1. Was is “Kot sayn friit”, un wii tuut tas uns helfe? (Filiper 4:6, 7)

 ES KEPT een sort friit woo ti layt in te welt kaar net khëne. Tas is “Kot sayn friit” — ti ruu woo khomt fon een ticht fraayntxaft mit unser Fater im himel hon. Wën mer Kot sayn friit hon, xpiire mer uns in sicherheet. (Lees Filiper 4:6, 7.) b Weeche tiise friit, hon mer een ticht fraayntxaft mit “te Kot fon friit” un aach mit anere woo Tëm liipe. (1 The. 5:23) Wën mer unser Fater khëne, aan heere un uf tëm traue, khan Tëm sayn friit unser ëngstliche hërts in ruu lose wën mer xwiirichkheete mit mache.

2. Warom khene mer uns sicher sin tas es meechlich is Kot sayn friit hon?

² Is es wërklich meechlich Kot sayn friit fine wën mer xwiirichkheete mit mache? Es kept fiile tinge woo khene uns mit pang lose, soo wii wën een krankheet aus precht, wën een unklik orer wyolënte protëste pasiire orer wën mer yachtung mit mache. Awer Yeesus hot sayn nookeener aan kereet: “Lost ayer hërts net unruych un mit pang wëre.” (Yoo. 14:27) Wii kuut tas ti priiter un xwestere tuun Yeesus sayn aanreet aan heere. Un mit Yeehoowa sayn hilef, fine se friit, opwool se xwiirichkheete mit mache.

3. Wii khan een epitemii orer pantemii unser friit xteere?

³ Een epitemii orer pantemii khan neekst ales in unser leepe petrefe. Tenk mool aan wii te coronavirus fiile petrof hot. Fon te kanse layt woo in een unersuuchung mit keholef hon, mee wii ti heleft hot propleeme kehat fer se xloofe torich ti pantemii.  Torich ti pantemii, hot sich aach ferkreest ti numer layt woo ëngstlich orer tiifsinich waare, woo trooke orer tsu fiil alkohool in kenom hon, woo sayn man orer fraa ferklopt hon un woo fersuucht hon sich um pringe. Is een krankheet aus keproch im plats woos tuu leepst? Soo wii khanst tuu tayn ëngstlichkheet kontroliire un Kot sayn friit xpiire?

4. Warom pringt uns friit Yeesus sayn profetsii iwer ti letste taache wise?

⁴ Yeesus hot foer raus kesaat tas, in te letste taache, teete epitemiie “uf een plats noom anere” pasiire. (Luk. 21:11) Warom tas foer raus wise, pringt uns friit? Wën een krankheet aus precht, tas tuut uns net ferxreke. Meyer wise tas tiise tinge sin am pasiire soo wii Yeesus es kesaat hot. Tes weeche mise mer Yeesus sayn aanreet aan heere, woo eyer kep hot fer tii woo in te tsayt fom ën leepe: “Phast uf tas iir net ëngstlich wërt.” (Mat. 24:6)

5. (a) Tëm noo Filiper 4:8, 9, iwer was khene mer peete wën een krankheet aus precht? (b) Wii hon ti autyos fon te Piipel een xwester keholef un was khene mer too temit lërne?

⁵ Wën een krankheet aus precht, tas khan uns ëngstlich un mit pang lose. Tas is mit een xwester pasiirt woo Desi c heest. Sayn unkel, sayn primo un sayn tokter sin weeche te coronavirus kextorep. Tes weeche hot se pang kehat tas se te wirus kreecht un sayn alt mama aan xteche teet. Tii hot sich aach ketanke kemacht tas se sayn aarwayt ferliire teet weeche ti pantemii. Wën tas pasiire teet, wii khent se tas ese un miit petsaale? Tii hot sich soo fiil ketanke too triwer kemacht tas, oomts, khont se net richtich xloofe. Awer Desi hot sayn friit tsurik kriit. Wii? Tii hot spetsiifix tsu Yeehoowa kepeet tas se khont sich in ruu xpiire un positiiwe ketanke hon. (Lees Filiper 4:8, 9.) d Tii hot Yeehoowa sayn “xtim” keheert torich ti autyos fon te Piipel. Tii saat: “Ti xtime fon te leeser hon mayn ëngstlichkheet peruycht un hon mich erinert tas Yeehoowa sich mit mich khimert.” (Psal. 94:19)

