XTUUTYUM ARTIKEL 3
Tas kroose folek fon anere xeef loopt Kot un Kristus
“Unser retung khomt fon unser Kot, woo uf tëm troon setst, un fon tëm Lam.” (APOCALIPSE 7:10)
LIIT 14 Yeesus — Te naye kheenich fon te eyert
WAS TUUN MER SIIN? *
1. Wii hot een reet, woo waar in een konkrës in 1935 kehal, eene yunge man petrof?
TE YUNGE MAN waar 18 yoer alt wii eyer sich taafe kelos hot im yoerkang 1926. Sayn eltere waare Piipel Xtutënte — wii Yeehoowa sayn Tsayer waare aan tiise tsayt pekhant. Ti eltere hon tray puupe un tswaay meetche kehat un hon tëne in kelërnt Yeehoowa tiine un Yeesus Kristus noo mache. Soo wii al ti Piipel Xtutënte aan tiise tsayt, tiise troye yunge man hot yeetes yoer tas proot kes un te wayn ketrunkt in tëm Aantenke fon Yeesus sayn toot. Awer, sayn hofnung fer ti tsukhunft hot sich keënert wii eyer ti wichtich reet keheert hot: “Tas kroose folek.” In 1935, hot J. F. Rutherford tiise reet in een konkrës in Washington, D.C., F.X.A. kehal. Was hon ti Piipel Xtutënte in tiise konkrës kelërnt?
2. Was fer ufmuutich woerheet hot te pruuter Rutherford in sayn reet aus keleet?
2 In tiise reet, hot te pruuter Rutherford aus keleet weer macht teel fon tëm “kroose folek”, iwer weem Apocalipse 7:9 xprecht. Pis tiise tsayt, ti Piipel Xtutënte hon ketenkt tas tas kroose folek waar een krup fon mënxe kewees woo teet tsum himel keen, awer woo net soo troy wii ti kesalpte waar. Te pruuter Rutherford hot ti Piipel penutst fer se aus leye tas tas kroose folek is net raus kesuucht kep fer im himel se leepe; awer, tii sin Kristus sayn anere xeef * woo tuun “ti kroos tripulatsyoon” iwerleepe un fer imer uf te eyert woone. (Apo. 7:14) Yeesus hot ferxproch: “Ich hon aach anere xeef, woo net fon tiise xtal sin; ich mus se aach pringe un tii tuun mayn xtim heere un wëre wii ploos een trop, mit ploos een xeefer.” (João 10:16) Tiise “anere xeef” sin troye Yeehoowa sayn Tsayer woo ti hofnung hon fer in een Paratiis uf te eyert fer imer leepe. (Mat. 25:31-33, 46) Wole mer siin wii tiise plits fon kaystlich licht hot tas leepe fon fiile fon Yeehoowa sayn folek keënert — too tepay te yunge pruuter iwer weem mer eente kexproch hon. (Sal. 97:11; Pro. 4:18)
EEN PLITS FON KAYSTLICH LICHT ËNERT TAS LEEPE FON TAUSENTE
3-4. In tëm konkrës fon 1935, was hon tausente iwer sayn hofnung ferxtan, un warom khonte se sich sicher fon tas sin?
3 Een emotsyonant xtun in tëm konkrës waar wën te reetner hot fer ti layt woo tat waare ferlangt: “Piite, khene al tii woo ti hofnung hon fer fer imer uf te eyert leepe sich uf xtele?” Tëm noo eene pruuter woo im konkrës waar, mee wii een heleft fon te unkefeer 20.000 layt is xteen keplip. Tan, hot te pruuter Rutherford kesaat: “Kuk mool! Tas kroose folek!” Noo tas, al hon mit frayt kexraayt. Tii woo xteen keplip sin, hon ferxtan tas Yeehoowa hot tëne net raus kesuucht fer im himel se leepe. Tii wuste tas se waare net mit Kot sayn hayliche kayst kesalpt. In tëm neekste taach fom konkrës, 840 naye Yeehoowa sayn Tsayer hon sich taafe kelos un ti meyerste fon tëne waare fon te anere xeef kewees.
4 Noo tiise reet, te yunge man, iwer weem mer hon fonerste kexproch, un tausente anere hon noo kelos tas proot ese un te wayn trinke in tëm Aantenke. Fiile hon sich kraat wii eene teemuutiche pruuter kexpiirt, woo kesaat hot: “Tas Aantenke fon 1935 waar tas letste mool woo ich hon fom proot kes un fom wayn ketrunkt, wayl ich wust tas Yeehoowa hat net sayn hayliche kayst penutst fer mich ti himlix hofnung kepe. Xtats tas, hat ich ti hofnung fer uf te eyert leepe un mit helfe fer fon tëne een Paratiis mache.” (Rom. 8:16, 17; 2 Cor. 1:21, 22) Fon tat aan, tas kroose folek hot sich ferkreest un tuut mit te kesalpte woo noch uf te eyert sin ticht paysamer xafe.
