1. Kraat foer se xtërpe, was hot Yeesus kesaat fer een kriminoos woo neewich tëm waar? (Lukas 23:39-43)

 YEESUS un ti 2 kriminoose neewich tëm waare am layte un sayn toot am waarte. (Luk. 23:32, 33) Ti 2 kriminoose waare fon Yeesus am xpote; soo, kewis waare se net tëm sayn tisipele. (Mat. 27:44; Mar. 15:32) Awer eene fon tëne hot sayn aanxtelung keënert. Tee hot kesaat: “Yeesus, tenk aan mich wëns tuu in tayne Raych khomst.” Yeesus hot keantwort: “Ich lose tich hayt sicher: tuu wërst mit meer im Paratiis sin.” (Lees Lukas 23:39-43.) b Niks tsaycht tas tiise kriminoos aan kenom hot tas pexeet iwer ‘tas Raych fom himel’, woo Yeesus kepreeticht hat. Un Yeesus hot nii kesaat tas te man mit tëm im Raych fom himel weyer. (Mat. 4:17) Yeesus waar am xpreche iwer tas Paratiis woo im futuer tsu te eyert khemt. Warom khene mer tas saan?

2. Was tsaycht tas te kriminoos woo sich peroyt hot een yuute waar?

² Te kriminoos woo sich peroyt hot, waar woerxaynlich een yuute. Tee hot fer te aner kriminoos kesaat: “Host tuu kaar khee respekt tsu Kot?” (Luk. 23:40) Ti yuute hon ploos  eene Kot aan kepeet, awer ti layt fon te natsyoone hon aan fiile keeter keklaapt. (Eeks. 20:2, 3; 1 Kor. 8:5, 6) Wën tiise kriminoose net yuute weyere, tsiimlich sicher weyer ti frooch anerste: “Host tuu kaar khee respekt tsu ti keeter?” Un noch, Yeesus is net fer ti layt fon te natsyoone kexikt kep, awer fer “ti ferloerne xeef fon Israël sayn haus”. (Mat. 15:24) Kot hot fer ti israeliiter ketsaycht tas eyer ti toote uf ruufe teet. Im xtant, wust te kriminoos too triwer, un sayn wërter kepe tsum ferxteen tas eyer ketenkt hot tas Yeehoowa Yeesus uf ruufe teet fer in Kot sayn Raych rechiire. Es siit aus tas tiise man hofnung hat tas Kot tëm aach uf ruufe teet.

3. Was hot te kriminoos tsiimlich sicher ketenkt wii Yeesus iwer een Paratiis kexproch hot? Lee tas aus. (Xeenesis 2:15)

³ Wën tiise kriminoos woo sich peroyt hot een yuute waar, wust eyer iwer Aatam un Ewa un tas Paratiis woo Yeehoowa tëne kemacht hat. Soo tsiimlich sicher, hot te kriminoos ketenkt tas tas Paratiis woo Yeesus am xpreche waar, een xeen kaate too hiir uf te eyert weyer. (Lees Xeenesis 2:15.) c

4. Was sole Yeesus sayn wërter fer eene fon te kriminoose uns uf muute se tenke?

⁴ Yeesus sayn wërter fer te kriminoos sole uns uf muute se tenke aan wii tas leepe im Paratiis wërt. Te kheenich Salomon sayn friitlich rechiirung khan uns etwas lërne iwer tiise Paratiis. Ti Piipel saat tas Yeesus kreeser wii Salomon is; soo khene mer waarte tas Yeesus un tii woo mit tëm rechiire, xafe fer fon te eyert een Paratiis mache. (Mat. 12:42) Un kewis, ti “anere xeef” mise acht kepe fer was se mache mise fer tas eewiche leepe im Paratiis kriin. (Yoo. 10:16)

5. Wii xtelst tuu tich tas leepe im Paratiis foer?

⁵ Wii xtelst tuu tich tas leepe im Paratiis foer? Fiilaycht tenkst tuu in een xeene park, wii te Eetem kaate. (Xee. 2:7-9) Orer khan sin tas tuu tenkst aan Kot sayn profetsii woo Mikeyas kexrip hot, tas Kot sayn folek teet “sich uner sayn traupe kriste un sayn fayche paam setse”. (Mik. 4:3, 4) Fiilaycht, tenkst tuu aan phaar tekste woo tsayche tas es fiil ese kepe tuut. (Psal. 72:16; Isa. 65:21, 22) Soo, im xtant xtelst tuu tich foer tas tuu in eene xeene kaate kesetst pist, un foer tich is een tix fol kuut ese. In te luft, mërkst tuu tas kuute keroch fon te plantse un ti pluume. Tsiimlich sicher heerst tuu tayn parente un fraaynte — too tepay tii woo uf keruuft kep sin — mitsamer am lache; un tii sin froo tas se paysamer sin. Tas ales is net ploos een traam. Tas ales tuut sicher uf te eyert eene taach pasiire. Awer im Paratiis tuun mer aach een aarwayt hon woo uns fraye tuut.

