1. Wën mer triwer noo tenke aan Yeehoowa sayn ferxpreche fon eewiche leepe, wii tuut tas uns petrefe?

 YEEHOOWA ferxprecht “eewiche leepe” fer tii woo tëm aan heere. (Rom. 6:23) Wën mer too triwer noo tenke, wërt unser liip tsu tëm sicher xtërker. Tenk mool noo: unser Fater im himel liipt uns soo fiil tas eyer wil hon tas mer fer imer eksistiire, in eenichkheet mit tëm.

2. Wii helft uns tas ferxpreche fon eewiche leepe?

² Kot sayn ferxpreche fon eewiche leepe helft uns ti propleeme aus hale. Soo kaar wën ti faynte saan tas se uns um pringe, lose mer net noo Yeehoowa tiine. Warom net? Een uersach is tas mer wise tas, wën mer troy tsu Yeehoowa xtërpe, tuut eyer uns uf ruufe mit te hofnung fer nii mool um khome. (Yoo. 5:28, 29; 1 Kor. 15:55-58; Hep. 2:15) Warom khene mer uns sicher sin tas es meechlich fer uns is fer imer leepe? Kuk mool etliche uersache.

3. Warom khene mer uns sicher sin tas Yeehoowa uns eewiche leepe kepe khan? (Psalm 102:12, 24, 27)

³ Wii wise mer tas Yeehoowa uns eewiche leepe kepe khan? Tee is ti Kwel fom leepe un leept fer imer. (Psal. 36:9) Kuk mool etliche tekste fon te Piipel woo tsayche tas Yeehoowa imer eksistiirt hot un tas eyer fer imer eksistiire tuut. Te Psalm 90:2 saat tas Yeehoowa “fon eewichkheet tsu eewichkheet” is. Te Psalm 102 saat was eenliches. (Lees Psalm 102:12, b 24, c 27. d) Un te profeet Hapakuk hot iwer unser  Fater im himel kexrip: “Oo Yeehoowa, khomst tuu net fon te eewichkheet heyer? Oo mayn Kot, mayn Hayliche, tuu xtërpst net.” (Hap. 1:12)

4. Mise mer uns ketanke mache wën es xweyer fer uns is se ferxteen tas Yeehoowa imer eksistiirt hot? Lee tas aus.

⁴ Is es xweyer fer tich se ferxteen tas Yeehoowa “fer ti kans eewichkheet” eksistiirt hot? (Isa. 40:28) Tuu pist net aleen. Eliuu hot iwer Kot kesaat: “Meyer khene kaar net ferxteen wii alt eyer is.” (Yoop 36:26) Awer etwas net ferxteen wil net saan tas es net woer is. Tsum payxpiil: opwool mer net kenau ferxteen khene wii tas licht funtsyoniirt, wil tas saan tas es net eksistiirt? Kewis net. Kraat soo, khan sin tas ti mënxe nii ferxteen tuun wii es meechlich is tas Yeehoowa imer eksistiirt hot un fer imer eksistiire tuut. Awer tas wil net saan tas Kot net fer imer leept. Ti woerheet iwer te Kriatoer hëngt net ap aan was mer ferxteen khene orer net. (Rom. 11:33-36) Tee hot eksistiirt eep ales im Uniwërsum eksistiirt hot — wii ti Sun un ti xtërne. Yeehoowa lost uns sicher tas eyer “ti eyert mit sayn kraft kemacht” hot. Un eyer hot eksistiirt eep eyer te himel “aus kexpant” hot. (Yee. 51:15; Aph. 17:24) Was is een aner uersach warom mer khene uns sicher sin tas mer fer imer leepe khene?

5. Was fer hofnung hate Aatam un Ewa?

⁵ Al ti lepeentiche kriatuure woo Yeehoowa uf te eyert kemacht hot, teete mit te tsayt xtërpe — ploos ti mënxe net. Fer tëne, hot Yeehoowa een ekstra hofnung kep: nii xtërpe. Awer Yeehoowa hot Aatam aan kesaat: “Fom paam fon te khëntnis fom kuute un fom xlechte, thërfst tuu net ese, wayl aan tëm taach woos tuu fom tëm est, tuust tuu sicher xtërpe.” (Xee. 2:17) Wën Aatam un Ewa Kot kefolicht hëte, weyere se net kextorep. Khan ma klaape tas, mit te tsayt, teet Yeehoowa tëne erlaupe “fon te frucht fom paam fons leepe” ese. Tas teet se ti sicherheet kepe tas se fer imer leepe teete. e (Xee. 3:22)

6-7. (a) Was noch tsaycht tas ti mënxe net kemacht kep sin fer se xtërpe? (b) Was wilst tuu kërn im Paratiis mache? (Kuk tas pilt.)

