XTUUTYUM ARTIKEL 38
LIIT 25 Sayn spetsiaal aychentum
Kepst tuu acht wën Yeesus tich aan saat?
“Eene wërt mit kenom un te aner wërt tsurik kelos.” (MATHEUS 24:40)
WAS TUUN MER SIIN?
Meyer tuun 3 fon Yeesus sayn kexichte noo kuke un siin was se tuun hon mit te tsayt fom kericht woo am ën fon tiise xlechte welt pasiirt.
1. Was tuut Yeesus klaych mache?
KROOSE ënerunge pasiire in unser tsayt. Klaych tuut Yeesus ti kanse layt richte. Yeesus hot kesaat was uf te welt pasiire teet foer sayn kericht. Tee hot kexproch iwer etliche “tsayche fon [sayn] presens un fom ën fon tiise sisteem”. (Mat. 24:3) Tiise profetsii xteet in Matheus 24 un 25, in Markus 13 un in Lukas 21.
2. Was tuun mer in tiise artikel siin un warom is es kuut tas mache?
2 Fer uns helfe fërtich sin un uns aan saan, hot Yeesus 3 kexichte fertseelt. Tas sin ti kexichte fon te xeef un ti kaprite, fon te foersichtiche un ti tume yungfraae un fon te talënte. Yeete kexicht helft uns ferxteen tas Yeesus ti layt richte tuut tëm noo tëne sayn aanxtelung. In tiise artikel, tuun mer tiise kexichte un sayn lisyoone noo kuke. Wole mer aan fange mit te kexicht fon te xeef un ti kaprite.
TI XEEF UN TI KAPRITE
3. Wanee tuut Yeesus ti layt richte?
3 In te kexicht fon te xeef un ti kaprite, hot Yeesus ketsaycht tas eyer ti layt richte tuut tëm noo sayn aanxtelung wën se ti kuute notisye heere. Tee tuut aach tepay rechne ep se sayn kesalpte priiter pay kextan hon orer net. (Mat. 25:31-46) Torich ti “kroos tripulatsyoon” un kraat foer te Armaxeton, tuut eyer ëntxlise op se xeef orer kaprite sin. (Mat. 24:21) Soo wii een xeefer ti xeef un ti kaprite aus naner macht, tuut Yeesus aus naner mache tii woo sayn kesalpte priiter pay kextan hon fon tëne woo tas net kemacht hon.
4. Tëm noo Isayas 11:3, 4, warom khene mer uns sicher sin tas Yeesus ti layt kerecht richte tuut? (Kuk aach tas pilt.)
4 Ti Piipel saat tas wën Yeesus fer Yeehoowa richte tuut, wërt eyer imer kerecht sin. (Lees Isayas 11:3, 4.) a Tee peopacht was ti layt mache, tenke un saan — too tepay wii se sayn kesalpte priiter pehantelt hon. (Mat. 12:36, 37; 25:40) Yeesus tuut wise weer sayn kesalpte priiter un sayn aarwayt pay kextan hon. b Eene fon te haupste aate wii een persoon tas mache khan, is Yeesus sayn priiter helfe in te preetich aarwayt. Tii woo tas mache, wëre kerecht kenënt un tii khene “eewiche leepe” too uf te eyert kriin. (Mat. 25:46; Apo. 7:16, 17) Tas is sicher een wunerlich peloonung! Wën se sich torich ti kroos tripulatsyoon un aach noo heyer troy hale, tuun se sayn naame “im puuch fom leepe” hale. (Apo. 20:15)
Klaych, tuut Yeesus richte ep ti mënxe sich wii xeef orer kaprite aan kextelt hon (Kuk te apsats 4.)