6. Was tuun mer im Paratiis mache? (Kuk tas pilt.)

 ⁶ Yeehoowa hot uns kemacht fer frooheet in unser aarwayt fine. (Ekl. 2:24) Torich Yeesus sayn Tausent Yoore Rechiirung, tuun mer fiil aarwayt se tuun hon. Tii woo ti kroos tripulatsyoon iwerleepe un ti milyoone woo uf keruuft wëre, mise tsaych, ese un woonung hon. Fer tas fersoriche, mise mer fiil xafe, un tiise aarwayt tuut uns frooheet pringe! Soo wii Aatam un Ewa, woo miste ti eyert uf phase, kriin mer ti xeen aarwayt fer fon te eyert een Paratiis mache. Es wërt aach neetich in se lërne milyoone woo uf keruuft wëre woo weenich iwer Yeehoowa un sayn tsiil wuste. Un es wërt aach neetich ti troye layt, woo fiile yoore foer Yeesus keleept hon, in lërne iwer was pasiirt is noo sayn toot. Xtel tich mool foer wii xeen wërt tiise aarwayt sin!

7. Fon was khene mer uns sicher sin un warom?

⁷ Im Paratiis tuun mer tas neetiches hon un in friit un ortnung leepe. Warom khene mer uns too tefun sicher sin? Wayl Yeehoowa uns xon een payxpiil kep hot wii tas leepe unich Yeesus sayn rechiirung wërt. Te kheenich Salomon sayn rechiirung is tiise payxpiil.

8. Wii hon ti wërter fon Psalm 37:10, 11, 29 sich in te ferkangne yoore erfiilt? (Kuk aach “Frooche fon te leeser” in tiise piichelche.)

⁸ Kot hot te kheenich Tawi kelënkt se xraype iwer wii tas leepe im futuer weyer wën een kluuche un troye kheenich rechiire teet. (Lees Psalm 37:10, 11, d 29. e) Ofts, wën mer te Psalm 37:11 fer ti anere leese, xpreche mer iwer tas Paratiis woo im futuer tsu te eyert khomt. Un tas is net ferkheert, wayl Yeesus hot too triwer kexproch in sayn Përich Reet; un soo hot eyer ketsaycht tas tas sich im futuer erfiile teet. (Mat. 5:5) Awer Tawi sayn wërter hon aach ketsaycht wii tas leepe torich te kheenich Salomon sayn taache weyer. Wii  Salomon Israël rechiirt hot, hat Kot sayn folek fiil friit un raychtum in “een lant woo raychlich milich un honich” kep hot. Kot hot kesaat: “Wën teyer wayter aan mayn kesetse keet (...), ich tuun friit im lant in setse, un iir tuut ruue oone yemant aych pang mache.” (Lew. 20:24; 26:3, 6) Tiise ferxpreche hon sich erfiilt wii Salomon Israël sayn kheenich waar. (1 Kro. 22:9; 29:26-28) Un Yeehoowa hot aach ferxproch tas ti xlechte layt teete “net mee eksistiire”. (Psal. 37:10) Soo ti wërter fon Psalm 37:10, 11, 29 hon sich in te ferkangne yoore erfiilt un tuun sich aach im futuer erfiile.

9. Was hot ti kheenichin fon Sapaa kesaat iwer Salomon sayn rechiirung?

⁹ Ti kheenichin fon Sapaa hot tsum wise kriit iwer tas raychtum un friit fon te natsyoon fon Israël wii Salomon kheenich waar. Tii is fon kans wayt pis Yeruusalem kerees fer ti situatsyoon mit sayn aychne aue siin. (1 Khe. 10:1) Noo Salomon sayn raych uner suuche, hot se kesaat: “Tii hon mich net mool ti heleft fertseelt. (...) Tayne mëner un tayn tiiner, woo imer pay tich sin, khene sich wërklich fraye tas se tayn kluucheet heere!” (1 Khe. 10:6-8) Awer ti situatsyoon unich Salomon sayn rechiirung waar ploos een payxpiil fon was Yeehoowa fer ti mënxheet mache tuut torich ti rechiirung fon sayn Soon Yeesus.

