1-2. Weeche was fer situatsyoone khene mer prile?

 MEYER al hon xon keprilt. Als mool, prile mer weeche frooheet. Fiilaycht host tuu keprilt weeche was kuutes woo mit tich pasiirt is. Khan sin, tsum payxpiil, tas tayn khint uf te welt khom is. Orer im xtant host tuu tich etwas traan ketenkt woo tich froo kelos hat. Orer khan sin tas, noo haufe yoore, host tuu een liipe fraaynt noch mool kesiin.

² Awer in te meyerst tsayt, prile mer wayl mer traurich orer am layte sin. Tsum payxpiil, fiilaycht prile mer wayl yemant woo mer traue uns xlecht pehantelt hot. Orer khan sin tas mer prile wayl mer krank sin orer weeche te toot fon yemant woo mer liipe. Als mool khan ti phayn soo kroos sin tas noo lose se prile, khan unmeechlich aus siin. Tas is mim profeet Yeeremias pasiirt wii ti papilooner Yeruusalem fernicht hon. Tee hot kesaat: “Treene xtroome laafe aus mayn aue. (…) Ich prile ti kans tsayt, oone noo lose.” (Yaa. 3:48, 49)

3. Wii xpiirt sich Yeehoowa wën tee siit sayn tiiner am layte? (Isayas 63:9)

³ Yeehoowa wees kenau wii fiil mool mer keprilt hon weeche situatsyoone woo uns traurich kelos hon. Ti Piipel lost uns sicher tas Yeehoowa wees wën mer am layte sin un tas eyer heert wën mer tëm hilef ferlange. (Psal. 34:15) Awer Yeehoowa macht mee wii ploos uns siin un heere. Tee is unser Fater un tee liipt uns aarich fiil. Soo, wën tee siit tas mer am prile sin, wërt tee aach traurich un tee tuut uns xnel helfe. (Lees Isayas 63:9.) a

4. Was fer piiplixe payxpiile tuun mer xtutiire un was lërne mer iwer Yeehoowa?

 ⁴ In sayn Wort, tuut Yeehoowa uns saan wii eyer sich kexpiirt hot wii sayn tiiner keprilt hon un wii eyer se keholef hot. Meyer khene, tsum payxpiil, fiil lërne mit was pasiirt is mit Ana, Tawi un te kheenich Esekias. Warom hon se keprilt? Wii hot Yeehoowa se keholef? Wii tuut Yeehoowa uns treeste wën mer uns traurich xpiire, wën mer hinerkang kep sin orer wën mer khee hofnung xpiire? Wole mer ti antworte in tiise artikel fine.

TREENE WEECHE EEN TIIF TRAURICHKHEET

5. Wii hot Ana sich kexpiirt?

⁵ Ana hot fiile propleeme mit kemacht woo se mechtich traurich kelos hon un woo se prile kemacht hon. Tëne sayn man hat een aner fraa: Penina. Tiise fraa waar aarich krop mit Ana. Tas weyer xon xlim kenuuch, awer Ana khont aach khee khint kriin un Penina hat phaar khiner. (1 Sam. 1:1, 2) Penina hot Ana noo un noo too teweeche ferxpot. Wii teest tuu tich xpiire in soo een sort situatsyoon? Ana waar soo traurich “tas se keprilt un net kes hot” un tii is “aarich unruych” im hërts kep. (1 Sam. 1:6, 7, 10)

6. Was hot Ana kemacht fer troost kriin?

⁶ Was hot Ana kemacht fer sich peser xpiire? Een tings woo se keholef hot, waar tsum tapernakel keen fer Yeehoowa aan peete. Tsiimlich sicher waar se ticht paym inkang fom tapernakel wii se “aan kefang [hot] tsu Yeehoowa peete un oone kontrol se prile”. Tii hot aan kehal: ‘Kuk tsu te unruychkheet fon tayn tiinerin un eriner tich fon mich.’ (1 Sam. 1:10 2^te teel, 11) Ana hot tsu Yeehoowa kesaat wii se sich kexpiirt hot. Wii Yeehoowa Ana am prile kesiin hot, hot eyer sich aach traurich kexpiirt. Tii waar tëm sayn weyertlich tochter un tee wolt se treeste.

