uf te eyert waar, hot eyer ti layt keholef ferxteen tas ti troye mënxe khene Yeehoowa wii een Fater aan siin. Wii Yeesus mit sayn tisipele kexproch hot, hot eyer Yeehoowa wii “mayne Fater un ayre Fater” kenënt. (Yoo. 20:17) Un wën mer uns tsu Yeehoowa tetikiire un uns taafe lose, wëre mer teel fon een liiplich familye fon priiter un xwestere. (Mar. 10:29, 30)

2. Was tuun mer in tiise artikel lërne?

² Etliche fine es xweyer Yeehoowa wii eene liipliche Fater siin. Anere wise es net wii liip tsu sayn priiter un xwestere tsayche. In tiise artikel, lërne mer wii Yeesus uns helfe tuut Yeehoowa wii unser liipliche Fater siin, yemant woo wil hon tas mer ticht pay tëm khome. Meyer tuun aach siin wii mer khene Yeehoowa noo mache in te aat wii mer mit unser priiter un xwestere um keen.

3. Wii tuut tas kepeet woo Yeesus fer sayn tisipele in kelërnt hot uns tichter pay Yeehoowa xafe?

³ Yeehoowa is een liipliche Fater. Yeesus wil hon tas mer Yeehoowa siin soo wii eyer tëm siit. Wii? Net wii een khalt un krop autoriteet woo ploos uns saat was se mache, awer wii een liipliche papa mit weem mer khene in kwalkee xtun xpreche. Meyer khene tas taytlich mërke im kepeet woo Yeesus fer sayn tisipele in kelërnt hot. Tee hot tëne kesaat fer soo aan fange: “Unser Fater.” (Mat. 6:9) Yeesus khent uns kesaat hon fer Yeehoowa wii “Ale Mechtiche”, “te Kriatoer” orer “te Kheenich  fon eewichkheet” ruufe; tas weyer net ferkheert wayl ti Piipel penutst al tiise thitele fer Yeehoowa pexraype. (Xee. 49:25; Isa. 40:28; 1 Tim. 1:17) Awer Yeesus hot uns in kelërnt Yeehoowa wii “Fater” ruufe, een wort woo uns tichter pay Tëm xaft.

4. Wii wise mer tas Yeehoowa wil hon tas mer tichter pay tëm khome?

⁴ Etliche fon uns fine es xweyer Yeehoowa wii een liipliche Fater siin. Is tas tayn situatsyoon? Wën unser fater krop waar, im xtant is es xweyer fer uns ferxteen wii een liipliche papa is. Awer was uns treeste khan, is wise tas Yeehoowa tuut unser xpiirunge kenau ferxteen! Tee wil ticht pay uns sin. Tes weeche, tuut tëm sayn Wort uns uf muute: “Khomt ticht tsu Kot, un Eyer khomt ticht tsu aych.” (Tya. 4:8) Yeehoowa liipt uns un tee wil te peste Fater sin woo mer khene hon.

5. Tëm noo Lukas 10:22, wii khan Yeesus uns helfe tichter pay Yeehoowa khome?

⁵ Yeesus khan uns helfe tichter pay Yeehoowa khome. Yeesus khënt Yeehoowa aarich kuut un macht tëm sayn kwaliteete perfekt noo; tes weeche, hot eyer kesaat: “Weer mich siit, siit aach te Fater.” (Yoo. 14:9) Wii een elter pruuter, tuut Yeesus uns in lërne wii unser Fater respektiire un tëm aan heere. Yeesus tsaycht uns aach wii unser Fater froo lose un tëm kefale. Un tas haupste: ti aat wii Yeesus keleept hot, tsaycht uns wii liip un kuut Yeehoowa is. (Lees Lukas 10:22.) * Wole mer phaar payxpiile siin.

