XTUUTYUM ARTIKEL 39
Is tayn naame im “puuch fom leepe”?
“Forich tëm is een aantenke puuch kexrip kep fer tii woo tiif respekt tsu Yeehoowa hate.” (MALAKIAS 3:16)
LIIT 61 Keet forem Kot sayn Tsayer!
WAS TUUN MER SIIN? *
Torich ti yoore, hot Yeehoowa wayter naame im “puuch fom leepe” rin kexrip (Kuk ti apsetse 1-2.)
1. Tëm noo Malakias 3:16, was fer puuch is Yeehoowa am xraype, un was is in tiise puuch trin?
TORICH tausente yoore, is Yeehoowa een ekstra puuch am xraype. Tiise puuch hot een list naame un tiise list fangt aan mit tëm eyerste troye tsayer: Apël. * (Luk. 11:50, 51) Fon Apël sayn taache aan, hot Yeehoowa fiil anere naame in tiise puuch rin kexrip; hayt, sin milyoone naame tat trin. In te Piipel, is tiise puuch kenënt wii tas “aantenke puuch”, “tas puuch fom leepe”, un “te rol fom leepe”. In tiise artikel, tuun mer tas wii “puuch fom leepe” nëne. (Lees Malakias 3:16; * Apo. 3:5; 17:8)
2. Was fer sorte layt hon sayn naame im puuch fom leepe, un wii khene mer unser naame in tiise puuch rin kexrip kriin?
2 Tiise ekstra puuch hot te naame fon ale tii woo Yeehoowa mit tiif respekt aan peete un woo tëm sayn naame liipe. Tii hon ti xans fer eewiche leepe kriin. Hayt, khene mer unser naame in tiise puuch rin kexrip kriin wën mer een ticht fraayntxaft mit Yeehoowa paue torich Yeesus sayn fray khaaf opfer. (Yoo. 3:16, 36) Meyer al wole hon tas unser naame in tiise puuch kexrip wërt — ekaal ep unser hofnung im himel orer uf te eyert leepe is!
3-4. (a) Tuun mer tas eewiche leepe kriin ploos wayl unser naame hayt im puuch fom leepe is? Lee tas aus. (b) Iwer was tuun mer in tiise artikel un im neekste xpreche?
3 Wil tas saan tas ale woo sayn naame in tiise puuch hon, sicher tas eewiche leepe kriin tuun? Yeehoowa sayn wërter fer Mooses, in Eeksotus 32:33, kepe uns ti antwort. Yeehoowa hot kesaat: “Ich tuun fon mayn puuch aus wixe weer keeche mich kesint hot.” Tes weeche, ti naame woo hayt in tiise puuch kexrip sin, khene aus kewixt wëre. Es is wii wën Yeehoowa am aanfang ti naame mit playxtift kexrip hët. (Apo. 3:5) Meyer mise uns aan xtrenge tas unser naame in tiise puuch kexrip playpt, pis tee in een aat kexrip wërt woo eyer net mee aus kewixt wëre khan — wii wën eyer mit een xtift kexrip weyer.
4 Awer fiilaycht khene etliche frooche foer khome. Tsum payxpiil: Was saat ti Piipel iwer tii woo sayn naame im puuch fom leepe hon un tii woo sayn naame net tat hon? Wanee tuun tii woo sayn naame im puuch fom leepe hale tas eewiche leepe kriin? Un tii woo kextorep sin un khee xans hate fer Yeehoowa khëne lërne? Is es tëne meechlich sayn naame in tiise puuch rin kexrip kriin? Tee too un te neekste artikel tuun tiise frooche antworte.
WAS FER NAAME SIN IN TËM PUUCH FOM LEEPE?
5-6. (a) Tëm noo Filiper 4:3, was fer krup hot sayn naame im puuch fom leepe? (b) Wanee wëre sayn naame fer imer im puuch fom leepe kexrip sin?
5 Was fer naame sin im puuch fom leepe kexrip? Fer tiise frooch antworte, tuun mer iwer 5 krupe layt xpreche. Tswixich tëne, etliche hon sayn naame im puuch fom leepe; anere, net.