5. Wii siit Yeehoowa aan tii woo noo kelos hon fom proot ese un fom wayn trinke in tëm Aantenke?
5 Wii siit Yeehoowa aan tii woo noo kelos hon fom proot ese un fom wayn trinke in tëm Aantenke noo 1935? Un wën hayt een ketaafte Yeehoowa sayn Tsayer tuut eerlich fom proot ese un fom wayn trinke in tëm Aantenke, awer noo heyer ferxteet tas eyer net wërklich kesalpt waar? (1 Cor. 11:28) Welche hon fom proot kes un fom wayn ketrunkt wayl tii hon net sayn hofnung richtich ferxtan. Awer, wën se erkhëne tas se ferkheert waare, noo lose tas mache un wayter Yeehoowa troy tiine, sicher tseelt Eyer tëne aan te anere xeef tepay. Opwool tii tuun net mee fom proot ese un fom wayn trinke, tuun se wayter tsum Aantenke keen wayl se aarich petanklich sin fer was Yeehoowa un Yeesus tëne kemacht hon.
EEN WUNERLICH HOFNUNG
6. Was xikt Yeesus ti engele se mache?
6 Ti kroos tripulatsyoon is kraat forich uns. Tes weeche, wëre mer uf kemuut wën mer noch mool siin was noch saat Apocalipse kapitel 7 iwer ti kesalpte un tas kroose folek fon anere xeef. Yeesus xikt ti engele wayter ti fier winte fon fernichtung fest hale. Tii sole net ti winte uf te eyert keen lose pis al ti kesalpte markiirt sin — es wil saan, wën Yeehoowa ëntxlist tas se troy sin. (Apo. 7:1-4) Wii peloonung weeche sayn troyheet, Kristus sayn kesalpte priiter wëre kheeniche un priister mit tëm im himel. (Apo. 20:6) Yeehoowa, Yeesus un ti engele tuun wërklich froo wëre wën se ti 144.000 kesalpte siin sayn himlix peloonung kriin.
Tas kroose folek, mit lange ways tsaych aan un mit phalm rayse in tëne sayn hënt. Tii sin foer Kot sayn xaynich troon un foer tëm Lam (Kuk te apsats 7.)
7. Tëm noo Apocalipse 7:9, 10, weer hot Yoohan in een wisyoon kesiin un was waare se am mache? (Kuk tas pilt am aanfang fom piichelche.)
7 Noo tas Yoohan iwer tiise 144.000 kheeniche un priister kexproch hot, tuut eyer etwas emotsyonant siin: een “kroos folek”, woo te Armaxeton iwerleept. Anerste wii ti eyerst krup, tiise kroos folek is fiil kreeser un hot net een runte numer. (Lees Apocalipse 7:9, 10.) * Tii hon “lang ways tsaych aan” — tas wayst tas tii tuun sich “oone flek” fon Satanaas sayn welt hale un tuun wayter leaal tsu Kot un Kristus plaype. (Tia. 1:27) Tii saan in hart xtim tas tii sin keret kep weeche ales woo Yeehoowa un Yeesus, tas Lam, kemacht hon. Un noch, tii hon phalm rayse in sayn hënt — tas tsaycht tas se nëme Yeesus froo aan wii Yeehoowa sayn inkexteltne kheenich. (Kuk aach João 12:12, 13.)
8. Was tuut Apocalipse 7:11, 12 saan iwer Yeehoowa sayn himlix familye?
8 Lees Apocalipse 7:11, 12. * Was pasiirt wën tii im himel tas kroose folek siin? Yoohan siit tas al im himel tuun sich mit frayt iwerlaafe un tuun Kot loope wën tas kroose folek tsum foer xayn khomt. Yeehoowa sayn himlix familye wërt aarich froo wën se ti erfiilung fon tiise wisyoon siin: tas kroose folek khomt lepeentich aus fon te kroos tripulatsyoon.
