XTUUTYUM ARTIKEL 40
Fiile wëre tsu te kerechtichkheet kenom
“Tii woo fiile layt tsu te kerechtichkheet nëme, tuun soo wii ti xtërne xayne, fer ti kans eewichkheet.” (TANYËL 12:3)
LIIT 151 Ëyer tuut tëne ruufe
WAS TUUN MER SIIN? *
1. Was fer wunerliche ewënte tuun torich ti Tausent Yoore Rechiirung pasiire?
XTEL tich mool foer ti kroos frayt woo mer xpiire tuun wën tas ufxtaye fom toot uf te eyert aan fangt, torich Yeesus Kristus sayn Tausent Yoore Rechiirung! Ale tii woo yemant im toot ferloer hon, sin hërtslich am waarte te taach khome. Yeehoowa hot aach tiise selwiche xpiirunge. (Yoop 14:15) Wii mer im letste artikel kesiin hon, ‘ti kerechte’ sayn naame sin im puuch fom leepe kexrip. Tii tuun uf keruuft wëre “fer een ufxtaye fers leepe”. (Aph. 24:15; Yoo. 5:29) Fiilaycht, wëre fiile fon unser keliipte tepay sin pay tëne woo uf keruuft wëre klaych noom Armaxeton. * Un noch: ti unkerechte, soo wii tii woo khee richtich xans hate fer iwer Yeehoowa lërne orer tëm tiine foer sayn toot, wëre uf keruuft fer “een ufxtaye fers kericht”.
2-3. (a) Tëm noo Isaiias 11:9, 10, was wërt in kelërnt in tëm kreest inlërnung prokram woo xon pasiirt is, un warom? (b) Was tuun mer in tiise artikel siin?
2 Al tii woo fom toot uf xtaye, mise in kelërnt wëre. (Isa. 26:9; 61:11) Tes weeche, wërt es neetich tas kreest inlërnung prokram woo xon pasiirt is, mache. (Lees Isaiias 11:9, 10.) * Warom? Een uersach is wayl ti unkerechte woo uf keruuft wëre, mise lërne iwer Yeesus, Kot sayn Raych, tas fray khaaf opfer, wii wichtich Yeehoowa sayn naame is un warom ploos Eyer tas recht fer se rechiire hot. Soo kaar ti kerechte mise lërne was Yeehoowa mit te tsayt ketsaycht hot iwer sayn tsiil fer ti eyert. Etliche fon tiise troye mënxe sin kextorep een lang tsayt eep ti Piipel fërtich waar. Yawool, ti unkerechte un ti kerechte hon fiil se lërne.
3 In tiise artikel, tuun mer ti antwort fer ti neekste frooche fine: Wii wërt tiise kroos inlërnung aarwayt kemacht? Was tuut pasiire wën ti layt sich kuut aan xtele foer tiise inlërnung prokram? Un, was pasiirt wën se tas net mache? Ti antworte fer tiise frooche sin wichtich fer uns hayt. Wii mer noch siin tuun, etliche wunerliche profetsiie in Tanyël un Apokalipsis helfe uns peser ferxteen was pasiire tuut wën ti toote uf keruuft wëre. Awer eyerst, wole mer ti wunerliche ewënte siin woo in te profetsii fon Tanyël 12:1, 2 xteen.
“TII WOO IM XTAAP (…) IN KEXLOOF SIN, WËRE WACH”
4-5. Was tuut Tanyël 12:1 saan iwer ti tsayt fom ën?
4 Lees Tanyël 12:1. * Tas puuch Tanyël tsaycht in was fer sekwens tuun wunerliche tinge pasiire in te tsayt fom ën. Tsum payxpiil: Tanyël 12:1 saat tas Michel, woo Yeesus Kristus is, “xteen playpt fer nutse fer [Kot sayn] folek pringe”. Tiise teel fon te profetsii hot aan kefang sich erfiile in 1914 wii Yeesus in kesetst kep is wii kheenich fon Kot sayn Raych.
