Nee. Niks in te Piipel orer in te kexichte piicher tsaycht tas ti kriste hon soo was kemacht.

Weeche ti aat wii tiise wersikel in fiile Piipele iwersetst is, etliche tenke tas ti taaf fer ti toote waar in te tsayt fon tëm aphostel Phaul kemacht. Tsum payxpiil, welche Piipele saan: “Awer wën es khee ufxtaye kept, was mache tii woo fer ti toote ketaaft sin?”

Awer, mërk was tswaay Piipel leerer saan. Te Dr. Gregory Lockwood saat tas es kept khee pewaysung in te Piipel orer im kexicht woo tsaycht tas yemant hot sich ufm plats fon een toot persoon ketaaft. Te Piipel leerer Gordon D. Fee xtimt mit tas. Eyer hot kexrip tas es kept khee payxpiil in te Piipel orer in tëm kexicht fon soo een sorte taaf. Tee saat tas te Naye Testament tuut nii mools too triwer xpreche; un tas es khee pewaysung kept tas ti eyerste kriste, orer tas ti khëriche woo sin klaych noo te aphostele sayn toot kekriintet, hon tas kemacht.

Ti Piipel saat tas Yeesus sayn nookeener selte ‘tisipele mache fon mënxe fon ale natsyoone, tëne taafe, un tëne in lërne se aan heere ales was eyer tëne kexikt hat’. (Mat. 28:19, 20) Eep een persoon khent een ketaafte tisipel wëre, praucht eyer iwer Yeehoowa un sayn Soon lërne, aan tëne klaape, un tëne aan heere. Yemant woo xon toot un im kraap waar khent net tas mache; un een krist woo noch am leepe waar khent net tas fer ti toot persoon mache. (Ecl. 9:5, 10; João 4:1; 1 Cor. 1:14-16)

Tan, was wolt Phaul saan?

Welche korinter hon ap kextos tas ti toote uf keruuft weyere. (1 Cor. 15:12) Phaul hot ketsaycht tas se ferkheert waare. Wii? Eyer hot kesaat tas ‘yeete taach is eyer xteen foer te toot keplip’. Kewis tee waar noch am leepe. Awer, opwool eyer hot tiise kefoere mit kemacht, tee waar sich sicher tas, noom toot, teet eyer wii een mechtich kayst uf keruuft wëre, soo wii Yeesus waar. (1 Cor. 15:30-32, 42-44)

Ti korinter praychte ferxteen tas kesalpte kriste sin, wolt saan tas se teete yeete taach kefoere mit mache, un tas se xtërpe teete eep se uf kextii wëre khente. Tan, wën se “aan Yeesus Kristus ketaaft” waare, waare se aach “aan tëm sayn toot ketaaft”. (Rom. 6:3) Es petayt tas, soo wii Yeesus, teete se proope mit mache un xtërpe tas se khente uf keruuft wëre fer im himel se leepe.

Mee wii tswaay yoore noo tas Yeesus im waser ketaaft waar, hot eyer fer tswaay fon sayn aphostele kesaat: “Teyer wërt ketaaft mit te taaf woo ich ketaaft wëre.” (Mar. 10:38, 39) Too hiir, Yeesus waar net am xpreche iwer ti taaf mit waser. Xtats tas, wolt eyer saan tas troy tsu Kot plaype, teet tëm tsum toot nëme. Phaul hot kexrip tas ti kesalpte teete ‘mit Kristus layte tas se aach mit tëm kehërlicht wëre’. (Rom. 8:16, 17; 2 Cor. 4:17) Tan, prauchte se aach xtërpe fer uf keruuft wëre fer im himel se leepe.

Tes weeche, Phaul sayn wërter khene soo iwersetst sin: “Wën es net soo weyer, was mache tii woo sich taafe mit tëm tswek fer te toot kriin? Wën ti toote wëre kaar net uf keruuft, warom tuun se sich mit tiise tswek taafe?”