9. Tëm noo Apocalipse 7:13-15, was mache tii fon tëm kroose folek hayt?
9 Lees Apocalipse 7:13-15. * Yoohan hot kexrip tas tas kroose folek hot “sayn lang tsaych kewext un im pluut fom Lam ways kemacht”. Tas petayt tas se een sauwer kewise hon un tas Yeehoowa kefalt sich mit tëne. (Isa. 1:18) Tii sin kriste woo sich xon tetikiirt un ketaaft hon. Tii hon eene xtarke klaape aan Kristus sayn fray khaaf opfer un hon een ticht froyntxaft mit Yeehoowa. (João 3:36; 1 Ped. 3:21) Tes weeche, Kot kefalt sich mit tëne un tii khene Tëm “hayliche tiinst taach un nacht” too hiir uf te eyert mache. Xon yets, wayl Kot sayn Raych tas haupste in tëne sayn leepe is, sin se flaysich un mache se tas kreeste teel fon te aarwayt fer tas Raych preetiche un tisipele mache. (Mat. 6:33; 24:14; 28:19, 20)
Tas kroose folek fon anere xeef khomt froo aus ti kroos tripulatsyoon (Kuk te apsats 10.)
10. Fon was is tas kroose folek sich sicher, un was fer ferxpreche tuun se sich erfiile siin?
10 Tas kroose folek, woo ti kroos tripulatsyoon iwerleept, is sich sicher tas Kot tuut tëne wayter uf phase, wayl “Tee woo uf tëm troon setst, tuut sayn parak iwer tii xpane”. Ëntlich, ti erfiilung fon tëm ferxpreche woo ti anere xeef xon een lang tsayt kewaart hon, tuut pasiire: “[Kot] tuut yeete treene fon sayn aue ap trokne, un es kept kheen toot mee, kheen traurichkheet, kheen krayxe un kheen phayn.” (Apo. 21:3, 4)
11-12. (a) Soo wii in Apocalipse 7:16, 17 xteet, was fer seechen tuut tas kroose folek in te futuer kriin? (b) Was khene ti anere xeef in tëm Aantenke mache, un weeche was mache se tas?
11 Lees Apocalipse 7:16, 17. * Hayt, welche fon Yeehoowa sayn folek tuun hungernoot mit mache wayl es kelt feelt, orer weeche ti propleeme woo te kriich pringt. Anere sin weeche sayn klaape inkexpërt. Noch soo, tii fon tëm kroose folek sin aarich froo. Warom? Tii wise tas noo tas se ti fernichtung fon tiise xlechte welt iwerleepe, tuun se imer iwer fiil kaystlich un fiisix ese hon. Wën Satanaas sayn xlechte welt fernicht wërt, tas kroose folek wërt kexoont fon te “hits” fon Yeehoowa sayn wuut, woo Eyer tuut iwer ti natsyoone xite. Noom ën fon te kroos tripulatsyoon, tuut Yeesus tii woo uf te eyert iwerleepe tsum “waser fom [eewiche] leepe lënke”. Tenk mool: Tas kroose folek hot een wunerlich hofnung — tswixich ti pilyoone woo xon een mool keleept hon, tii khene nii mool xtërpe! (João 11:26)
12 Ti anere xeef hon een wunerlich hofnung — weeche tas, sin se aarich petanklich tsu Yeehoowa un Yeesus! Opwool Yeehoowa hot tëne net raus kesuucht fer im himel se leepe, eyer liipt tëne kraat wii eyer ti kesalpte liipt. Ti kesalpte un ti anere xeef khene Kot un Kristus loope, tsum payxpiil, wën se tsu tëm Aantenke keen.
LOOP YEEHOOWA UN YEESUS MIT TAYN KANS HËRTS IN TËM AANTENKE
Tas proot un te wayn woo im Aantenke torich keen, erinere uns tas Yeesus is uf unser plats kextorep tas mer khente leepe hon (Kuk ti apsetse 13-15.)
13-14. Warom sole al in tëm Aantenke fon Kristus sayn toot keen?
13 In te letste yoore, tswixich 1.000 layt woo in tëm Aantenke keen, unkefeer 1 persoon tuut fom proot ese un fom wayn trinke. Es wil saan tas ti meyerste kemaynte uf te welt hon nimant woo fom proot est un fom wayn trinkt, un tas ti meyerste woo in tëm Aantenke keen hon ti hofnung fer uf te eyert leepe. Tan, warom keen se? Weeche ti selwich uersach tas ti layt in een froynt sayn hoochtsayt keen: tii wole sayn liip un unerxtitsung tsayche fer tas pheyerche woo sich am hayrate is. In te selwich aat, tii fon te anere xeef keen tsum Aantenke wayl tii wole sayn liip un unerxtitsung fer Kristus un fer ti kesalpte tsayche. Tii keen aach fer se tsayche tas se petanklich sin fer Yeesus sayn fray khaaf opfer — woo macht tëne meechlich fer imer uf te eyert leepe.
