Ploos wayl se net im Oomtsmaal fom Hër waare, es wil net saan tas Yeesus sich net kefalt hot mit te 70 tisipele orer tas se tëm im xtich kelos hon. Yeesus wolt aynfach mit sayn aphostele in tiise ewënt sin.

Yeesus hot sich kefalt mit te 12 un mit te 70. Tswixich sayn fiile tisipele, hot Yeesus eyerst 12 mëner raus kesuucht woo eyer aphostele kenënt hot. (Luk. 6:12-16) Tee waar in Kalileya kewees wii eyer ti “12 fersamelt [hot]” un “se kexikt [hot] Kot sayn Raych preetiche un ti kranke heele”. (Luk. 9:1-6) Xpeeter in Yuteea, hot Yeesus “noch 70 raus kesuucht un [se] kexikt tsu tsweet”. (Luk. 9:51; 10:1) Soo hat Yeesus tisipele, woo iwer tëm kepreeticht hon, in unerxiitliche pletse.

Ti yuute woo Yeesus sayn tisipele kep sin, hon wayter tas Oostre yeetes yoer kefayert, tsiimlich sicher mit sayn familye. (Eeks. 12:6-11, 17-20) Klaych foer sayn toot, sin Yeesus un sayn aphostele tsu Yeruusalem kang. Awer tee hot net ferlangt tas al sayn tisipele fon Yuteea, Kalileya un Perëya sich samele solte fer tas Oostre fayre. Siits aus tas Yeesus wolt ploos mit sayn aphostele sin. Tee hot se kesaat: “Ich hat een kroose wunx fer tiise Oostre mit aych ese eep ich layte mus.” (Luk. 22:15)

Es waar een kuut uersach too hiner traan. Yeesus teet klaych wii “Kot sayn Lam [xtërpe] woo ti sint fon te welt wech xaft”. (Yoo. 1:29) Tas teet in Yeruusalem pasiire, woo ti opfere tsu Kot xon een lang tsayt kemacht waare. Tas lam fom Oostre hot ti israeliiter erinert tas Yeehoowa se fom Ejipt pefrayt hot. Awer torich sayn opfer, teet Yeesus fiil mee mache. Eyer teet ti kans mënxheet fon te sint un fom toot pefraye. (1 Kor. 5:7, 8) Weeche Yeesus sayn opfer, teete ti 12 aphostele teel fom funtament fon te kristlich kemaynt wëre. (Ëfe. 2:20-22) Es is interesant tas ti haylich Yeruusalem hot “12 funtamente xteen” mit te “naame fon te 12 aphostele fom Lam”. (Apo. 21:10-14) Yawool, ti troye aphostele teete een wichtich teel in te erfiilung fon Kot sayn tsiil hon. Soo is es tsum ferxteen warom wolt Yeesus pay tëne sin im letste Oostre un in was klaych tëm noo pasiirt is: tas Oomtsmaal fom Hër.

Ti 70 un ti anere tisipele waare net in tiise Oomtsmaal mit Yeesus. Noch soo, al ti tisipele woo troy plaype teete, teete nutse too tefun kriin. Al fon tiise tisipele, woo mit te tsayt kesalpte kriste kep sin, teete teel mache im pakt fom Raych, iwer was Yeesus mit te aphostele kexproch hot in tiise nacht. (Luk. 22:29, 30)