XTUUTYUM ARTIKEL 39
LIIT 125 “Froo sin ti parmhërtsliche”
Woo mee meyer kepe, woo frooer mer wëre
“Kepe pringt mee frooheet wii kriin.” (APHOSTELE SAYN KEXICHT 20:35)
WAS TUUN MER SIIN?
Lërn unerxiitliche aate wii mer fer ti anere kepe khene un warom tas uns froo lost.
1-2. Kepe pringt uns frooheet. Warom is es kuut tas Kot uns soo kemacht hot?
WËN meyer etwas kepe, is unser frooheet kreeser wii wën mer etwas kriin. (Aph. 20:35) Wil tas saan tas mer khee frooheet hon wën mer een kexenk kriin? Nee. Meyer xpiire uns kuut wën tas pasiirt. Awer meyer wëre noch frooer wën mer etwas fer ti anere kepe. Wii kuut tas Yeehoowa uns soo kemacht hot. Warom khene mer tas saan?
2 Wayl Yeehoowa uns soo kemacht hot, khene meyer unser aychne frooheet ferkreese. Meyer kriin tas hin wën mer oportuniteete suuche fer se kepe. Ti aat wii Yeehoowa uns kemacht hot is wunerlich, kël? (Psal. 139:14)
3. Warom khan Yeehoowa wii te “frooe Kot” pexrip sin?
3 Ti Piipel saat tas kepe, pringt frooheet. Tes weeche, khene mer laycht ferxteen warom Yeehoowa wii “te frooe Kot” pexrip is. (1 Tim. 1:11) Tee waar ti eyerst persoon woo etwas kep hot, un nimant kept mee wii Yeehoowa. Soo wii te aphostel Phaul kesaat hot, hot Yeehoowa uns tas leepe kep, un weeche Tëm, tuun mer “uns weekele un eksistiire”. (Aph. 17:28) Yawool, “yeete kuute un perfekte kexenk” khomt fon Yeehoowa. (Tya. 1:17)
4. Was tuut uns helfe noch mee frooheet xpiire?
4 Was khene mer mache wën mer wole noch kreeser frooheet xpiire wën mer kepe? Meyer khene Yeehoowa sayn payxpiil fon krooshërtslichkheet noo mache. (Ëfe. 5:1) In tiise artikel, tuun mer Yeehoowa sayn xeen payxpiil xtutiire. Meyer lërne aach was mer mache khene wën mer tenke tas ti anere net petanklich sin weeche was mer kemacht hon. Tas tuut uns helfe fer ti anere wayter kepe un, soo, frooer wëre.
SAY KROOSHËRTSLICH SOO WII YEEHOOWA
5. Was fer materyaalixe tinge kept uns Yeehoowa?
5 In was fer aate tuut Yeehoowa krooshërtslichkheet tsayche? Wole mer etliche payxpiile noo kuke. Yeehoowa kept uns materyaalixe tinge. Fiilaycht, tuut eyer uns net imer was faynes kepe, awer tee lost sich sicher tas mer imer tas neetiches hon. Tsum payxpiil, tee macht es meechlich tas meyer ese, tsaych un een plats fer se leepe hon. (Psal. 4:8; Mat. 6:31-33; 1 Tim. 6:6-8) Yeehoowa tuut net tas ales fer uns mache wayl eyer sich ketswung xpiirt. Soo, warom macht eyer tas?
6. Was lërne mer mit Matheus 6:25, 26?
6 In khortse wërter, Yeehoowa kept uns was mer prayche wayl eyer uns liipt. Mërk mool Yeesus sayn wërter in Matheus 6:25, 26. a (Lees.) Yeesus hot tas payxpiil fon te feechel penutst un hot kesaat: “Tii tuun net seeye un net ërnte, un tuun net in xope samele.” Awer mërk mool was Yeesus klaych tëm noo saat: “Ayre Fater, woo im himel is, fersoricht se.” Tan, froot Yeesus: “Meecht teyer net mee weyert hon wii tii?” Was is ti lisyoon? Fer Yeehoowa, hon sayn tiiner fiil mee weyert wii ti tiere. Soo, wën Yeehoowa ti tiere uf phast, khene mer uns sicher sin tas eyer uns aach uf phase tuut. Wayl Yeehoowa unser Fater is un uns liipt, kept eyer uns was mer prayche. (Psal. 145:16; Mat. 6:32)
