1. Soo wii te kheenich Tawi, was khene welche fon uns frooe?

MEYER al wole in ruu un in friit leepe. Nimant tuut sich kërn ëngstlich fine. Awer, als mool, khene mer keeche ëngstlichkheete khëmpfe. Tes weeche, welche fon Yeehoowa sayn tiiner mache ti selwich frooch woo te kheenich Tawi tsu Yeehoowa kemacht hot: “Pis wan tuun ich ëngstlichkheete un soriche hon, mit traurichkheet in mayn hërts yeete taach?” (Sal. 13:2)

2. Iwer was tuun mer in tiise artikel xpreche?

² Opwool meyer khene net kans fray fon te ëngstlichkheete wëre, khene mer fiil mache fer tiise xpiirunge kontroliire. In tiise artikel, tuun mer eyerst xpreche iwer welche tinge woo uns fiilaycht ëngstlich lose. Tan, xpreche mer iwer 6 tinge woo mer mache khene woo uns helfe tuun in ruu plaype wën mer propleeme hon.

3. Was fer kefoere mache mer mit, un wii fiil kontrol hon mer iwich tëne?

³ Fiilaycht hon mer weenich orer kaar khee kontrol iwer etliche tinge woo khene uns ëngstlich lose. Tsum payxpiil, meyer kriin net kontroliire wii fiil te prays fon tëm ese, tëm tsaych un te woonung tuut sich yeetes yoer ferkreese; un mer khene aach net kontroliire wii oft tuun unser aarwayt orer xuul koleke uns fersuuche etwas uneerlich orer imoraalix mache. Un meyer khene aach net ti wyolënts in unser nochperxaft kontroliire. Meyer mache tiise kefoere mit wayl mer in een welt leepe woo ti meyerste layt tuun net ti piiplixe printsiipye noo keen. Een aner uersach is tas Satanaas — te kot fon tiise welt — wil uns mit te “ëngstlichkheete fon tiise welt” iwerlaate tas mer net Yeehoowa tiine kriin. (Mat. 13:22;  1 João 5:19) Tan, es ferwunert uns net tas tiise welt is fol mit propleeme woo ti layt aarich ëngstlich lose!

4. Was khan pasiire wën mer uns tsu fiil soriche iwer unser propleeme mache?

⁴ Meyer khene uns soo fiil soriche iwer unser propleeme mache tas mer kriin net iwer sonst was tenke. Tsum payxpiil, fiilaycht hon mer ëngst tas mer tuun net kenuuch kelt kriin fer uns fersoriche. Orer tas mer tuun krank wëre un net xafe kriin, orer soo kaar unser aarwayt ferliire. Un im xtant, mache mer uns ketanke tas wën mer fersuucht wëre fer Kot sayn kesets iwer treete, wëre mer untroy. Klaych, tuut Satanaas tii woo eyer kontroliirt lënke fer keeche Kot sayn folek keen; tan, fiilaycht mache mer uns ketanke iwer wii mer uns aan xtele tuun wën tas pasiirt. Im xtant, frooe mer uns: ‘Is es ferkheert mich ketanke mache iwer soo sorte tinge?’

5. Was wolt Yeesus saan wën eyer kesaat hot: ‘Lost noo aych soo fiil ketanke mache’?

⁵ Meyer wise tas Yeesus hot fer sayn nookeener kesaat: ‘Lost noo aych soo fiil ketanke mache.’ (Mat. 6:25) Wolt Yeesus saan tas mer selte uns iwer kaar niks ketanke mache? Kewis net! Eriner tich tas in te friirixe tsayte, welche fon Yeehoowa sayn troye tiiner hon sich aach ëngstlich kefun; awer tii hon net weeche tas Yeehoowa sayn tsuxtimung ferloer.⁠ * (1 Reis 19:4; Sal. 6:3) In woerheet, Yeesus waar uns am treeste. Tee wolt net hon tas mer soo ëngstlich mit te tinge woo mer prauche weyere, tas Yeehoowa tiine net mee tas wichtichste in unser leepe weyer. Tan, was khene mer mache wën mer uns ëngstlich fine? (Kuk te khaste  “Wii tas mache”.)