6. Wii ti Piipel xtutiire un ti fersamlunge kuke khan tich helfe?

⁶ Wën een krankheet aus precht, is es als mool net mee meechlich se mache ales was mer friier kemacht hon. Awer los tas net tayn rutiin xteere fer ti Piipel xtutiire un ti fersamlunge kuke. Ti speryense in unser puplikatsyoone un wiiteos tuun tich helfe aan priiter un xwestere traan tenke woo troy plaype, opwool se eenliche propleeme mit mache.  (1 Phe. 5:9) Ti fersamlunge tuun tich helfe se tenke aan ufmuutiche tinge fon te Piipel. Tii kepe tich aach ti xans fer anere uf muute un uf kemuut wëre. (Rom. 1:11, 12) Wëns tuu triwer noo tenkst aan wii Yeehoowa sayn tiiner keholef hot wën se krank, ëngstlich orer aleen waare, wërt tayn klaape xtërker. Tuu wërst tich aach sicher tas Kot tich helfe tuut.

7. Was lërne mer fon tëm aphostel Yoohan sayn payxpiil?

⁷ Xtreng tich aan fer mit tayn priiter un xwestere fertseele. Wën een krankheet aus precht, fiilaycht mise mer wayt wech soo kaar fon unser priiter un xwestere plaype. In soo een situatsyoon, im xtant xpiirst tuu tas selwiche wii te aphostel Yoohan. Tee wolt sayn fraaynt Kayo perseenlich siin. (3 Yo. 13, 14) Awer Yoohan hot erkhënt tas, fer een tsayt, khent eyer tas net mache. Soo hot eyer kemacht was eyer khont: tee hot een priif fer Kayo kexrip. Is es net imer meechlich tayn priiter un xwestere perseenlich pesuuche? Tan fersuuch mit tëne xpreche torich telefoon, wiiteokonferëns orer mensagens. Wëns tuu wayter mit tayn priiter un xwestere fertseelst, tuust tuu tich in friit un net soo aleen xpiire. Wëns tuu tich ëngstlich xpiirst, xprech mit te elteste un los tëne tich liiplich uf muute. (Isa. 32:1, 2)

8. Wii khan een unklik tayn friit xteere?

⁸ Host tuu xon een iwerxwemung, eyertxuter orer fayer mit kemacht? Fiilaycht host tuu tich ëngstlich fer een lang tsayt kexpiirt. Wëns tuu een liip persoon orer tayn aychentum ferloer host, im xtant host tuu tich traurich, pees orer mit khee hofnung kexpiirt. Tas wil net saan tas tuu materyalistix pist orer tas tayn klaape xwach is. Es is normaal sich soo xpiire wën mer xwiirichkheete mit mache, un ti anere tuun tas soo kaar xon waarte. (Yoop 1:11) Awer aach in te xweyere situatsyoone, khanst tuu friit fine. Wii?

9. Was hot Yeesus kesaat fer uns fer ti unklike foer perayte?

⁹ Etliche tenke tas se nii fon een unklik petrof wëre. Awer meyer mise uns erinere was Yeesus profetisiirt hot. Meyer wise xon tas mee unklike teete in unser tsayt pasiire un etliche fon tëne khene uns petrefe. Yeesus hot fer sayn nookeener kesaat tas “kroose eyertxutere” un anere unklike teete foer tas ën pasiire. (Luk. 21:11) Tee hot aach profetisiirt tas es teet een “ferkreesung fon te unkerechtichkheet” kepe; ti krime, wyolënts un ti teroristixe atake tuun tas taytlich pewayse. (Mat. 24:12) Fiile troye tiiner fon Yeehoowa layte weeche unklike. Awer Yeesus hot nii kesaat tas, wën mer tas mit mache, is wayl Yeehoowa uns im xtich kelos hot. (Isa. 57:1; 2 Kor. 11:25) Fiilaycht tuut Yeehoowa net een wuner mache fer uns fon tiise unklike rete, awer tee kept uns was mer prayche fer friit un ruu hon.

