XTUUTYUM ARTIKEL 36
LIIT 89 Heert, macht, un wërt keseechent
“Tuut tas wort aan wëne”
“Tuut tas wort aan wëne, net ploos horiche.” (TYAKO 1:22)
WAS TUUN MER SIIN?
Tiise artikel tuut unser wunx ferxtërke fer se tenke aan was mer in te Piipel leese un aan wëne was mer lërne.
1-2. Warom sin Kot sayn tiiner froo? (Tyako 1:22-25)
YEEHOOWA un sayn liipe Soon wole hon tas mer froo wëre. Te xrayper fom Psalm 119:2 saat: “Froo sin tii woo acht fer Sayn aanreete kepe un woo iim mit kanse hërts suuche.” Yeesus hot aach kesaat: “Froo sin tii woo Kot sayn wort heere un tas in sayn leepe aan wëne!” (Luk. 11:28)
2 Yeehoowa sayn tiiner sin een froo folek. Warom? Es kept fiile uersache, awer eene fon te wichtichste is tas mer Kot sayn Wort imer leese un uns aan xtrenge fer aan wëne was mer lërne. (Lees Tyako 1:22-25.) a
3. Was fer nutse kriin mer wën mer aan wëne was mer in te Piipel leese?
3 Meyer kriin fiil nutse wën mer “tas wort aan wëne”. Tsum payxpiil: meyer kefale Yeehoowa un tas lost uns froo. (Ekl. 12:13) Meyer tuun aach xtarke fraayntxafte mit unser familye un unser priiter un xwestere hon. Tsiimlich sicher host tuu xon kemërkt wii tas woer in tayn leepe is. Ti layt woo Yeehoowa net aan heere, mache fiile propleeme mit, awer wayl mer ti Piipel aan heere, hale mer uns too tefun wech. Meyer xtime mim kheenich Tawi. In een Psalm, hot eyer kesung iwer Kot sayn kepoote, kesetse un kerichte. Tsum xlus hot eyer kesaat: “Tii in se hale, pringt een kroos peloonung.” (Psal. 19:7-11)
4. Warom is tas net imer laycht aan wëne was ti Piipel saat?
4 Awer es is net imer laycht aan wëne was ti Piipel saat. Opwool mer fiil se tuun hon, mise mer tsayt fine fer ti Piipel leese un xtutiire, wayl ploos soo tuun mer ferxteen was Yeehoowa wil hon. Soo wole mer etliche itee noo kuke woo khene uns helfe ti Piipel yeete taach leese. Meyer siin aach was uns helfe tuut triwer noo tenke aan was mer leese un aan wëne was mer lërne.
FIN TSAYT FER KOT SAYN WORT LEESE
5. Warom hon mer imer fiil se tuun?
5 Ti meyerste fon Yeehoowa sayn tiiner hon imer fiil se tuun. Meyer fertraype fiil tsayt mit te aktiwiteete woo ti Piipel saat wichtich sin. Tsum payxpiil: ti meyerste fon uns hon een aarwayt fer uns selepst un unser familye fersoriche. (1 Tim. 5:8) Fiile kriste phase sayn elter orer kranke parente uf. Un meyer al mise unser kesuntheet uf phase, etwas woo tsayt nëmt. Meyer hon aach wichtiche tinge fer in te kemaynt mache, wii uns aan xtrenge fer ti kuute notisye preetiche. Mit al ti flichte woos tuu host, wii khanst tuu tsayt fine fer ti Piipel yeete taach leese, too triwer noo tenke un tas aan wëne?