6. Tëm noo Filipenses 4:6, 7, was khan unser ëngstlichkheete peruyche?

⁶ (1) Peet eftas. Wëns tuu weeche een propleem ëngstlich pist, khanst tuu Yeehoowa sayn hilef mit hërtsliche kepeete suuche. (1 Ped. 5:7) Fer tayn kepeete antworte, Kot khan tich tëm sayn friit kepe, “woo keet iwer ales woo ti mënxe ferxteen khene”. (Lees Filipenses 4:6, 7.) * Yeehoowa tuut tayn ëngstlichkheet peruyche torich sayn mechtich hayliche kayst. (Gál. 5:22)

7. Was sole mer uns erinere wën mer tsu Kot peete?

⁷ Wëns tuu fer Yeehoowa peete tuust, mach tayn hërts tsu tëm uf. Say spetsiifix: saa tëm was te propleem is, un lee tëm aus wiis tuu tich too triwer xpiirst. Wëns meechlich is te propleem resolwiire, ferlang ti kluucheet fer se wise was se mache un ti kraft fer es mache kriin. Wëns niks kept woos tuu mache khanst fer te propleem resolwiire, ferlang Yeehoowa sayn hilef fer net tsu ëngstlich too triwer plaype. Wën tayn kepeete spetsiifix sin, mit te tsayt, wërt es laychter siin wii hot Yeehoowa tëne keantwort. Wën ti antwort tuut net klaych noo tëm kepeet khome, kep net uf! Yeehoowa wil net ploos hon tas tuu spetsiifix wërst, awer aach tas tuu wayter too triwer peete tuust. (Luc. 11:8-10)

8. Was sole mer in unser kepeete tepay tuun?

⁸ Wëns tuu iwer tayn soriche tsu Yeehoowa peete tuust, tuu tëm aach tanke. Es is kuut uns erinere fon te seechen woo mer hon, soo kaar wën mer fiil propleeme mit leepe. Awer, was solst tuu mache wëns tuu net ti richtiche  wërter finst fer tayn xpiirunge tsu Yeehoowa aus leye? Eriner tich tas Yeehoowa tuut tayn kepeete antworte soo kaar wën tas eensiches woos tuu saan khanst, is: ‘Helef mich, piite!’ (2 Crô. 18:31; Rom. 8:26)

9. Was sole mer mache wën mer pang xpiire?

⁹ (2) Trau aan Yeehoowa sayn kluucheet, net aan tayns. In te tsayt fon tëm profeet Isaiias, tas folek fon Yuuta hat pang tas ti asiiryer keeche tëne kheemte. Yuuta sayn folek wolt net hon tas ti asiiryer tëne hërxe teete, soo hon se ti hilef fon te ejipter kesuucht. (Isa. 30:1, 2) Yeehoowa hot tëne aan kesaat tas aan te ejipter traue tsu unklik nëme teet. (Isa. 30:7, 12, 13) Torich Isaiias, Yeehoowa hot fer tas folek kesaat wii khonte se woere sicherheet fine: “Ayre kraft khomt fon in ruu plaype un aan mich traue.” (Isa. 30:15 2^te teel)

10. Was sin etliche situatsyoone woo mer tsayche khene tas mer aan Yeehoowa traue?

¹⁰ Wanee khene mer tsayche tas mer aan Yeehoowa traue? Kuk etliche situatsyoone. Wole mer saan tas se tich een aarwayt aan piite woo tuut peser petsaale... awer, tas tuut mee fon tayn tsayt khoste un tayn kaystlich rutiin xteere. Orer wole mer saan tas yemant aan te aarwayt hot xpas aan tich... awer, tiise persoon is net een ketaafte tiiner fon Yeehoowa. Orer, was teest tuu mache wën een keliipte persoon fon te familye teet tich wiitich ti want xtele, un tich saan: “Suuch yets raus: Ich... orer tayn Kot!” In yeete eene fon tiise situatsyoone prauchst tuu een xweyer ëntxlus mache; awer, Yeehoowa kept tich ti lënkung woos tuu prauchst. (Mat. 6:33; 10:37; 1 Cor. 7:39) Ti frooch is: Tuust tuu aan Tëm sayn lënkung kenuuch traue fer tas aan wëne?

