Klaych noo 1940, hon mayn eltere ti Piipel mit Yeehoowa sayn Tsayer xtutiirt. Mit te tsayt, hon se noo kelos, awer mayn mama hot wayter ti piichelcher Te Wachthorm un Wacht Uf! kriit. In 1950, is een internatsyonaal konkrës in Nay York pasiirt un mayn familye is kang.

Klaych tëm noo, hot te pruuter Lawrence Jeffries aan kefang uns pesuuche. Tee hot fersuucht mich helfe ti woerheet lërne. Am aanfang, hon ich ketenkt tas Yeehoowa sayn Tsayer miste sich aan te politik rin mexe un im militeer tiine. Ich hon tëm kesaat: “Wën nimant fon unser lant tsum kriich keengt, khente ti faynte khome un unser lant iwerfale.” Mit ketult, hot te pruuter Lawrence mich tenke kemacht: “Was mënst tuu: was teet Kot mache wën al in unser lant tëm tiine teete un ti faynte khemte fer uns atakiire?” Was eyer too triwer un iwer anere sache kesaat hot, hot mich keholef ferxteen tas ich ferkheert waar. Un tes weeche, wolt ich mee iwer ti Piipel lërne.

Mayn mama hat fiile alte etitsyoone fon Te Wachthorm un Wacht Uf! im keeler uf keraumt; torich fiile xtune, hon ich se kelees. Mit te tsayt, hon ich kemërkt tas ich ti woerheet am lërne waar. Tes weeche, hon ich aan kenom ti Piipel mim pruuter Lawrence xtutiire. Ich hon aach aan kefang imer in te fersamlunge keen. Ich hon keliipt was ich kelërnt hon un ich sin een puplikatoer fon te kuute notisye kep. Was ich fon mayn leepe mache wolt, hot sich keënert wii ich ferxtan hon tas ‘Yeehoowa sayn kroose taach ticht is’. (Sof. 1:14) Yets, wolt ich net mee tsu te uniwersiteet keen. Yets, wolt ich anere helfe ti piiplix woerheet lërne.

 Am 13^te yuuni fon 1956, sin ich fërtich mit te mitel xuul kep. Tray taache xpeeter, hon ich mich taafe kelos in een sirkuyt konkrës. Ich teet mayn leepe penutse fer lërne un anere in lërne iwer Yeehoowa. Awer, ich wust noch net wii fiil seechen mich am waarte waare.

Ich sin een rekulaar pyoneer kep 6 moonate noo mayn taaf. Unser Raych Tiinst, Teetsemper fon 1956, hat een artikel mim theema: “Khanst tuu tiine woo ti neetichkheet kreeser is?” Yaa, ich khent! Ich wolt in een plats helfe woo weenich layt ti kuute notisye kepreeticht hon. (Mat. 24:14)

Ich hon mich pis Edgefield, Siit Carolina, kewanert. Es waare ploos 4 puplikatoore in te kemaynt… awer yets waare mer 5. Meyer hon ti fersamlunge im haus fon een pruuter kehal. Yeete moonat, hon ich 100 xtune in te preetich aarwayt fertrip. Ich hat imer fiil se tuun wayl ich ti preetich aarwayt kefiirt hon un aach teele in te fersamlunge kehat hon. Es is kans interesant tas, woo mee ich kexaft hon, woo mee hon ich iwer Yeehoowa kelërnt.

Ich hon ti Piipel xtutiirt mit een fraa woo een peërtichungs haus hat in Johnston, een xtat phaar kiloometer wech. Tii hot mich een halpe taach aarwayt kep; un hot uns kelos een kleen kepay woo se hat wii Raych Saal penutse.

Jolly Jeffries, te soon fom pruuter woo mayn Piipel leerer waar, is fon Brooklyn, Nay York, khom fer mit mich wii pyoneer tiine. Meyer hon in een kleene trailer kewoont, woo een pruuter uns keporicht hat.

Im siit, hot ma weenich kelt kriit. Fer yeete taach woo mer kexaft hon, hon mer 2 orer 3 tolare kriit. Een mool, hon ich mayn letste nikele penutst fer ese im merkaate khaafe. Wii ich raus kang sin, is een man ticht khom un hot mich kefroot: “Wilst tuu xafe? Ich petsaale tich 1 tolar ti xtun.” Tan, torich 3 taache, mayn aarwayt waar een paueray plats sauwer lose. Fer mich, waars taytlich tas Yeehoowa mich am helfe waar in Edgefield plaype. Opwool ich net fiil kelt hat, sin ich in 1958 tsum internatsyonaal konkrës in Nay York kang.