⁶ Es is interesant tas etliche syentiste hon pewaysunge kefun tas unser kehërn khan fiil mee informatsyoone phake wii mer torich unser kanse leepe hayt lërne khene. In 2010, hot een piichelche kesaat tas etliche rechne tas unser kehërn khan soo fiil informatsyoone wii 3 milyoone xtune fon TV prokrame phake. Fer tas ales kuke, teet es mee wii  300  yoore nëme! Un tiise numere khene in woerheet fiil kreeser sin. Awer tas tsaycht tas Yeehoowa unser kehërn kemacht hot fer fiil mee informatsyoone phake wii mer torich ploos 70 orer 80  yoore lërne khene. (Psal. 90:10)

⁷ Yeehoowa hot uns aach een xtark wunx kep fer wayter leepe. Ti Piipel saat tas Kot hot “eewichkheet in [te mënxe] sayn hërts ketuun”. (Ekl. 3:11) Tas is een uersach warom mer te toot wii een faynt siin. (1 Kor. 15:26) Tsum payxpiil: wën mer een xroo krankheet kriin, tuun mer tas ruych aan nëme un te toot waarte? Nee. Ofts keen mer pay een tokter un fiilaycht tuun mer metitsiin in nëme fer ti krankheet heele. Yawool, meyer xtrenge uns aan fer net xtërpe. Un wën yemant woo mer liipe xtërpt — ekaal ep yung orer alt — xpiire mer uns traurich torich een lang tsayt. (Yoo. 11:32, 33) Meyer khene fer ti kans eewichkheet lërne un mer hon een xtark wunx fer se leepe; tas pasiirt wayl Yeehoowa uns soo kemacht hot. Tas lost es taytlich: Yeehoowa sayn tsiil is tas ti mënxe fer imer leepe. Awer es kept noch anere uersache fer se klaape tas mer khene fer imer leepe. Yets wole mer xpreche iwer etliche tinge woo Yeehoowa in te friirixe tsayte kemacht hot un woo eyer hayt am mache is woo pewayse tas eyer sayn tsiil net keënert hot.

8. Was lërnt uns Isaiias 55:11 iwer Yeehoowa sayn tsiil fer uns?

⁸ Aatam un Ewa hon kesint un toot fer sayn khiner keprung. Soo wii soo, hot Yeehoowa sayn tsiil net keënert. (Lees Isaiias 55:11.) f Tee wil noch hon tas troye mënxe fer imer  leepe. Meyer sin uns sicher too tefun weeche was Yeehoowa kemacht un kesaat hot fer sayn tsiil erfiile.

9. Was hot Kot ferxproch? (Tanyël 12:2, 13)

⁹ Yeehoowa hot ferxproch tas eyer ti toote uf ruuft un tëne ti xans kept fer eewiche leepe kriin. (Aph. 24:15; Tit. 1:1, 2) Te troye Yoop waar sich sicher tas Kot hërtslich uf ruufe wil tii woo toot sin. (Yoop 14:14, 15) Te profeet Tanyël wust tas ti toote uf keruuft weyere un ti oportuniteet kreechte fer eewiche leepe hon. (Psal. 37:29; lees Tanyël 12:2, g 13. h) Ti yuute in Yeesus sayn taache wuste aach tas Yeehoowa eewiche leepe fer sayn troye tiiner kepe khan. (Luk. 10:25; 18:18) Yeesus hot aach noo un noo too triwer kexproch un tee selepst waar fon sayn Fater uf keruuft. (Mat. 19:29; 22:31, 32; Luk. 18:30; Yoo. 11:25)

10. Was tuun ti ufxtaye fon te friirixe tsayte pewayse? (Kuk tas pilt.)

¹⁰ Yeehoowa is Tee woo tas leepe kept un tee hot ti kraft fer ti layt tsurik tsum leepe pringe. Tee hot kraft fer te profeet Eliias kep fer te soon fon een witfraa in Sarefaa, fom toot uf ruufe. (1 Khe. 17:21-23) Xpeeter, mit Kot sayn hilef, hot te profeet Eliseu te soon fon een sunamiitix fraa fom toot uf keruuft. (2 Khe. 4:18-20, 34-37) Tiise un anere ufxtaye pewayse tas Yeehoowa ti kraft hot fer ti layt tsurik tsum leepe pringe. Wii Yeesus uf te eyert waar, hot eyer ketsaycht tas sayn Fater tëm tiise kraft kep hat. (Yoo. 11:23-25, 43, 44) Yets is Yeesus im himel un tee hot “ti kans autoriteet im himel un uf te eyert” kriit. Tes weeche khan eyer tas ferxpreche erfiile tas “al tii woo in te kreeper sin” uf keruuft wëre mit te hofnung fer eewiche leepe kriin. (Mat. 28:18; Yoo. 5:25-29)