5 Awer, Tanyël hot aach kesaat tas Yeesus teet sich “uf xtele” torich ‘een xweyer tsayt, ti xlimste fom aanfang fon te natsyoone aan’. Tiise “xweyer tsayt” is ti “kroos tripulatsyoon” fon Matheus 24:21. Yeesus xtelt sich uf, orer xitst Kot sayn folek, am ën fon tiise xweyer tsayt — es wil saan, te Armaxeton. Tas puuch Apokalipsis nënt tëne wii een kroos folek “woo fon te kroos tripulatsyoon raus [khomt]”. (Apo. 7:9, 14)
6. Was tuut pasiire noo tas kroose folek ti kroos tripulatsyoon iwerleepe? Lee tas aus. (Kuk “Frooche fon te leeser” in tiise piichelche fer mee iwer tas ufxtaye too uf te eyert lërne.)
6 Lees Tanyël 12:2. * Was tuut pasiire noo tas kroose folek tiise xweyer tsayt iwerleepe? Friier, hon mer ketenkt tas Tanyël 12:2 am xpreche waar iwer tas himlix ufxtaye orer ti ferkreesung in te preetich aarwayt, woo ti keechner neekst xtil kehal hon in 1918. * Awer yets, ferxteen mer tas tiise wërter hon se tuun mit tëm ufxtaye fom toot woo im futuer, in te nay welt, pasiirt. Warom khene mer tas saan? Tas wort “xtaap” is aach penutst in Yoop 17:16 un petayt tas selwiche wii “Kraap”. Tas tsaycht tas Tanyël 12:2 am xpreche is iwer tas ufxtaye woo pasiire tuut noo te letste taache tsum ën khome un noom Armaxeton kriich.
7. (a) Wii soo wëre etliche uf keruuft fer tas “eewiche leepe”? (b) In was fer aat is tiise ufxtaye peser?
7 Awer was wil Tanyël 12:2 saan wën es saat tas etliche tuun fer tas “eewiche leepe uf xtaye”? Tas wil saan tas tii woo uf xtaye un Yeehoowa un Yeesus khëne lërne, orer wayter tëne peser khëne lërne, un torich ti 1.000 yoore tëne aan heere, tuun tsum xlus tas eewiche leepe kriin. (Yoo. 17:3) Tas wërt een “peser ufxtaye” sin wii tas woo etliche mënxe in te friirixe tsayte kriit hon. (Hep. 11:35) Warom? Wayl tiise imperfekte mënxe woo friier fom toot uf kextii sin, sin nochter noch mool kextorep.
8. In was fer aat tuun etliche fer “ti xaam un fer ti eewich uneer” uf xtaye?
8 Awer net al woo fom toot uf keruuft wëre, tuun Yeehoowa sayn inlërnung aan nëme. Tanyël sayn profetsii saat tas etliche tuun fer “ti xaam un fer ti eewich uneer” uf xtaye. Tii tuun een repëlix aanxtelung tsayche; tes weeche, wërt tëne sayn naame net im puuch fom leepe kexrip un tii tuun net tas eewiche leepe kriin. Xtats tas, tuun se “ti eewich uneer”, orer fernichtung, kriin. Soo, Tanyël 12:2 is am xpreche iwer was tsum xlus pasiire tuut mit al tii woo fom toot uf keruuft wëre, tëm noo sayn aanxtelung noo sayn ufxtaye. * (Apo. 20:12) Etliche tuun tas eewiche leepe kriin; anere, net.
TI AARWAYT FER “FIILE LAYT TSU TE KERECHTICHKHEET NËME”
9-10. (a) Tëm noo Tanyël 12:3, was noch tuut pasiire noo te kroos tripulatsyoon? (b) Weer tuut “soo wii te himel xayne”?
9 Lees Tanyël 12:3. * Was noch tuut noo te “xweyer tsayt” pasiire? Meyer hon xon kesiin was Tanyël 12:2 saat; awer te wersikel 3 saat noch etwas woo pasiirt noo te kroos tripulatsyoon.
