1. Was tenke etliche iwer eewiche leepe?

 FIILE layt phase uf was se ese un mache esersiis fer sich kesunt hale. Soo, hofe se een lang tsayt leepe. Noch soo, waarte se net fer imer leepe. Tas khent unmeechlich orer soo kaar xlecht aus siin, wën ma tepay rechent ti propleeme woo ti elter pringt. Im keeche teel, hot Yeesus positiiw iwer tas “eewiche leepe” kexproch, soo wii in Yoohan 3:16 un 5:24.

2. Was saat Yoohan 6 iwer eewiche leepe? (Yoohan 6:39, 40)

² Wii mer im letste artikel kesiin hon, hot Yeesus een wuner kemacht fer proot un fix fer tausente layt fersoriche. (Yoo. 6:5-35) Tas waar was krooses kewees, awer was eyer im neekste taach kesaat hot fer ti layt woo tëm pis Kafarnaum in Kalileya noo kang sin, waar noch wunerlicher. Tee hot kesaat tas eyer uf ruufe teet tii woo kextorep sin un tas se khente eewiche leepe kriin! (Lees Yoohan 6:39, 40.) a Tenk iwer was tas petayt fer tayn parente un fraaynte woo xon kextorep sin. Yeesus sayn wërter tsayche tas fiile woo xon kextorep sin, khene uf keruuft wëre un tas tuu un tayn  keliipte fer imer leepe khene. Awer fiile layt hon net richtich ferxtan Yeesus sayn neekste wërter in Yoohan 6. In woerheet, pis hayt is es noch xweyer fer fiile tas richtich ferxteen. Was hot Yeesus kesaat?

3. Was hot Yeesus iwer sich selepst ketsaycht in Yoohan 6:51?

³ Tas folek in Kafarnaum hot eenlichkheete kesiin tswixich tas proot woo Yeesus tëne fersoricht hot un te manaa, woo Yeehoowa fer sayn foerkhomer friier fersoricht hat. In woerheet, ti Xrifte nëne te manaa “proot fom himel”. (Psal. 105:40; Yoo. 6:31) Yeesus hot te manaa penutst fer etliche wichtiche tinge in lërne. Opwool te manaa fon Kot khom is, tii woo tas kes hon, sin mit te tsayt kextorep. (Yoo. 6:49) Im keeche teel, Yeesus hot sich selepst kenënt wii “tas woere proot fom himel”, “Kot sayn proot” un “tas proot fom leepe”. (Yoo. 6:32, 33, 35) Awer tee hot een wichtich unerxiit ketsaycht tswixich te manaa un tee selepst: “Ich sin tas lepeentiche proot woo fom himel runer khom is. Wën yemant fon tiise proot est, tuut eyer fer imer leepe.” (Lees Yoohan 6:51.) b Ti yuute sin konfus kep. Tii khonte net ferxteen wii soo Yeesus tas proot fom himel waar, un wii soo tiise “proot” peser wii te manaa waar. Too hot Yeesus kesaat: “Tas proot woo ich opfere (…) is mayn flayx.” Was wolt eyer saan? Es is wichtich ferxteen was tas petayt, wayl ti antwort tsaycht wii es meechlich is eewiche leepe kriin — fer uns un unser keliipte. Wole mer siin was Yeesus saan wolt.

TAS PROOT FOM LEEPE UN YEESUS SAYN FLAYX — WAS PETAYTE SE?

4. Warom hon etliche sich ferxrok mit Yeesus sayn wërter?

⁴ Etliche layt hon sich ferxrok wii Yeesus kexproch hot iwer sayn flayx kepe tas “ti welt leepe khan”. Fiilaycht hon se ketenkt tas eyer hon wolt tas se tas flayx fon tëm sayn khërper ese teete. (Yoo. 6:52) Awer tan hot Yeesus etwas kesaat woo se noch mee ferxrok hot: “Wën teyer net tas flayx fom Mënxe Soon est un sayn pluut trinkt, tuut teyer khee leepe hon.” (Yoo. 6:53)

5. Warom khene mer uns sicher sin tas Yeesus net hon wolt tas ti layt sayn pluut wërklich trinke teete?

⁵ Friier, in Noee sayn taache, hot Kot ti mënxe ferpoot pluut ese. (Xee. 9:3, 4) Xpeeter hot Kot aach, torich tas Kesets, ti israeliiter kexikt net pluut ese: “Weer pluut est, wërt fom folek fernicht.” (Lew. 7:27) Un Yeesus hot ti yuute in kelërnt tas kanse Kesets aan heere. (Mat. 5:17-19) Soo, sicher, teet eyer nii ti yuute uf muute tas flayx fon tëm sayn khërper ese orer tas pluut in tëm sayn ooter trinke. Mit tiise unkeweenliche wërter wolt Yeesus fer ti layt tsayche was se mache muste fer tas “eewiche leepe” kriin. (Yoo. 6:54)

6. Wii sole mer Yeesus sayn wërter, iwer sayn flayx ese un pluut trinke, ferxteen?

⁶ Was wolt Yeesus saan? Sicher waar tee in een simpoolix aat am xpreche, soo wii eyer friier kemacht hot mit te samaritaanix fraa: “Weer fom waser woo ich tich kepe trinkt, kriit nii noch mool torst. Tiise waser wërt in tëm een kweel woo iwerlaaft un woo eewiche leepe kept.” (Yoo. 4:7, 14) c  Yeesus wolt net saan tas ti samaritaanix fraa eewiche leepe kreecht ploos wayl se waser trinke teet. Kraat soo, ti wërter woo Yeesus fer ti layt in Kafarnaum kesaat hot, hon net petayt tas se miste tëm sayn echte flayx ese un tëm sayn echte pluut trinke fer eewiche leepe kriin.

