1. Warom sol tas uns net ferwunere tas fiile layt hayt tenke tas se khene net uf te anere traue?

 TI LAYT in Satanaas sayn welt wise net uf weem se traue khene. Tii kepe eftas traurich weeche ti aanxtelung fon kexefts layt, un aach politixe un relichyeese fiirer. Fiile tuun aach tenke tas se khene net uf sayn fraaynte, nochpere orer soo kaar familye traue. Tas sol uns net ferwunere, wayl ti Piipel xon foer raus kesaat hot: ‘In te letste taache, tuun ti mënxe untroy sin, ti anere ferxtumpiire un hinerlistich sin.’ In anere wërter: ti mënxe weyere soo wii Satanaas, te kot fon tiise welt. Un kewis, khan ma net uf tëm traue. (2 Tim. 3:1-4; 2 Kor. 4:4)

2. (a) Uf weem un uf was khene mer kans traue? (b) Was khene etliche sich frooe?

² Awer meyer sin kriste, un tes weeche, wise mer tas mer khene kans uf Yeehoowa traue. (Yee. 17:7, 8) Meyer sin uns sicher tas eyer uns liipt un tas eyer sayn fraaynte ‘nii im xtich lose tuut’. (Psal. 9:10) Meyer khene aach uf Yeesus traue, wayl tee hot sayn leepe fer uns ap kep. (1 Phe. 3:18) Un meyer hon xon in unser aychne leepe kemërkt tas ti Piipel oryentiirunge kept woo mer traue khene. (2 Tim. 3:16, 17) Yaa, meyer sin uns sicher tas mer khene uf Yeehoowa, Yeesus un ti Piipel traue. Awer yemant khan sich frooe: “Meechte mer khene imer uf unser priiter un xwestere traue?” Wën ti antwort ‘yaa’ is, was fer uersache hon mer fer tas mache?

3. Was fer ekstra priwilëj mer hon? (Markus 10:29, 30)

³ Yeehoowa hot uns raus kesuucht fer teel fon sayn welt wayt familye fon aanpeeter sin. Tas is een ekstra priwilëj woo uns fiil nutse pringt. (Lees Markus 10:29, 30.) * Uf te kans welt, hon mer priiter un xwestere woo, soo wii uns, Yeehoowa liipe un woo sayn pestes mache fer Sayn kesetse foliche. Fiilaycht, is unser xprooch,  kultuer orer tsaych anerste wii tëne sayns. Awer meyer liipe se — soo kaar wën es tas eyerste mool is woo mer se trefe. Un mer sin hauptseechlich kërn mit tëne wën mer unser liipliche Fater im himel loope un aan peete. (Psal. 133:1)

4. Warom prayche mer unser priiter un xwestere?

⁴ Yets, mee wii noch nii, mise mer eenich mit unser priiter un xwestere plaype. Als mool, helfe se unser last nëme. (Rom. 15:1; Kal. 6:2) Tii muute uns aach uf imer fiil se tuun hon in Yeehoowa sayn aarwayt un unser fraayntxaft mit tëm hale. (1 The. 5:11; Hep. 10:23-25) Xtel tich mool foer wii mer traan weyere wën mer net ti hilef fon te kemaynt hëte fer uns fest xtele keeche unser faynte — Satanaas un sayn xlechte welt. Satanaas un tii woo unich sayn kontrol sin, tuun klaych Kot sayn folek atakiire. In tiise tsayt, mer wëre wool aarich petanklich sin tas mer unser priiter un xwestere pay uns hon!

5. Warom is es als mool xweyer fer etliche uf sayn priiter un xwestere traue?

⁵ Awer etliche fine es xweyer uf sayn priiter un xwestere traue. Tas pasiirt, tsiimlich sicher, wayl se sich hinerkang xpiire, wayl yemant een perseenlich sache aus keteelt hot woo eyer net thërft, orer wayl yemant net een ferxpreche kehal hot. Orer fiilaycht, hot yemant in te kemaynt etwas kesaat orer kemacht woo se mechtich traurich kelos hot. Soo sorte speryense khene xweyer fer uns lose uf te anere traue. Soo, was khan uns helfe uf unser priiter un xwestere traue?