7. Wii khene mer Yeehoowa sayn krooshërtslichkheet noo mache? (Kuk aach tas pilt.)
7 Soo wii Yeehoowa, khene mer aach materyaalixe tinge fer ti anere kepe wayl mer tëne liipe. Tsum payxpiil, tuust tuu een pruuter orer een xwester khëne woo ese orer tsaych praycht? Yeehoowa khan tich penutse fer tiise persoon helfe. Yeehoowa sayn tiiner sin aach fiks fer ti anere helfe wën unklike pasiire. Tsum payxpiil, torich ti pantemii fon coronavirus, hon ti priiter ese, tsaych un anere neetiche tinge keteelt mit tëne woo es praychte. Fiile hon aach krooshërtsliche kontripuytsyoone fer ti weltwayt aarwayt kemacht. Tiise kontripuytsyoone hon keholef ti umaniteer hilef uf te kans welt orkanisiire. Tiise krooshërtsliche priiter un xwestere hon ti wërter fon Hepreeyer 13:16 aan kewënt: “Ferkest aych net tas kuutes se mache un se teele was teyer hot mit te anere, wayl Kot kefalt sich mit tiise opfere.”
Meyer al khene Yeehoowa sayn krooshërtslichkheet noo mache (Kuk te apsats 7.)
8. Was kriin mer hin mit te kraft woo Yeehoowa uns kept? (Filiper 2:13)
8 Yeehoowa kept uns kraft. Yeehoowa sayn kraft hot khee krëns un, mit frooheet, tuut eyer tiise kraft fer sayn tiiner kepe. (Lees Filiper 2:13.) b Host tuu xon kraft im kepeet ferlangt fer keeche een fersuuchung khëmpfe orer fer een xweyer proop aus hale? Fiilaycht host tuu aynfach tsu Yeehoowa ti neetich kraft ferlangt fer ploos noch eene taach aus hale. Wën Yeehoowa tayn kepeet keantwort hot un tich kraft kep hot fer aus hale, sicher host tuu tich soo wii te aphostel Phaul kexpiirt, woo kexrip hot: “Fer ales sin ich xtark torich tee woo meer kraft kept.” (Fili. 4:13)
9. Wii khene mer Yeehoowa noo mache un unser kraft penutse fer ti anere helfe? (Kuk aach tas pilt.)
9 Anerste wii Yeehoowa, hot unser kraft krënse; un meyer khene net kraft fer ti anere kepe kraat soo wii tee. Awer meyer khene Yeehoowa noo mache un unser kraft penutse fer ti anere helfe. Tsum payxpiil, wën een pruuter orer xwester alt orer krank is, khene mer helfe sayn haus uf phase orer im merkaat uf sayn plats keen. Wën unser situatsyoon uns erlaupt, khene mer uns aan piite fer se helfe te Raych Saal sauwer mache orer in te ray lose. Wën mer unser kraft penutse fer tiise tinge mache, khene mer fiil nutse fer unser priiter un xwestere pringe.
Meyer khene unser kraft penutse fer ti anere helfe (Kuk te apsats 9.)
10. Wii khene mer unser wërter penutse fer ti anere ferxtërke?
10 Wole mer uns aach net ferkese tas ti wërter kraft hon. Khënst tuu yemant woo uf kemuut weyer wëns tuu tëm eerlich loope teest? Khënst tuu yemant woo praycht ketreest wëre? Wën yaa, khanst tuu te eyerst xrit kepe fer ti persoon helfe. Tuu khanst ti persoon pesuuche, torich telefoon aan ruufe orer fiilaycht een khaart, een email orer een mensagem xike. Mach tich net tsu fiil ketanke mit was tuu saan tuust. Fiilaycht phaar liipliche wërter sin kraat was te pruuter orer xwester praycht fer noch een taach leaal plaype orer sich peser xpiire. (Xpr. 12:25; Ëfe. 4:29)
