1-2. (a) Was fer waar ti situatsyoon in Yuteea wii te aphostel Phaul te priif fer ti hepreeyer kexrip hot? (b) Warom khene mer saan tas tiise priif in te richtich tsayt khom is?

 NOO Yeesus sayn toot, in 33 N.K., hon ti kriste in Yeruusalem un Yuteea fiile xweyere situatsyoone mit kemacht. Klaych wii ti kristlich kemaynt kekrintet waar, waare ti kriste xroo keyacht kewees. (Aph. 8:1) Tan, 20 yoore xpeeter, hon Kristus sayn nookeener xlime ekonoomixe propleeme mit kemacht, tsiimlich sicher weeche ti hungernoot woo tas lant eente petrof hat. (Aph. 11:27-30) Awer torich een tsayt, unkefeer im yoerkang 61 N.K., hate ti kriste een pisye friit — een friit woo net lang hale teet. In tëne tsayt, hot Yeehoowa te aphostel Phaul inspiriirt een priif tëne xraype. Ti aanreete in tiise priif waare kraat was ti kriste praychte fer sich foer perayte fer was noch pasiire teet.

² Te priif fer ti hepreeyer is kraat in te richtich tsayt khom. Warom khene mer tas saan? Wayl te friit woo se hate, teet klaych tsum ën khome. Yeesus hat foer raus kesaat tas Yeruusalem fernicht weyer un tiise tsayt waar yets ticht. (Luk. 21:20) Phaul hot praktixe aanreete fer ti kriste kep woo se helfe teete ti tripulatsyoon woo klaych khemt, aus hale. Kewis Phaul un ti kriste in Yuteea wuste net kenau wanee tiise fernichtung pasiire teet. Awer tii khente sich foer perayte. Fer tas hin kriin, khente se sayn kwaliteete ferpesere, soo wii te klaape un ti persewerans. (Hep. 10:25; 12:1, 2)

3. Warom sole ti kriste hayt acht kepe fer te priif fer ti hepreeyer?

 ³ Klaych tuun mer een tripulatsyoon mit mache woo fiil kreeser wërt wii tii woo ti hepreeyxe kriste mit kemacht hon. (Mat. 24:21; Apo. 16:14, 16) Soo tuun mer noo kuke etliche aanreete woo Yeehoowa tiise kriste kep hot un woo uns aach helfe khene.

“WOLE MER FORAN KEEN FER RAYFE LAYT WËRE”

4. Was fer ënerunge muste ti yuute, woo kriste kep sin, mache? (Kuk aach tas pilt.)

⁴ Ti yuute woo kriste kep sin, muste kroose ënerunge mache un tas waar net laycht kewees. Friier waare se Yeehoowa sayn rauskesuuchtne folek. Yeruusalem waar ti eyertlix sets fon Kot sayn Raych un te thempel waar tas haupste plats fer ti phuer aanpeetung pratikiire. Ti troye yuute hon tas mosayxe Kesets un ti inlërnunge fon te leerer aan keheert. Tiise inlërnunge hate se tuun mit ese, pexnaytung un wii ti frëmte pehantele. Awer noo Yeesus sayn toot, hot Yeehoowa ti opfere im thempel net mee aan kenom. Soo es waar net laycht fer ti yuute woo kriste kep sin, sayn aat fer Yeehoowa aan peete ënere. (Hep. 10:1, 4, 10) Soo kaar kriste woo een xtarke klaape hate, soo wii te aphostel Pheeter, hon es xweyer kefun tiise ënerunge mache. (Aph. 10:9-14; Kal. 2:11-14) Weeche tiise naye klaape, hon ti yiitixe relichyeese fiirer aan kefang ti kriste yachte.

5. Keeche was muste ti kriste sich uf phase?

⁵ Tswaay krupe hon sich kextelt keeche ti kriste in Yuteea. Ti yiitixe relichyeese fiirer hon ti kriste pehantelt wii wën se aphostate weyere. Un etliche woo sich kriste kenënt hon, hon ti anere uf kemuut etliche kepoote fom mosayxe Kesets wayter noo keen. Fiilaycht hon se tas kemacht wayl se wolte net keyacht wëre. (Kal. 6:12) Was teet ti kriste helfe troy tsu Yeehoowa plaype?