6. Wii wise mer tas Yeehoowa Yeesus keheert hot? Kep etliche payxpiile.

⁶ Yeehoowa heert sayn khiner. Kuk mool ti aat wii Yeehoowa sayn eyerste kepoerne Soon keheert hot. Sicher, hot Yeesus fiile kepeete kemacht wii eyer uf te eyert waar un tëm sayn Fater hot tëm keheert. (Luk. 5:16) Yeehoowa hot Yeesus keheert iwer xweyere ëntxlise peete — tsum payxpiil, wii eyer ti 12 aphostele raus kesuucht hot. (Luk. 6:12, 13) Un wii Yeesus ëngstlich waar, hot Yeehoowa tëm sayn  kepeete aach keheert. Kraat foer Yuutas tëm hinerkeen, hot Yeesus hërtslich tsu sayn Fater kepeet iwer ti xrooe tinge woo klaych pasiire teete. Yeehoowa hot net ploos Yeesus sayn kepeet keheert — Eyer hot aach een engel kexikt fer Sayn liipe Soon ferxtërke. (Luk. 22:41-44)

7. Wii finst tuu tich fon wise tas Yeehoowa unser kepeete heert?

⁷ Hayt, tuut Yeehoowa wayter ti kepeete fon sayn troye tiiner heere. Un tee tuut se antworte in te richtich tsayt un in te pest aat woos meechlich is. (Psal. 116:1, 2) Een xwester in Intya hot kesiin wii tas wërklich woer is. Tii waar aarich ëngstlich kewees, un hot hërtslich tsu Yeehoowa too triwer kepeet. Tii xraypt: “Te JW Broadcasting^® fon Maay fon 2019, woo kexproch hot iwer was se mache wën mer ëngstlich sin, waar kraat was ich praucht. Tas waar een antwort fer mayn kepeete.”

8. Wii hot Yeehoowa liip tsu Yeesus ketsaycht?

⁸ Wii Yeesus uf te eyert waar, hot Yeehoowa tëm keliipt un sich mit tëm kekhimert. Kot xpiirt tas selwiche tsu uns. (Yoo. 5:20) Tee hot Yeesus keholef in ales: in kaystlich, emotsyonaal un fiisix aat. Un Yeehoowa hot fer sayn Soon kesaat tas eyer tëm keliipt hot un tas eyer froo mit tëm waar. (Mat. 3:16, 17) Yeesus khont imer mit sayn liipliche Fater im himel tseele; tes weeche, wust eyer tas eyer nii mools aleen waar. (Yoo. 8:16)

9. Was pewayst tas Yeehoowa uns liipe tuut?

⁹ Soo wii Yeesus, hon meyer al xon Yeehoowa sayn liip in fiile aate kexpiirt. Tenk traan: Yeehoowa hot uns kelos tëm sayn froynte wëre; tee hot uns aach liipliche priiter un xwestere kep woo lose uns froo un muute uns uf wën mer ëngstlich sin. (Yoo. 6:44) Yeehoowa kept uns aach ales was mer prayche fer unser klaape xtark hale; un tee helft uns soo kaar uns fersoriche. (Mat. 6:31, 32) Wën mer triwer noo tenke aan Yeehoowa sayn liip tsu uns, unser liip tsu tëm wërt kreeser.

10. Wii khene mer Yeehoowa noo mache?

¹⁰ Yeehoowa liipt unser priiter un xwestere. Awer im xtant, is es net imer laycht liip fer unser priiter xpiire un tsayche. Tas khan pasiire wayl unser kultuer anerste is orer wayl mer anerste ketsoo kep sin. Un meyer al mache feeler woo khene ti anere ëriche orer traurich lose. Noch soo, khene mer uns aan xtrenge fer ti liip in unser kaystlich familye xtërker lose. Meyer kriin tas hin wën mer unser Fater noo mache un liip tsu unser priiter un xwestere tsayche. (Ëfe. 5:1, 2; 1 Yo. 4:19) Wole mer siin was mer mit Yeehoowa sayn payxpiil lërne khene.

