1. Wii finst tuu tich weeche Kot sayn liip?

“KOT is liip” — hot te aphostel Yoohan kexrip. (1 João 4:8) Tiise keweenliche wërter tuun uns fon een wichtich woerheet erinere: Kot, ti Kwel fom leepe, is aach ti Kwel fon te liip. Yeehoowa liipt uns! Weeche tëm sayn liip fine mer uns sicher, froo un tsufriite.

2. Tëm noo Mateus 22:37-40, was sin ti tswaay kreeste kepoote, un warom khan es fer uns xweyer sin tas tsweete aan wëne?

² Ti kriste khene net raus suuche ep se tuun orer net liip tsayche — tas is een kepoot. (Lees Mateus 22:37-40.) * Wën mer Yeehoowa kuut khëne lërne, fiilaycht fine mer es laycht tas eyerste kepoot aan heere. Tas pasiirt wayl Yeehoowa perfekt is; eyer khimert sich un is kuut mit uns. Awer, es khan fer uns xweyer sin tas tsweete kepoot aan heere. Weeche was? Wayl unser priiter un xwestere — woo tepay sin aan unser tichste neekste — sin imperfekt. Als mool, im xtant saan se was, orer mache se etwas woo net liiplich is, orer woo tsaycht net tas se sich mit uns khimere. Yeehoowa wust xon tas mer teete tiise kefoer mit mache. Tes weeche, hot eyer welche Piipel xrayper inspiriirt spetsiifixe aanreete kepe iwer warom un wii sole mer uns naner liip tsayche. Eene fon tiise xrayper waar Yoohan kewees. (1 João 3:11, 12)

3. Was hot Yoohan iwer ti liip kesaat?

 ³ In sayn wërter, Yoohan hot noo un noo foer keprung tas ti kriste mise liip tsayche. In tëm puuch woo Yoohan iwer Yeesus sayn leepe kexrip hot, hot eyer ti wërter “liip” un “keliipt” eftas penutst wii in te piicher fon Mateus, Marcos un Lucas paysamer. Yoohan waar unkefeer 100 yoer alt wii eyer sayn Ewankeelyum un sayn tray priife kexrip hot. Tiise piiplixe piicher lërne uns tas ales was een krist macht mus weeche liip sin. (1 João 4:10, 11) Awer, es hot tsayt kenom fer Yoohan tas lërne.

4. Hot Yoohan imer liip fer ti anere ketsaycht?

⁴ Wën Yoohan noch yung waar, hot eyer net imer liip ketsaycht. Tsum payxpiil, een mool, Yeesus un sayn tisipele waare tsu Yeruusalem am reese un sin torich Samaria kang. Ti layt fon een kleen samaritaanix xtat hon tëne net kuut aan kenom. Wii hot Yoohan sich aan kextelt? Tee un sayn pruuter Tyako hon Yeesus kefroot ep tii khente fayer fom himel runer fale mache fer ale kaar in te xtat fernichte! (Luc. 9:52-56) Een aner mool, Yoohan hot net liip fer ti anere aphostele ketsaycht. Siits aus tas tee un sayn pruuter hon sayn muter in kereet fer tsu Yeesus ferlange tëne wichtiche pletse im Raych kepe. Wën ti anere aphostele tas tsu wise kriit hon, sin se wuutich kep! (Mat. 20:20, 21, 24) Awer, opwool Yoohan al tiise feeler kemacht hot, Yeesus hot tëm keliipt. (João 21:7)

5. Was tuun mer in tiise artikel noo kuke?

⁵ In tiise artikel, kuke mer noo Yoohan sayn payxpiil un aach etliche tinge woo eyer iwer ti liip kexrip hot. Wii mer es mache, lërne mer wii khene mer liip fer unser priiter un xwestere tsayche. Meyer tuun aach lërne iwer een wichtich aat wii een familye xëf khan tsayche tas eyer sayn familye liipt.