11. Wii tuut Yeehoowa sayn kluucheet penutse?
11 Yeehoowa kept uns kluucheet. Te tisipel Tyako hot kexrip: “Wën es kluucheet fer yemant fon aych feelt, sol eyer tii noo un noo fer Kot ferlange un eyer tuut tas kriin, wayl Kot tuut krooshërtslich fer ale kaar kepe, oone se xëne.” (Tya. 1:5) Tiise wërter tsayche tas Yeehoowa tuut net sayn kluucheet fer sich selepst pehale. Tee tuut se mit te anere krooshërtslich teele. Tyako saat aach tas, wën Yeehoowa sayn kluucheet kept, macht Eyer tas “oone se xëne”. Eyer tuut uns nii niter xtele wayl mer erkhëne tas mer sayn oryentiirunge prayche. In woerheet, tuut Yeehoowa uns uf muute tas tsu tëm ferlange. (Xpr. 2:1-6)
12. Was fer oportuniteete hon mer fer unser kluucheet mit te anere teele?
12 Un meyer? Khene mer Yeehoowa noo mache un mit te anere teele was mer wise? (Psal. 32:8) Yeehoowa sayn tiiner hon fiile oportuniteete fer se teele was se kelërnt hon. Tsum payxpiil, ofts, tuun mer tii woo nay in te woerheet sin in te preetich aarwayt iipe. Mit ketult, tuun ti elteste ti ministeryaale tiiner un ti ketaafte priiter helfe se lërne sayn flichte in te kemaynt uf phase. Un tii woo fiil wise iwer wii ti kepaye paue un uf phase, kepe iipung tas anere xafe khene in te kepaye woo ti Orkanisatsyoon penutst.
13. Wën mer ti anere iipe, wii khene mer noo mache ti aat wii Yeehoowa sayn kluucheet teelt?
13 Fersuuch Yeehoowa noo mache wëns tuu ti anere iipst. Meyer mise uns erinere tas Yeehoowa tuut sayn kluucheet krooshërtslich kepe. Tes weeche, teele mer was mer wise mit tëne woo am lërne sin. Meyer hale uns net tsurik ti anere iipe wayl mer pang hon tas se uns eene taach ersetse. Meyer tuun aach net tenke: ‘Nimant hot mich keiipt. Soo, eyer mus aach tas selwer lërne.’ Nimant tswixich Yeehoowa sayn folek sol soo tenke. Xtats tas, tuun mer ales was mer wise froo teele un uns aan xtrenge fer ti anere iipe. (1 The. 2:8) Meyer wole hon tas se aach “inkeiipt [wëre] fer ti anere in lërne”. (2 Tim. 2:1, 2) Wën mer al krooshërtslich teele was mer wise, wëre meyer al kluucher un frooer.
WËNS AUS SIIT TAS TI LAYT NET PETANKLICH SIN
14. Was tuun ti meyerste mache wën mer krooshërtslich mit tëne sin?
14 Wën mer krooshërtslich sin, hauptseechlich mit unser priiter un xwestere, tuun se uns ofts tanke. Im xtant, xike se uns een khaart orer tsayche se sayn petanklichkheet uf een aner aat. (Kol. 3:15) Wën se uns tanke, xpiire mer uns noch frooer.
15. Was sole mer uns erinere wën etliche net petanklichkheet tsayche?
15 Awer als mool, tuun ti layt uns net tanke weeche was mer tëne kemacht hon. Im xtant, hon mer unser tsayt, kraft orer tinge penutst fer yemant helfe. Awer khan sin tas noo heyer, siits aus tas ti persoon kaar khee weyert too tefoer kep hot. Wën tas pasiirt, was khene mer mache fer unser frooheet net ferliire orer piterlich wëre? Tenk tich traan ti wërter fon unser haupste tekst, Aphostele sayn Kexicht 20:35. Ti frooheet woo mer kriin wën mer etwas kepe, hëngt net ap aan wii petanklich ti layt too teweeche sin. Soo kaar wëns aus siit tas ti anere net petanklich sin, khene mer noch soo ëntxlise wayter mit frooheet kepe. Was khan uns helfe? Wole mer phaar itee noo kuke.