11. Wii hot Yeesus Yeehoowa sayn “hërtslich mitlayt” noo kemacht?

¹¹ Yeehoowa tsaycht “hërtslich mitlayt”. (Luk. 1:78) Wën een mitlaytich persoon siit yemant am layte, macht se sich ketanke mit tëm un suucht aate fer hilef un troost kepe. Yeehoowa tsaycht mitlayt fer ale kaar un tas is klaar ketsaycht kep in te aat wii Yeesus ti layt pehantelt hot. (Yoo. 5:19) Tsum payxpiil: een mool hot Yeesus een kroos folek kesiin; tan “hot eyer ti layt ketauert, wayl se ferhunst un im xtich kelos waare, wii xeef oone xeefer.” (Mat. 9:36) Awer, Yeesus hot net ploos ti layt ketauert. Weeche mitlayt, hot eyer ti kranke keheelt un aach tii woo ‘xweyer kexaft hon un iwerlaat waare’ keholef. (Mat. 11:28-30; 14:14)

12. Wii khene mer mitlayt fer unser priiter un xwestere tsayche?

¹² Fer mitlayt fer unser priiter un xwestere tsayche, mise mer eyerst ferxteen was se am mit mache sin. Tsum payxpiil: im xtant hot een xwester een xweyer kesuntheet propleem. Tii  pexweert sich net too triwer, awer tsiimlich sicher weyer se froo wën se hilef kreecht. Es wërt wool net laycht sin fer tii sayn familye uf phase. Meecht tii net froo wëre wën mer tëne een hant kepe teete — fiilaycht etwas koche orer tas haus helfe sauwer mache? Orer wole mer saan tas een pruuter sayn aarwayt ferloer hot. Fiilaycht khene mer tëm helfe mit een pisye kelt, im xtant pis eyer een aner aarwayt fint. Meyer khene tas mache oone tëm saan tas meyer tiise kexenk kep hon.

13-14. Wii khene mer krooshërtslich soo wii Yeehoowa sin?

¹³ Yeehoowa is krooshërtslich. (Mat. 5:45) Meyer sole net waarte pis unser priiter uns hilef ferlange fer tan mitlayt tsayche. Soo wii Yeehoowa, khene mer te eyerste xrit kepe. Yeete taach macht eyer ti sun uf keen — un mer prayche tas net ferlange! Un ti hits fon te sun pringt nutse fer ale kaar, net ploos fer tii woo petanklich sin. Yeehoowa kept uns ales was mer prayche un soo tsaycht eyer sayn liip fer uns. Un meyer liipe Yeehoowa aarich fiil wayl eyer soo kuut un krooshërtslich is!

¹⁴ Unser priiter un xwestere mache Yeehoowa noo un tii kepe te eyerste xrit fer krooshërtslichkheet tsayche. Tsum payxpiil: in 2013, een mechtich xtark xtorm — te Haiyan — hot fiil fernichtung tsu te Filipinas keprung. Fiile priiter un xwestere hon sayn hayser un tinge ferloer. Awer tëne sayn kaystlich familye welt wayt hot tëne xnel hilef kep. Fiile hon kelt kep un anere hon in te paueray keholef. Was fer waar te resultaat? Neekst 750 hayser sin, in weenicher wii een yoer, uf kepaut orer in te ray kelos kep. Un torich ti pantemii fon coronavirus, Yeehoowa sayn Tsayer hon xweyer kexaft fer sayn priiter un xwestere helfe. Wën mer fiks sin fer unser priiter un xwestere helfe, tsayche mer unser liip tsu tëne.

15-16. Tëm noo Lukas 6:36, wii khene mer unser Fater im himel noo mache?

¹⁵ Yeehoowa is parmhërtslich un tuut fertsaye. (Lees Lukas 6:36.) * Unser Fater im himel tuut uns yeete taach fertsaye. (Psal. 103:10-14) Yeesus hot aach parmhërtslichkheet fer sayn  tisipele ketsaycht un tëne fertsayt opwool se imperfekt waare. Tee waar soo kaar wilich fer sayn leepe ap kepe, tas soo unser sinte khente fertsayt wëre. (1 Yo. 2:1, 2) Wayl Yeehoowa un Yeesus parmhërtslich sin un imer fertsaye tuun, xpiire mer uns tichter pay tëne.

¹⁶ Wën mer uns naner ‘krooshërtslich fertsaye’, ti liip tswixich uns wërt xtërker. (Ëfe. 4:32) Kewis, es is net imer laycht fertsaye, awer mer mise too traan xafe. Een artikel fon Te Wachthorm, “Perdoem uns aos outros liberalmente”, hot een xwester keholef tas mache. * Tii xraypt: “Tiise artikel hot mich keholef ferxteen tas, wën ich ti anere fertsaye, tas tuut mich selepst helfe. Te artikel hot kesaat tas wën mer ti anere fertsaye, es wil net saan tas tas net uns wee kemacht hot orer tas es net ferkheert waar. Awer wën mer fertsaye, plaype mer net pees mit tëne un soo, hale mer unser inerlich friit.” Wën mer unser priiter un xwestere krooshërtslich fertsaye, tsayche mer unser liip tsu tëne un mache mer unser Fater Yeehoowa noo.