10. Warom uns fer een unklik yets in richte tsaycht tas mer klaape hon? (Xpriiche 22:3)

¹⁰ Wën mer xon foer perayt sin, wërt es laychter fer uns in ruu plaype wën een emerxëns pasiirt. Awer wën mer uns foer perayte, tuun mer net tsayche tas mer weenich uf Yeehoowa traue? Nee, sicher net. In woerheet, sich in richte fer een unklik tsaycht tas mer klaape aan Kot sayn apiliteet fer uns uf phase. Wii soo? Kot sayn Wort tuut uns aan reete uns in richte fer unklike woo pasiire khene. (Lees Xpriiche 22:3.) e Un torich artikele, fersamlunge un pekhantmachunge, tuut Kot sayn Orkanisatsyoon uns noo un noo uf muute uns foer perayte fer een  emerxëns. f Wën mer aan Yeehoowa traue, tuun mer tiise aanreete yets aan heere — eep een unklik pasiirt.

11. Was lërnst tuu mit Margaret sayn payxpiil?

¹¹ Kuk mool ti speryens fon een xwester woo Margaret heest. Ti autoriteete hon se kexikt sayn haus lose wayl een walt fayer tat ticht aan kefang hot. Wayl fiil layt wolte uf een mool aus rayse, waare ti xtroose fol un nimant khont faare. Te xwartse tamp hot ti luft tik kelos, un tes weeche khont Margaret net fon sayn khare raus keen. Awer tii waar foerperayt. In sayn thax, hat se een lantkhaart woo se penutst hot fer een aner ausweech fine. Tas se khent laychter tiise xtroose fine in een emerxëns, is se xon friier tat torich kefaar. Margaret hot ti unklik iwerleept wayl se sich foer perayt hat.

12. Warom tuun mer ti oryentiirunge fer uns in sicherheet hale aan heere?

¹² Fer uns un ti anere in sicherheet hale, fiilaycht tuun ti autoriteete uns xike spetsiifixe xtune tehëm plaype, aus rayse orer was aneres mache. Etliche tuun net aan heere wayl se net sayn tinge im xtich lose wole. Awer wii tuun ti kriste sich aan xtele? Ti Piipel saat: “Weeche tëm Hër, xtelt aych unich ti kans mënxlich kriatsyoon, ops eene kheenich is, wii heechste, ops kowernatoore sin, woo te kheenich kexikt hot.” (1 Phe. 2:13, 14) Kot sayn Orkanisatsyoon kept uns aach oryentiirunge fer uns in sicherheet hale. Meyer wëre ofts erinert unser kontakt fer ti elteste kepe, tas se khene mit uns xpreche wën een emerxëns pasiirt. Host tuu tas xon kemacht? Fiilaycht kriin mer aach oryentiirunge fer tehëm plaype, aus rayse, wii ti neetich tinge kriin orer wii un wën ti anere helfe. Wën mer net aan heere, khene mer unser leepe un ti elteste sayns ins kefoer xtele. Tenk tich imer traan: tiise troye mëner tuun uns uf phase. (Hep. 13:17) Margaret hot kesaat: “Ich sin mich sicher tas ti oryentiirunge fon te elteste un ti Orkanisatsyoon aan heere, hot mayn leepe keret.”

13. Was hot etliche kriste keholef, woo muste sayn hayser lose, frooheet un friit hon?

¹³ Fiile priiter un xwestere muste sayn hayser lose weeche een unklik, een kriich orer wyolënte protëste. Tii hon sich aan kextrengt fer sich traan keweene in sayn nay situatsyoon un sayn pestes fer Yeehoowa mache.  Soo wii ti eyerste kriste, woo weeche ti yachtung aus keprayt kep sin, tuun se wayter “ti kuute notisye fon Kot sayn wort” pekhant mache. (Aph. 8:4) Preetiche helft tëne sich aan Kot sayn Raych konsentriire xtats aan tëne sayn xwiirichkheete. Tes weeche xpiire se sich froo un in friit.

14. Wii khan ti yachtung unser friit xteere?

¹⁴ Wën mer yachtung mit mache, khene mer fiile tinge ferliire woo uns helfe in friit plaype. Meyer xpiire uns froo wën mer khene uns fray fersamele, puuplix preetiche un unser leepe nëme mit khee pang fon in kexpërt wëre. Wën mer tas net mee mache khene, khene mer uns ëngstlich xpiire un pang hon fon was noch pasiire khan. Soo sorte xpiirunge sin normaal. Awer meyer mise uf phase. Yeesus hot kesaat tas ti yachtung khent etliche fon sayn tisipele xtolpere mache. (Yoo. 16:1, 2) Soo, wii khene mer unser friit hale soo lang wii mer yachtung mit mache?

