1. Wii tuut Yeehoowa ofts ti kepeete fon sayn tiiner antworte?

 WUST tuu tas Yeehoowa khan tich penutse fer yemant sayn hërtslich kepeet antworte? Tas khan pasiire ekaal eps tuu een elteste, ministeryaale tiiner, pyoneer orer puplikatoer pist. Yeehoowa khan tich penutse ekaal eps tuu yung orer alt pist; eps tuu een pruuter orer xwester pist. Wën yemant woo Yeehoowa liipt tëm hilef ferlangt, tuut Yeehoowa ofts ti elteste orer anere troye tiiner penutse fer ti persoon “fiil troost” kepe. (Kol. 4:11) Tas is een kroos eer Yeehoowa un unser priiter soo tiine! Meyer khene tas mache wën een krankheet aus precht, wën een unklik pasiirt orer wën mer yachtung mit mache.

2. Warom khan es fiilaycht xweyer sin ti anere helfe wën een krankheet aus precht?

² Wën een krankheet aus precht, khan es xweyer sin ti anere helfe. Tsum payxpiil, im xtant wole mer unser fraaynte pesuuche, awer soo was mache khent kefeerlich sin. Fiilaycht wole mer in laate tii woo weenich kelt hon fer mit uns ese, awer tas is aach net meechlich. Un wën unser aychne familye am layte is, khan es xweyer sin ti anere helfe. Noch soo, hon mer een kroose wunx fer ti priiter helfe un Yeehoowa kefalt sich wën mer uns too traan aan xtrenge. (Xpr. 3:27; 19:17) Soo, was khene mer mache?

3. Was lërne mer mim payxpiil fon te elteste in Desi sayn kemaynt? (Yeeremias 23:4)

³ Was khene ti elteste mache? Wëns tuu een elteste pist, tuu ti xeef kuut khëne lërne. (Lees Yeeremias 23:4.) b Desi c, ti xwester iwer weem mer im letste artikel kexproch hon, saat:  “Ti elteste fon mayn preetich aarwayt krup, hon imer mit mich un mit te anere kexaft un sich ferkniicht.” Tes weeche waar es laychter fer tiise elteste Desi helfe wën ti pantemii fon coronavirus aus keproch is un etliche fon Desi sayn parente weeche te wirus kextorep sin.

4. Warom khonte ti elteste Desi helfe un was lërne mer too temit?

⁴ Desi leet aus: “Wayl ti elteste xon mayn fraaynte waare, waar es laychter fer mich saan wii ich mich kexpiirt hon un was mich ëngstlich kelos hot.” Was lërne ti elteste too temit? Phas ti xeef uf eep een xwiirichkheet khomt. Say tëne sayn fraaynt. Wën een krankheet aus precht un tuu khanst net mee ti priiter perseenlich pesuuche, xprech mit tëne torich anere aate. Desi saat: “Als mool, unerxiitliche elteste hon mich aan keruuft un mensagens kexikt im selwiche taach. Ti tekste woo se mich ketsaycht hon, hon mich tiif aan kekrif, opwool ich se xon kuut kekhënt hon.”

5. Wii khene ti elteste tsum wise kriin was ti priiter un xwestere prayche, un wii khene se tëne helfe?

⁵ Fer se wise was ti priiter prayche, khanst tuu mit kexik tëne frooche mache. (Xpr. 20:5) Hon se kenuuch ese, metitsiin un anere neetiche tinge? Is es meechlich tas se sayn aarwayt orer soo kaar sayn woonung ferliire? Wën ti rechiirung hilef aan piit, prayche se hilef fer tas ferlange? Desi hot materyaalix hilef fon sayn priiter kriit. Awer was se te meyerst keholef hot, waar tas ti elteste liip ketsaycht hon un se uf kemuut hon torich ti Piipel. Tii saat: “Ti elteste hon mit mich kepeet. Ich khan mich net kenau traan tenke was se kesaat hon, awer ich erinere mich wii ich mich kexpiirt hon. Es waar wii wën Yeehoowa saan teet: ‘Tuu pist net aleen.’” (Isa. 41:10, 13)

