Te aphostel Phaul hot etwas fer Timoteus kexrip, woo aach een elteste waar: “Ich tuun tich ërnstlich xike — foer Kot, Yeesus Kristus un ti rauskesuuchtne engele — tas tuu tiise oryentiirunge folichst oone prekonseyt orer sayte hoole.” (1 Tim. 5:21)

Eyerst, wole mer ferxteen weer tiise engele net sin. Es is taytlich tas se net teel sin fon te 144.000. Wii Phaul fer Timoteus kexrip hot, es waare noch net kesalpte im himel. Ti aphostele un ti anere kesalpte waare noch net kaystliche kriatuure. Tes weeche, khonte se net ti “rauskesuuchtne engele” sin. (1 Kor. 15:50-54; 1 The. 4:13-17; 1 Yo. 3:2)

Ti “rauskesuuchtne engele” khonte aach net ti unfoliche engele sin, woo sich repeliirt hon in te tsayt fon te Sintfluut. Tiise engele sin Satanaas noo kang un tii sin temoone un Yeesus sayn keechner kep. (Xee. 6:2; Luk. 8:30, 31; 2 Phe. 2:4) Im futuer, tuut Yeesus se in een tiif loch xmayse un tii plaype tat 1.000 yoore. Noo heyer, wëre se mit Satanaas fernicht. (Yuu. 6; Apo. 20:1-3, 10)

Te tekst fon 1 Timoteus 5:21 xprecht aach iwer “Kot [un] Yeesus Kristus”. Soo tsiimlich sicher, ti “rauskesuuchtne engele” sin engele im himel woo mit Kot un Yeesus Kristus xafe.

Es kept tausente un tausente troye engele. (Hep. 12:22, 23) Siits aus tas Yeehoowa tuut net ti selwich aarwayt fer yeete engel kepe. (Apo. 14:17, 18) Tsum payxpiil, Yeehoowa hot ploos fer een engel ti flicht kep fer 185.000 asiirixe soltaate um pringe. (2 Khe. 19:35) Awer khan sin tas fiile engele ti flicht hon fer “fon [Yeesus] sayn Raych raus xtele ales was tsu te sint nëmt un aach ti layt woo tas kesets iwertreete”. (Mat. 13:39-41) Anere im xtant hon ti flicht fer ti kesalpte im himel samele. (Mat. 24:31) Un noch anere engele tuun uns in unser “kanse weeche xitse”. (Psal. 91:11; Mat. 18:10; kuk aach Matheus 4:11; Luk. 22:43.)

Ti “rauskesuuchtne engele” fon 1 Timoteus 5:21 tsiimlich sicher hate ti flicht fer ti kemaynte uf phase. In te wersikele trom rom, hot Phaul kluuche aanreete fer ti elteste kep, woo te respekt fon te kemaynt fertiine. Phaul hot kesaat tas ti elteste solte net “prekonseyt [hon] orer sayte hoole”. Tii solte sich aach net ayle fer ëntxlise mache orer richte. Phaul hot een wichtich uersach kep fer sayn aanreet foliche: ti elteste tiine sayn priiter “foer Kot, Yeesus Kristus un ti rauskesuuchtne engele”. Es wil saan, tii al peopachte wii ti elteste ti kemaynt uf phase. Soo es is taytlich tas etliche engele ti flicht hon fer ti kemaynt helfe. Tswixich anere tinge, tuun se Kot sayn tiiner xitse, tëne helfe in te preetich aarwayt un fer Yeehoowa saan was se peopacht hon. (Mat. 18:10; Apo. 14:6)