16. Was khan uns helfe wayter mit frooheet kepe?
16 Eriner tich tas wëns tuu tsu te anere kepst, machst tuu Yeehoowa noo. Tee kept kuute tinge fer ti layt, ekaal ep se petanklichkheet tsayche orer net. (Mat. 5:43-48) Yeehoowa ferxprecht tas wën mer etwas kepe “oone etwas tsurik waarte”, wërt unser “peloonung kroos sin”. (Luk. 6:35) Soo, say net oone muut wën ti layt tich net imer “tanke xeen” saan. Ferkes tich net: Yeehoowa tuut tich imer peloone weeche tas kuutes woos tuu fer ti anere machst un wayls tuu “mit frooheet [kepst]”. (2 Kor. 9:7; Xpr. 19:17)
17. Was tuut uns helfe Yeehoowa noo mache wën mer kepe? (Luk. 14:12-14)
17 Een aner tings woo mer mache khene fer Yeehoowa noo mache, is aan wëne was Yeesus kesaat hot in Lukas 14:12-14. c (Lees.) Kewis, es is net ferkheert fer een ese in laate orer krooshërtslich pehantele tii woo was eenliches fer uns mache khene. Awer un wën mer mërke tas ofts, tuun mer fer ti anere kepe am waarte tas se uns etwas tsurik kepe? Meyer mise fersuuche aan wëne was Yeesus kesaat hot. Say krooshërtslich mit te layt woos tuu weest khene net etwas tsurik fer tich kepe. Tan wërst tuu froo, wayls tuu Yeehoowa noo machst. Un wën mer fer ti anere kepe oone etwas tsurik waarte, wëre mer imer froo sin, soo kaar wën se uns kaar khee petanklichkheet tsayche.
18. Was khan uns helfe net was xlechtes iwer ti anere tenke?
18 Tenk net was xlechtes iwer ti anere. (1 Kor. 13:7) Wën ti anere uns net petanklichkheet tsayche, khene mer uns frooe: ‘Sin se wërklich unpetanklich orer hon se sich ploos ferkes “tanke xeen” saan?’ Fiilaycht es kept anere uersache warom ti persoon sich net aan kextelt hot wii mer kewaart hon. Etliche sin im xtant aarich petanklich weeche was mer kemacht hon, awer tii khene es xweyer fine tas tsayche. Khan sin tas se sich ferxeemt xpiire wayl se hilef kriit hon, hauptseechlich wën friier, waare tii woo hilef kep hon. Ekaal ti situatsyoon, wën mer unser priiter un xwestere wërklich liipe, tuun mer net was xlechtes iwer tëne tenke un meyer tuun wayter mit frooheet kepe. (Ëfe. 4:2)
19-20. Was noch khan uns helfe froo sin wën mer fer ti anere kepe? (Kuk aach tas pilt.)
19 Say ketultich. Te kheenich Salomon hot was kluuches iwer ti krooshërtslichkheet kexrip: “Xmays tayn proot iwer tas waser, wayl noo fiile taache, tuust tuu tëm noch mool fine.” (Ekl. 11:1) Tiise wërter tsayche tas ofts, khene ti layt sayn petanklichkheet tsayche ploos “noo fiile taache”. Tas is mit een xwester pasiirt.
