Wën Yeehoowa ti mënxe kexikt hot ‘ti eyert fol mache un se iwer nëme’, hot eyer ketsaycht tas, mit te lëngt, teet ti kans eyert een paratiis wëre. (Xee. 1:28) Tiise kepoot tuut kile fer tii woo ti eyert ërpe tuun. Awer es kept khee mee Eetem kaate hayt; tes weeche, tuun mer am aanfang net in een paratiis leepe. Klaych noom Armaxeton, tuun mer fiil aarwayt hon fer etliche pletse woo fernicht kep sin, sauwer mache. Yawool, aarwayt tuut sicher net feele in te nay welt!

Tas erinert uns fon te aarwayt woo ti israeliiter hate wii se fon Papiloon tsurik khom sin. Tas lant waar im xtich kelos kep torich 70  yoore. Awer Isaiias hot kesaat tas, mit Yeehoowa sayn hilef, khente se noch mool tas lant xeen lose. Ti profetsii hot kesaat: “Tee macht tas sayn tesërt soo wii te Eetem wërt un sayn tesërtix epnung, wii Yeehoowa sayn kaate.” (Isa. 51:3) Ti israeliiter hon es hin kriit. Kraat soo, mit Yeehoowa sayn hilef, tuun tii woo ti eyert ërpe es hin kriin fon te eyert een paratiis mache. Un es kept  etliche tinge woos tuu yets mache khanst fer se tsayche tas tuu wilst in tiise aarwayt xafe.

Tuu khanst, tsum payxpiil, tich aan xtrenge fer tayn haus sauwer un in ortnung lose. Tuu khanst tas mache soo kaar wën tayn nochpere sayn plats net sauwer lose. Tuu khanst aach helfe te Raych Saal un te Konkrës Saal sauwer un in te ray hale. Wën tayn situatsyoon tich erlaupt, khanst tuu tich aach aan piite fer se helfe in te umaniteer hilef. Tas tuut tsayche tas tuu wilich pist fer tayn priiter un xwestere helfe wën etwas pasiire tuut. Froo tich: ‘Khan ich een apiliteet lërne woo ich penutse tuun wën Yeehoowa mich erlaupt fer imer uf te eyert leepe?’

Klaych noo Yayrus sayn meetche fom toot uf ruufe, hot Yeesus kesaat tas tas khint etwas fer se ese kriin mist. (Mar. 5:42, 43) Es is woer tas, ti neetichkheete fersoriche fon een meetche woo 12  yoore alt waar, waar niks xweyeres. Awer xtel tich mool foer wii fiil aarwayt es kept wën Yeesus sayn ferxpreche erfiilt tas “al tii woo in te kreeper sin, tuun tëm sayn xtim heere un raus khome”. (Yoo. 5:28, 29) Ti Piipel xprecht net fiil too triwer, awer meyer khene uns foer xtele tas tii woo uf keruuft wëre, mise ese, woonung un tsaych hon. Tuu khanst xon hayt tsayche tas tuu wilich pist fer se helfe. Wole mer etliche tinge siin woos tuu mache khanst.

Wën te sirkuyt superintentent sayn pesuuch pekhant kemacht wërt, khanst tuu tich aan piite fer tëm ese kepe? Wën spetsyaale fol tsayt tiiner fon Petël tsu tayn kemaynt kexikt wëre orer wën een sirkuyt superintentent noo lost in te reesent aarwayt xafe, khanst tuu tëne helfe een plats fer se woone fine? Wën een rechyonaal orer spetsyaal konkrës pasiirt ticht am plats woos tuu woonst, khanst tuu tich aan piite fer se xafe foer orer noom konkrës orer fer se wilkhome un helfe tii woo fon anere pletse khome?

Weeche tas was in Aphostele sayn Kexicht 24:15 xteet, waarte mer tas pilyoone layt uf keruuft wëre. Fiile fon tëne hate net ti xans fer Yeehoowa khëne lërne. Awer tii kriin tiise xans wën se uf keruuft wëre. a Troye tiiner fon Yeehoowa woo fiil speryens hon, tuun tëne in lërne. (Isa. 11:9) Charlotte, woo xon kepreeticht hot in Europa, Siit Amërika un Afrika, tuut tas hërtslich waarte. Tii saat mit frooheet: “Ich khan neekst net waarte ti tsayt wën ich in lërne tuun tii woo uf keruuft wëre. Wën ich iwer yemant leese woo fiil tsayt tsurik keleept hot, tenke ich ofts: ‘Wën tiise persoon Yeehoowa kekhënt hët, weyer sayn leepe kans anerste.’ Ich wil tii woo uf keruuft wëre iwer Yeehoowa in lërne un tëne saan wii fiil peser tëne sayn leepe khan sin wën se Yeehoowa tiine.”

Soo kaar Yeehoowa sayn troye tiiner woo keleept hon foer Yeesus tsu te eyert khome, hon fiil fer se lërne. Xtel tich mool foer fer Tanyël aus leye ti erfiilung fon te profetsiie woo eyer uf kexrip hot, awer net ferxtan hot. Es wërt een kroos frooheet un eer sin! (Tan. 12:8) Meyer mise aach fer Rut un Noemii aus leye tas te Mesias is fon tëne sayn familye ap kextam. Es tuut uns fiil frooheet pringe layt uf te kans eyert in lërne, in een welt woo uns net mee uner trike orer ap lënke tuut.

Was khanst tuu yets mache fer se tsayche tas tuu wilst in tiise prokram xafe? Een tings is tayn pestes mache fer een kuut leerer sin un reeklich in te preetich xafe. (Mat. 24:14) Soo kaar wën tayn elter orer een aner situatsyoon tich um halt mee in tiise aarwayt mache, tayn aanxtrengung tuut tsayche tas tuu wilich pist fer tii woo uf keruuft wëre, in lërne.

Es is kuut aan tiise wichtiche frooche triwer noo tenke: Pist tuu wërklich hërtslich am waarte ti eyert ërpe? Host tuu een kroos wunx fer fon te eyert een paratiis mache un fer tii woo uf keruuft wëre uf phase un in lërne? Tuu khanst xon hayt tsayche tas tuu fërtich pist fer eewiche leepe uf te eyert kriin. Wii? Xaf xon hayt in aarwayte woo eenlich sin wii tii woos tuu in te nay welt mache tuust.