Nee. Was Tawi kexrip hot, hot kextimt un waar woer kewees.

Tenk aan was eyer kesaat hot aan tiise un anere eenliche wersikele: “Ich tuun fer imer tayn naame mit liiter loope, soo lang wii ich mayn ferxpreche yeete taach in hale.” “Ich loope tich, Oo Yeehoowa, mayn Kot, mit mayn kans hërts; un ich tuun tayn naame fer imer ferhërliche.” “Ich tuun tayn naame fer ti kans eewichkheet loope.” (Psal. 61:8; 86:12; 145:1, 2)

Wii Tawi tas kexrip hot, waar eyer net am tenke tas eyer nii xtërpe teet. Tee wust tas Yeehoowa kesaat hat tas ti mënxe xtërpe teete weeche ti sint. Un Tawi wust tas eyer een sintiche mënx waar. (Xee. 3:3, 17-19; Psal. 51:4, 5) Tee wust aach tas anere troye mëner — soo wii Apraham, Isak un Yaakop — kextorep sin. Un Tawi khont mërke tas eyer selepst mit te tsayt xtërpe teet. (Psal. 37:25; 39:4) Awer ti wërter im Psalm 61:8 hon ketsaycht was tëm sayn wunx un pextimung waar: tee wolt Kot fer imer loope, es wil saan, soo lang wii eyer leepe teet. (2 Sam. 7:12)

Als mool was Tawi kexrip hot, waar net een profetsii, awer etwas woo eyer mit keleept hot. Etliche payxpiile sin ti Psalme 18, 51 un 52. Im Psalm 23, hot Tawi, woo een xeefer waar, Yeehoowa wii een xeefer pexrip woo fiirung, kraft un xitsung kept. Tes weeche, wolt Tawi Kot ti kanse taache fon sayn leepe tiine. (Psal. 23:6)

Eriner tich aach tas es waar Yeehoowa woo Tawi kelënkt hot se xraype. Tepay aan was eyer kexrip hot, waare profetsiie woo teete sich wayt im futuer erfiile. Tsum payxpiil, im Psalm 110, hot Tawi kexrip iwer een tsayt wën sayn Hër teet sich “aan [Kot sayn] rechts sayt”, im himel, setse un teet fiil autoriteet kriin. Autoriteet fer was mache? Fer Kot sayn faynte unich tëm xtele un “ti natsyoone [fon te eyert] richte”. Tiise tekst xprecht iwer te Mesias, nookhomer fon Tawi. Te Mesias teet im himel rechiire un ‘een priister fer imer sin’. (Psal. 110:1-6) Yeesus hot ketsaycht tas ti profetsii im Psalm 110 hot iwer tëm kexproch un teet sich im futuer erfiile. (Mat. 22:41-45)

Yawool, Yeehoowa hot Tawi kelënkt se xraype iwer sayn tsayt un een tsayt im futuer, woo eyer fom toot uf keruuft wëre teet un khent tan Yeehoowa fer imer loope. Tas tsaycht tas te Psalm 37:10, 11, 29 khan aan kewënt wëre in te tsayt woo tiise wersikele kexrip kep sin un aach im futuer. Friier, hon tiise ferxpreche sich in Israël erfiilt; im futuer, tuun se sich erfiile wën Kot macht was eyer ferxproch hot. (Kuk te apsats 8 fom artikel “Tuu wërst mit meer im Paratiis sin”, in tiise piichelche.)

Soo, tuun te Psalm 61:8 un anere eenliche wersikele tsayche tas Tawi wolt Yeehoowa pis sayn toot loope, im friirixe Israël. Un tii tuun aach tsayche was Tawi im futuer mache tuut wën Yeehoowa tëm tsurik tsum leepe pringt.