5. Was lërne mer mit te kexicht fon te xeef un ti kaprite un weer kriit nutse too tefun?
5 Say troy. Yeesus sayn kexicht iwer ti xeef un ti kaprite tuut hauptseechlich phase fer tii woo ti eyertlix hofnung hon. Tii tsayche sayn klaape wën se Yeesus sayn priiter in te preetich aarwayt helfe un wën se te troy un ferninftiche sklaaw aan heere, woo Yeesus raus kesuucht hot. (Mat. 24:45) Awer tii woo ti himlix hofnung hon, sole aach acht kepe fer ti lisyoon hinich tiise kexicht. Warom? Wayl Yeesus tuut aach peopachte was se mache, tenke un saan. Tii mise sich aach troy hale. In Matheus 25, hot Yeesus aach 2 anere kexichte fertseelt fer ti kesalpte aan saan. Wole mer yets xpreche iwer ti kexicht fon te foersichtiche un ti tume yungfraae.
TI FOERSICHTICHE UN TI TUME YUNGFRAAE
6. Wii hon 5 yungfraae ketsaycht tas se foersichtich waare? (Matheus 25:6-10)
6 In te kexicht fon te yungfraae, hot Yeesus kexproch iwer 10 yungfraae woo een prautman trefe wolte. (Mat. 25:1-4) Tii al wolte mit tëm rin keen in sayn hoochtsayt fest. Yeesus hot kesaat tas 5 waare foersichtich un 5, tum. Ti foersichtiche yungfraae waare foerperayt un wachsam. Tii waare fërtich fer te prautman waarte soo lang wiis neetich weyer. Tee khent soo kaar xpeet in te nacht khome. Tes weeche, hon se eel lampe mit sich kenom tas se licht in te nacht hëte. Tii hon soo kaar ekstra eel mit keprung, wayl te prautman sich ferxpeete khent. Soo tii waare fërtich fer sayn lampe aan lose. (Lees Matheus 25:6-10.) c Wii te prautman khom is, sin ti foersichtiche yungfraae mit tëm rin kang in te hoochtsayt fest. Kraat soo, ti kesalpte kriste woo sich fërtich hale, kriin ti peloonung fer mit Yeesus — te prautman — rin keen im himlixe Raych; fer tas hin kriin, mise se sich wachsam un troy hale. d (Apo. 7:1-3) Awer was is mit te tume yungfraae pasiirt?
7. Was is mit te 5 tume yungfraae pasiirt un warom?
7 Anerste wii ti foersichtiche yungfraae, waare ti 5 tume net fërtich wii te prautman khom is. Sayn lampe waare am aus keen un tii hate khee ekstra eel mit sich. Wii se tsum wise kriit hon tas te prautman klaych khemt, sin se eel khaafe kang. Tan is te prautman khom, awer ti tume waare noch net tat kewees. In tiise xtun, sin ti yungfraae woo fërtich waare “mit tëm in te hoochtsayt fest rin kang un ti teer is tsu kemacht kep”. (Mat. 25:10) Xpeeter, wii ti tume yungfraae tsurik khom sin, wolte se rin keen. Awer te prautman hot se kesaat: “Ich khëne aych net.” (Mat. 25:11, 12) Tiise yungfraae waare net fërtich fer te prautman waarte soo lang wiis neetich weyer. Was is ti lisyoon fer ti kesalpte?
8-9. Was khene ti kesalpte lërne mit te kexicht fon te yungfraae? (Kuk aach tas pilt.)
8 Hal tich fërtich un wachsam. Yeesus wolt net saan tas es 2 krupe kesalpte weyere — eene woo fërtich weyer fer pis tas ën waarte un aner woo net weyer. Xtats tas, wolt eyer tsayche was mit te kesalpte pasiire teet wën se net fërtich weyere fer pis tas ën troy aus hale: tii teete sayn peloonung net kriin. (Yoo. 14:3, 4) Tas is ërnst! Ekaal ep mer hofe im himel orer uf te eyert leepe, meyer al sole acht kepe fer ti lisyoon in te kexicht fon te yungfraae. Meyer al mise foerperayt un wachsam sin, fërtich fer pis tas ën aus hale. (Mat. 24:13)
9 Noo se tsayche tas mer mise foerperayt un wachsam sin torich ti kexicht fon te yungfraae, hot Yeesus ti kexicht fon te talënte fertseelt. Tiise kexicht tsaycht tas mer mise flaysich sin.