6. Was must tuu mache fer ti Piipel imer kelees kriin? (Kuk aach tas pilt.)
6 Fer ti kriste, ti Piipel leese is eene fon te “tinge [woo] wichticher sin”; soo meyer mise tsayt fine fer tas mache. (Fili. 1:10) Te eyerste Psalm saat iwer te frooe man: “Tee frayt sich mit Yeehoowa sayn kesets, un tee tuut Sayn kesets taach un nacht mit layse xtim leese.” (Psal. 1:1, 2) Es wil saan: meyer mise tsayt fine fer ti Piipel leese. Wanee is ti pest xtun fer tas mache? Tas ënert sich tëm noo te persoon. Awer in khortse wërter, es is ti xtun woos tuu tas yeete taach mache khanst. Een pruuter woo Victor heest, saat: “Ich leese kërn ti Piipel moynts. Ich tuun net kërn frii uf xtaye, awer in tiise xtune sin weenicher tinge woo mayn acht ap lenke. Moynts, is es aach laychter mich konsentriire.” Fiilaycht is tas aach soo mit tich. Froo tich selepst: ‘Wanee is ti pest tsayt fer mich ti Piipel leese?’
Wanee is ti pest tsayt fer ti Piipel leese? In was fer xtun khenst tuu tas yeete taach mache? (Kuk te apsats 6.)
TENK AAN WAS TUU LEEST
7-8. Was khan uns um hale ti kreest nuts fon unser Piipel leesung kriin? Mach een ferklaychung.
7 Awer meyer mise mit etwas uf phase. Host tuu xon een mool etwas kelees un te minut truf tich kaar niks traan ketenkt? Tas is mit uns al xon pasiirt. Es is xaat, awer tas khan aach mit unser Piipel leesung pasiire. Tsum payxpiil: fiilaycht wole mer phaar kapitele fon te Piipel yeete taach leese. Tas is was kuutes. Meyer mise tsiile xtele un uns aan xtrenge fer tëne trefe. (1 Kor. 9:26) Awer ploos leese is net kenuuch fer ti kanse nuts fon te Piipel kriin.
8 Tenk iwer tiise ferklaychung: oone reen, tuun ti planse kaput keen. Awer wëns tsu fiil uf een mool reent, khan te krunt tsu nas wëre. Wayter reene, pringt kaar khee nuts. Es is peser wën te reen lamsam falt, wayl soo khan te krunt tas waser tsiie un ti planse helfe se wakse. Kraat soo, sole mer ti Piipel net soo fiks leese tas mer khee tsayt hon fer triwer noo tenke un uns erinere was mer kelees hon. (Tya. 1:24)
Te krunt mus tsayt hon fer tas waser fom reen tsiie. Kraat soo, mise mer tsayt hon fer triwer noo tenke un aan wëne was mer in Kot sayn Wort leese (Kuk te apsats 8.)
9. Was sole mer mache wën mer mërke tas mer ti Piipel tsu fiks am leese sin?
9 Is es xon mit tich pasiirt tas tuu wolst tayn Piipel leesung ploos fiks fërtich pringe? Was solst tuu mache wën tas pasiirt? Tuu een pisye “prëmse” un lees lamsamer. Soo khanst tuu tenke soo lang wiis tuu leest. Orer hool tich tsayt noo te leesung fer triwer noo tenke aan was tuu kelees host. Tas mus net komplikiirt sin. Fiilaycht khanst tuu lënger xtutiire fer tsayt hon fer triwer noo tenke. Orer khanst tuu weenicher wersikele leese un ti iwrich tsayt penutse fer triwer noo tenke. Victor, iwer weem mer foner traan kexproch hon, saat: “Mayn Piipel leesung is khorts, fiilaycht een kapitel. Wayl ich moynts frii leese, khan ich torich te taach tenke aan was ich kelees hon.” Ekaal was tuu raus suuchst se mache, es is wichtich lamsam kenuuch leese tas tuu tenke khanst aan was tuu leest. (Psal. 119:97; kuk te khaste “ Frooche fer triwer noo tenke”.)
