Host tuu Te Wachthorm mit acht tiise yoer kelees? Kuk eps tuu khanst tiise frooche antworte:

Was fer nutse kriin mer wën mer unser tsayt penutse fer mit Yeehoowa xpreche, tëm heere un iwer tëm tenke?

Meyer tuun peser ëntxlise mache, peser leerer sin, een xtërker klaape hon un Yeehoowa noch mee liipe. (Wachthorm 01/22 sayte 30-31)

Wii wëre mer keholef wën mer lërne uf Yeehoowa un ti mënxe woo tëm foer xteen, traue?

Yets is ti tsayt fer lërne se traue aan wii Kot ti tinge macht. Too tefoer, sole mer net iwer ti oryentiirunge un ëntxlise fon te elteste tswayfele. Soo, wën ti kroos tripulatsyoon khomt, wëre mer fërtich fer ti oryentiirunge aan heere, soo kaar wën se xpasich orer xweyer fer se ferxteen, aus siin. (Wachthorm 02/22 sayte 4-6)

Was wolt te engel saan wii eyer mit Sakarias kexproch hot iwer ‘tas senkel im hant fon tëm kowernatoer Soropapël’? (Sak. 4:8-10)

Tiise wisyoon hot Kot sayn folek sicher kelos tas te keweenlich thempel woo se am paue waare, weyer fërtich kepaut un teet Kot kefale. (Wachthorm 03/22 sayte 16-17)

Wii khene mer ‘een payxpiil in te aat wii mer xpreche’ sin? (1 Tim. 4:12)

Meyer mise mit kuutheet un respekt in te preetich aarwayt xpreche, mit unser kans hërts singe, ofts antworte in te fersamlunge kepe, net liie, un unser wërter penutse fer ti anere uf muute, net xaate mache. (Wachthorm 04/22 sayte 6-9)

Warom hot tas wilt tier fon Apokalipsis 13:1, 2 teele fon te 4 tiere (rechiirunge) woo in Tanyël 7 foer khome?

Tas wilt tier fon Apokalipsis 13 petayt net ploos een rechiirung, wii Roma. Tas petayt al ti politixe rechiirunge woo xon iwer ti mënxe rechiirt hon un woo noch rechiire. (Wachthorm 05/22 sayt 9)

Was is een wichtich aat wii mer tsayche khene tas mer uf Kot sayn kerechtichkheet traue?

Wën yemant uns keëricht orer keeche uns kesint hot, fersuuche mer net pees orer piterlich plaype. Meyer fersuuche aach ti sache in Yeehoowa sayn hënt lose; tee tuut ti kanse xaate woo ti sint keprung hot, fermache. (Wachthorm 06/22 sayte 10-11)

Was sol een pruuter, woo een kepeet in een fersamlung macht, sich erinere?

Tas kepeet sol net penutst wëre fer ti kemaynt aan reete orer fer etwas pekhant mache. Es is aach net neetich “fiil wërter” penutse, hauptseechlich am aanfang fon te fersamlung. (Mat. 6:7) (Wachthorm 07/22 sayte 24-25)

Wii soo tuun “tii woo xlechtes kemacht hon” een “ufxtaye fers kericht” kriin? (Yoo. 5:29)

Tii tuun net een nekatiiw kericht kriin weeche ti tinge woo se foer sayn toot kemacht hon. Wën ti Piipel saat tas se kericht wëre, wil tii saan tas tëne sayn aanxtelung wërt peopacht noo sayn ufxtaye. (Wachthorm 09/22 sayt 18)

Was fer ufmuutiche wërter hot J. F. Rutherford kesaat in een konkrës in septemper fon 1922?

In een konkrës in Cedar Point, Ohio (Fereenichte Xtaate fon Amërika), hot eyer kesaat: “Te Kheenich rechiirt xon! Ayre flicht is tas fer ale kaar saan. Tes weeche, macht pekhant, macht pekhant, macht pekhant, te Kheenich un sayn Raych!” (Wachthorm 10/22 sayte 3-5)

Isaiias 30 xprecht iwer 3 aate wii Kot uns helft aus hale. Was sin se?

Tiise kapitel tsaycht tas Yeehoowa (1) heert un antwort unser kepeete, (2) lënkt uns un (3) seechent uns yets un im futuer. (Wachthorm 11/22 sayt 9)

Warom khene mer saan tas ti wërter im Psalm 37:10, 11, 29 hon sich friier erfiilt un tuun sich im futuer erfiile?

Tawi sayn wërter tuun kenau pexraype ti kuute situatsyoon in Israël, tsum payxpiil, torich Salomon sayn rechiirung. Yeesus hot ketsaycht tas te wersikel 11 xprecht iwer een paratiis woo im futuer khomt. (Mat. 5:5; Luk. 23:43) (Wachthorm 12/22 sayte 8-10, 14)