6. Was khene fiile in te kemaynt mache fer ti anere helfe? (Kuk tas pilt.)

⁶ Was khene ti anere mache? Meyer waarte tas ti elteste te eyerste xrit kepe fer ti priiter un xwestere helfe. Awer Yeehoowa wil hon tas meyer al ti anere uf muute un helfe. (Kal. 6:10) Wën yemant krank is, soo kaar een kleen tings woo mer mache, khan tëm xon fiil helfe. Een khint khan etwas moole orer een khaart xike fer een pruuter uf muute. Een yung persoon khan tsum merkaate keen orer was aneres fer een xwester mache. Anere in  te kemaynt khene fiilaycht ese in richte fer yemant woo krank is, un tas tsu tëm nëme. Kewis, wën een krankheet aus precht, ale in te kemaynt mise uf kemuut wëre. Noo te fersamlunge — ekaal ep tas perseenlich orer torich wiiteokonferëns is —, khene mer een pisye lënger plaype fer mit te priiter fertseele. Un ti elteste mise aach uf kemuut wëre. Wën een krankheet aus precht, hon se ofts fiil mee tinge fer se mache. Etliche priiter hon een priif fer ti elteste kexikt fer tëne “tanke xeen” saan. Es is aarich kuut wën mer unser pestes mache fer “eene ti anere uf muute un ferxtërke”! (1 The. 5:11)

7. Wii khan een unklik een persoon petrefe?

⁷ In phaar sekunte, khan een unklik een persoon sayn leepe ënere. Etliche ferliire sayn aychentum, sayn haus, orer soo kaar sayn keliipte. Tiise xrekliche tinge khene aach fer unser priiter un xwestere pasiire. Was khene mer mache fer se helfe?

8. Was khene ti elteste un ti familye xëfe mache eep een unklik pasiirt?

⁸ Was khene ti elteste mache? Elteste, helft ayre priiter sich foer perayte eep een unklik pasiirt. Lost aych sicher tas ale in te kemaynt xon wise was se mache mise fer in sicherheet plaype un fer mit te elteste fertseele. Margaret, iwer weem mer im letste artikel kexproch hon, saat: “Unser elteste hon in te phunkte fer ti kemaynt se helfe kesaat tas es noch meechlich weyer tas walt fayer pasiire teete. Tii hon kesaat tas, wën ti autoriteete uns xike teete unser haus lose orer wën ti situatsyoon kefeerlich weyer, miste mer klaych aus rayse.” Tas teel is in te richtich tsayt khom, wayl ploos 5 woche xpeeter hot een kefeerlich walt fayer aan kefang. In te familye aanpeetung, khene ti familye xëfe fertseele iwer was yeete eene in te familye mache mus. Wën tayn familye foer perayt is, wërt es tsiimlich sicher laychter fer aych in ruu plaype wën een unklik pasiirt.

9. Wii khene ti elteste sayn aarwayt orkanisiire foer un noo een unklik?

⁹ Wëns tuu superintentent fon een preetich aarwayt krup pist, host tuu ti richtiche numere un atrese fon al in tayn preetich krup? Samel tiise informatsyoone eep een unklik pasiirt. Mach een list un tuu ofts kuke ep tas noch xtime tuut. Soo, wën een unklik pasiirt, khanst tuu mit yeete puplikatoer xpreche un siin was se hon mise. Tan tuu klaych tiise informatsyoone fer te kortenatoer fon te elteste khërperxaft kepe, un tee tuut mim sirkuyt superintentent fertseele. Wën tiise priiter mitsamer xafe, khan sayn aanxtrengung fiil aus mache. Noo tas walt fayer, hot Margaret sayn sirkuyt superintentent net kexloof torich 36 xtune. Tee hat fiil se tuun wii eyer ti aarwayt fon te elteste orkanisiirt hot. Tii hon fersuucht kontaktiire un uf phase 450 priiter woo muste sayn hayser lose. (2 Kor. 11:27) Soo al woo muste een plats hon fer se plaype, hon tas kefun.