10. Wii khanst tuu aan wëne was tuu leest? Kep een payxpiil. (1 Thesalooniker 5:17, 18)
10 Noo etliche wersikele leese, tenk iwer wiis tuu tas aan wëne khanst. Soo lang wiis tuu een xtikche fon te Piipel leest, froo tich: ‘Wii khan ich tiise informatsyoon yets orer im futuer aan wëne?’ Tsum payxpiil: wole mer saan tas tuu 1 Thesalooniker 5:17, 18 b kelees host. (Lees.) Noo te leesung fon tiise wersikele, khanst tuu xtil hale un triwer noo tenke aan wii ofts un tiif tuu peete tuust. Tuu khanst aach triwer noo tenke aan te uersache warom tuu petanklich pist. Fiilaycht khanst tuu ëntxlise Yeehoowa tanke weeche 3 spetsiifixe tinge. Soo kaar wëns tuu ploos phaar minute penutst fer triwer noo tenke aan te lisyoone fon te Piipel, es tuut tich helfe Kot sayn Wort heere un aan wëne. Un wëns tuu tas yeete taach machst, mit te tsayt wërst tuu een peser tiiner fon Yeehoowa. Awer un wëns tuu mërkst tas es kept tsu fiile phunkte woos tuu tich ferpesere must?
ERKHËN TAYN KRËNSE WËNS TUU TSIILE XTELST
11. Warom khene mer als mool xpiire tas es tsu fiile phunkte kept fer uns ferpesere? Kep een payxpiil.
11 Wiis tuu ti Piipel leest, khan sin tas tuu siist soo fiile tinge woos tuu tich ferpesere khanst tas tuu oone muut wërst. Tsum payxpiil: wole mer saan tas hayt tuut tayn Piipel leesung tsayche tas mer sole net een persoon peser wii ti anere pehantele. (Tya. 2:1-8) Tuu mërkst tas tuu ënerunge too triwer mache khanst. Tas is yets tayn tsiil. Iwer xeen! Te taach truf, leest tuu etliche wersikele woo tsayche tas mer mise unser wërter uf phase. (Tya. 3:1-12) Tuu mërkst tas tuu als mool was kropes orer nekatiiwes kesaat host. Soo tuu ëntxlist ufmuuticher sin wëns tuu mit te anere fertseelst. Te neekste taach, tuut tayn Piipel leesung tsayche tas mer sole net fraaynte fon te welt sin. (Tya. 4:4-12) Tuu mërkst tas tuu must peser uf phase mit tayn ferkniichunge. Im 4te taach, fiilaycht tuust tuu xpiire tas es tsu xweyer is tas ales mache.
12. Warom sole mer net oone muut wëre wën mer mërke in unser Piipel leesung tas mer ënerunge mache mise? (Kuk aach ti noote.)
12 Playp net oone muut wëns tuu mërkst tas tuu phaar ënerunge mache must fer tich ferpesere. Tas tsaycht tas tuu teemuutich pist un ti richtich motiwatsyoon host. Wën mer teemuutich sin, tuun mer ti Piipel leese fer aate fine wii mer uns ferpesere khene. c Ferkes tich aach net tas “ti nay personaliteet” aan tsiie, is etwas woo mer wayter mache mise. (Kol. 3:10) Was tuut tich helfe wayter Kot sayn Wort aan wëne?
13. Was is een kuut aat wii mer aan wëne khene was mer lërne? (Kuk aach tas pilt.)
13 Xtats fersuuche ales uf een mool aan wëne, khanst tuu tich aan xtrenge fer eene orer tswaay tinge ënere. (Xpr. 11:2) Fersuuch tas too mache: mach een list fon te tinge woos tuu ënere must. Tan, suuch raus eene orer tswaay tinge fon tiise list un xaf too traan. Xpeeter, xaf in te anere phunkte. Woo solst tuu aan fange?
Xtats fersuuche ales was mer in te Piipel leese uf een mool aan wëne, sole mer unser krënse erkhëne wën mer tsiile xtele. Fiilaycht khene mer in eene orer tswaay phunkte xafe (Kuk ti apsetse 13-14.)
