In woerheet, tas is net was tiise wersikel saan wil. Xtats tas, tiise wersikel xprecht iwer yemant woo fiile propleeme mit macht (woo falt), awer halt aus (xtayt uf).

Wole mer kuke ti wersikele woo foer un noo tiise tekst xteen: “Tuu tich net neewich am haus fon tëm kerechter ferxtekele fer tëm atakiire, soo wii een xlechte mënx macht. Tuu net tëm sayn plats fer se ruue fernichte. Wayl, soo kaar wën te kerechter siwe mools falt, tuut eyer noch mool uf xtaye; awer ti xlechter tuun weeche ti unklik xtolpere. Wën tayn faynt falt, tuu net froo wëre; un wën eyer xtolpert, tayn hërts sol sich net fraye.” (Pro. 24:15-17)

Welche layt tenke tas te wersikel 16 xprecht iwer een persoon woo sint, awer peroyt sich un kriit sayn froyntxaft mit Kot noch mool tsurik. Tsum payxpiil, tswaay relichyeese fiirer fon Ënglant hon kexrip tas ti preeticher — in te ferkangne tsayte un hayt tsu taach — hon tiise wersikel kraat soo aus keleet. Tii hon aach kesaat tas tiise ausleyung teet petayte tas “es is meechlich fer eene kuute mënx xrooe sinte mache, awer wayter Kot liipe un Kot sayn tsuxtimung kriin, wayl eyer peroyt sich”. Yemant woo wil net keeche ti sint khëmpfe fiilaycht teet tiise ausleyung kërn hon. Im xtant eyer tenkt tas, soo kaar wën eyer noo un noo sint, Kot tuut tëm imer fertsaye.

Awer tas is net was te wersikel 16 saan wil.

Tas hepreeyx wort woo iwersetst is “falt” in te wersikele  16 un 17 khan in unerxiitliche aate penutst wëre. Tsum payxpiil: een xtiir falt uf te xtroos, yemant falt fon tëm tach, orer een xteenche falt ufm pootem. (Deut. 22:4, 8; Amós 9:9) Tas wort khan aach in een simpoolix aat penutst wëre, soo wii neekst xteet: “Wën Yeehoowa kefalt sich mit een mënx sayn weech, tuut Eyer sayn xrite lënke. Soo kaar wën eyer falt, tuut eyer net ufm pootem keleet plaype, wayl Yeehoowa halt sayn hant fest.” (Sal. 37:23, 24; Pro. 11:5; 13:17; 17:20)

Awer, kuk was te leerer Edward H. Plumptre saat: “Tas hepreeyx wort fer [“se fale”] is nii mools penutst fer se xpreche iwer in te sint fale.” Tes weeche, een aner leerer tuut te wersikel 16 soo aus leye: “Es hot khee tswek Kot sayn folek xlecht pehantele, wayl tii tuun imer iwerleepe — ti xlechter net!”

Tas ales tsaycht tas Provérbios 24:16 xprecht net iwer sinte mache, awer iwer propleeme un xwiirichkheete mit leepe — soo kaar wën se noo un noo pasiire. In te xlechte welt woo mer hayt leepe, een kerechter khan propleeme mit kesuntheet orer anere kefoere mit leepe. Tee khan soo kaar xrooe yachtung fon te rechiirunge mit mache. Awer eyer khan sich sicher sin tas Kot tuut tëm unerxtitse un tëm helfe tas phake un iwerkhome. Tenk iwer wii fiil mools host tuu xon kesiin tas ales laaft kuut ap mit Kot sayn tiiner. Warom? Weeche ti karantii woo mer hon: “Yeehoowa xtitst uner ale tii woo am fale sin un heept uf ale tii woo krum sin.” (Sal. 41:1-3; 145:14-19)

“Te kerechter” wërt net froo wën ti anere propleeme hon. Xtats tas, is eyer uf kemuut wayl eyer wees tas “ales tuut kuut ap laafe mit tëne woo tiife respëkt noom woere Kot hon, wayl se tiife respëkt tsu tëm hon”. (Ecl. 8:11-13; Jó 31:3-6; Sal. 27:5, 6)