Im 2^te taach fom konkrës, is was ekstras pasiirt: ich hon Ruby Wadlington khëne kelërnt. Tii waar wii rekulaar pyoneerin in Gallatin, Tennessee am tiine. Wayl meyer 2 wii misyoneere tiine wolte, sin mer tsu te Xileat fersamlung im konkrës kang. Xpeeter, hon mer aan kefang uns priife naner xike. Too, sin ich in kelaat kep fer een puuplix reet in Gallatin kepe. Ich hon tiise keleechenheet penutst fer Ruby frooe ep se wolt sich mit mich hayrate. Noo tas, hon ich mich tsu Ruby sayn kemaynt kewanert un mer hon uns kehayrat in 1959.

Wii ich 23  yoore alt waar, waar ich in Gallatin in kesetst wii was mer hayt khëne wii kortenatoer fon te elteste khërperxaft. Te pruuter Charles Thompson waar kraat wii sirkuyt superintentent in  kextelt wii eyer unser kemaynt pesuucht hot. Tee hat fiil speryens. Awer, tee hot mich kefroot: “Was mënst tuu: was prayche ti priiter? Wii hon ti anere sirkuyt superintentente tas uf kephast?” Mit tëm, hon ich kelërnt tas es kuut is frooche mache un ti tinge kuut ferxteen foer een ëntxlus mache.

In maay fon 1964, sin ich in kelaat kep fer ti Raych Tiinst Xuul mache. Ti xuul teet een moonat hale un weyer in Siit Lansing (Nay York) kehal. Ti leerer fon te xuul hon mich uf kemuut imer mee iwer Yeehoowa lërne un tichter pay tëm khome.

In yanuer fon 1965, hot ti filyaal mich ferlangt fer sirkuyt superintentent wëre un ti kemaynte mit Ruby pesuuche. Unser eyerste sirkuyt waar mechtich kroos: tee is fon Knoxville (Tennessee) neekst pis Richmond (Virginia) kang. Tepay, waare kemaynte in Nort Carolina, Kentucky un Oëst Virginia. Im siit fon te Fereenichte Xtaate fon Amërika, hon ti kesetse noch ferpoot tas ti xwartse un ti wayse layt sich fersamele teete. Tes weeche, hon ich ploos ti kemaynte mit xwartse priiter pesuucht. Ti priiter waare aarm un meyer hon kelërnt se teele was mer hate mit tëne. Een sirkuyt superintentent mit fiil speryens hot mich een wichtich lisyoon in kelërnt: “Say een pruuter, net een xëf. Ploos wën se tich wii een pruuter siin, khanst tuu ti kemaynt helfe.”

Wii mer een kleen kemaynt am pesuuche waare, hot Ruby een xtuutyum mit een yung fraa aan kefang. Tii hat een meetche woo ploos 1 yoer alt waar. Wii nimant in te kemaynt tas xtuutyum wayter fiire khont, hot Ruby tas kemacht torich priife. In unser neekst pesuuch, is ti fraa in al ti fersamlunge khom. Noo heyer, 2 spetsyaale pyoneerine hon sich pis tat hin kewanert, un hon wayter tas xtuutyum kefiirt. Klaych tëm noo, hot ti fraa sich taafe kelos. In 1995 — unkefeer 30 yoore xpeeter —, is een yunge xwester mit Ruby fertseele khom, im Petël fon Patterson. Tas waar ti tochter fon te fraa woo mit Ruby xtutiirt hat! Tii un sayn man waare xiiler in te 100^te klaas fon te Xileat Xuul.

Unser tsweete sirkuyt waar in Florida. In tiise tsayt, praychte mer een khare un meyer hon een kans pilich khaaft. Awer, xon in te eyerste woch, hot ti waser pump noo kelos se pariire. Meyer hate khee kelt fer tas kans mache. Ich hon mich traan ketenkt fon een pruuter woo uns fiilaycht helfe khont un ich hon tëm aan keruuft. Te pruuter hot ferlangt fer eene fon sayn aarwayter unser khare kans mache. Nochter, wolt te pruuter khee kelt aan nëme. “Tas is xon fërtich — hot eyer kesaat. — Teyer praycht mich niks petsaale.” Tee hot uns soo kaar kelt wii kexenk kep! Es waar een xeen payxpiil iwer wii Yeehoowa sayn tiiner uf phast. Tas hot uns erinert krooshërtslich mit te anere sin.

Imer wën mer ti kemaynte pesuucht hon, sin mer in te hayser fon te priiter keplip. Tes weeche, hon mer fiile kuute fraaynte kemacht. Een mool, hat ich aan kefang tas relatooryum iwer ti kemaynt truke in mayn xrayp maxiin. Un ich hon tas tat kelos fer tas xpeeter fërtich mache. Wii ich foernachts hëm khom sin, hon ich kemërkt tas tas relatooryum xon “fërtich” waar! — een puup woo 3  yoore alt waar, hat mich “keholef”. Ich hon een lang tsayt mit tëm too triwer kexpiilt.

In 1971, hon ich een priif mit een nay insetsung kriit: ich teet wii tistrikt superintentent in Nay York tiine. Meyer waare tas net am waarte! Wii mer uns pis tat hin kewanert hon, waar ich ploos 34  yoore alt. Ich waar te eyerste xwartse tistrikt superintentent woo ti priiter tat hate un tii hon mich hërtslich wilkhom.