Meyer al mise acht kepe fer ti lisyoon hinich te kexicht fon te yungfraae: meyer mise foerperayt un wachsam sin, fërtich fer pis tas ën aus hale (Kuk ti apsetse 8-9.)
TI TALËNTE
10. Wii hon 2 sklaawe ketsaycht tas se troy waare? (Matheus 25:19-23)
10 In te kexicht fon te talënte, hot Yeesus kexproch iwer 2 sklaawe woo troy tsu sayn hër waare un eene woo net waar. (Mat. 25:14-18) Te hër teet een tsayt faart reese. Too hot eyer talënte — es wil saan, fiil kelt — fer ti 3 sklaawe kep. Ti 2 troye sklaawe hon sich aan kextrengt fer mee kelt fer sayn hër fertiine. Tii waare flaysich un kluuch mim kelt. Te resultaat? Wën sayn hër tsurik khom is, hate se te topelt numer talënte woo se kriit hate. Te hër hot se keloopt un tii hon sich mit tëm kefrayt. (Lees Matheus 25:19-23.) e Awer un te 3te sklaaw? Was hot eyer mim kelt kemacht?
11. Was is mit tëm “faule sklaaw” pasiirt un warom?
11 Te 3te sklaaw hot 1 talënt kriit, awer tee waar een “faule sklaaw”. Sayn hër wolt hon tas eyer kluuch mit sayn talënt weyer, awer xtats tas, hot eyer tas pekraapt. Wën te hër tsurik khom is, hot te sklaaw tëm ploos tsurik kep te talënt woo tëm kep waar. Te sklaaw hat net een kuut aanxtelung. Xtats sich ëntxultiche weeche sayn feeler, hot eyer sayn hër wii “xtrenge man” kenënt, opwool tas net woer waar. Te hër hot sich net kefalt mit tiise sklaaw. Tee hot tëm te talënt wech kehool un hot tëm fon sayn haus faart kexikt. (Mat. 25:24, 26-30)
12. Weer representiire ti 2 troye sklaawe hayt?
12 Ti 2 troye sklaawe representiire ti troye kesalpte kriste. Sayn Hër, Yeesus, tuut se in laate sich mit tëm fraye — es wil saan, sayn himlix peloonung kriin, tas eyerste ufxtaye. (Mat. 25:21, 23; Apo. 20:5 2te teel) Im keeche teel, tas xlechte payxpiil fom faule sklaaw lost een lisyoon fer ti kesalpte. Wii soo?
13-14. Was fer lisyoon lërne ti kesalpte mit te kexicht fon te talënte? (Kuk aach tas pilt.)
13 Say flaysich. Soo wii in te kexicht fon te yungfraae, Yeesus wolt net tsayche mit te kexicht fon te talënte tas ti kesalpte faule weyere. Xtats tas, wolt eyer aus leye was pasiire khent wën se noo lose teete flaysich sin. Tii teete sich net “sicher lose tas [se] keruuft un raus kesuucht [weyere]”; tii weyere net erlaupt im himlixe Raych rin keen. (2 Phe. 1:10)
14 Yeesus sayn kexichte iwer ti yungfraae un ti talënte lose es taytlich: al ti kesalpte kriste mise sich fërtich, wachsam un flaysich hale. Awer Yeesus hot noch etwas fertseelt fer ti kesalpte aan saan in Matheus 24:40, 41.
Yeesus wil hon tas ti kesalpte xtram xafe pis tas ën (Kuk ti apsetse 13-14.) h
WEER “WËRT MIT KENOM”?
15-16. Wii tuut Matheus 24:40, 41 tsayche tas ti kesalpte sich wachsam hale sole?