6. Wii khan ti liip uns helfe uf unser priiter traue? (1^te Korinter 13:4-8)

⁶ Ti liip is te funtament fer uf unser priiter  traue. In 1^te Korinter 13:4-8, * fine mer fiile kleenichkheete fon te liip, woo uns helfe uf unser priiter traue orer lërne tas noch mool mache. (Lees.) Tsum payxpiil: te wersikel 4 saat tas ‘ti liip ketultich un kuut is’. Yeehoowa is ketultich mit uns, soo kaar wën mer keeche tëm sinte. Tes weeche, mise mer ketultich mit unser priiter sin wën se etwas keeche uns mache orer saan, woo uns pees orer traurich lost. Te wersikel 5 saat noch: “[Ti liip] kept net klaych wuutich, macht sich niks traus mim xaate.” Meyer wole uns ‘niks traus mache mim xaate’ — es wil saan, wayter traan tenke aan was ti priiter keeche uns kemacht hon. Eklesyastes 7:9 saat tas mer sole uns net “klaych pelayticht” xpiire. Es is fiil peser Ëfeser 4:26 aan wëne: “Ti sun sol net uner keen soo lang wii teyer noch wuutich sayt.”

7. Wii khene ti funtamente in Matheus 7:1-5 uns helfe uf unser priiter traue?

⁷ Meyer khene aach lërne mee uf unser priiter un xwestere traue wën mer se siin soo wii Yeehoowa se siit. Kot liipt se un tee halt sich net traan aan tëne sayn sinte; un meyer sole tas aach net mache. (Psal. 130:3) Xtats uns traan hale aan sayn feeler, sole mer uns aan xtrenge fer tëne sayn kuute kwaliteete mërke un aach tenke iwer ti kuute tinge woo se noch mache khene. (Lees Matheus 7:1-5.) * Meyer klaape tas tii wole imer tas kuutes mache, un nii etwas woo uns xaate pringe khent, wayl ti liip “klaapt aan ales”. (1 Kor. 13:7) Tëm noo tiise wërter, meecht Yeehoowa waarte tas mer pliint uf te anere traue? Nee. Kot wil hon tas mer uf tëne traue wayl se xon pewayst hon tas se layt sin woo ma traue khan. *

8. Wii khanst tuu lërne uf tayn priiter traue?

⁸ Es nëmt tsayt fer mee uf unser priiter traue. Wii khanst tuu tas mache? Tuu tëne peser khëne lërne. Xprech mit tëne in te fersamlunge un preetich mit tëne. Say ketultich mit tëne, un kep tëne een xans fer se pewayse tas se layt sin woo ma traue khan. Wëns tuu yemant am khëne lërne pist, fiilaycht tuust tuu, am aanfang, net ales iwer tich saan. Awer, soo lang wiis tuu tëm peser khëne lërnst, im xtant tuust tuu tich fray xpiire fer iwer tayn xpiirunge fertseele. (Luk. 16:10) Un, wëns tuu tich hinerkang xpiirst weeche etwas woo een pruuter woos tuu ketraut host, kemacht hot? Tuu net klaych fon te persoon uf kepe. Xtats tas, los een pisye tsayt rom keen. Un los net noo uf te anere priiter traue ploos weeche etwas woo een persoon kemacht hot. Etliche fon Yeehoowa sayn troye tiiner hon wayter uf anere ketraut, opwool se sich traurich kexpiirt hon weeche ti aktsyoone fon phaar layt. Wole mer tëne sayn payxpiil kuke.

9. (a) Wii hot Ana ketsaycht tas se uf Yeehoowa ketraut hot opwool ti feeler fon etliche fon Sayn representante? (b) Was tuut Ana sayn payxpiil tich in lërne iwer se traue uf tëne woo Yeehoowa raus suucht fer sayn folek uf phase?

⁹ Host tuu tich xon traurich kexpiirt weeche ti aanxtelung fon een pruuter woo flichte in te  kemaynt hot? Wën yaa, Ana sayn payxpiil khan tich helfe. In tëne sayn tsayt, hot te hooche priister Elii Yeehoowa sayn aanpeetung in Israël kefiirt; awer sayn familye hot net een kuut payxpiil kelos. Elii sayn soone, woo priister waare, hon eftas imoraalixe un xeemliche tinge kemacht. Soo wii soo, hot sayn fater net fiil kemacht fer se korikiire. Waar es neetich etwas too triwer mache? Yawool. Un, in te richtich tsayt, hot Yeehoowa Elii sayn soone kextrooft. (1 Sam. 4:17) Opwool Yeehoowa net klaych Elii ap kesets hot, hot Ana net noo kelos Yeehoowa im tapernakel aan peete, soo lang wii Elii te hooche priister waar. Wii Ana am peete un prile waar weeche sayn kroos traurichkheet, hot Elii ferkheert kerechent tas se pesof waar. Xtats Ana frooe was am pasiire waar, hot eyer se kritikiirt. (1 Sam. 1:12-16) Noch soo, hot Ana ferxproch tas, wën se een soon kreecht, teet se tëm pis te tapernakel nëme fer tat tiine, opwool tas es petayte teet tas sayn soon teet unich Elii sayn fiirung xafe. Un mit te tsayt, hot Yeehoowa Ana mit een soon peloont: Samuël. (1 Sam. 1:17-20)