10 Weer tuut “soo wii te himel xayne”? Yeesus sayn wërter in Matheus 13:43 helfe uns ti antwort fine: “In te tsayt, tuun ti kerechte soo xtark wii ti sun xayne, im Raych fon sayn Fater.” Wën mer siin was foer tiise tekst xteet, mërke mer tas Yeesus am xpreche waar iwer “ti khiner fom Raych”, es wil saan, sayn kesalpte priiter woo mit tëm im himlixe Raych tiine tuun. (Mat. 13:38) Soo, Tanyël 12:3 mus am xpreche sin iwer ti kesalpte un was se mache tuun in te Tausent Yoore Rechiirung.
Ti 144.000 tuun mit Yeesus Kristus xafe fer ti inlërnung aarwayt lënke woo torich ti 1.000 yoore pasiire tuut (Kuk te apsats 11.)
11-12. Was fer aarwayt tuun ti 144.000 torich ti 1.000 yoore mache?
11 Wii tuun ti kesalpte “fiile layt tsu te kerechtichkheet nëme”? Tii tuun mit Yeesus xafe fer een inlërnung prokram orkanisiire woo uf te eyert kemacht wërt torich ti 1.000 yoore. Ti 144.000 tuun net ploos wii kheeniche rechiire, awer tuun aach wii priister xafe. (Apo. 1:6; 5:10; 20:6) Tes weeche, tuun se ti aarwayt “fer ti natsyoone heele” uner xtitse — es wil saan, tuun ti mënxe helfe xrit noo xrit perfekt wëre. (Apo. 22:1, 2; Ese. 47:12) Sicher, tas wërt een kroos frooheet fer al ti kesalpte sin!
12 Awer, weer sin ti “fiile” woo tsu te kerechtichkheet kenom wëre? Too tepay sin tii woo fom toot uf keruuft wëre, tii woo te Armaxeton iwerleepe un ti khiner woo fiilaycht im paratiis uf te welt khome. Am ën fon te 1.000 yoore, wëre al ti mënxe uf te eyert perfekt. Awer in was fer momënt wërt tëne sayn naame mit “xtift” im puuch fom leepe kexrip?
TI LETST PROOP
13-14. Was mise al ti perfekte layt uf te eyert pewayse eep se khene tas eewiche leepe kriin?
13 Meyer mise uns erinere tas ploos wayl yemant perfekt is, es wil net saan tas eyer sicher tas eewiche leepe kriit. Tenk mool noo iwer Aatam un Ewa. Tii waare perfekt, awer tii miste Yeehoowa aan heere fer tas eewiche leepe kriin. Es is traurich, awer tii hon tas net kemacht. (Rom. 5:12)
14 Was fer wërt ti situatsyoon sin fon te mënxheet uf te eyert am ën fon te 1.000 yoore? Ti mënxe tuun al perfekt sin. Tuun tiise kanse perfekte mënxe Yeehoowa sayn rechiirung fer imer pay xteen? Orer tuun etliche sich soo wii Aatam un Ewa aan xtele — woo perfekt waare, awer noch soo untroy kep sin? Tiise frooche al mise keantwort wëre, awer wii?
15-16. (a) Wën tuut ti kans mënxheet een xans kriin fer sayn leaaliteet tsu Yeehoowa tsayche? (b) Was wërt te resultaat fon tiise proop sin?
15 Torich ti 1.000 yoore, playpt Satanaas inkexpërt. Torich tiise tsayt, tuut eyer nimant ap lënke. Awer, am ën fon te 1.000 yoore, wërt Satanaas pefrayt. Tan, tuut eyer fersuuche ti perfekte mënxe ap lënke. Tiise proop tuut een xans fer al ti perfekte mënxe uf te eyert kepe fer taytlich tsayche tas se Kot sayn naame respektiire un sayn rechiirung pay xteen. (Apo. 20:7-10) Was se in tiise tsayt mache, tuut tsayche ep se fertiine im puuch fom leepe fer imer rin kexrip wëre orer net.
16 Ti Piipel saat tas etliche tuun untroy sin, soo wii Aatam un Ewa. Tii tuun Yeehoowa sayn rechiirung net aan nëme. Was tuut mit tëne pasiire? Apokalipsis 20:15 saat uns: “Weer net im puuch fom leepe kexrip is, is in te fayer lakoo hin keworeft kep.” Yawool, tiise repëlixe layt wëre fer imer fernicht. Awer ti meyerste perfekte mënxe tuun tiise letst proop troy aus hale. Un sayn naame wëre fer imer im puuch fom leepe rin kexrip.