6 Im 1te krup, sin tii woo raus kesuucht kep sin fer mit Yeesus im himel rechiire. Sin tëne sayn naame im puuch fom leepe hayt? Yawool. Tëm noo was Phaul kesaat hot fer sayn mitaarwayter in Filipos, sin ti naame fon te kesalpte, woo in kelaat sin fer mit Yeesus rechiire, xon im puuch fom leepe hayt kexrip. (Lees Filiper 4:3.) * Awer fer tëne sayn naame im puuch fom leepe hale, mise se troy plaype. Wën se tsum xlus markiirt sin, wëre sayn naame fer imer im puuch fom leepe kexrip. Tas pasiirt eep se xtërpe orer foer te aanfang fon te kroos tripulatsyoon. (Apo. 7:3)
7. Wii helft uns Apokalipsis 7:16, 17 raus fine wanee tas kroose folek fer imer sayn naame im puuch fom leepe kexrip kriit?
7 Im 2te krup, is tas kroose folek fon anere xeef. Sin tëne sayn naame im puuch fom leepe hayt? Yawool. Wëre tëne sayn naame noch im puuch fom leepe sin noo se te Armaxeton iwerleepe? Yawool. (Apo. 7:14) Yeesus hot kesaat tas tiise krup layt, woo soo wii xeef sin, “tuun tsum eewiche leepe keen”. (Mat. 25:46) Awer tii woo te Armaxeton iwerleepe tuun net klaych tas eewiche leepe kriin. Tëne sayn naame plaype im puuch fom leepe, wii wën se mit playxtift kexrip weyere. In te Tausent Yoore Rechiirung, tuut Yeesus se “wii een xeefer uf phase un tsu waser kwele fom leepe lënke”. Tii woo Yeesus sayn lënkung aan heere, un woo tsum xlus troy foer Yeehoowa aus kexproch wëre, tuun sayn naame im puuch fom leepe fer imer kexrip kriin. (Lees Apokalipsis 7:16, 17.) *
8. Weer hot net sayn naame im puuch fom leepe, un was tuut mit tëne pasiire?
8 Im 3te krup, sin ti kaprite woo wëre im Armaxeton fernicht. Sayn naame sin net im puuch fom leepe. Yeesus hot kesaat tas tii tuun tsu “eewich fernichtung keen”. (Mat. 25:46) Unich Yeehoowa sayn lënkung, hot te aphostel Phaul kexrip tas “tii wëre kericht un kextrooft mit eewich fernichtung”. (2 The. 1:9; 2 Phe. 2:9) Tas selwiche kilt fer tii woo torich tas mënxliche kexicht fer kërn keeche te hayliche kayst kesint hon. Tii kriin aach ti eewich fernichtung, net tas eewiche leepe. Es is taytlich tas tii wëre net fom toot uf keruuft. (Mat. 12:32; Mar. 3:28, 29; Hep. 6:4-6) Wole mer yets xpreche iwer 2 krupe layt woo uf keruuft wëre fer uf te eyert se leepe.
TII WOO FOM TOOT UF KERUUFT WËRE
9. Tëm noo Aphostele sayn Kexicht 24:15, was fer 2 krupe wëre uf keruuft fer too uf te eyert leepe, un was is ti unerxiit tswixich tëne?
9 Ti Piipel xprecht iwer 2 krupe layt woo uf keruuft wëre mit te hofnung fer uf te eyert fer imer leepe — ti “kerechte” un ti “unkerechte”. (Lees Aphostele sayn Kexicht 24:15.) * Ti “kerechte” sin tii woo Yeehoowa troy ketiint hon wii se noch am leepe waare. Awer, ti “unkerechte” sin tii woo Yeehoowa net ketiint hon eep se kextorep sin. Tii waare net kerecht foer Yeehoowa sayn aue, wayl se net keleept hon tëm noo Sayn kerechte kesetse. Ti 2 krupe wëre fom toot uf keruuft; awer wil tas saan tas sayn naame im puuch fom leepe sin? Fer ti antwort fine, wole mer iwer yeete krup xpreche.