11. Was fer piiplixe kexichte khene mer xtutiire fer in ruu plaype wën ti anere sich keeche uns xtele?

¹¹ (3) Lërn fon te kuute un aach fon te xlechte payxpiile. Ti Piipel hot fiile kexichte woo tsayche wii wichtich es is in ruu plaype un aan Yeehoowa traue. Wiis tuu tiise kexichte xtutiirst, mërk was hot Kot sayn tiiner keholef in ruu plaype wën ti anere sich keeche tëne kextelt hon. Tsum payxpiil, wën tas yitix heechste kericht hot te aphostele kexikt noo lose se preetiche, hon se khee angst kriit. Xtats tas, hon se koraajich kesaat: “Meyer mise Kot als rechiirente aan heere xtats ti mënxe.” (Atos 5:29) Un soo kaar noo tas se kepaytxt waare, ti aphostele hon net pang kriit. Warom? Wayl tii wuste tas Yeehoowa waar uf tëne sayn sayt — Tee waar froo mit tëne. Tes weeche, hon se wayter ti kuute oter kepreeticht. (Atos 5:40-42) In te selwich aat, wën te tisipel Xteefan is foer te toot kextan, is eyer soo in ruu un in friit keplip tas sayn kesicht hot aus kesiin wii “tas kesicht fon een engel”. (Atos 6:12-15) Weeche was? Wayl eyer waar sich sicher tas Yeehoowa froo mit tëm waar.

12. Tëm noo 1 Pedro 3:14 un 4:14, weeche was khene mer froo sin wën mer yachtung mit mache?

¹² Ti aphostele hate taytliche pewaysunge tas Yeehoowa mit tëne waar: tee hat tëne ti macht kep fer wunere mache. (Atos 5:12-16; 6:8) Tas pasiirt net mit uns hayt. Soo wii soo, Yeehoowa tuut uns torich sayn Wort liiplich saan tas, wën mer weeche ti kerechtichkheet layte, kefalt Eyer sich mit uns un sayn kayst is mit uns. (Lees 1 Pedro 3:14; * 4:14. *) Tan, mer sole uns net soriche mache iwer wii tuun mer uns aan xtele wën mer xroo yachtung in te futuer mit mache. Xtats tas, sole mer unser pestes mache fer unser fertraue ferxtërke tas  Yeehoowa khan uns unerxtitse un rete. Soo wii ti eyerste tisipele kemacht hon, mise mer aan Yeesus sayn ferxpreche traue: “Ich tuun aych wërter un kluucheet kepe, tas al ayre keechner paysamer, kriin net sich keeche tëne xtele orer etwas keeche tëne saan.” Tee hot noch ferxproch: “Weeche ayre persewerans, tuut teyer ayre leepe hale.” (Luc. 21:12-19) Un tuu nii net ferkese tas Yeehoowa erinert sich fon te kleenste kleenichkheete fon sayn tiiner woo troy tsu tëm xtërpe. Tee tuut tëne mit tiise kleenichkheete tsurik tsum leepe pringe.

13. Was fer nutse khene mer kriin wën mer xtutiire iwer tii woo sin net in ruu keplip un woo hon net aan Yeehoowa ketraut?

¹³ Meyer khene aach fon te payxpiile lërne fon tëne woo sin net in ruu keplip un woo hon net aan Yeehoowa ketraut. Tiise xlechte payxpiile xtutiire heleft uns net ti selwiche feeler mache. Tsum payxpiil, in te eyerste yoore fon sayn rechiirung, te kheenich Asa fon Yuuta, hot uf Yeehoowa ketraut wën eene mechtich kroos militeer is keeche tëm khom; un Yeehoowa hot tëm tas kewine kep. (2 Crô. 14:9-12) Xpeeter, te kheenich Paasa, fon Israël, is keeche Asa khom mit een fiil kleener militeer. Awer yets, Asa hot net uf Yeehoowa ketraut fer iim rete, soo wii eyer friier kemacht hat. Xtats tas, hot eyer ti siiryer petsaalt fer tee helfe. (2 Crô. 16:1-3) Un wii tas ën fon sayn leepe ticht waar, wën eyer aarich krank kep is, hot eyer net aan Yeehoowa ketraut fer hilef kriin. (2 Crô. 16:12)