7. Wii hot Ana sich kexpiirt noo tas se iwer sayn propleeme mit Yeehoowa fertseelt hot?

⁷ Noo tas Ana sayn hërts tsu Yeehoowa uf kemacht hot, hot te hooche priister Elii tëne sicher kelos tas Kot sayn kepeet antworte teet. Wii hot Ana sich tan kexpiirt? Ti Piipel saat: “Ti fraa is faart kang, hot kes, un sayn kesicht waar net mee traurich.” (1 Sam. 1:17, 18) Sayn situatsyoon hat sich noch net keënert, awer Ana hot sich peser kexpiirt. Tii waar sich sicher tas Yeehoowa tëne sayn xpiirunge un propleeme ferxtan hot un tas eyer se helfe teet. Yeehoowa hot kraat tas kemacht: tee hot Ana sayn traurichkheet kemërkt, sayn kepeete kehoricht un xpeeter, hot eyer se keholef khiner kriin. (1 Sam. 1:19, 20; 2:21)

8-9. Warom is es wichtich tas mer tsu te fersamlunge keen? (Hepreeyer 10:24, 25) (Kuk aach tas pilt.)

⁸ Was lërne mer too temit? Im xtant, pist tuu propleeme am mit mache woo tich mechtich traurich lose. Khan sin tas yemant fon tayn familye orer een fraaynt kextorep is. In soo  sorte situatsyoone, fiilaycht wilst tuu aleen plaype un tas is normaal. Awer tenk tich traan fon Ana sayn payxpiil. Tii is tsum tapernakel kang un Yeehoowa hot se tat ketreest. Kraat soo, tuut Yeehoowa tich treeste un uf muute wëns tuu tsu te fersamlunge keest, soo kaar wëns tuu miit un oone muut pist. (Lees Hepreeyer 10:24, 25.) b In te fersamlunge, heere mer piiplixe tekste woo uns fiil uf muute. Tas is een aat wii Yeehoowa uns helft noo lose se tenke iwer ti tinge woo uns traurich lose. Tes weeche xpiire mer uns peser, soo kaar wën unser situatsyoon sich net klaych ferpesert.

⁹ In te fersamlunge, tuun ti priiter un xwestere uns aach treeste un tsayche wii fiil se uns liipe. Un meyer xpiire uns peser pay tëne. (1 The. 5:11, 14) Mërk mool ti speryens fon een spetsyaal pyoneer woo sayn fraa im toot ferloer hat. Tee saat: “Als mool mus ich aleen plaype, wayl ich net noo lose khan se prile. Awer wën ich tsu te fersamlunge khome, sin ich fiil ketreest. Ti liipliche wërter fon te priiter un xwestere un aach sayn komentaare tuun mich wërklich treeste. Ekaal wii kroos mayn soriche orer ëngstlichkheete sin foer te fersamlung, ich tuun mich imer peser xpiire wën ich tat sin.” Wën mer in te fersamlunge sin, khan Yeehoowa unser priiter un xwestere penutse fer uns helfe.

10. Wii khene mer Ana sayn payxpiil noo mache wën mer aarich traurich sin?

¹⁰ Ana waar aach ketreest wii se sayn hërts in kepeet tsu Yeehoowa uf kemacht hot. Tuu khanst aach tayn “kanse soriche uf [Kot wërfe]”, mit te sicherheet tas eyer tich heere tuut. (1 Phe. 5:7) Een xwester sayn man is fon xpitspuupe um keprung kep. Tii erinert sich: “Ich hon kexpiirt wii wën mayn hërts in kleene xtike ferproch weyer un tas es sich nii heele teet. Awer imer wën ich tsu mayn liiplich Fater im himel kepeet hon, hon ich mich peser kexpiirt. Als mool khont ich net ti richtiche wërter fine, awer tee hot mich ferxtan. Wën ich traurich un ëngstlich waar, hon ich tëm friit ferlangt. Klaych hon ich kexpiirt tas mayn hërts un ketanke sich peruycht hon un ich khont wayter mayn leepe nëme.” Wëns tuu iwer tayn soriche mit Yeehoowa in kepeet fertseelst, tuut eyer tayn phayn in tëm sayn hërts xpiire un tee tuut tayn xpiirunge kenau ferxteen. Soo kaar wën te propleem net faart keet, khan Yeehoowa tich treeste un tich helfe in ruu plaype. (Psal. 94:19; Fili. 4:6, 7) Tee mërkt ales was tuu machst fer troy plaype un tee tuut tich too teweeche peloone. (Hep. 11:6)