10. Warom wëre ti “kerechte” uf keruuft, un was fer priwilëj tuun etliche fon tëne kriin? (Kuk “Frooche fon te leeser” in tiise piichelche fer mee iwer tas ufxtaye too uf te eyert lërne.)
10 Im 4te krup, sin ti “kerechte”. Eep se kextorep sin, waare sayn naame im puuch fom leepe. Awer waare sayn naame fon tiise puuch aus kewixt wii se kextorep sin? Nee, wayl tii sin noch in Yeehoowa sayn ketanke “am leepe”. Yeehoowa “is Kot, net fon te toote, awer fon te lepeentiche, wayl fer tëm, tuun se al leepe”. (Luk. 20:38) Tas wil saan tas, wën ti kerechte uf keruuft wëre fer uf te eyert se leepe, is tëne sayn naame noch im puuch fom leepe, awer am aanfang “mit playxtift”. (Luk. 14:14) Etliche fon tiise kerechte woo uf keruuft wëre, tuun te priwilëj kriin fer wii “prinse uf te kans eyert” tiine. (Psal. 45:16)
11. Was prayche ti “unkerechte” noo sayn ufxtaye lërne, tas sayn naame im puuch fom leepe kexrip wëre?
11 Yets, wole mer iwer te 5te krup xpreche: ti “unkerechte”. Ti layt in tiise krup waare net kerecht foer Yeehoowa sayn aue wii se kextorep sin, fiilaycht wayl se tëm sayn kesetse net kekhënt hon. Tes weeche, sin sayn naame net im puuch fom leepe kexrip kep. Awer Kot tuut se fom toot uf ruufe tas se khene een xans kriin fer sayn naame tat hon. Tiise “unkerechte” tuun fiil hilef prayche. Eep se kextorep sin, hon etliche fon tëne xrekliche tinge kemacht. Tes weeche, wërt es neetich tëne in lërne se leepe tëm noo Yeehoowa sayn kerechte kesetse. Fer tas hin kriin, tuut Kot sayn Raych ti kreest inlërnung aarwayt lënke, woo xon uf te eyert kemacht kep is.
12. (a) Weer tuut ti unkerechte in lërne? (b) Was tuut pasiire mit tëne woo net aan wëne wole was se lërne?
12 Weer tuut ti unkerechte in lërne? Tas kroose folek un ti kerechte woo uf keruuft wëre. Was mise ti unkerechte mache tas sayn naame im puuch fom leepe kexrip wëre? Tii mise een fraayntxaft mit Yeehoowa paue un aach sich tsu tëm tetikiire. Fom himel aus, tuun Yeesus un ti kesalpte tiise unkerechte peopachte fer se siin wii se sich aan xtele tëm noo was se lërne. (Apo. 20:4) Tii woo net aan wëne wole was se lërne, wëre net erlaupt wayter leepe — opwool se fiilaycht 100 yoore alt sin. (Isa. 65:20) Yeehoowa un Yeesus khene hërtse leese un tii tuun net erlaupe tas yemant xaate in te nay welt pringt. (Isa. 11:9; 60:18; 65:25; Yoo. 2:25)
UFXTAYE FERS LEEPE UN FERS KERICHT
13-14. (a) Friier, wii hon mer Yeesus sayn wërter in Yoohan 5:29 ferxtan? (b) Was mise mer iwer tiise wërter mërke?
13 Yeesus hot aach kexproch iwer tii woo uf keruuft wëre fer uf te eyert se leepe. Tee hot, tsum payxpiil, kesaat: “Ti tsayt is am khome wën al tii woo in te kreeper sin, tuun tëm sayn xtim heere un raus khome: tii woo kuutes kemacht hon, fer een ufxtaye fers leepe; un tii woo xlechtes kemacht hon, fer een ufxtaye fers kericht.” (Yoo. 5:28, 29) Was wolt Yeesus saan?
