Kuk mool wii ti Piipel tiise frooche antworte tuut.

Aphostele sayn Kexicht 24:15 saat “tas es een ufxtaye fom toot kept fon te kerechte soo wii fon te unkerechte”. Ti kerechte sin tii woo, foer sayn toot, Kot aan keheert hon. Tes weeche, sin tëne sayn naame im puuch fom leepe kexrip. (Mal. 3:16) Tepay in te unkerechte sin tii woo net een kuut xans hate, foer sayn toot, fer iwer Yeehoowa lërne. Tes weeche, sin sayn naame net im puuch fom leepe kexrip.

Yoohan 5:28, 29 xprecht iwer ti selwiche 2 krupe woo in Aphostele sayn Kexicht 24:15 foer khome. Yeesus saat tas “tii woo kuutes kemacht hon” tuun “een ufxtaye fers leepe” kriin; un “tii woo xlechtes kemacht hon”, “een ufxtaye fers kericht”. Ti kerechte hon tas kuutes foer sayn toot kemacht. Tii kriin een ufxtaye fers leepe, wayl sayn naame noch im puuch fom leepe kexrip sin. Awer, ti unkerechte hon tas xlechtes foer sayn toot kemacht. Tes weeche, kriin se een ufxtaye fers kericht. Tëne sayn naame sin noch net im puuch fom leepe kexrip. Un, torich een tsayt, wërt tëne sayn aanxtelung mit acht peopacht. Torich tiise tsayt, kriin se ti xans fer iwer Yeehoowa lërne un sayn naame im puuch fom leepe rin kexrip kriin.

Apokalipsis 20:12, 13 leet aus tas al tii woo uf keruuft wëre, mise aan heere “was in te role kexrip” is — es wil saan, ti naye kesetse woo Kot uns kept in te nay welt. Yeehoowa tuut fernichte tii woo net tiise kesetse foliche. (Isa. 65:20)

Tanyël 12:2 saat tas etliche woo im toot am xloofe sin, tuun wach kepe “fer tas eewiche leepe” un anere tuun wach kepe “fer ti xaam un fer ti eewich uneer”. Too te tekst xprecht iwer was pasiirt am ën fon te 1.000  yoore: etliche woo uf keruuft wëre, tuun “eewiche leepe” kriin; anere, “eewich uneer” — es wil saan, eewich fernichtung. (Apo. 20:15; 21:3, 4)

Ti situatsyoon fon te 2 krupe woo uf keruuft wëre, khan ferklaycht sin mit te situatsyoon fon te auslënter woo wole in een aner lant woone. Ti kerechte sin soo wii tii woo een erlaupnis fon te rechiirung kriin fer im lant xafe orer woone. Tes weeche, hon se fiile rechte un kuute tinge woo ti pewooner fom lant aach hon. Im keeche teel, ti unkerechte sin soo wii ti auslënter woo een khorts erlaupnis kriin fer tas lant pesuuche. Tiise auslënter mise pewayse tas se fertiine wayter im lant woone. Kraat soo, ti unkerechte woo uf keruuft wëre, mise Yeehoowa sayn kesetse aan heere un pewayse tas se kerecht sin. Soo, khene se im Paratiis wayter leepe. Awer, ekaal was fer sort erlaupnis ti auslënter am aanfang kriit hon, mit te tsayt, khene etliche tas recht kriin fer im lant plaype, awer anere khene faart kexikt wëre. Tsum xlus, wërt te ëntxlus kemacht tëm noo sayn aanxtelung im naye lant. Kraat soo, am ën, tuun al woo uf keruuft sin kericht wëre tëm noo sayn aanxtelung un troyheet in te nay welt.

Yeehoowa is net ploos een mitlaytiche Kot — tee is aach een Kot fon kerechtichkheet. (Teut. 32:4; Psal. 33:5) Tee tuut sayn liip tsayche wii eyer ti kerechte un ti unkerechte fom toot uf ruuft. Awer, tee wil hon tas al woo uf keruuft wëre, aan heere was eyer saat richtich un ferkheert is. Ploos tii woo liip tsu Tëm ëntwikele un sayn kesetse foliche, wëre erlaupt in te nay welt wayter leepe.