17. Tëm noo Matheus 5:16, wii khene mer unser Fater im himel eere?

¹⁷ Meyer hon priiter un xwestere uf te kans welt woo sich naner liipe tuun. Es is een kroos priwilëj teel fon tiise familye mache! Un meyer wole tas soo fiil layt wiis meechlich is pay uns khome un aach Kot aan peete. Tes weeche, mise mer uf phase fer niks mache woo khent Yeehoowa sayn naame orer te naame fon sayn folek trekich mache. Meyer fersuuche uns kuut aan xtele wayl tas khan ti layt uf muute Yeehoowa khëne lërne un tëm tiine. (Lees Matheus 5:16.) *

18. Was khan uns helfe mit koraaj preetiche?

¹⁸ Als mool, tuun etliche uns kritikiire orer soo kaar uns yachte wayl mer unser Fater im himel aan heere. Was khene mer mache wën mer pang xpiire fer mit anere iwer unser klaape xpreche? Meyer khene mit Yeehoowa un sayn  Soon rechne — tii tuun uns sicher helfe. Yeesus hot fer sayn tisipele kesaat: “Macht aych net ketanke mit was teyer saat orer wii teyer es saat.” Warom net? “Wayl wën ti xtun khomt, wërt es aych ketsaycht was teyer saan solt — hot Yeesus aus keleet —, wayl teyer tuut net aleen xpreche; te kayst fon ayre Fater tuut torich aych xpreche.” (Mat. 10:19, 20)

19. Kep een payxpiil fon yemant woo tsaye mit koraaj kep hot.

¹⁹ Kuk mool tas payxpiil fon Robert. Tee hat kraat aan kefang ti Piipel xtutiire, un hat noch weenich khëntnis iwer tii. Too must eyer foer een kericht in Siit Afrika keen un aus leye warom eyer net im militeer tiine teet. Tee hot mit koraaj aus keleet tas eyer wolt net tas mache weeche sayn liip tsu sayn kristliche priiter un xwestere. Tee waar wërklich petanklich weeche sayn plats in Yeehoowa sayn familye. “Weer sin tayn priiter?” — hot een richter uf een mool kefroot. Robert hot net tiise frooch kewaart, awer tee hot sich klaych traan ketenkt am tekst fom taach. Es waar Matheus 12:50: “Weer te wile fon mayn Fater im himel macht, is mayn pruuter, mayn xwester un mayn muter.” Opwool Robert kraat aan kefang hat se xtutiire, Yeehoowa sayn kayst hot tëm keholef tiise frooch un noch anere unkewaartne frooche antworte. Yeehoowa wërt wool wërklich froo mit Robert kep sin! Un Yeehoowa wërt froo mit uns wën mer uf tëm traue un mit koraaj tsaye in xweyere situatsyoone kepe.

20. Was wole mer imer mache? (Yoohan 17:11, 15)

²⁰ Wole mer wayter petanklich sin fer ti liiplich familye woo mer hon. Meyer hon te peste Fater woo mer khene hon un fiile priiter un xwestere woo uns liipe tuun. Meyer mise imer fiil weyert fer tas kepe. Satanaas un sayn xlechte nookeener wole uns tswayfele mache tas Yeehoowa uns liipt; tii wole aach ti eenichkheet woo mer hon fersaue. Awer Yeesus hot weeche uns kepeet; tee hot fer unser Fater ferlangt fer uns uf phase, tas unser familye khan eenich plaype. (Lees Yoohan 17:11, * 15. *) Yeehoowa is tiise kepeet am antworte. Soo wii Yeesus, tuu nii mools tswayfele iwer Yeehoowa sayn liip — tee tuut uns sicher imer uner xtitse. Un wole mer wayter tichter pay unsere priiter un xwestere khome.