20 Phaar yoore tsurik, hot ti fraa fon een sirkuyt superintentent een ufmuutich priif fer Sandra kexrip, een xwester woo sich kraat ketaaft hat. In sayn priif, hot se fer Sandra kesaat wii wichtich es is troy tsu Yeehoowa plaype. Unkefeer 8 yoore xpeeter, hot Sandra een priif kexrip fer tas antworte; tii hot kesaat: “Tuu weest tas net, awer ich wil tich saan wii fiil tuu mich keholef host torich ti letste yoore. [Tayn wërter] waare aarich liiplich un ich hon mich nii ferkes fom tekst woos tuu mich kexrip host.” d Sandra hot kexrip iwer ti xwiirichkheete woo se torich ti yoore mit kemacht hot un tan hot se kesaat: “Als mool wolt ich ales uf kepe un noo lose Yeehoowa tiine. Awer tan hon ich mich imer erinert te tekst woos tuu mich kexikt host un tas hot mich kraft kep fer wayter troy plaype. Torich tiise 8 yoore, niks hot mich mee uf kemuut wii te tekst un te priif woos tuu mich kexrip host.” Xtel tich mool foer wii froo meecht ti sirkuyt superintentent sayn fraa sich kexpiirt hon wën se tiise priif “noo fiile taache” kriit hot! Wën mer etwas fer yemant kemacht hon, khan aach pasiire tas ti persoon uns petanklichkheet tsaycht “noo fiile taache”.
Khan sin tas yemant uns ploos tanke tuut een lang tsayt noo meyer tëm keholef hon (Kuk te apsats 20.) e
21. Warom pist tuu pextimt wayter Yeehoowa sayn krooshërtslichkheet noo mache?
21 Wii mer xon kesaat hon, Yeehoowa hot uns mit een ekstra apiliteet kemacht. Opwool es frayt uns wën mer etwas kriin, unser frooheet is noch kreeser wën mer etwas kepe. Meyer xpiire uns kuut wën mer unser priiter un xwestere helfe khene un meyer wëre froo wën se uns petanklichkheet tsayche. Awer ekaal ep se uns tanke orer net, khene mer froo sin wayl mer tas richtiches kemacht hon. Ferkes tich net: ekaal wii fiil tuu kepst, “Yeehoowa khan tich fiil mee kepe wii tas”. (2 Kro. 25:9) Es is unmeechlich mee wii Yeehoowa kepe. Un niks lost uns frooer wii fon Yeehoowa peloont wëre. Soo wole mer pextimt sin wayter unser krooshërtsliche Fater im himel noo mache.
LIIT 17 “Ich wil es!”
a (Matheus 6:25, 26) “Tes weeche, saan ich aych: Lost noo aych soo fiil ketanke iwer ayre leepe mache, iwer was teyer ese orer trinke solt, un iwer ayre khërper, was teyer aan tsiie solt. Is tas leepe net wichticher wii tas ese un te khërper wichticher wii tas tsaych? 26 Kukt mit acht ti feechel im himel; tii tuun net seeye un net ërnte, un tuun net in xope samele, awer ayre Fater, woo im himel is, fersoricht se. Meecht teyer net mee weyert hon wii tii?
b (Filiper 2:13) Wayl Kot is Tee, woo soo wii es iim kefalt, is am aych xafe, un kept aych te wunx un ti macht fer in krayfe.
c (Lukas 14:12-14) Tan hot eyer kesaat tsum man woo tëm in kelaat hat: Wëns tuu een mitaach orer nacht ese machst, laat net in tayn fraaynte, tayn priiter, tayn parente un aach net tayn rayche nochpere. Wayl tii khente tich tsurik in laate, un tan weyerst tuu xon peloont. 13 Awer wëns tuu een ese aus kepst, tuu ti aarme, ti ferkripelte, ti laame un ti plinte in laate. 14 Soo wërst tuu froo sin, wayl se niks hon fer tich tsurik kepe. Tan wërst tuu peloont am ufxtaye fon te kerechte.”
d Te tekst woo ti fraa fom sirkuyt superintentent fer Sandra kexrip hot, waar 2 Yoohan 8, woo saat: “Phast uf tas teyer net ferliirt was mer uns aan kextrengt hon fer se erayche, tas teyer ti komplët peloonung kriit.”
e PILT AUSLEYUNG: (Foerxtelung) Ti fraa fon een sirkuyt superintentent hot een ufmuutich priif fer een xwester kexrip. Yoore xpeeter, hot ti xwester tsurik kexrip un “tanke xeen” kesaat.