15 Foer tiise 3 kexichte fertseele, hot Yeesus kexproch iwer een letst kericht fon te kesalpte woo tsayche teet weer ti tsuxtimung kriit hot. Tee hot kexproch iwer 2 mëner woo ufm khamp kexaft hon un iwer 2 fraae woo mit een hant miil kexaft hon. Es hot aus kesiin tas se ti selwich aarwayt am mache waare, awer Yeesus hot aus keleet tas ‘eene weyer mit kenom un te aner weyer tsurik kelos’. (Lees Matheus 24:40, 41.) f Too hot eyer sayn tisipele aan kesaat: “Playpt wachsam, wayl teyer wist net in was fer taach te Hër khomt.” (Mat. 24:42) Yeesus hot was eenliches kesaat noo te kexicht fon te yungfraae fertseele. (Mat. 25:13) Hon tiise wërter eene mit te anere se tuun? Siits aus tas es soo is. Ploos tii woo wërklich kesalpt un troy sin, wëre “mit kenom” — es wil saan, fon Yeesus tsum himlixe Raych kenom. (Yoo. 14:3)
16 Hal tich wachsam. Eene kesalpte woo sich net wachsam halt, wërt net kesamelt mit te “rauskesuuchtne”. (Mat. 24:31) Kewis, al woo hofe fer imer uf te eyert leepe, sole sich aach troy un wachsam hale.
17. Warom sole mer uns net ketanke mache wën Yeehoowa raus suucht etliche in unser tsayt salpe?
17 Meyer tuun Yeehoowa kuut khëne. Soo meyer wise tas eyer imer kerecht is. Wën Yeehoowa raus suucht etliche kriste in unser tsayt salpe, mache mer uns net ketanke too triwer. g Meyer tenke uns traan was Yeesus kesaat hot iwer ti aarwayter woo in te letste xtun xafe khom sin in sayn kexicht fon te traupe krist. (Mat. 20:1-16) Tii woo in kelaat waare fer in te traupe krist xafe xpeeter im taach, hon te selwich loon kriit wii tii woo friier aan kefang hate. Kraat soo, ekaal wanee ti kesalpte raus kesuucht kep sin, tuun se ti himlixe peloonung kriin wën se sich troy hale.
KEP ACHT WËN YEESUS TICH AAN SAAT
18-19. Was hon mer mit tiise kexichte kelërnt?
18 Was hon mer kelërnt? Ti kexicht fon te xeef un ti kaprite tsaycht tas tii woo ti eyertlix hofnung hon, mise sich troy tsu Yeehoowa hale — yets un torich ti kroos tripulatsyoon. Wën tiise tsayt khomt, tuut Yeesus ëntxlise weer ti troye sin, woo fertiine “tsum eewiche leepe keen”. (Mat. 25:46)
19 Meyer hon aach 2 kexichte noo kekukt woo Yeesus penutst hot fer ti kesalpte aan saan. In te kexicht fon te foersichtiche un tume yungfraae, 5 fon tëne hon sich kluuch aan kextelt. Tii waare foerperayt un wachsam un tii waare fërtich fer te prautman waarte soo lang wiis neetich weyer. Awer ti tume yungfraae waare net foerperayt. Soo te prautman hot se net erlaupt in sayn hoochtsayt fest rin keen. Meyer mise aach foerperayt sin fer se waarte tas Yeesus tas ën fon tiise welt pringt, ekaal wii lang tas tauert. In Yeesus sayn kexicht fon te talënte, hon mer kexproch iwer ti 2 troye sklaawe woo flaysich waare. Tii hon xtram fer sayn hër kexaft un tii hon tëm kefalt. Awer te faule sklaaw is faart kexikt kep. Was is ti lisyoon? Meyer mise fiil se tuun hon in Yeehoowa sayn aarwayt pis tas ën. Tsum xlus, hon mer kesiin tas ti kesalpte mise sich wachsam hale tas Yeesus se mit nëmt fer sayn himlix peloonung kriin. Tii tuun hërtslich waarte ti tsayt wën se mit Yeesus im himel “fersamelt wëre”. Noom Armaxeton kriich, wëre se Yeesus sayn praut in te hayrat fom Lam. (2 The. 2:1; Apo. 19:9)