10. Warom ti priiter uf phase is soo wichtich fer ti elteste? (Yoohan 21:15)

¹⁰ Ti elteste hon ti flicht fer ti priiter uf muute torich ti Piipel un aach helfe tii woo ëngstlich sin. (1 Phe. 5:2) Wën een unklik pasiirt, mise ti elteste sich sicher lose tas yeete pruuter un xwester in sicherheet is un ep se ese, tsaych un een plats fer se plaype hon. Awer in te moonate tëm noo, mise ti priiter wayter uf kemuut wëre torich ti Piipel un aach hilef kriin fer mit te ëngstlichkheete um keen. (Lees Yoohan 21:15.) d Harold tiint in een Filyaal Komisyoon un hot fiile priiter un xwestere khëne kelërnt woo unklike mit kemacht hon. Tee saat: “Es nëmt tsayt fer too  triwer wech khome. Im xtant xpiire se tas sayn leepe noch mool normaal is, awer ti erinerung fon een keliipte woo kextorep is, fon een weyertlich aychentum woo se ferloer hon, orer fon te kefeerlich situatsyoon woo se mit keleept hon, khan noch hale. Weeche tiise erinerunge, khene se sich noch mool traurich xpiire. Es is normaal tas een mënx sich soo xpiirt un es wil net saan tas eyer een xwache klaape hot.”

11. Was fer anere hilef mise ti familye im xtant kriin?

¹¹ Ti elteste tuun aan wëne te aanreet fon Romaaner 12:15: “Prilt mit tii woo prile.” Ti elteste mise tii, woo een unklik mit kemacht hon, sicher lose tas Yeehoowa un ti priiter se liipe tuun. Ti elteste wole aach ti familye helfe sayn kaystlich rutiin hale: peete, xtutiire, tsu te fersamlunge keen un preetiche. Ti elteste khene aach ti eltere uf muute sayn khiner helfe sich traan hale aan was net fernicht wëre khan. Eltere, erinert ayre khiner tas Yeehoowa wërt fer imer tëne sayn Fraaynt sin un tas eyer tuut se imer helfe. Un erinert tëne aach tas se een weltwayt pruuterxaft hon woo fërtich is fer tëne helfe. (1 Phe. 2:17)

12. Was khene anere mache fer se helfe wën een unklik pasiirt? (Kuk tas pilt.)

¹² Was khene ti anere mache? Wën een unklik ticht pasiirt, froo fer ti elteste wiis tuu helfe khanst. Fiilaycht khanst tuu fer een tsayt in tayn haus aan nëme tii woo muste sayn hayser lose orer tii woo in te umaniteer hilef xafe. Im xtant, khanst tuu ese un anere neetiche tinge fer ti puplikatoore woo petrof kep sin, fersoriche. Wën een unklik wayt wech pasiirt, khanst tuu aach helfe. Wii? Peet fer tii woo ti unklik mit mache. (2 Kor. 1:8-11) Tuu khanst aach ti umaniteer hilef uner xtitse torich kontripuytsyoone fer ti weltwayt aarwayt. (2 Kor. 8:2-5) Wëns tuu pis tas plats reese khanst fer se helfe, xprech mit te elteste iwer wiis tuu tich fraywilich aan piite khanst. Wëns tuu in kelaat wërst fer se helfe, tsiimlich sicher tuust tuu iipung kriin; soo khanst tuu in te pest aat helfe.

13. Was fer propleeme mache unser priiter mit in lënter woo unser aarwayt ferpoot is?

¹³ In lënter woo unser aarwayt ferpoot is, lost ti yachtung tas leepe noch xweyer. Priiter  in tiise lënter mache aach propleeme mit weeche kelt, krankheete orer weeche te toot fon yemant woo se liipe. Awer weeche ti ferpiitung, im xtant khene ti elteste net pesuuche orer fray xpreche mit tëne woo mise uf kemuut wëre. Tas is mit Andrei pasiirt, iwer weem mer im letste artikel kexproch hon. Een xwester fon sayn preetich aarwayt krup hot ekonoomixe propleeme mit kemacht. Too hot se een unfal mim khare kehat. Tii must etliche sirurxiie mache un khont net xafe. Yeehoowa waar ti situatsyoon fon te xwester am uf phase un hot ti priiter kelënkt fer se helfe. Opwool ti ferpiitung un ti pantemii, hon ti priiter kemacht was se khonte fer se helfe.