11. Wii macht tas fray khaaf opfer es meechlich tas mer fer imer leepe?

¹¹ Warom hot Yeehoowa kelos tas sayn liipe Soon een xlime toot layte teet? Yeesus hot tas keantwort wii eyer kesaat hot: “Wayl Kot ti welt soo fiil keliipt hot, hot eyer sayn eensiche kepoerne Soon kep, tas yeete eene woo aan tëm klaapt net fernicht wërt, awer eewiche leepe kriit.” (Yoo. 3:16) Kot hot es meechlich kemacht tas mer eewiche leepe kreechte wii eyer sayn Soon wii een fray khaaf opfer kep hot fer unser sinte teke. (Mat. 20:28) Te aphostel Phaul hot tiise wichtich teel fon Kot sayn tsiil aus keleet wii eyer kexrip hot: “Soo wii te toot is torich eene man khom, tas ufxtaye fom toot khomt aach torich eene man. Wayl, soo wii in Aatam ale xtërpe, soo aach in Kristus tuun ale leepe kriin.” (1 Kor. 15:21, 22)

12. Wii tuut Yeehoowa sayn tsiil erfiile?

¹² Yeesus hot sayn tisipele in kelërnt se peete tas Kot sayn Raych khome sol un tas Kot sayn wile uf te eyert kemacht wëre sol. (Mat. 6:9, 10) Een teel fon Kot sayn tsiil is tas ti mënxe fer imer uf te eyert leepe. Fer tas erfiile, hot Kot tëm sayn Soon wii Kheenich fom Raych in kesetst. Un Yeehoowa is 144.000 layt fon te eyert am samele fer mit Yeesus xafe un Kot sayn wile erfiile. (Apo. 5:9, 10)

13. Was is Yeehoowa yets am mache un was must tuu mache?

¹³ Yets is Yeehoowa een “kroos folek” am samele; un tee is tëne am iipe fer unich sayn Raych leepe. (Apo. 7:9, 10; Tya. 2:8) Hayt ti  meyerste layt in te welt sin keteelt weeche te has un ti kriiche. Awer tii fom kroose folek xtrenge sich aan fer ale sorte has fon sayn leepe wech hoole. Sayn aktsyoone tsayche tas “tii tuun aus iire xwaarte, pluuch xaare mache”. (Mik. 4:3) Xtats tsum kriich keen, woo soo fiil toot pringt, tuun se ti layt iwer te woere Kot un sayn tsiil in lërne. Un soo, helfe se tëne tas “woere leepe” fine. (1 Tim. 6:19) Sayn familye khan sich keeche tëne xtele un tii khene aach kelt ferliire wayl se Kot sayn Raych pay xteen, awer Yeehoowa tuut se helfe tas neetiches hon. (Mat. 6:25, 30-33; Luk. 18:29, 30) Tas ales lost uns sicher tas Kot sayn Raych wërklich eksistiirt un tas es tuut wayter Kot sayn tsiil erfiile.

14-15. Wii wërt Yeehoowa sayn ferxpreche fer te toot fer imer fernichte, tsum xlus erfiilt?

¹⁴ Yeesus is hayt Kheenich fon Kot sayn Raych im himel un tee tuut al ti ferxpreche woo Yeehoowa kemacht hot, erfiile. (2 Kor. 1:20) Fon 1914 aan, is Yeesus sayn faynte am ap kewine. (Psal. 110:1, 2) Klaych tuun Yeesus un tii woo mit tëm rechiire al ti xlechte layt fernichte. (Apo. 6:2)

¹⁵ Torich sayn Tausent Yoore Rechiirung, tuut Yeesus ti toote uf ruufe un aach helfe al tii woo Yeehoowa heere wole, perfekt wëre. Noo te letste proop, tuun tii, woo Yeehoowa wii kerechte aus xprecht, “ti eyert kriin, un (…) fer imer too truf woone”. (Psal. 37:10, 11,  29) Tsum xlus, ‘wërt te letste faynt, te toot, tsu niks kemacht’. (1 Kor. 15:26)

16. Was sol ti haupst uersach sin fer Yeehoowa tiine?

¹⁶ Wii mer in tiise artikel kesiin hon, unser hofnung fer eewiche leepe hon, tuut sich aan Kot sayn Wort fest xtaype. Tiise hofnung khan uns helfe troy plaype torich ti xweyere letste taache. Awer te wunx fer lepeentich plaype sol net ti haupst uersach sin fer troy tsu Yeehoowa un Yeesus plaype. Fer Kot kefale, mise mer tas mache weeche liip tsu tëne. (2 Kor. 5:14, 15) Tiise liip tuut uns uf muute Kot un Yeesus noo mache un iwer unser hofnung preetiche. (Rom. 10:13-15) Wën mer lërne krooshërtslich sin un te ekoiismus uf sayt lose, wëre mer ti sort persoon sin woo Yeehoowa wil fer imer wii sayne fraaynt hon. (Hep. 13:16)

17. Was fer responsapiliteet hon meyer al? (Matheus 7:13, 14)

¹⁷ Wërst tuu tepay tswixich tii woo eewiche leepe kriin? Yeehoowa kept tiise xans fer uns al. Awer mer mise yets raus suuche im weech plaype woo tsum eewiche leepe nëmt. (Lees Matheus 7:13, 14.) i Wii wërt tas eewiche leepe sin? Meyer kuke ti antwort fer tiise frooch im neekste artikel.