10. In was fer aate is Yeesus peser wii Salomon?

¹⁰ Yeesus is peser wii Salomon in ales. Salomon waar een imperfekte mënx woo xlime feeler kemacht hot; un, mit te tsayt, hon tiise feeler fiile propleeme fer Kot sayn folek keprung. Xon Yeesus is kans anerste: tee is een perfekte rechiirente woo khee feele macht. (Luk. 1:32; Hep. 4:14, 15) Yeesus is troy tsu Kot keplip opwool ti xweyere proope woo Satanaas tëm foer keprung hot. Yeesus hot pewayst tas eyer nii sinte tuut, un tas eyer nii etwas macht woo khent xaate pringe fer ti troye layt woo unich sayn rechiirung sin. Tee is te peste kheenich woo mer khente hon.

11. Was fer hilef tuut Yeesus hon?

¹¹ Yeesus tuut net aleen rechiire: 144.000 layt xafe mit tëm fer ti mënxe uf phase un Yeehoowa sayn tsiil fer ti eyert erfiile. (Apo. 14:1-3) Wii ti 144.000 uf te eyert waare, hon se fiile xwiirichkheete un proope mit kemacht; tes weeche ferxteen se was ti layt uf te eyert xpiire tuun. Was mache tii woo mit Yeesus rechiire?

12. Was fer aarwayt tuut Yeehoowa fer ti 144.000 kepe?

¹² Yeesus un ti kesalpte tuun fiil mee aarwayt hon wii Salomon hat. Te kheenich Salomon hot milyoone layt in ploos een lant uf kephast. Awer ti rechiirente fon Kot sayn Raych tuun pilyoone layt in te kans welt uf phase. Yeehoowa hot wërklich een kroos eer fer ti 144.000 kep!

13. Was fer ekstra aarwayt tuun tii woo mit Yeesus rechiire kriin?

¹³ Soo wii Yeesus, tuun ti 144.000 wii kheeniche un priister tiine. (Apo. 5:10) Unich tas mosayxe Kesets, hon ti priister ti layt keholef kesunt un ticht pay Yeehoowa plaype. Tas kesets waar ‘een xate fon te kuute tinge woo khome teete’; soo khene mer waarte tas tii woo mit Yeesus rechiire, tuun Kot sayn folek helfe kesunt un ticht pay Yeehoowa plaype. (Hep. 10:1) Wii tuun tiise kheeniche un priister mit te layt too uf te eyert xpreche? Meyer wise tas noch net. Awer ekaal was Yeehoowa orkanisiirt, khene mer uns sicher sin tas, im Paratiis woo noch khomt, tuun ti layt uf te eyert ti neetiche oryentiirunge kriin. (Apo. 21:3, 4)

14. Was is ti ferpiinung tswixich ti “anere xeef” un te “kleene trop”?

¹⁴ Yeesus hot tii woo mit tëm rechiire wii “kleene trop” kenënt. (Luk. 12:32) Tee hot aach iwer een aner krup kexproch, woo eyer wii ti “anere xeef” keruuft hot. Tiise 2 krupe xafe mitsamer wii ploos een trop. (Yoo. 10:16) Tii mache tas xon hayt, un tuun tas wayter mache wën ti eyert een Paratiis wërt. Wën tas pasiirt, is te “kleene trop” im himel; un ti “anere xeef” kriin ti hofnung fer eewiche leepe too uf te eyert hon. Awer was mise ti “anere xeef” yets mache tas se khene im Paratiis leepe?

15. (a) Wii tuun ti “anere xeef” mit Yeesus sayn priiter xafe? (b) Wii khanst tuu tas payxpiil fon tëm pruuter in te farmasya noo mache? (Kuk tas pilt.)