6. Was hot Phaul ti kriste uf kemuut se mache? (Hepreeyer 5:14–6:1)

⁶ In sayn priif fer ti hepreeyer, hot Phaul ti kriste uf kemuut Kot sayn Wort tiif xtutiire  un too triwer noo tenke. (Lees Hepreeyer 5:14–6:1.) a Phaul hot ti Hepreeyxe Xrifte penutst fer aus leye tas ti aat wii ti kriste Kot aan kepeet hon, peser waar wii ti yuute sayns. b Phaul hot ti kriste uf kemuut ti woerheet fon te Xrifte peser lërne un ferxteen. Soo khente se ti ferkheerte inlërnunge itentifitsiire un ap xtose.

7. Was fer kefoore tuun mer hayt mit mache?

⁷ Soo wii mit te hepreeyxe kriste pasiirt is, kepts layt hayt woo informatsyoone aus prayte woo keen keeche was Yeehoowa saat woer un richtich is. Etliche xtele sich keeche Yeehoowa sayn Tsayer wayl mer aan heere was ti Piipel iwer sëks saat. Ti aat wii ti layt in te welt tenke, tuut sich imer mee ap lenke fon te aat wii Yeehoowa tenkt. (Xpr. 17:15) Tes weeche, is es aarich wichtich tas mer ti ferkheerte mënunge erkhëne un ap xtose. Meyer sole net lose tas een keechner unser muut xteelt un uns noo lose macht Yeehoowa tiine. (Hep. 13:9)

8. Was tuut uns helfe uns wayter ferpesere wii kriste?

⁸ Phaul hot ti hepreeyer uf kemuut peser kriste wëre un meyer mise tas selwiche mache. Tas petayt tas mer mise ti Piipel tiif xtutiire fer Yeehoowa un sayn aat fer se tenke peser khëne lërne. Un meyer mise tas wayter mache, soo kaar noo unser taaf. Ekaal wii lang mer in te woerheet sin, meyer al mise Kot sayn Wort imer leese un xtutiire. (Psal. 1:2) Tiise rutiin tuut uns helfe unser klaape ferxtërke, een kwaliteet woo Phaul ti kriste uf kemuut hot se ëntwikele. (Hep. 11:1, 6)

MEYER MISE “KLAAPE HON FER TAS LEEPE RETE”

9. Warom waar es wichtich fer ti hepreeyxe kriste een xtarke klaape hon?

⁹ Ti hepreeyxe kriste muste een xtarke klaape hon, wayl tas teet tëne helfe ti tripulatsyoon woo Yuteea petrefe teet, iwerleepe. (Hep. 10:37-39) Yeesus hot fer sayn nookeener kesaat tas se tsu te përiche aus rayse solte wën se siin teete tas militeer um Yeruusalem rom. Tas hot fer al ti kriste kekilt, ekaal ep se in te xtat fon Yeruusalem orer in te khëmp fon Yuteea keleept hon. (Luk. 21:20-24) Friier, wën een militeer een plats atakiirt hot, waare ti layt keweent fon te khëmp tsu te xtat aus rayse, wayl tat es waare ti mauere fer tëne xitse. Fiilaycht es hot net wii een kuut itee aus kesiin tsu te përiche aus rayse xtats in te xtat fon Yeruusalem plaype. Soo ti kriste muste een xtarke klaape hon fer Yeesus aan heere.

10. Was teet een xtarke klaape ti kriste uf muute se mache? (Hepreeyer 13:17)

¹⁰ Ti hepreeyxe kriste muste aach traue uf tëne woo Yeesus am penutse waar fer ti kemaynt fiire. Tsiimlich sicher hon tiise mëner spetsiifixe oryentiirunge kep iwer wanee un wii aus rayse. (Lees Hepreeyer 13:17.) c Phaul hot ti priiter uf kemuut: “Sayt folich tsu tëne woo aych fiire.” Tee wolt hon tas ti priiter ti elteste aan heere teete, net wayl se tas mache miste, awer wayl se uf te elteste ketraut hon. Soo, ti hepreeyxe kriste muste lërne uf tëne traue un sayn oryentiirunge aan heere eep ti tripulatsyoon khome  teet. Wën ti kriste ti elteste in friitliche tsayte aan heere teete, weyer tas fiil laychter se mache in te xlime tsayte.