TREENE WEECHE EEN HINERKEENUNG

11. Wii hot Tawi sich kexpiirt wii ti anere tëm xlecht pehantelt hon?

¹¹ Torich sayn leepe, must Tawi haufe xweyere situatsyoone mit mache woo tëm prile kemacht hon. Fiile layt hon tëm kehast un soo kaar etliche fon sayn tichte fraaynte un parente waare net troy un hon tëm hinerkang. (1 Sam. 19:10, 11; 2 Sam. 15:10-14, 30) Een mool hot eyer kexrip: “Ich sin aarich miit fon soo fiil krekse; ti kans nacht, lose ich mayn pet nas weeche mayn treene; mayn pet tuut weeche mayn krayxe iwerlaafe.” Warom hot Tawi sich soo kexpiirt? “Weeche al tii woo mich aarich krop pehantele” — hot eyer aus keleet. (Psal. 6:6, 7) Wii ti anere Tawi xlecht pehantelt hon, is eyer soo traurich kep tas eyer khont net noo lose se prile.

12. Tëm noo Psalm 56:8, was fer sicherheet hat Tawi?

¹² Opwool Tawi sayn leepe xweyer waar,  waar eyer sich sicher tas Yeehoowa tëm keliipt hot. Tee hot kexrip: “Yeehoowa tuut mayn prile heere.” (Psal. 6:8) Een aner mool hot eyer ti xeene wërter in Psalm 56:8 c kexrip. (Lees.) Tiise wërter lose uns sicher tas Yeehoowa uns wërklich liipt un tas eyer sich khimere tuut mit unser xpiirunge. Tawi hot kesaat tas es waar wii wën Yeehoowa sayn treene in een leter sak samele teet orer tëne uf een puuch xraype teet. Tawi waar sich sicher tas Yeehoowa sayn phayn kemërkt hot un tas net ferkes hat. Tawi waar sich aach sicher tas sayn liipe Fater im himel net ploos kemërkt hot ti propleeme woo eyer kelit hot, awer aach wii tas tëm petrof hot.

13. Wën ti anere uns wee mache orer hinerkeen, fon was mise mer uns erinere? (Kuk aach tas pilt.)

¹³ Was lërne mer too temit? Im xtant pist tuu aarich traurich wayl yemant woos tuu ketraut host tich wee kemacht hot orer tich hinerkang hot. Khan sin tas tayn xetsye orer tayn man orer fraa tich im xtich kelos hot; orer khan sin tas yemant woos tuu liipst noo kelos hot Yeehoowa tiine. Een pruuter sayn fraa hot atultëryo kemacht un tëm im xtich kelos. Te pruuter hot kesaat: “Ich khont kaar net klaape tas tas mit mich am pasiire waar. Ich hon mich unutslich, traurich un pees kexpiirt.” Wën yemant tich hinerkang hot orer tich fiil wee kemacht hot, say tich sicher tas Yeehoowa tich nii im xtich lose tuut. Te selwiche pruuter hot kesaat: “Ich hon kemërkt tas, im xtant, wëre ti layt net imer leaal tsu tich, awer Yeehoowa is unser Fels. Ekaal was pasiirt, tee tuut uns imer helfe. Tee lost nii sayn troye tiiner im xtich.” (Psal. 37:28) Eriner tich aach tas Yeehoowa sayn liip tsu tich is fiil kreeser wii ti mënxe sayns. Wën yemant woos tuu liipst tich hinerkeet, tas khan fiil phayn pringe. Awer tas hot net keënert ti aat wii Yeehoowa sich iwer tich xpiirt — tuu pist noch weyertlich fer tëm. (Rom. 8:38, 39) Soo, ferkes tich net: ekaal wii yemant tich pehantelt hot, tayn himlixe Fater liipt tich!

14. Was fer sicherheet kept uns te Psalm 34:18?

¹⁴ Wëns tuu hinerkang waarst, Tawi sayn wërter im Psalm 34:18 d khene tich treeste. (Lees.) Een referëns puuch saat tas “tii woo een fertriktne kayst hon”, hon im xtant sayn kanse hofnung ferloer. Wii helft Yeehoowa tii woo sich soo xpiire? Tee is ticht pay tëne. Tee is wii een papa orer mama woo halt un treest een khint woo prilt. Wën mer am layte sin wayl yemant uns hinerkang hot orer im xtich  kelos hot, is Yeehoowa mitlaytich un fërtich fer uns helfe. Tee wil uns treeste wën mer een ferprochne hërts hon un wën mer tenke tas mer unutslich sin. Un tee kept uns imer etwas kuutes fer se hofe un tas helft uns ti propleeme hayt tsu taach aus hale. (Isa. 65:17)