¹⁵ Te kriminoos woo sich peroyt hot, is kextorep eep eyer ti xans hat fer se pewayse tas eyer petanklich waar fer ales was Yeesus tëm kemacht hat. Awer meyer, ti “anere xeef”, hon fiile oportuniteete fer se tsayche was mer iwer Yeesus xpiire. Tsum payxpiil: meyer tsayche tas mer tëm liipe wën mer sayn kesalpte priiter kuut pehantele. Yeesus hot kesaat tas eyer teet ti layt richte tëm noo ti aat wii se sayn priiter pehantele teete. (Mat. 25:31-40) Wii khene mer Yeesus sayn priiter pay xteen? Een aat is tëne flaysich helfe in te aarwayt fer se preetiche un tisipele mache. (Mat. 28:18-20) Tes weeche wole mer kuut penutse ti feramente woo se uns kepe fer Piipel xtuutye fiire, soo wii tas puuch Los tich kuut keen im leepe fer imer! Wëns tuu yets khee Piipel xtuutyum host, was mënst tuu fon een Piipel xtuutyum aan piite fer soo fiil layt wiis meechlich is?

16. Was khene mer hayt mache fer uns foer perayte fer unich Kot sayn Raych leepe?

¹⁶ Meyer prayche net waarte pis tas Paratiis khomt fer ti sort layt sin woo Yeehoowa wil tat hon. Xon hayt, khene mer uns aan xtrenge fer eerlich in unser wërter un aktsyoone sin un ferninftich in unser leepe sin. Meyer khene aach leaal tsu Yeehoowa, tsu unser man orer fraa un tsu unser priiter sin. Wën mer Yeehoowa xon hayt in tiise xlecht welt aan heere, wërt es laychter fer uns tas  mache im Paratiis woo noch khomt. Meyer khene aach apiliteete un kwaliteete ëntwikele fer se tsayche tas mer uns am foer perayte sin fer tat leepe. (Kuk te artikel “Pist tuu fërtich fer ‘ti eyert ërpe’?”, woos tuu in tiise piichelche fine tuust.)

17. Sole mer oone muut plaype weeche ti sinte woo mer friier kemacht hon? Lee tas aus.

¹⁷ Wën mer xweyere sinte friier kemacht hon, sole mer aach uns aan xtrenge fer noo lose uns xultich too teweeche xpiire. Kewis tuun mer nii tas fray khaaf opfer penutse wii een ausreet fer “fer kërn noo un noo sinte”. (Hep. 10:26-31) Awer wën mer uns wërklich peroyt hon fon unser xweyer sint, Yeehoowa un ti elteste sayn hilef ferlangt hon un unser aanxtelung keënert hon, khene mer uns sicher sin tas Yeehoowa uns krooshërtslich fertsayt hot. (Isa. 55:7; Aph. 3:19) Eriner tich fon Yeesus sayn wërter fer ti fariseer: “Ich sin net ti kerechte ruufe khom, awer ti sinter.” (Mat. 9:13) Tas fray khaaf opfer is kroos kenuuch fer unser kanse sinte teke.

18. Iwer was teest tuu kërn fertseele mit tëm man woo neewich Yeesus kextorep is?

¹⁸ Xtel tich mool foer tas tuu im Paratiis pist, un tuu pist am xpreche mit tëm kriminoos woo neewich Yeesus waar. Sicher sayt teyer 2 petanklich weeche Yeesus sayn fray khaaf opfer. Un fiilaycht khanst tuu tëm frooe: ‘Was is pasiirt in te letste xtune fon Yeesus sayn leepe too uf te eyert? Wii host tuu tich kexpiirt wii Yeesus tich keantwort hot?’ Un im xtant tuut eyer tich frooe wii tas leepe in te letste taache fon Satanaas sayn welt waar. Sicher wërt es een kroos eer sin ti Piipel xtutiire mit layt soo wii tiise man! (Ëfe. 4:22-24)

19. Warom wëre mer uns net leetich fon tëm leepe im Paratiis? (Kuk tas pilt am aanfang fom piichelche.)

¹⁹ Meyer wëre uns nii leetich fon tëm leepe im Paratiis. Meyer tuun imer interesante layt khëne lërne un wichtiche aarwayte mache. Un tas haupste: yeete taach tuun mer unser Fater im himel peser khëne lërne un nutse kriin fon was eyer uns fersoricht. Meyer tuun imer was nayes iwer tëm un sayn kriatsyoon lërne. Woo lënger unser leepe wërt, woo tiifer wërt unser liip tsu Kot. Meyer sin aarich petanklich tsu Yeehoowa un Yeesus, wayl se uns ti hofnung kep hon fer tas eewiche leepe im Paratiis kriin!