20. Was tuut Yeehoowa mache fer tii woo acht kepe wën eyer se aan saat?
20 Yeesus sayn kericht khomt klaych, awer mer prayche khee pang hon. Wën mer uns troy hale, tuut unser liipliche Fater im himel uns ti “iwermeesich kraft” kepe tas mer “foer te Mënxe Soon xteen plaype [khene]”. (2 Kor. 4:7; Luk. 21:36) Ekaal op mer hofe im himel orer uf te eyert leepe, wën mer aan heere was Yeesus uns aan kesaat hot, tuun mer Yeehoowa kefale. Un weeche Yeehoowa sayn unfertiint kuutheet, wëre unser naame im puuch fom leepe kehal. (Tan. 12:1; Apo. 3:5)
LIIT 26 Tuu host es fer mich kemacht
a (Isayas 11:3, 4) Un eyer frayt sich in sayn tiif respekt foer Yeehoowa. Tee tuut net richte tëm noo wiis aus siit un tuut net aynfach korikiire tëm noo was eyer heert. 4 Tee tuut ti aarme in kerechtichkheet richte, un tuut ufrichtich tisipliin kepe fer ti tsaame fon te eyert se helfe. Tee xlaat ti eyert mit te ruut fon sayn munt un tuut ti xlechte mit tëm ploose fon sayne lipe tsum toot pringe.
b Kuk te artikel “Wii tuut Yeehoowa ti layt im futuer richte?” in Te Wachthorm Maay fon 2024.
c (Matheus 25:6-10) Awer in te mite fon te nacht, hon se yemant am xraaye keheert: ‘Te prautman is too! Keet tëm trefe.’ 7 Al ti yungfraae sin tan uf kextii un hon sayn lampe in ortnung kextelt. 8 Ti tume hon fer ti foersichtiche kesaat: ‘Kept uns een pisye fon ayre eel, wayl unser lampe sin neekst am aus keen.’ 9 Ti foersichtiche hon keantwort: ‘Im xtant kepts net kenuuch fer uns un fer aych. Keet pis tii woo eel ferkhaafe un khaaft een pisye fer aych.’ 10 In te tsayt woo se eel khaafe kang sin, is te prautman khom. Ti yungfraae woo fërtich waare, sin mit tëm in te hoochtsayt fest rin kang un ti teer is tsu kemacht kep.
d Fer mee informatsyoone kriin, kuk te artikel “Você vai ‘se manter vigilante’?” in A Sentinela 15te Mërts fon 2015.
e (Matheus 25:19-23) “Noo een lang tsayt, is te hër fon te sklaawe tsurik khom un hot aprechnunge mit tëne kemacht. 20 Tee woo 5 talënte kriit hat, is tsu tëm khom un hot noch 5 talënte keprung. Tee hot kesaat: ‘Tuu host mich 5 talënte kep. Kuk mool, ich hon noch 5 talënte fertiint!’ 21 Sayn hër hot tëm kesaat: ‘Aarich kuut, tuu, kuute un troye sklaaw! Tuu waarst troy wiis tuu weeniche tinge uf kephast host. Tes weeche, tuun ich tich fiile tinge iwer kepe. Khom un fray tich mit tayn hër.’ 22 Un too is foer khom tee woo ti 2 talënte kriit hat, un tee hot kesaat: ‘Hër, tuu host mich 2 talënte kep un, kuk mool, ich hon noch 2 talënte fertiint!’ 23 Sayn hër hot tëm kesaat: ‘Aarich kuut, tuu, kuute un troye sklaaw! Tuu waarst troy wiis tuu weeniche tinge uf kephast host. Tes weeche, tuun ich tich fiile tinge iwer kepe. Khom un fray tich mit tayn hër.’
f (Matheus 24:40, 41) Tan wëre tswaay mëner ufm khamp sin; eene wërt mit kenom un te aner wërt tsurik kelos. 41 Tswaay fraae tuun mit een hant miil maale; een wërt mit kenom un ti aner wërt tsurik kelos.
h PILT AUSLEYUNG Een kesalpt xwester fiirt een Piipel xtuutyum mit een yung fraa woo se in te preetich aarwayt ketrof hot.