6. Wii hot Yeehoowa sayn liip tsu uns ketsaycht?

⁶ Eftas, tenke mer iwich liip wii een hërtslich xpiirung woo is torich xeene wërter ketsaycht. Awer, tas ti liip khan woer sin, mus tii aach torich aktsyoone ketsaycht wëre. (Kuk aach Tiago 2:17, 26.) Tsum payxpiil, Yeehoowa liipt uns. (1 João 4:19) Un eyer tsaycht sayn liip torich xeene wërter woo in te Piipel xteen. (Sal. 25:10; Rom. 8:38, 39) Awer mer wise tas Kot liipt uns net ploos weeche was eyer saat, awer aach weeche was eyer macht. Yoohan hot kexrip: “Torich tas, is Kot sayn liip tsu uns taytlich: Kot hot sayn eensiche kepoerne Soon uf te welt kexikt, tas mer torich tee leepe kreechte.” (1 João 4:9) Yeehoowa hot erlaupt tas sayn liipe Soon fer uns layte un xtërpe teet. (João 3:16)  Tas lost uns sicher tas Yeehoowa liipt uns wërklich fiil, kël?

7. Was hot Yeesus kemacht fer sayn liip tsu uns pewayse?

⁷ Yeesus hot sayn tisipele sicher kelos tas eyer tëne keliipt hot. (João 13:1; 15:15) Tee hot pewayst wii tiif sayn liip tsu tëne un tsu uns is, net ploos torich was eyer kesaat hot, awer aach torich was eyer kemacht hot. Yeesus hot kesaat: “Nimant hot kreeser liip wii tee woo sayn leepe fer sayn froynte kept.” (João 15:13) Wën mer tenke iwer was Yeehoowa un Yeesus fer uns kemacht hon, wii sol tas uns petrefe?

8. Tëm noo 1 João 3:18, was sole mer mache?

⁸ Meyer pewayse tas mer Yeehoowa un Yeesus liipe wën mer tëne aan heere. (João 14:15; 1 João 5:3) Un Yeesus hot uns kexikt uns naner liipe. (João 13:34, 35) Meyer thërfe fer unser priiter un xwestere saan tas mer tëne liipe; awer mer sole tas aach pewayse torich was mer mache. (Lees 1 João 3:18.) * Was sin welche tinge woo mer mache khene fer unser liip tsu tëne pewayse?

9. Was hot Yoohan weeche ti liip kemacht?

⁹ Yoohan khent mit sayn fater keplip sin un kelt kriit hon in tëm sayn familye fixeray kexeft. Awer, xtats tas, hot eyer te rest fon sayn lang leepe penutst fer ti anere helfe ti woerheet iwer Yeehoowa un Yeesus lërne. Tas leepe woo Yoohan raus kesuucht hot waar net laycht. Weeche ti preetich aarwayt, waar eyer keyacht un wën eyer xon alt waar, is eyer in een insel in kexpërt. (Atos 3:1; 4:1-3; 5:18; Apo. 1:9) Soo kaar wën eyer inkexpërt waar weeche sayn preetich iwer Yeesus, hot Yoohan pewayst tas eyer aan te anere am tenke waar. Tsum payxpiil, wii eyer in tëm insel fon Patmos waar, hot eyer tas puuch fon Apocalipse kexrip un tëm fer ti kemaynte kexikt tas se wise teete was “hatich pasiire” teet. (Apo. 1:1) Tan, tsiimlich sicher noo tas eyer fon Patmos pefrayt waar, Yoohan hot tas Ewankeelyum iwer Yeesus sayn leepe un preetich kexrip. Eyer hot aach tray priife kexrip fer sayn priiter un xwestere uf muute un ferxtërke. Wii khanst tuu ti aat wii Yoohan sayn leepe penutst hot noo mache?

10. Wii khanst tuu pewayse tas tuu ti layt liipst?

¹⁰ Tuu khanst pewayse tas tuu ti layt liipst torich was tuu raus suuchst mit tayn leepe mache. Satanaas sayn welt wil hon tas tuu tayn kanse tsayt un kraft mit tich selepst fertraypst — tas tuu fersuuchst kelt kriin orer een kroose naame fer tich mache. Im keeche teel, flaysiche kriste uf te kans welt fertraype wii fiil tsayt es meechlich is fer ti kuute notisye preetiche un anere helfe tichter pay Yeehoowa khome. Welche khene soo kaar fol tsayt preetiche un in lërne.

