In 1^te Korinter 15:8, hot Phaul kesaat: “Tsum xlus, is eyer fer mich tsum foer xayn khom, wii fer yemant woo foer te tsayt uf te welt khom is.” Friier, hon mer aus keleet tas Phaul, tëm noo wiis aus siit, am xpreche waar iwer sayn aychne speryens wii eyer een wisyoon fon Yeesus im himel kriit hot. Es waar wii wën eyer ti eer kreecht fer ‘uf te welt khome’, orer uf xtaye, fer sayn kaystlich leepe foer te tsayt, wayl soo een sort ufxtaye teet ploos pasiire fiile yoore tëm noo. Awer, meyer hon tiise tekst peser xtutiirt un kemërkt tas es neetich waar een ënerung in sayn ausleyung mache.

Es is woer tas Phaul waar too am xpreche iwer was pasiirt is wii eyer een krist kep is. Awer warom hot eyer sich pexrip wii “yemant woo foer te tsayt uf te welt khom is”? Es kept etliche ausleyunge woo meechlich sin.

Wii Phaul een krist kep is, tas waar unkewaart un xweyer fer tëm. Es is ofts was unkewaartnes wën een khint foer te tsayt uf te welt khomt. Wii Saul (xpeeter wii Phaul kenënt) tsu Tamaskus am reese waar fer ti kriste tat yachte, waar eyer net am waarte een wisyoon fon Kristus im himel kriin. Tas waar was unkewaartnes fer tee un fer ti kriste woo eyer in Tamaskus yachte wolt, tas eyer een krist kep is. Tiise speryens waar aach aarich xweyer fer Phaul; un fer een tsayt, is eyer pliint keplip. (Aph. 9:1-9, 17-19)

Tee is een krist kep in te “ferkheert tsayt”. Tas kreekix wort woo iwersetst is “yemant woo foer te tsayt uf te welt khom is” khan aach iwersetst wëre wii “yemant woo in te ferkheert tsayt uf te welt khom is”. In te tsayt woo Phaul een krist kep is, is Yeesus xon tsurik tsum himel kang. Anerste wii ti layt iwer weem Phaul kexproch hot in te wersikele foner traan, hot Phaul net kesiin wii Yeesus uf kextii un tsurik tsum himel kang is. (1 Kor. 15:4-8) Es is was unkewaartnes tas Yeesus Kristus fer Phaul tsum foer xayn khemt. Awer tas hot Phaul ti xans kep fer Yeesus siin noo tas eyer uf keruuft kep is, opwool es aus kesiin hot tas es in te “ferkheert tsayt” waar.

Tee waar iwer sich selepst in een teemuutich aat am xpreche. Tëm noo etliche kelërntne layt, tas wort woo Phaul im tekst penutst, khan aus siin mache tas eyer sich selepst am niter xtele waar. Wën tas is was Phaul saan wolt, waar tee am erkhëne tas eyer net fertiint hot een aphostel wëre. Tee hot soo kaar in te neekste wersikele kesaat: “Ich sin te kleenste fon te aphostele, un ich fertiine net wii aphostel keruuft wëre, wayl ich hon Kot sayn kemaynt keyacht. Awer, weeche Kot sayn unfertiint kuutheet, sin ich was ich sin.” (1 Kor. 15:9, 10)

Tes weeche, khan sin tas Phaul am xpreche waar iwer ti unkewaartne aat wii Yeesus fer tëm tsum foer xayn khom is, iwer ti “ferkheert tsayt” woo eyer een krist kep is, orer tas eyer net fertiint hot soo een wunerlich wisyoon kriin. Awer, ekaal ti uersach, sicher was mit Phaul pasiirt is, hat fiil weyert fer tëm: tas hot tëm ti sicherheet kep tas Yeesus fom toot uf keruuft waar. Tes weeche, is es net umsonst tas eyer eftas iwer tiise speryens kexproch hot wii eyer fer anere iwer Yeesus sayn ufxtaye kepreeticht hot. (Aph. 22:6-11; 26:13-18)