14. Wii khene ti elteste uf Yeehoowa traue un soo een kuut payxpiil lose?

¹⁴ Was khene ti elteste mache? Andrei hot kepeet un kemacht was eyer khont. Wii hot Yeehoowa keantwort? Tee hot anere in te kemaynt penutst woo khonte mee mache fer ti xwester helfe. Etliche hon ti xwester paym tokter kenom. Anere hon tëne kelt kep. Yeehoowa hot se kelënkt se mache was meechlich waar, un tee hot sayn eenich un koraajich aarwayt keseechent. (Hep. 13:16) Elteste, wën ti aarwayt ferpoot is, ferlangt ti anere sayn hilef. (Yee. 36:5, 6) Un tas haupste: tuut uf Yeehoowa traue; tee khan aych helfe ti priiter un xwestere uf phase.

15. Wii khene mer eenich mit unser priiter plaype wën mer yachtung mit mache?

¹⁵ Was khene ti anere mache? Wën unser aarwayt ferpoot is, im xtant mise mer uns in kleener krupe fersamele. Tes weeche is es wichtich yets te friit mit al unser priiter un xwestere hale. Khëmpft keeche Satanaas un net eene keeche ti anere. Kept net acht fer ti priiter sayn feeler un waart net tsu lang fer een propleem resolwiire. (Xpr. 19:11; Ëfe. 4:26) Sayt fërtich fer ti anere helfe. (Tit. 3:14) Erinerst tuu tich fon te xwester woo mer kraat fertseelt hon? Ti hilef woo se kriit hot, hot te kanse preetich aarwayt krup petrof. Tii sin tichter khom, wii een familye. (Psal. 133:1)

16. Tëm noo Koloser 4:3, 18, wii khene mer unser priiter un xwestere helfe woo yachtung am mit mache sin?

¹⁶ Tausente priiter un xwestere tuun Yeehoowa tiine, opwool ti rechiirung se ferpoot hot. Etliche fon tëne sin in te katee weeche sayn klaape. Meyer khene fer tëne un sayn familye peete. Meyer khene aach peete fer tii woo koraaj tsayche fer unser inkexpërtne priiter helfe un woo, weeche tas, khente aach in  kexpërt wëre. Tiise priiter tuun tii woo inkexpërt sin tas neetiches fersoriche, tëne foer tas kericht xitse un se uf muute wayter uf Yeehoowa traue. e (Lees Koloser 4:3, f 18. g) Ferkes tich net tas tayn kepeete khene tiise priiter un xwestere al helfe! (2 The. 3:1, 2; 1 Tim. 2:1, 2)

17. Wii khanst tuu tich yets foer perayte fer ti yachtung?

¹⁷ Tuu un tayn familye khene sich yets in richte fer ti yachtung. (Aph. 14:22) Fersuuch net tenke aan te kanse xlechte tinge woo pasiire khene. Xtats tas, ferxtërk tayn fraayntxaft mit Yeehoowa un helf tayn khiner tas selwiche mache. Wëns tuu tich als mool ëngstlich xpiirst, mach tayn hërts tsu Kot uf. (Psal. 62:7, 8) Xprecht wii familye iwer al ti uersache warom mer uf Yeehoowa traue khene. h Soo wii es nutslich is fer tayn khiner wëns tuu tich foer peraytst fer een unklik, es tuut aach tayn khiner helfe wëns tuu tëne foer peraytst fer ti yachtung. Tas helft tëne koraaj hon un sich in ruu xpiire, wayls tuu tëne kelërnt host uf Yeehoowa traue.

18. Was kriin mer im futuer?

¹⁸ Weeche Kot sayn friit, khene mer uns in sicherheet xpiire. (Fili. 4:6, 7) Yeehoowa penutst tiise friit fer unser hërts in ruu lose wën mer krankheete, unklike orer yachtung mit mache. Tee penutst flaysiche elteste fer uns uf phase. Un tee kept uns al ti eer fer uns naner helfe. Te friit woo mer hayt xpiire khan uns foer perayte fer ti kreeser proope woo mer noch mit mache tuun, soo kaar ti “kroos tripulatsyoon”. (Mat. 24:21) In tiise tsayt, wërt es neetich unser friit hale un aach ti anere helfe tas mache. Awer noo te kroos tripulatsyoon, tuun mer khee mee xwiirichkheete mit mache woo uns ëngstlich lose tuun. Tsum xlus, kriin mer was Yeehoowa wolt fer uns xon fom aanfang aan — woere un eewiche friit. (Isa. 26:3, 4)