11. Wii tuun fiile troye kriste pewayse tas se Yeehoowa un sayn priiter un xwestere liipe?

¹¹ Fiile troye kriste mise fol tsayt xafe tas se sayn familye un sich selepst fersoriche kriin. Soo wii soo, tiise troye puplikatoore tuun Kot sayn Orkanisatsyoon unerxtitse in yeete aat woo se khene. Tsum payxpiil, welche tuun in te umaniteer hilef mit helfe, anere tuun in te paueray projëkte xafe, un al hon ti keleechenheet fer kontripuytsyoone fer ti welt aarwayt mache. Tii mache tas wayl se Kot un ti anere liipe. Yeete woch, pewayse mer tas mer unser priiter un xwestere liipe wën mer aan te fersamlunge keen un wën mer aan tëne mit helfe. Opwool mer fiilaycht miit sin, keen mer tsu te fersamlunge. Opwool mer fiilaycht pang hon, kepe mer antworte. Un opwool mer  al unser aychne propleeme hon, muute mer ti anere uf foer un noo te fersamlunge. (Heb. 10:24, 25) Wii petanklich sin mer weeche ales woo unser liipe priiter un xwestere mache!

12. In was fer een aner aat hot Yoohan sayn liip fer sayn priiter un xwestere pewayst?

¹² Yoohan hot sayn liip fer sayn priiter un xwestere pewayst, net ploos torich loope, awer aach torich aanreete. Tsum payxpiil, in sayn priife, hot Yoohan ti priiter un xwestere keloopt weeche sayn klaape un kuute aarwayte; awer tee hot aach tëne ërnst aan kereet keeche ti sint. (1 João 1:8–2:1, 13, 14) In te selwich aat, prayche mer unser priiter un xwestere loope weeche ti kuute tinge woo se mache. Awer, wën yemant een xlecht aanxtelung orer kewoonheet ëntwikelt, wii khene mer tëm liip tsayche? Meyer khene tëm mit kexik saan was eyer heere praucht. Es ferlangt koraaj een aanreet fer een froynt kepe, awer ti Piipel saat tas ti woere froynte tuun sich “naner xlayfe” — orer korikiire. (Pro. 27:17)

13. Was sole mer net mache?

¹³ Als mool, pewayse mer unser liip fer unser priiter un xwestere torich was mer net mache. Tsum payxpiil, meyer tuun uns net klaych ëriche weeche was se saan. Kuk was pasiirt is neekst am ën fon Yeesus sayn leepe uf te eyert. Tee hot fer sayn tisipele kesaat tas, fer tas leepe kriin, praychte se tëm sayn flayx ese un tëm sayn pluut trinke. (João 6:53-57) Weeche tas, fiile fon sayn tisipele sin soo ferxrok kep, tas se tëm im xtich kelos hon — awer net sayn woere froynte, too tepay Yoohan. Tii sin troy mit tëm keplip. Tii hon net richtich ferxtan was Yeesus kesaat hat, un tsiimlich sicher hon se sich een pisye ferxrok. Awer Yeesus sayn troye froynte hon net ketenkt tas was eyer kesaat hot ferkheert waar; un tii hon sich net keëricht. Xtats tas, hon se uf tëm ketraut, wayl tii wuste tas eyer ti woerheet kexproch hot. (João 6:60, 66-69) Wii wichtich es is net klaych keëricht wëre weeche was unser froynte saan! Xtats tas, wën mer es net richtich ferxtan hon, lose mer tëne aus leye was se wërklich saan wolte. (Pro. 18:13; Ecl. 7:9)

14. Warom sole mer net erlaupe te has in unser hërts wakse?

¹⁴ Yoohan hot uns aach aan kereet fer unser priiter uns xwestere net hase. Wën net, lose mer te weech uf fer Satanaas uns kontroliire. (1 João 2:11; 3:15) Tas is mit welche  pasiirt am ën fon tëm eyerste yoer hunert. In tiise tsayt, Satanaas hot ales was eyer khont kemacht fer te has uf rechne un Kot sayn folek ferteele. In te tsayt woo Yoohan sayn priife kexrip hot, mëner woo soo wii Satanaas waare, hate sich in te kemaynt rin kexlicht. Tsum payxpiil, Tyotrefes waar ërnste ferteelheete in een kemaynt am mache. (3 João 9, 10) Tee hot khee respekt ketsaycht fer ti reesenter elteste woo fon te rechiirente khërperxaft kexikt waare. Tee hot soo kaar fersuucht etliche fon te kemaynt fat xike, wayl se hon welche layt — woo eyer net kërn hat — in sayn hays kuut aan kenom. Was fer een hoochnaasiche man! Satanaas is noch am sich miie fer Kot sayn folek ferteele un kewine. Wole mer nii net lose tas te has uns aus naner macht.