14 Friier, hon mer aus keleet tas Yeesus sayn wërter se tuun hate mit was ti layt mache teete noo sayn ufxtaye; es wil saan, etliche teete tsum leepe khome un kuute tinge mache, awer anere teete tsum leepe khome un xlechte tinge mache. Awer mërk mool tas Yeesus saat net tas tii woo uf keruuft wëre tuun tas kuutes mache orer tuun tas xlechtes mache. Tee saat tas se tas “kuutes kemacht hon” orer tas “xlechtes kemacht hon”. Tes weeche, khene mer saan tas Yeesus am xpreche waar iwer tas kuutes orer tas xlechtes woo se kemacht hon foer sayn toot un ufxtaye. Un tas xtimt, wayl nimant wërt erlaupt tas xlechtes in te nay welt mache. Soo, was petayte Yeesus sayn wërter iwer “een ufxtaye fers leepe” un “een ufxtaye fers kericht”?
15. Weer tuut “een ufxtaye fers leepe” kriin, un warom?
15 Ti kerechte, woo tas kuutes foer sayn toot kemacht hon, tuun “een ufxtaye fers leepe” kriin, wayl sayn naame xon im puuch fom leepe sin. Tas wil saan tas “tii woo kuutes kemacht hon” in Yoohan 5:29 sin ti selwiche wii ti “kerechte” fon Aphostele sayn Kexicht 24:15. Tiise ausleyung xtimt mit was Romaaner 6:7 saat: “Weer kextorep is, is fon sayn sint fray kemacht kep.” Tes weeche, wën tiise kerechte kextorep sin, hot Yeehoowa tëne sayn sinte fertsayt; awer Yeehoowa tuut sich erinere fon te troyheet woo se ketsaycht hon wii se noch am leepe waare. (Hep. 6:10) Kewis, tiise kerechte woo uf keruuft wëre, mise wayter troy plaype tas tii khene sayn naame im puuch fom leepe hale.
16. Was petayt tas “ufxtaye fers kericht”?
16 Un tii woo tas xlechtes kemacht hon foer sayn toot? Opwool Yeehoowa sayn sinte fertsayt hot wii se kextorep sin, hon se net Yeehoowa aan kepeet wii se noch am leepe waare. Tëne sayn naame sin net im puuch fom leepe. Tes weeche, “tii woo xlechtes kemacht hon” sin ti selwiche wii ti “unkerechte” fon Aphostele sayn Kexicht 24:15. Tii tuun een “ufxtaye fers kericht” kriin. * Es petayt tas Yeesus tuut tiise unkerechte peopachte. (Luk. 22:30) Noo een tsayt, tuut Yeesus wise ep se fertiine sayn naame im puuch fom leepe kexrip kriin. Tiise unkerechte mise ti xlecht aanxtelung woo se hate ënere un sich tsu Yeehoowa tetikiire. Ploos tan khene se sayn naame im puuch fom leepe kexrip kriin.
17-18. Was mise al tii woo uf keruuft wëre in te nay welt mache, un was sin ti “aktsyoone” fon Apokalipsis 20:12, 13?
17 Torich ti Tausent Yoore Rechiirung, wëre naye role mit kesetse uf kemacht. Al woo uf keruuft wëre — ekaal ep se kerechte orer unkerechte foer sayn toot waare — mise tiise naye kesetse aan heere. Te aphostel Yoohan pexraypt was eyer in een wisyoon kesiin hot: “Ich hon ti toote — ti kroose un ti kleene — kesiin foer tëm troon kextan un role sin uf kemacht kep. Awer een aner rol is uf kemacht kep: te rol fom leepe. Ti toote sin kericht kep tëm noo was in te role kexrip waar, tëm noo sayn aktsyoone.” (Apo. 20:12, 13)
18 Tëm noo was fer “aktsyoone” wëre tii woo uf xtaye kericht? Ti aktsyoone woo se kemacht hon foer sayn toot? Nee! Eriner tich tas Yeehoowa hot tëne sayn sinte fertsayt wii se kextorep sin. Tes weeche, too, “sayn aktsyoone” petayte net was se kemacht hon foer sayn toot. Xtats tas, xprecht te tekst iwer sayn aktsyoone noo se in te nay welt in kelërnt wëre. Soo kaar troye mëner wii Noee, Samuël, Tawi un Tanyël mise iwer Yeesus lërne un tëm sayn fray khaaf opfer aan nëme. Yawool, tiise troye mëner mise fiile tinge lërne; soo, xtel tich mool foer wii fiil mee mise ti unkerechte lërne!