IN “TI TSAYT FOM ËN”
17. Was hot te engel fer Tanyël kesaat teet in unser tsayt pasiire? (Tanyël 12:4, 8-10)
17 Es is wunerlich se tenke iwer ales was im futuer pasiire tuut, kël? Awer Tanyël hot aach wichtiche informatsyoone kriit iwer was in unser tsayt — “ti tsayt fom ën” — pasiire teet. (Lees Tanyël 12:4 * , 8-10 *; 2 Tim. 3:1-5) Te engel hot fer Tanyël kesaat: “Ti woere khëntnis wërt raychlich pekhant kepe.” Yawool, Kot sayn folek teet peser ferxteen ti profetsiie fon Tanyël sayn puuch. Te engel hot aach iwer tiise tsayt kesaat: “Ti xlechte tuun tas xlechtes mache, un khee eene fon tëne tuut tas ferxteen.”
18. Was tuut klaych mit te xlechte layt pasiire?
18 Hayt, khan es aus siin tas ti xlechte prayche khee aprechnung weeche sayn xlechtichkheet mache. (Mal. 3:14, 15) Awer klaych, tuut Yeesus ti xlechte, woo soo wii kaprite sin, richte un tëne aus naner mache fon tëne woo soo wii xeef sin. (Mat. 25:31-33) Tiise xlechte layt tuun net ti kroos tripulatsyoon iwerleepe un wëre aach net uf keruuft fer in te nay welt leepe. Sayn naame wëre net im “aantenke puuch” rin kexrip, woo in Malakias 3:16 pexrip is.
19. Was sole mer yets mache, un warom? (Malakias 3:16-18)
19 Yets is ti tsayt fer se pewayse tas mer net tepay sin pay te xlechte. (Lees Malakias 3:16-18.) * Yeehoowa is am samele tii woo eyer wii sayn “ekstra aychentum” siit, es wil saan, layt woo weyert fer tëm hon. Kewis, wole mer in tiise krup tepay sin.
Een wunerlich tsayt waart uns: meyer siin Tanyël, unser keliipte un fiil anere uf xtaye fer sayn teel in te nay welt kriin! (Kuk te apsats 20.)
20. Was is tas letste ferxpreche woo tsu Tanyël kemacht kep is, un warom tuust tuu sayn erfiilung hërtslich waarte?
20 Meyer sin wërklich in wunerliche tsayte am leepe. Awer noch wunerlicher tinge tuun hatich pasiire. Palt, siin mer tas ën fon te kans xlechtichkheet. Nochter, siin mer ti erfiilung fon Yeehoowa sayn ferxpreche fer Tanyël: “Am ën fon te taache tuust tuu uf xtaye fer tayn teel kriin.” (Tan. 12:13) Kewis, pist tuu hërtslich am waarte te taach wën Tanyël un tayn keliipte fom toot uf xtaye tuun. Fer tat sin, mach tayn pestes fer troy plaype. Un tuu khanst ti sicherheet hon tas tayn naame in Yeehoowa sayn puuch fom leepe kexrip playpt.
LIIT 80 “Xmekt un siit wii Yeehoowa is kuut”
^ Tiise artikel ënert ti ausleyung iwer ti kroos inlërnung aarwayt woo in Tanyël 12:2, 3 pexrip is. Meyer tuun lërne wën tiise aarwayt pasiirt un weer een teel too tepay hot. Meyer tuun aach siin wii tiise inlërnung aarwayt ti layt foer perayte tuut fer ti letst proop, am ën fon Yeesus Kristus sayn Tausent Yoore Rechiirung.