14. Mit was fer tsiile khanst tuu aan fange?
14 Fiilaycht khanst tuu mit een tsiil aan fange woo laychter is fer se trefe. Orer khanst tuu tich aan etwas konsentriire woo wichticher is yets ferpesere. Wëns tuu ëntxlist host was tuu mache wilst, mach unersuuchunge in unser puplikatsyoone, fiilaycht torich te Índice das Publicações da Torre de Vigia orer te Guia de Pesquisa para Testemunhas de Jeová. Peet tsu Kot un ferlang tëm “te wunx un ti macht fer in krayfe”. (Fili. 2:13) Tan fersuuch aan wëne was tuu kelërnt host. Tayn eyerste tsiil trefe, tuut tich tsiimlich sicher uf muute aan tëm neekste xafe. Mit te tsayt, wërt es woerxaynlich laychter anere ënerunge mache.
LOS KOT SAYN WORT IN TICH XAFE
15. Wii sin Yeehoowa sayn tiiner anerste wii fiile layt woo ti Piipel leese? (1 Thesalooniker 2:13)
15 Etliche layt hon ti Piipel fiil mool kelees. Awer meechte se wërklich aan te Piipel klaape? Tuun se sich aan xtrenge fer se leepe tëm noo was ti Piipel saat? Tuun se sayn leepe too teweeche ënere? Es is xaat, awer ti antwort is ofts “nee”. Awer tas is fiil anerste mit Yeehoowa sayn tiiner. Soo wii ti eyerste kriste, tuun mer ti Piipel aan nëme “wii es wërklich is, Kot sayn wort”. Un meyer xtrenge uns aan fer sayn aanreete aan wëne in unser leepe. (Lees 1 Thesalooniker 2:13.) d
16. Was khan uns helfe ti Piipel aan wëne?
16 Es is net imer laycht Kot sayn Wort leese un aan wëne. Fiilaycht is es xweyer tsayt fer se leese fine. Orer fiilaycht tuun mer tsu fiks leese un net too triwer noo tenke. Orer khan sin tas mer mërke tas es kept tsu fiile phunkte fer uns ferpesere un tas khan uns oone muute lose. Ekaal was tayn kefoer is, tuu khanst too triwer wech khome mit Yeehoowa sayn hilef. Wole mer Sayn hilef aan nëme un ti Piipel aan wëne — net ploos heere was se saat un tan uns klaych ferkese. Kans sicher, woo mee tas mer Kot sayn Wort leese un aan wëne, woo frooer wërt unser leepe sin. (Tya. 1:25)
LIIT 94 Tanke xeen fer tayn Wort, ti Piipel
a (Tyako 1:22-25) Awer, tuut tas wort aan wëne, net ploos horiche; wën net, tuut teyer aych mit falxe aanunge hinerkeen. 23 Wayl wën yemant tas wort horicht, awer es net aan wënt, es is wii eene man woo sayn kesicht im xpiichel kukt: 24 tee kukt sich un, wën eyer faart keet, tuut xon klaych ferkese was fer sort persoon tee is. 25 Awer tee woo mit acht noo kukt tas perfekt kesets, woo frayheet pringt, un sich aan tëm halt, tuut net tas horiche un klaych ferkese, awer tuut ti aarwayt mache; un eyer wërt froo too teweeche.
b (1 Thesalooniker 5:17, 18) Tuut imer peete. 18 Tuut weeche ales tanke. Tas is Kot sayn wile fer aych, in Yeesus Kristus.
c Kuk te wiiteo Was saan anere yunge—Piipel leese im site jw.org.
d (1 Thesalooniker 2:13) Tes weeche tuun meyer aach imer Kot tanke, wayl, wii teyer Kot sayn wort kriit hot, woo teyer fon uns keheert hot, hot teyer es aan kenom net wii wërter fon mënxe awer wii es wërklich is, Kot sayn wort, woo aach in aych woo klaapt, wërke tuut.