15. Fon was mus een familye xëf sich erinere?

¹⁵ Een wichtich aat wii een familye xëf pewayse khan tas eyer sayn familye liipt, is tëne fersoriche. (1 Tim. 5:8) Awer, tee mus sich erinere tas es noch fiil wichticher is sayn familye helfe een kuut froyntxaft mit Yeehoowa hon. (Mat. 5:3) Mërk tas payxpiil woo Yeesus fer ti familye xëfe kelos hot. Tas puuch fon Yoohan saat uns tas, wii Yeesus in tëm kweeleray phool am xtërpe waar, hot eyer wayter aan sayn familye ketenkt. Yoohan waar mit Yeesus sayn muter, Maria, tat kewees. Opwool Yeesus xroo am layte waar, hot eyer Yoohan ferlangt fer Maria uf phase. (João 19:26, 27) Yeesus hot priiter un xwestere kehat woo khente Maria sayn fiisix neetichkheete uf phase; awer siits aus tas khee eene fon tëne waar xon Yeesus sayn tisipel kewees. Tan, Yeesus wolt sich sicher sin tas Maria teet in kaystlich un in fiisix aat uf kephast wëre.

16. Was fer flichte hot Yoohan kehat?

¹⁶ Yoohan hot fiile flichte kehat. Wii eene fon te aphostele, praucht eyer flaysich in te preetich aarwayt xafe. Khan sin tas eyer aach ferhayrat waar. Wën es soo waar, praucht eyer sayn familye fersoriche awer aach tëne sayn kaystliche neetichkheete uf phase. (1 Cor. 9:5) Was is ti lisyoon fer ti familye xëfe hayt tsu taach?

17. Warom is es wichtich tas een familye xëf ti kaystliche neetichkheete fon sayn familye uf phast?

¹⁷ Eene pruuter woo eene familye xëf is, fiilaycht hot haufe xweyere flichte fer se uf phase. Tsum payxpiil, eyer mus flaysich in sayn aarwayt xafe tas sayn aanxtelung eer  tsu Yeehoowa pringt. (Efé. 6:5, 6; Tito 2:9, 10) Un fiilaycht hot eyer aach flichte in te kemaynt, soo wii ti priiter un xwestere uf muute un uf phase, un ti preetich aarwayt fiire. In te selwich tsayt, is es wichtich tas eyer reeklich ti Piipel mit sayn fraa un khiner xtutiirt. Sayn familye tuut sicher petanklich sin fer ales woo eyer macht fer tëne kesunt, froo un kaystlich xtark hale. (Efé. 5:28, 29; 6:4)

18. Fon was waar Yoohan sich sicher?

¹⁸ Yoohan hot eene lang un fol leepe kehat. Tee hot ale sorte kefoere mit kemacht, woo khente sayn klaape ferxweecht hon. Awer, tee hot imer sayn pestes kemacht fer Yeesus sayn kepoote aan heere — too tepay sayn priiter un xwestere liipe. Weeche tas, Yoohan waar sich sicher tas Yeehoowa un Yeesus hon tëm keliipt, un tas se teete tëm ti neetich kraft kepe fer yeete xwiirichkheet iwerkhome. (João 14:15-17; 15:10; 1 João 4:16) Satanaas un sayn welt khonte net Yoohan um hale fon sayn priiter un xwestere liipe un tiise liip tsayche torich was eyer kesaat un kemacht hot.

19. Was tuut 1 João 4:7 uns uf muute se mache, un warom?

¹⁹ Soo wii Yoohan, leepe mer in een welt woo is fon Satanaas, woo nimant liipt, rechiirt. (1 João 3:1, 10) Opwool eyer hon wil tas mer noo lose unser priiter un xwestere liipe, tee kriit tas ploos hin wën meyer es erlaupe. Wole mer pextimt sin fer unser priiter un xwestere liipe, fer tiise liip torich was mer saan tsayche, un fer tiise liip torich was mer mache pewayse. Tan, kriin mer ti frayt fon teel fon Yeehoowa sayn familye sin un unser leepe tuut wërklich een tswek hon. (Lees 1 João 4:7.) *