^ Fiilaycht, tuut tas ufxtaye fom toot aan fange mit tëne woo troy kextorep sin torich ti letste taache. Nochter, wëre uf keruuft tii woo foer tëne kextorep sin, xeneratsyoon noo xeneratsyoon. Wën tas soo pasiirt, khan yeete xeneratsyoon wilkhome ti layt woo se perseenlich kekhënt hon. Wën ti Piipel iwer tas himlixe ufxtaye xprecht, saat se tas yeete eene wërt uf keruuft “wën sayn mool in te ray is”. Soo, ekaal wii tas eyertlich ufxtaye pasiirt, khene mer klaape tas es mit ortnung kemacht wërt. (1 Kor. 14:33; 15:23)
^ (Isaiias 11:9, 10) Es wërt khee xaate kemacht un aach khee fernichtung uf mayne kanse hayliche përich, wayl ti eyert wërt sicher fol mit Yeehoowa sayn khëntnis, soo wii tas waser tas kanse meer tekt. 10 Aan tiise taach, wërt Jesë sayn wortsel sich uf xtele, wii een tsayche fer ti layt. Pay iim, wëre ti natsyoone oryentiirung suuche, un sayn woonung wërt hërlich sin.
^ (Tanyël 12:1) “In tiise tsayt, tuut Michel sich uf xtele, te kroose prins woo xteen playpt fer nutse fer tayn folek pringe. Un es wërt een xweyer tsayt kepe — ti xlimste fom aanfang fon te natsyoone aan. In tiise tsayt, wërt tayn folek keret, yeete eene woo ins puuch kexrip is.
^ (Tanyël 12:2) Un fiile fon tii woo im xtaap fon te eyert in kexloof sin, wëre wach, etliche fer tas eewiche leepe, anere fer ti xaam un fer ti eewich uneer.
^ Tas ënert ti ausleyung woo mer friier kep hon im puuch Preste Atenção à Profecia de Daniel! kapitel 17, un in A Sentinela 1te Yuuli fon 1987, sayte 21-25.
^ Im keeche teel, ti wërter “kerechte” un “unkerechte” fon Aphostele sayn Kexicht 24:15 un ti wërter “tii woo kuutes kemacht hon” un “tii woo xlechtes kemacht hon” in Yoohan 5:29, hale sich traan aan te aanxtelung woo tii woo uf keruuft wëre hate foer se xtërpe.
^ (Tanyël 12:3) “Un tii woo ferninftichkheet hon, tuun soo wii te himel xayne; un tii woo fiile layt tsu te kerechtichkheet nëme, tuun soo wii ti xtërne xayne, fer ti kans eewichkheet.
^ (Tanyël 12:4) “Un tuu, Tanyël, tuu tiise wërter kehaym hale un tuu tas puuch seliire pis ti tsayt fom ën. Fiile tuun tas uner suuche, un ti woere khëntnis wërt raychlich pekhant kepe.”
^ (Tanyël 12:8-10) Ich hon keheert, awer net ferxtan. Tes weeche, hon ich kefroot: “Oo mayn hër, was tuut too teweeche pasiire?” 9 Too hot eyer kesaat: “Kee, Tanyël, wayl tiise wërter mise kehaym un seliirt kehal wëre pis ti tsayt fom ën. 10 Fiile tuun sich rayn un ways mache. Un ti xlechte tuun tas xlechtes mache, un khee eene fon tëne tuut tas ferxteen. Awer tii woo ferninftich sin, tuun tas ferxteen.
^ (Malakias 3:16-18) Tan, tii woo tiif respekt tsu Yeehoowa hate, hon eene mit te anere kexproch, yeete eene mit sayn pruuter, un Yeehoowa hot mit acht keheert. Un forich tëm is een aantenke puuch kexrip kep fer tii woo tiif respekt tsu Yeehoowa hate un fer tii woo aan tëm sayn naame traan ketenkt hon. 17 “Tii wëre mayn — saat Yeehoowa fom militeer — im taach woo ich se tsu mayn ekstra aychentum mache. Ich wëre mitlaytich mit tëne sin soo wii een man mitlaytich is mit sayne soon woo iim tiint. 18 Un teyer tuut noch mool te unerxiit siin tswixich ti kerechte un ti xlechte layt, tswixich tëm woo Kot tiint un tëm woo tëm net tiint”.