10. Wii hot te kheenich Tawi wayter uf anere ketraut, opwool etliche layt tëm hiner kang hon?

¹⁰ Host tuu tich xon hinerkang kexpiirt weeche etwas woo een ticht fraaynt kemacht hot? Wën yaa, kuk mool te kheenich Tawi sayn payxpiil. Aytofël waar eene fon tëm sayn fraaynte. Awer, wii Tawi sayn soon, Apsaloon, fersuucht hot tas raych fer sich hoole, hot Aytofël Apsaloon pay kextan. Tsiimlich sicher, is Tawi aarich traurich kep, wayl eyer ti unerxtitsung ferloer hot fon sayn soon un fon eene man woo eyer ketenkt hot sayn fraaynt weyer. Awer Tawi hot net noo kelos uf te anere traue ploos weeche ti aktsyoone fon tiise 2 xlechte mënxe. Tee hot wayter uf eene aner troy fraaynt ketraut, Husay, woo Apsaloon net pay kextan hot. Tawi sayn fertraung waar net umsonst kewees. Was xpeeter pasiirt is, hot pewayst tas Husay een woere un kuute fraaynt waar. Tee hot soo kaar sayn leepe ins kefoer kextelt fer Tawi helfe! (2 Sam. 17:1-16)

11. Wii hot eene fon Napal sayn tiiner ketsaycht tas eyer uf Apikaiil ketraut hot?

¹¹ Kuk aach tas payxpiil fon eene fon Napal sayn tiiner. Tawi un sayn mëner hon kuutheet ketsaycht un aach kexitst ti tiiner fon een israeliitixe man woo aarich raych waar, Napal. Een tsayt xpeeter, hot Tawi tëm ese fer sayn mëner ferlangt. Tawi hot net fiiles ferlangt, ploos was Napal kepe khont. Awer Napal hot tas net aan  kenom, un tes weeche, is Tawi soo pees kep tas eyer al ti mëner fon Napal sayn haus um pringe wolt. Eene fon te tiiner, woo um keprung weyer, hot mit Napal sayn fraa, Apikaiil, too triwer kexproch. Tee wust tas Apikaiil khont tëm sayn leepe rete. Xtats ap haue, hot eyer ketraut tas Apikaiil ti situatsyoon in te ray xtele khent. Tee khont soo een fertraung hon, wayl ale wuste tas Apikaiil een kluuch fraa waar. Was xpeeter pasiirt is, hot ketsaycht tas uf Apikaiil traue, net umsonst waar. Tii hot koraaj ketsaycht un hot mit Tawi kexproch; un tii hot ketraut tas eyer een kluuch ëntxlus mache teet. Un tes weeche, hot Tawi fon sayn plaan uf kep. (1 Sam. 25:2-35)

12. Wii hot Yeesus ketsaycht tas eyer uf sayn tisipele ketraut hot, opwool se feeler hate?

¹² Yeesus hot uf sayn tisipele ketraut, opwool se feeler hate. (Yoo. 15:15, 16) Tsum payxpiil: een mool, hon Tyako un Yoohan fer Yeesus ferlangt wichtiche pletse im Raych kriin. Awer Yeesus hot net im frooch kextelt warom se Kot ketiint hon orer tëne wii aphostele ap kextos. (Mar. 10:35-40) Xpeeter, in te nacht woo eyer in kexpërt kep is, hon al sayn tisipele tëm im xtich kelos. (Mat. 26:56) Soo wii soo, hot Yeesus nii noo kelos uf tëne traue. Tee wust tas se imperfekt waare; ale weeche, “hot eyer tëne pis aans ën keliipt”. (Yoo. 13:1) Noo sayn ufxtaye, hot eyer soo kaar fer sayn troye aphostele ti wichtich flicht kep fer ti preetich aarwayt fiire un sayn liipe xeef uf phase. (Mat. 28:19, 20; Yoo. 21:15-17) Yeesus sayn fertraung uf tiise imperfekte mënxe waar net umsonst: tii al sin troy keplip pis se kextorep sin. Yawool, Ana, Tawi, Napal sayn tiiner, Apikaiil un Yeesus hon al uf imperfekte mënxe ketraut un, soo, hon se een kuut payxpiil fer uns kelos.