19. Was tuut pasiire mit tëne woo tiise wunerlich oportuniteet ap xtose?
19 Was tuut pasiire mit tëne woo tiise wunerlich oportuniteet ap xtose? Apokalipsis 20:15 saat uns: “Weer net im puuch fom leepe kexrip is, is in te fayer lakoo hin keworeft kep.” Yawool, tii wëre fer imer fernicht. Tes weeche, is es aarich wichtich tas mer uns sicher lose tas unser naame im puuch fom leepe is un tas eyer tat playpt!
Een pruuter tuut in tëm kroos inlërnung prokram mit helfe, woo torich ti Tausent Yoore Rechiirung pasiire tuut (Kuk te apsats 20.)
20. Was fer wunerlich aarwayt wërt in te Tausent Yoore Rechiirung kemacht? (Kuk tas pilt am aanfang fom piichelche.)
20 Ti Tausent Yoore Rechiirung tuut sicher een froo tsayt sin! Ti kreest inlërnung aarwayt woo Kot sayn folek xon uf te eyert kemacht hot, tuut tan pasiire. In tiise tsayt, mise ti kerechte un ti unkerechte pewayse tas se wilich sin fer Kot sayn kesetse aan heere. (Isa. 26:9; Aph. 17:31) Wii wërt tiise inlërnung aarwayt kemacht? Te neekste artikel tuut uns helfe tiise wunerlich kexenk ferxteen un weyert fer tëm kepe.
LIIT 147 Kot ferxprecht uns eewiches leepe!
^ Tiise artikel pringt een ënerung in te aat wii mer Yeesus sayn wërter in Yoohan 5:28, 29 friier ferxtan hon, iwer tas “ufxtaye fers leepe” un “fers kericht”. Meyer tuun siin was yeete eene fon tiise ufxtaye petayt un weer tuut yeete eene fon tëne kriin.
^ Yeehoowa hot aan kefang tiise puuch xraype am “aanfang fon te welt”. Too, tas wort “welt” petayt ti layt woo khene nutse kriin fon Yeesus sayn fray khaaf opfer. (Mat. 25:34; Apo. 17:8) Tes weeche, siit es aus tas Apël te eyerste is woo sayn naame im puuch fom leepe kexrip kriit hot.
^ (Malakias 3:16) Tan, tii woo tiif respekt tsu Yeehoowa hate, hon eene mit te anere kexproch, yeete eene mit sayn pruuter, un Yeehoowa hot mit acht keheert. Un forich tëm is een aantenke puuch kexrip kep fer tii woo tiif respekt tsu Yeehoowa hate un fer tii woo aan tëm sayn naame traan ketenkt hon.
^ (Filiper 4:3) Un ich ferlange tich aach, mayn woere mitaarwayter, tas tuu wayter tiise fraae helfst. Tii hon sich mit mich weeche ti kuute notisye aan kextrengt, tepay mit Klemente un anere fon mayne mitaarwayter, woo sayne naame im puuch fom leepe hon.
^ (Apokalipsis 7:16, 17) Tii tuun khee hunger mee xpiire, un aach khee torst, un ti sun un ti hits tuun se nii mee kweele, 17 wayl tas Lam, woo in te mite fom troon is, tuut se wii een xeefer uf phase un tsu waser kwele fom leepe lënke. Un Kot tuut yeete treene fon tëne sayn aue ap trokne.”
^ (Aphostele sayn Kexicht 24:15) Un ich hon hofnung aan Kot, hofnung woo tiise mëner aach hon, tas es een ufxtaye fom toot kept fon te kerechte soo wii fon te unkerechte.
^ Friier, hon mer aus keleet tas tas wort “kericht” petayt was nekatiiwes orer yemant xultich aus xpreche. In woerheet, tiise wort khan tas petayte. Awer es siit aus tas too, hot Yeesus tas wort “kericht” penutst fer se xpreche iwer yemant mit acht kuke, tëm peopachte. Orer wii een kreekix piiplix wërterpuuch saat: “yemant sayn aanxtelung noo kuke”.