TI UNERXIITE TSWIXICH 2 EWËNTE

7. Was saan etliche iwer Yeesus sayn wërter in Yoohan 6:53?

⁷ Etliche relichyeese layt tenke tas Yeesus sayn wërter in Yoohan 6:53 leye aus was ti layt mache sole im Oomtsmaal fom Hër. Tii rechne tas es soo is wayl, im Oomtsmaal fom Hër, hot Yeesus eenliche wërter penutst. (Mat. 26:26-28) Tii saan tas al tii woo im Oomtsmaal fom Hër sin, mise tas proot ese un te wayn trinke. Meecht tas wërklich soo sin? Es is wichtich ti antwort fine, wayl yeetes yoer milyoone layt uf te kans welt samele sich mit uns fer tiise ewënt fayre. Wole mer ti unerxiite siin tswixich te ewënt in Yoohan 6:53 un tas Oomtsmaal fom Hër.

8. Was sin 2 unerxiite tswixich was pasiirt is in Yoohan 6 un tas Oomtsmaal fom Hër? (Kuk aach ti pilter.)

⁸ Wole mer 2 unerxiite siin. Eyerst: wanee un woo Yeesus ti wërter in Yoohan 6:53-56 kexproch hot. Tee waar mit te yuute  am xpreche, im yoerkang 32 N.K., in Kalileya. Tas waar unkefeer 1 yoer eep eyer tas Oomtsmaal fom Hër in Yeruusalem in kextelt hot. Tsweet: tsu weem tee kexproch hot. Tee hot ti wërter in Yoohan 6 kesaat fer layt woo wolte rechter sayn fiisixe neetichkheete als sayn kaystliche neetichkheete erfiile. (Yoo. 6:26) In woerheet, wii Yeesus etwas kesaat hot woo se xweyer kefun hon fer se ferxteen, hon se noo kelos aan tëm klaape. Soo kaar etliche fon sayn tisipele hon noo kelos tëm noo keen. (Yoo. 6:14, 36, 42, 60, 64, 66) Tiise layt waare kans anerste wii ti 11 troye aphostele woo mit Yeesus waare unkefeer 1 yoer xpeeter, im Oomtsmaal fom Hër. Tii sin mit Yeesus ti kans tsayt keplip, opwool se net al fon Yeesus sayn inlërnunge ferxtan hon. Un anerste wii ti layt fon Kalileya, waare Yeesus sayn troye aphostele sich sicher tas eyer Kot sayn Soon waar un tas eyer fom himel khom is. (Mat. 16:16) Yeesus hot se keloopt: “Teyer sayt tii woo mit mich in mayn proope keplip sayt.” (Luk. 22:28) Tiise unerxiite lose es taytlich tas, in Yoohan 6:53, hot Yeesus net fersuucht aus leye was pasiire teet im Oomtsmaal fom Hër. Awer es kept noch anere unerxiite tswixich tiise 2 ewënte.

WAS YEESUS SAYN WËRTER FER TICH PETAYTE

9. Mit was fer krup hot Yeesus kexproch im Oomtsmaal fom Hër?

⁹ Im Oomtsmaal fom Hër, hot Yeesus proot oone heep fer ti aphostele kep un hot kesaat tas es sayn khërper representiirt hot. Tan hot eyer se wayn kep un hot kesaat tas te wayn tas “pluut fom pakt” representiirt hot. (Mar. 14:22-25; Luk. 22:20; 1 Kor. 11:24) Tas is was wichtiches. Te naye pakt is kemacht kep, net mit al ti mënxe, awer mit “Israël sayn [kaystlich] haus”, es wil saan, ploos tii woo mit Yeesus “in Kot sayn Raych” rechiire tuun. (Hep. 8:6, 10; 9:15) In tëne tsayt, hon ti aphostele net kans ferxtan was tas petayt hot. Awer klaych weyere se mit hayliche kayst kesalpt un teete teel fon tëm nay pakt mache, fer mit Yeesus im himel rechiire. (Yoo. 14:2, 3)

10. Wii soo waare Yeesus sayn wërter in Kalileya anerste wii was eyer im Oomtsmaal fom Hër kesaat hot? (Kuk aach tas pilt.)