13. Was khan es xweyer fer uns lose uf te anere traue?

¹³ Host tuu xon een perseenlich informatsyoon fer een pruuter ketraut, awer tan xpeeter raus kefun tas eyer tas fer anere fertseelt hat? Tas khan unser hërts fiil wee mache. Selich mool, hot een xwester een perseenlich sache fer een elteste fertseelt un tii hot ketraut tas eyer teet tas net fer ti anere saan. Te taach truf, hot ti fraa fom elteste tii aan keruuft fer se uf muute. Kewis, wust se xon iwer was ti xwester fer te elteste fertseelt hat. Es is tsum ferxteen tas ti xwester es aarich xweyer kefun hot uf tiise elteste wayter traue. Awer tii hot tas richtich tings kemacht: tii hot hilef ferlangt. Ti xwester hot mit een aner elteste too triwer fertseelt un tee hot se keholef noch mool uf te elteste traue.

14. Was hot een pruuter keholef noch mool uf te anere traue?

¹⁴ Fer een lang tsayt, waar eene pruuter pees mit 2 elteste. Eyer hot ketenkt tas eyer khont net uf tëne traue. Awer, tee hot sich traan ketenkt fon etwas woo een pruuter woo eyer fiil respektiirt hot, kesaat hot. Tas waare keweenliche, awer xtarke wërter: “Satanaas is te faynt, net unser priiter.” Te pruuter hot too triwer noo ketenkt un aach iwer was eyer mache solt. Tee hot Yeehoowa sayn hilef in kepeet ferlangt un, mit te tsayt, hot eyer te friit mit te 2 elteste kemacht.

15. Warom uf te anere noch mool traue khan tsayt nëme? Kep een payxpiil.

¹⁵ Host tuu xon een priwilëj in te kemaynt ferloer? Tas khan een aarich traurich lose. Grete un sayn mama waare troye Yeehoowa sayn Tsayer im Nasistixe Taytxlant foer te 2^te Welt Kriich, wën unser aarwayt ferpoot waar. Grete hat een priwilëj woo se aarich kërn hat: kopye fon Te Wachthorm fer sayn priiter truke. Awer, wii ti priiter tsum wise kriit hon tas Grete sayn papa keeche ti woerheet waar, hon se sayn priwilëj wech kehool. Tii hate pang tas Grete sayn fater teet informatsyoone iwer ti kemaynt fer ti keechner kepe. Awer tas waar net ti eensich propleem woo Grete aus kehal hot. Torich te 2^te Welt Kriich, hon ti priiter khee piichelcher  fer Grete un sayn mama kep. Un ti priiter wolte aach net mit tëne xpreche wën se tëne uf te xtroos ketrof hon. Tas hot Grete fiil wee kemacht un es hot een lang tsayt kenom fer Grete tiise priiter fertsaye un noch mool uf tëne traue. Awer, mit te tsayt, hot se erkhënt: “Yeehoowa must se fertsayt hon... soo, mus ich tas aach mache.” *

16. Warom mise mer uns aan xtrenge fer se lërne uf unser priiter un xwestere traue?

¹⁶ Wëns tuu was eenliches mit kemacht host, xtreng tich aan fer uf te anere noch mool traue. Es khan tsayt nëme, awer tayn aanxtrengung loont sich. Wole mer een ferklaychung mache. Wën mer xon krank kep sin weeche etwas woo mer kes hon, fiilaycht tuun mer mee uf phase mit was mer ese. Awer, meechte mer too teweeche noo lose se ese? Kewis net. Kraat soo, sole mer net weenicher uf unser priiter un xwestere traue ploos weeche een xlecht speryens. Meyer mise uns imer traan tenke tas tii sin aach imperfekt uf te welt khom. Wën mer uf te anere noch mool traue, wëre mer frooer. Es wërt aach laychter uns traan hale aan wii khene mer unser teel mache tas al in te kemaynt wayter eene uf te anere traue.

17. Warom is es soo wichtich uf te anere traue, un was tuun mer im neekste artikel siin?

¹⁷ In te welt, is es net laycht yemant fine woo ma traue khan. Awer, meyer khene uf unser priiter un xwestere traue, wayl meyer uns naner liipe. Soo een sort fertraung helft uns froo un eenich hayt sin un tuut uns aach xitse in te xweyere tsayte woo im futuer khome. Awer, was solst tuu mache wën yemant tich traurich kelos hot, un es is tich xweyer uf tëm noch mool traue? Fersuuch ti situatsyoon siin soo wii Yeehoowa se siit; tuu ti piiplixe oryentiirunge aan wëne; tuu een tiif liip tsu tayn priiter un xwestere ëntwikele un lërn fon te piiplixe payxpiile. Meyer khene torich ti traurichkheet triwer wech khome un noch mool uf te anere traue! Wën mer tas mache, tuun mer fiile fraaynte hon “woo sich fester traan [hale] wii eene pruuter”. (Xpr. 18:24) Awer tas is net kenuuch uf te anere traue: tii mise aach wise tas se uf uns traue khene. Was khene mer mache fer se tsayche tas mer ti fertraung fon unser priiter fertiine? Tas is was mer im neekste artikel siin tuun.