TREENE WAYL ES UNS HOFNUNG FEELT

15. Was fer situatsyoon hot Esekias prile kemacht?

¹⁵ Wii te kheenich Esekias fon Yutaa 39 yoore alt waar, is eyer xlim krank kep. Yeehoowa hot te profeet Isayas kexikt fer Esekias saan tas eyer too teweeche xtërpe teet. (2 Khe. 20:1) Es hot aus kesiin tas es khee hofnung fer Esekias waar. Wii Esekias tas keheert hot, is eyer soo traurich kep tas eyer fiil keprilt hot. Tan hot eyer een hërtslich kepeet tsu Yeehoowa kemacht. (2 Khe. 20:2, 3)

16. Was hot Yeehoowa fer Esekias kemacht?

¹⁶ Wii Yeehoowa Esekias sayn kepeet keheert hot un sayn treene kesiin hot, hot Eyer mitlayt kexpiirt un kesaat: “Ich hon tayn kepeet keheert un tayn treene kesiin. Tes weeche, tuun ich tich heele.” Torich Isayas, hot Yeehoowa ferxproch Esekias sayn leepe lënger lose un Yeruusalem fon te asiiryer rete. (2 Khe. 20:4-6)

17. Wii helft uns Yeehoowa wën mer een xlim krankheet hon? (Psalm 41:3) (Kuk aach tas pilt.)

¹⁷ Was lërne mer too temit? Im xtant host tuu een krankheet un es siit aus tas es khee hofnung kept. Was khanst tuu too triwer mache? Saa fer Yeehoowa wiis tuu tich xpiirst. Tee tuut tayn kepeet horiche, soo kaar wëns tuu tas unich treene machst. Ti Piipel lost uns sicher tas “te Fater fon te parmhërtslichkheet un te Kot fom kanse troost” tuut uns in al unser xwiirichkheete treeste. (2 Kor. 1:3, 4) Hayt khene mer net waarte tas Yeehoowa al unser propleeme wech xaft, awer tee tuut uns imer helfe. (Lees Psalm 41:3.) e Torich sayn hayliche kayst, kept uns Yeehoowa sayn kraft, kluucheet un inerlich friit fer aus hale. (Xpr. 18:14; Fili. 4:13) Tee kept uns aach ti hofnung tas, im futuer, nimant krank wërt un tas treest uns aach. (Isa. 33:24)

18. Was fer tekst tuut tich treeste wëns tuu een aarich xlim situatsyoon mit machst? (Kuk te khaste “ Wërter woo uns uf muute khene wën mer prile”.)

¹⁸ Yeehoowa sayn wërter hon Esekias ketreest. Kraat soo, khene mer troost in te Piipel fine. Wën mer traurich sin, Yeehoowa sayn wërter in te Piipel khene uns treeste un peruyche. (Rom. 15:4) Wii een xwester in Oëst Afrika tsum wise kriit hot tas se kreeps hat, hot se ofts keprilt. Tii saat: “Een tekst woo mich fiil treest is Isayas 26:3. Ofts khene mer net unser situatsyoon ënere, awer tiise tekst ferxprecht tas Yeehoowa uns helfe khan in ruu plaype un kwalkee proop aus hale.” Kept tas  een tekst woo tich hauptseechlich uf muute tuut wëns tuu situatsyoone mit machst woos tuu khee ausweech siist?

19. Was fer futuer khene mer waarte?

¹⁹ Tas ën fon tiise sisteem is tichter wii noch nii. Meyer khene waarte tas noch mee xwiirichkheete khome, woo uns phayn un treene pringe. Awer wii mer mit te payxpiile fon Ana, Tawi un Esekias kesiin hon, Yeehoowa mërkt unser treene un tee xpiirt sich traurich too teweeche. Unser treene hon fiil weyert fer tëm. Soo, wën mer xweyere situatsyoone mit mache, wole mer unser hërts in kepeet tsu Yeehoowa uf mache. Meyer mise uns ticht pay unser liipe priiter un xwestere in te kemaynt hale. Un wën mer ti Piipel leese, kriin mer troost fon Yeehoowa. Meyer khene uns sicher sin tas wën mer troy aus hale, tuut Yeehoowa uns peloone. Tepay in tiise peloonung, is tas wunerlich ferxpreche tas, klaych, tuut Yeehoowa unser kanse treene, woo weeche traurichkheet kelaaft sin, ap trokne. (Apo. 21:4) In tiise tsayt, tuun ploos treene fon frooheet fale.