¹⁰ Was Yeesus im Oomtsmaal fom Hër kesaat hot, waar fer te “kleene trop”. Sayn troye aphostele waare ti eyerste woo teel fon tiise kleen krup kemacht hon. (Luk. 12:32) Tii waare ti eyerste woo Yeesus ferlangt hot fom proot ese un fom wayn trinke in tiise ewënt. Anere, woo xpeeter teel fon tiise krup weyere, miste aach tas proot ese un te wayn trinke wën se tas Oomtsmaal fom Hër fayre teete. Tiise krup is kemacht fon tëne woo mit Yeesus im himel rechiire tuun. Was Yeesus im Oomtsmaal fom Hër kesaat hot kilt ploos fer tiise kleen krup layt. Im keeche teel, sayn wërter fer ti layt in Kalileya, kile fer fiil mee layt. Tas is een aner unerxiit tswixich tas Oomtsmaal fom Hër un was in Kalileya pasiirt is in 32 N.K.

11. Was hot Yeesus in Kalileya kesaat woo tsaycht tas eyer net am xpreche waar iwer een kleen krup?

¹¹ Wii Yeesus in Kalileya waar in 32 N.K., hot eyer hauptseechlich mit layt kexproch woo wolte ploos ese kriin. Awer Yeesus hot fersuucht tëne helfe se ferxteen tas es etwas kept woo wichticher wii tas ese is — etwas woo se helfe khent eewiche leepe kriin. Yeesus hot soo kaar kesaat tas tii woo kextorep sin, khente im letste taach uf keruuft wëre  un fer imer leepe. In Yoohan 6 hot eyer net kexproch iwer een seechen woo ploos phaar layt kriin khente, soo wii eyer xpeeter kemacht hot im Oomtsmaal fom Hër. Xtats tas, in Kalileya, hot eyer kexproch iwer een seechen woo al ti layt kriin khente. Tes weeche hot eyer kesaat: “Tas proot woo ich opfere tas ti welt leepe khan, is mayn flayx.” (Yoo. 6:51)

12. Was is neetich fer eewiche leepe kriin?

¹² Wolt Yeesus saan tas yeete persoon woo xon keleept hot, eewiche leepe kreecht? Nee. Ploos ti layt woo “tiise proot” ese teete — es wil saan, woo aan Yeesus klaape teete —, tiise kexenk kreechte. Hayt, fiile saan tas se aan Yeesus klaape un tas eyer sayn reter is. (Yoo. 6:29) Awer tas is net kenuuch. In Kalileya, es waare aach fiile woo am aanfang aan Yeesus keklaapt hon. Noch soo, hon se noo kelos tëm noo keen. Warom is tas pasiirt?

13. Was is neetich fer Yeesus sayn woere tisipel wëre?

¹³ Ti meyerste fon tiise layt sin Yeesus noo kang ploos wayl eyer tëne kep hot was se wolte. Tii wolte fon Yeesus ese kriin, keheelt wëre un inlërnunge kriin woo se horiche wolte. Awer Yeesus hot taytlich kelos tas eyer net tsu te eyert khom is ploos fer tëne kepe was se wolte. Tee is khom fer tëne in lërne was se mache miste fer tëm sayn woere tisipele wëre. Tii miste ‘tsu tëm khome’, es wil saan, tëm heere un foliche. (Yoo. 5:40; 6:44)

14. Was mise mer mache fer eewiche leepe kriin?

 ¹⁴ Yeesus hot ti yuute in kelërnt tas se khente fer imer leepe torich te opfer fon tëm sayn flayx un pluut. Awer tii miste too traan klaape. Tiise klaape waar wichtich fer ti yuute un is noch wichtich hayt. (Yoo. 6:40) Yawool, Yeesus sayn wërter in Yoohan 6:53 petayte tas mer sole aan tëm fray khaaf opfer klaape fer eewiche leepe kriin. Ti teer fer tiise seechen kriin, is fer fiile layt uf. (Ëfe. 1:7)

15-16. Was fer wichtiche tinge hon mer in Yoohan 6 kelërnt?

¹⁵ In Yoohan 6 lërne mer fiile importante tinge woo uns al uf muute. Meyer lërne tas Yeesus sich fiil mit te layt khimert. Tee hot ti kranke keheelt, ti layt in kelërnt iwer tas Raych un tëne ese kep wën se tas praychte. (Luk. 9:11; Yoo. 6:2, 11, 12) Un noch wichticher: tee hot in kelërnt tas eyer tas “proot fom leepe is”. (Yoo. 6:35, 48)

¹⁶ Es is woer tas ti layt woo Yeesus wii “anere xeef” kenënt hot, sole net tas proot ese un te wayn trinke im Oomtsmaal fom Hër. (Yoo. 10:16) Awer in een simpoolix aat, tuun se tas “proot fom leepe” ese. Tii mache tas wën se klaape tsayche aan tëm fray khaaf opfer un aan te tinge woo too teweeche meechlich sin. (Yoo. 6:53) Im keeche teel, ti kesalpte tsayche tas se teel fom nay pakt mache un tas se ti hofnung hon fer im himel rechiire wën se tas proot ese un te wayn trinke. Soo, ekaal ep mer fon te kesalpte orer ti anere xeef sin, ti kexicht in Yoohan 6 is aarich wichtich fer uns. Meyer lërne tas, fer eewiche leepe kriin, mise mer fest aan tëm fray khaaf opfer klaape.