Wii tistrikt superintentent, hon ich kërn yeete wochën iwer Yeehoowa in kelërnt in te sirkuyt konkrëse. Fiile fon te sirkuyt superintentente hate mee speryens wii ich. Eene hat ti reet fon mayn taaf kemacht. Een aner, Theodore Jaracz, is xpeeter een mitkliit fon te Rechiirente Khërperxaft kep. Es waare aach fiile speryente priiter woo im Petël fon Brooklyn am tiine waare. Awer ich khan mit frooheet saan tas ti sirkuyt superintentente un ti peteliter hon mich kuut pehantelt. Ich hon mit mayn aychne aue kesiin tas se liipliche xeefer waare, woo uf Kot sayn Wort ketraut hon un woo ti Orkanisatsyoon troy uner xtitst hon. Weeche  sayn teemuut, waars laycht fer mich wii tistrikt superintentent tiine.

In 1974, hot ti Rechiirente Khërperxaft een aner krup sirkuyt superintentente wii tistrikt superintentente in kesetst. Ich sin noch mool een sirkuyt superintentent kep, un yets solt ich tiine in Siit Carolina. In tiise tsayt, waars net mee neetich in te Fereenichte Xtaate fon Amërika ti xwartse un wayse kemaynte aus naner plaype. Ti priiter un xwestere sin mechtich froo weeche tas kep.

Am ën fon 1976, hon ich een aner sirkuyt kriit: es waar in Georgia, tswixich Atlanta un Columbus. Ich khan mich noch traan tenke fon een peërtichungs reet woo ich kemacht hon. Finef xwartse khiner sin kextorep wayl phaar layt hate fer kërn fayer in tëne sayn haus traan ketuun. Ti mama is tsum krankehaus kenom kep weeche sayn wee. Fiile xwartse un wayse Yeehoowa sayn Tsayer sin tsum krankehaus khom fer ti eltere treeste. Ich hon kesiin tas ti priiter sayn liip aarich kroos waar. Wën Kot sayn tiiner tiise sort mitlayt eene fer ti anere tsayche, khene se soo kaar ti xweyerste propleeme aus hale.

In 1977, hon se uns in kelaat fer im Petël fon Brooklyn keen fer in een projëkt helfe. Meyer hon phaar moonate kexaft, un wii tas neekst fërtich waar, sin 2 mitkliiter fon te Rechiirente Khërperxaft mit mich un Ruby xpreche khom. Tii hon uns kefroot ep mer wilich waare fer in Petël plaype, un mer hon tas aan kenom.

Ich hon 24  yoore in te Tiinst Apteelung kexaft. Tat, mise ti priiter ofts mit xweyer frooche um keen un tëne antworte. Torich ti yoore, hot ti Rechiirente Khërperxaft fiile oryentiirunge kep, woo sich in te piiplixe funtamente xtaype. Tas helft ti Tiinst Apteelung ti frooche antworte; tas wërt aach penutst fer ti sirkuyt superintentente, elteste un pyoneere iipe. Tas hot xon fiile keholef rayfer kriste wëre. Un kewis, tas tuut Yeehoowa sayn Orkanisatsyoon ferxtërke.

Tswixich 1995 un 2018 hon ich phaar filyaale pesuucht wii representant fon te haupst sets. Ich hon mit te filyaal komisyoone, peteliter un misyoneere fertseelt fer tëne uf muute un mit sayn propleeme helfe. Awer, ich un Ruby sin aach ferxtërkt kep weeche ti speryense woo se uns fertseelt hon. Tsum payxpiil, meyer hon Ruanta in 2000 pesuucht. Es hot uns fiil uf kemuut se heere wii ti priiter un ti peteliter ti umpringeray fon 1994 iwerleept hon. Fiile hon yemant im toot ferloer. Awer, opwool sayn xwiirichkheete, hon se klaape, hofnung un frooheet ketsaycht.

Yets, sin mer xon mee wii 80  yoore alt. Ich hon in te letste 20  yoore in te Filyaal Komisyoon fon te Fereenichte Xtaate fon Amërika ketiint. Ich sin nii tsu te uniwersiteet kang; awer ich hon ti pest inlërnung fon Yeehoowa un sayn Orkanisatsyoon kriit. Weeche tas, khan ich fer ti anere piiplixe woerheete in lërne — etwas woo tuut tëne fer imer helfe. (2 Kor. 3:5; 2 Tim. 2:2) Ich hon kesiin wii ti Piipel khan ti layt sayn leepe ferpesere un se helfe een fraayntxaft mit sayn Kriatoer ëntwikele. (Tya. 4:8) Ich un Ruby tuun imer wëns meechlich is, ti anere uf muute iwer Yeehoowa lërne un piiplixe woerheete fer ti anere in lërne. Sicher, tas is ti kreest eer woo een tiiner fon Yeehoowa khan hon!