14. Was khene mer mit tëm kheenich Asa sayn feeler lërne?

¹⁴ Am aanfang, hot Asa Yeehoowa kesuucht wii eyer propleeme hat. Awer, xpeeter, hot eyer net aan Kot ketraut fer hilef kriin. Xtats tas, hot eyer peser kefun ti propleeme aleen resolwiire. Wën ma xnel kukt, Asa sayn plaan fer ti siiryer sayn hilef suuche fer keeche Israël khëmpfe, hot kuut aus kesiin. Awer ti friitlich tsayt hot net lang ketauert. Yeehoowa hot tëm torich een profeet kesaat: “Wayls tuu host uf tëm kheenich fon Siirya ketraut un host net uf Yeehoowa, tayn Kot, ketraut, hot te militeer fon tëm kheenich fon Siirya fon tayn hënt kefloo.” (2 Crô. 16:7) Meyer thërfe uf phase fer net tenke tas mer khene unser propleeme aleen resolwiire, oone Yeehoowa sayn lënkung torich sayn Wort suuche. Soo kaar wën een aylich situatsyoon foer khomt, sole mer in ruu plaype un aan Yeehoowa traue, un tee tuut uns helfe te richtich ëntxlus mache.

15. Was khene mer mache wën mer ti Piipel leese?

¹⁵ (4) Lërn piiplixe tekste ausm khop. Wëns tuu Piipel tekste finst woo tsayche wii wichtich es is in ruu plaype un aan Yeehoowa traue, fersuuch tëne ausm khop lërne. Fer tas mache kriin, es khan tich helfe tëne in een hart xtim leese orer tëne hin xraype un reeklich noch mool leese. Yeehoowa hot Yosuë kesaat tas eyer selt tas puuch fom Kesets in een layse xtim reeklich leese; soo, khent eyer sich kluuch aan xtele. Was eyer in tëm Kesets leese teet, teet tëm helfe net pang hon, awer koraaj hon fer Kot sayn folek fiire. (Jos. 1:8, 9) Fiile wërter woos tuu in te Piipel finst, khene tayn hërts un ketanke peruyche in situatsyoone woo teete tich, in te meyerst tsayt, ëngstlich un mit pang lose. (Sal. 27:1-3; Pro. 3:25, 26)

16. Wii tuut Yeehoowa ti kemaynt penutse fer uns helfe in ruu plaype un aan tëm traue?

¹⁶ (5) Fertrayp tsayt mit Kot sayn folek. Yeehoowa penutst unser priiter un xwestere fer uns helfe in ruu plaype un aan tëm traue. In unser fersamlunge, kriin mer nutse fon te reete, te komentaare un te ufmuutiche kexpreeche woo mer mit unser priiter un  xwestere hon. (Heb. 10:24, 25) Meyer khene aach fiil uf kemuut wëre wën mer iwer unser xpiirunge xpreche mit unser tichte froynte in te kemaynt. “Tas kuute wort” fon een froynt khan es helfe te last fon te ëngstlichkheet laychter lose. (Pro. 12:25)

17. Tëm noo Hebreus 6:19, wii khan ti hofnung aan tëm Raych uns fest hale opwool ti xrooe situatsyoone?

¹⁷ (6) Hal tayn hofnung xtark. Unser hofnung aan tëm Raych is “wii een anker fer unser seel”: tii lost uns fest opwool ti xrooe situatsyoone un ëngstliche ketanke. (Lees Hebreus 6:19.) * Tenk triwer aan Yeehoowa sayn ferxpreche fon een futuer wën nii mools ti nekatiiwe ketanke tuun foer khome. (Isa. 65:17) Iwerlee tich tat in tiise friitlich naye welt, wën nii mee ti xlechte tinge pasiire tuun. (Miq. 4:4) Un aach, woo mee tas tuu iwer tayn hofnung mit te anere fertseelst, woo xtërker tayn hofnung wërt. Mach tayn pestes in tëm preetich un in te aarwayt fer tisipele mache. Wëns tuu es machst, tuu khanst tich “kans sicher fon te hofnung pis aans ën sin”. (Heb. 6:11)

18. Was fer kefoere khene mer in te futuer waarte, un was khene mer mache fer tëne aus hale?

¹⁸ Soo lang wii tiise sisteem noo sayn ën keet, tuun mer noch mee kefoere mit leepe, woo khente uns ëngstlich lose. Unser yoers tekst fer 2021 khan uns helfe tiise kefoere aus hale un in ruu plaype, net weeche unser aychne kraft, awer wayl mer aan Yeehoowa traue. Torich 2021, wole mer mit unser aktsyoone tsayche tas mer aan Yeehoowa sayn ferxpreche klaape: “Ayre kraft khomt fon in ruu plaype un aan mich traue.” (Isa. 30:15)