11. Warom is es wichtich tas ti kriste hayt een xtarke klaape hon?

¹¹ Soo wii ti hepreeyxe kriste, mise mer aach klaape hon. Meyer leepe in een tsayt woo ti meyerste net klaape tas tas ën fon te welt khome tuut. Tii tuun soo kaar xpoteray weeche unser klaape mache. (2 Phe. 3:3, 4) Un opwool ti Piipel xprecht iwer phaar tinge woo torich ti kroos tripulatsyoon pasiire, sin fiile tinge woo mer aynfach net wise tuun. Meyer mise een xtarke klaape hon tas Yeehoowa uns uf phase tuut un tas tas ën fon tiise xlechte welt in te richtich tsayt khomt. (Hap. 2:3)

12. Was tuut uns helfe ti kroos tripulatsyoon iwerleepe?

¹² Meyer mise aach unser klaape ferxtërke tas Yeehoowa “te troye un ferninftiche sklaaw” am penutse is fer uns hayt lenke. (Mat. 24:45) Wën ti kroos tripulatsyoon aan fangt, tsiimlich sicher tuun mer oryentiirunge kriin woo unser leepe rete khene — kraat soo wii woerxaynlich pasiirt is mit te hepreeyxe kriste wii ti romaaner sich um Yeruusalem rom kextelt hon. Yets is ti tsayt fer unser fertraung ferxtërke uf tëne woo ti Orkanisatsyoon fiire. Wën es hayt xweyer fer uns is tëne aan heere, khene mer net waarte tas es laychter wërt torich ti kroos tripulatsyoon.

13. Warom waar te aanreet fon Hepreeyer 13:5 soo wichtich?

¹³ Soo lang wii se kewaart hon ti tsayt fer aus rayse, miste ti hepreeyxe kriste aach sich traan hale aan sayn tiinst tsu Yeehoowa un uf phase mit “te liip tsum kelt”. (Lees Hepreeyer 13:5.) d Etliche fon tëne hate hungernoot un aarmheet mit kemacht. (Hep. 10:32-34) Opwool se wilich waare fer aus hale weeche ti kuute notisye, es weyer laycht aan fange sich aan xtrenge fer mee kelt fertiine. Fiilaycht teete se tas mache fer sich xitse fon te aarmheet orer ti kefoore. Awer tas kelt khent se net xitse wën Yeruusalem fernicht weyer. (Tya. 5:3) In woerheet, wën yemant ti materyaalixe tinge liipe teet, weyer tas tsiimlich sicher xweyer fer tëm aus rayse un sayn hayser un tinge lose.

14. Wii khan een xtarke klaape unser ëntxlise iwer materyaalixe tinge petrefe?

¹⁴ Wën mer een xtarke klaape hon tas Yeehoowa klaych tiise xlechte welt fernichte tuut, tuun mer net tenke tas tas haupste is mee tinge un kelt samele. Torich ti kroos tripulatsyoon, tuut tas kelt khee weyert hon. Ti Piipel saat tas ti layt “tuun sayn silper uf te xtroose xmayse” wayl tii tuun mërke tas “sayn silper un sayn kolt khene se net rete wën te taach fon Yeehoowa sayn wuut khomt”. (Ese. 7:19) Xtats uns traan hale aan soo fiil kelt wiis meechlich is, samele, mise mer ëntxlise mache woo uns helfe uns selepst un unser familye fersoriche un woo uns lose wayter Yeehoowa tiine. Es weyer net kluuch mee kelt aus kepe wii mer hon orer neekst unser kanse tsayt penutse fer unser materyaalixe tinge uf phase. Meyer mise aach uf phase tas unser materyaalixe tinge net tas haupste in unser leepe wëre. (Mat. 6:19, 24) Soo lang wii tas ën fon tiise welt tichter khomt, wërts neetich ëntxlise ep mer uf Yeehoowa orer uf unser tinge traue tuun.

“TEYER MIST AUS HALE”