15. Warom sole mer khee pang fon te yachtung hon? (Yoohan 15:20; 16:33)

¹⁵ Ti Piipel saat uns: “Al woo een leepe fon aanpeetung tsu Kot nëme wole, in eenichkheet mit Yeesus Kristus, tuun aach keyacht wëre.” (2 Tim. 3:12) Es waar xweyer fer een pruuter, woo Andrei heest, too traan klaape noo tas ti aarwayt in sayn lant ferpoot waar. Tee hot ketenkt: ‘Es kept soo fiil Yeehoowa sayn Tsayer too… wii khene ti autoriteete uns al in xpërte?’ Awer tiise ketanke hon Andrei ëngstlich kelos, net in ruu. Xon anere priiter hon aynfach uf Yeehoowa ketraut, un hon net ketenkt: ‘Ich wëre nii in kexpërt.’ Tii wuste tas es pasiire khent, awer tii waare net soo ëngstlich wii Andrei kewees. Tes weeche hot eyer ëntxlist tiise selwich aanxtelung hon, un aach kans uf Yeehoowa traue. Tee hot klaych friit un frooheet kexpiirt, opwool ti xwiirichkheete. Tas selwiche khan fer uns kile. Yeesus hot kesaat tas mer khente yachtung waarte, awer tee hot uns aach sicher kelos tas es meechlich is troy plaype. (Lees Yoohan 15:20; g 16:33. h)

16. Was fer oryentiirunge sole mer aan heere wën mer unich yachtung sin?

 ¹⁶ Wën unser aarwayt fiil krënse hot orer ferpoot is, im xtant kriin mer oryentiirunge fon te filyaal un fon te elteste. Tas opjetiiw fon tiise oryentiirunge is uns xitse, uns helfe wayter kaystlich esmitel hon un uns helfe wayter preetiche, soo wiis meechlich is. Mach tayn pestes fer ti oryentiirunge aan heere, soo kaar wëns tuu net kenau ferxteest warom se kep woer sin. (Tya. 3:17) Es kept aach etliche informatsyoone iwer ti priiter un xwestere un ti kemaynt woo thërfe net aus keprayt wëre. Tuu nii too triwer xpreche mit layt woo net tas recht hon fer tas wise. (Ekl. 3:7)

17. Soo wii ti aphostele im eyerste yoer hunert, was sin mer pextimt se mache?

¹⁷ Eene fon te haupste uersache warom Satanaas keeche Kot sayn folek khëmpft, is wayl se “ti aarwayt [hon] fer tsaye iwer Yeesus kepe”. (Apo. 12:17) Los net te Taywel un sayn welt tich pang mache! Preetiche un in lërne, soo kaar mit yachtung, pringt uns frooheet un friit. Im eyerste yoer hunert, wii ti yiitixe autoriteete ti aphostele kexikt hon noo lose se preetiche, hon tiise troye mëner raus kesuucht Kot aan heere. Tii hon wayter kepreeticht un frooheet too tefun kriit. (Aph. 5:27-29, 41, 42) Kewis, wën unser aarwayt krënse hot, mise mer uf phase wën mer preetiche. (Mat. 10:16) Awer wën mer unser pestes mache, tuun mer te friit kriin woo khomt fon Yeehoowa kefale un fon een pexeet aus teele woo ti layt sayn leepe rete khan.

18. Weer khan uns woere friit kepe?

¹⁸ Say tich sicher tas, soo kaar torich ti xweyerste tsayte, khene mer friit hon. In soo sorte momënte, mise mer uns erinere tas te friit woo mer prayche is Kot sayn friit — es wil saan, te friit woo ploos Yeehoowa kepe khan. Trau uf tëm wën een krankheet aus precht, wën een unklik pasiirt orer wëns tuu keyacht wërst. Playp ticht tsu Kot sayn Orkanisatsyoon. Hal tich traan aan tëm wunerliche futuer woo tich waart. Wëns tuu tas machst, wërt “te Kot fon friit” mit tich sin. (Fili. 4:9) Im neekste artikel tuun mer siin wii mer unser priiter helfe khene, woo xwiirichkheete am mit mache sin, Kot sayn friit hon.