15. Warom waars hauptseechlich neetich fer ti hepreeyxe kriste aus hale?

¹⁵ Ti hepreeyxe kriste muste in sayn tiinst tsu Yeehoowa aus hale, wayl klaych teete ti xwiirichkheete khome. (Hep. 10:36) Opwool  etliche fon tëne xroo yachtung friier mit kemacht hate, tas weyer was nayes fer fiile. Soo hot Phaul se erinert tas se solte sich foer perayte fer mee yachtung mit mache un fërtich sin fer troy pis te toot plaype, soo wii Yeesus es kemacht hot. (Hep. 12:4) Wii ti kristyanismus sich aus keprayt hot, sin fiile yuute wuutich un wyolënt kep weeche ti kroos numer yuute woo kriste kep sin. Phaar yoore foer sayn priif xraype, hat een krup Phaul atakiirt wii eyer in Yeruusalem kepreeticht hot. Mee wii 40 yuute hon sich “fersamelt un ferxproch, unich ferfluuchung, niks ese orer trinke pis se Phaul um pringe teete”. (Aph. 22:22; 23:12-14) Opwool ti kriste keyacht un kehast waare, muste se sich wayter aan xtrenge fer sich samele fer Kot aan peete, ti kuute notisye preetiche un sayn klaape xtark hale.

16. Wii khan te priif fer ti hepreeyer uns helfe ti yachtung in te richtich aat siin? (Hepreeyer 12:7)

¹⁶ Was teet ti hepreeyxe kriste helfe ti yachtung aus hale? Phaul wolt hon tas se mërke teete ti nutse woo mer kriin wën mer ti proope aus hale. Tee hot aus keleet tas, wën ti kriste proope mit mache, khan Kot tas penutse fer tëne iipe. (Lees Hepreeyer 12:7.) e Tii khene kwaliteete woo Kot kefale, ëntwikele orer ferpesere. Es weyer laychter fer ti hepreeyxe kriste ti proope aus hale wën se sich traan hale teete aan te resultaate fon te proope. (Hep. 12:11)

17. Was hot Phaul kelërnt iwer yachtung aus hale?

¹⁷ Phaul hot ti hepreeyxe kriste uf kemuut koraajix sin un net uf kepe foer ti proope. Te aphostel Phaul khont kuute aanreete kepe iwer wii ti yachtung aus hale. Eep eyer een krist kep is, hot Phaul ti kriste keyacht un tee hot kesiin wii krop se pehantelt waare. Tee wust aach wii aus hale, wayl tee selepst hot fiile sorte opositsyoon mit kemacht  noo eyer een krist kep is. (2 Kor. 11:23-25) Soo, Phaul wust kans kenau was neetich is fer aus hale. Tee hot tiise kriste erinert tas, wën se proope mit mache teete, muste se uf Yeehoowa traue, net uf sich selepst. Phaul khont mit koraaj saan: “Yeehoowa is mayn helfer; ich tuun khee pang hon.” (Hep. 13:6)

18. Was tuut im futuer mit uns al pasiire un wii khene mer uns foer perayte?

¹⁸ Etliche fon unser priiter sin yets yachtung am mit mache. Meyer khene fer tëne peete un soo unser liip tëne tsayche. Als mool, khene mer se aach was neetiches kepe. (Hep. 10:33) Awer ti Piipel lost es taytlich tas “al woo wole een leepe fon aanpeetung tsu Kot nëme, in eenichkheet mit Yeesus Kristus, wëre aach keyacht”. (2 Tim. 3:12) Tes weeche, meyer al mise uns foer perayte fer ti xlime tsayte woo noch khome. Soo wole mer wayter kans uf Yeehoowa traue, mit te sicherheet tas eyer uns helfe tuut kwalkee proop woo noch khomt, aus hale. In te richtich tsayt, tuut eyer pefrayung pringe fer al woo tëm leaal aan peete. (2 The. 1:7, 8)

19. Was khene mer mache fer uns foer perayte fer ti kroos tripulatsyoon? (Kuk aach tas pilt.)

¹⁹ Sicher, Phaul sayn priif fer ti hepreeyer hot ti kriste fom eyerste yoer hunert keholef sich foer perayte fer ti tripulatsyoon woo se mit mache teete. Phaul hot sayn priiter un xwestere uf kemuut Kot sayn Wort tiifer un peser xtutiire. Tas teet tëne helfe erkhëne un ap xtose ti inlërnunge woo sayn klaape ferxweeche khente. Tee hot se aach uf kemuut sayn klaape ferxtërke. Soo khente se xneler noo keen ti oryentiirunge woo se kriit hon fon Yeesus un fon tëne woo ti kemaynt kefiirt hon. Tee hot se aach keholef ti proope in te richtich aat siin — wii een iipung fon sayn liipliche Fater. Tas teet se helfe ti proope aus hale. Meyer mise aach tiise aanreete fon te Piipel aan heere. Soo khene mer pis tas ën troy aus hale. (Hep. 3:14)