14 Een aner wichtich uersach warom ti anere xeef in tëm Aantenke keen, is fer Yeesus sayn kepoot aan heere. Wii Yeesus tas eyerste mool tas Oomtmal fom Hër mit sayn troye aphostele kefayert hot, hot eyer tëne kesaat: “Macht tas imer fer aan mich aan se tenke.” (1 Cor. 11:23-26) Tan, soo lang wii welche fon te kesalpte noch uf te eyert sin, tuun ti anere xeef wayter in tëm Aantenke keen. Un ti anere xeef tuun ale kaar in laate fer tsum Aantenke mit tëne keen.
15. Was khene mer mache fer Kot un Kristus in tëm Aantenke loope?
15 In tëm Aantenke, hon mer ti keleechenheet fer Kot un Kristus loope wën mer mitsamer singe un peete. Tas theema fon te reet fon tiise yoer wërt: “Say petanklich fer tas woo Kot un Kristus fer tich kemacht hon!” Tiise reet tuut unser petanklichkheet fer Yeehoowa un Kristus ferkreese. Wën tas proot un te wayn torich keen, wëre mer erinert fon was se petayte — Yeesus sayn khërper un pluut. Meyer tuun aach iwer ti liip woo Yeehoowa uns ketsaycht hot traan tenke, wën eyer erlaupt hot sayn Soon uf unser plats xtërpe tas mer khente leepe hon. (Mat. 20:28) Ale tii woo unser himlixe Fater un sayn Soon liipe, tuun wërklich winxe in tëm Aantenke keen.
TANK YEEHOOWA FER TI HOFNUNG WOO EYER TICH KEP HOT
16. In was fer aate sin ti kesalpte un ti anere xeef eenlich?
16 Ti unerxiit tswixich ti kesalpte un ti anere xeef is net wii fiil weyert hon se foer Kot — tii sin al wichtich tsu Yeehoowa. Tee liipt ti tswaay krupe ekaal. Meyer wise tas, wayl eyer hot te selwiche prays petsaalt — tas leepe fon sayn liipe Soon — fer ti kesalpte un ti anere xeef khaafe. Ti unerxiit tswixich ti tswaay krupe is ti hofnung woo se hon. Awer ti tswaay krupe mise leaal tsu Kot un tsu Yeesus plaype. (Sal. 31:23) Un eriner tich: Yeehoowa kept sayn hayliche kayst fer yeete persoon tëm noo was se praucht, een tuun ep se fon te kesalpte orer fon te anere xeef is.
17. Was tuun ti kesalpte woo noch uf te eyert sin waarte?
17 Ti kesalpte kriste sin net uf te welt khom mit te himlix hofnung. Kot xtelt tas in tëne sayn hërts rin. Tii tuun iwer sayn hofnung tenke, too triwer peete, un khene neekst net waarte fer sayn peloonung im himel kriin. Tii wise net wii wërt sayn khërper im himel. (Fil. 3:20, 21; 1 João 3:2) Soo wii soo, waarte se te taach wën se tuun Yeehoowa, Yeesus, ti engele un ti anere kesalpte trefe un mit tëne in tëm himlixe Raych sin.
18. Was sin ti anere xeef am waarte?
18 Ti anere xeef hon een hofnung woo natiirlich fer ti mënxe is: fer imer uf te eyert leepe. (Ecl. 3:11) Tii waarte te taach wën se mit helfe tuun fon te kans welt een Paratiis mache. Tii khene te taach neekst net waarte wën se tuun sayn hayse paue, sayn kaate plantse, un sayn khiner mit perfekt kesuntheet tsiie. (Isa. 65:21-23) Tii winxe te taach siin wën se tuun ti eyert wërklich khëne lërne — sayn përiche, sayn walte, sayn meer... —, un wën se xtutiire tuun al ti tinge woo Yeehoowa erxaft hot. Un tas haupste: es iwerlaaft tëne se wise tas sayn froyntxaft mit Yeehoowa wërt xtërker un tichter.
19. Was fer keleechenheet kept tas Aantenke fer yeete eene fon uns, un wanee wërt tas tiise yoer kehal?
19 Yeehoowa kept fer yeete eene fon sayn tiiner woo tetikiirt is, een wunerlich hofnung fer ti futuer. (Jer. 29:11) Tas Aantenke fon Yeesus sayn toot kept fer ti kesalpte un fer ti anere xeef een ekstra keleechenheet: Kot un Kristus loope weeche ales woo se fer uns kemacht hon tas mer eewiche leepe kreechte. Oone tswayfel, tas Aantenke is ti wichtichste fersamlung woo ti woere kriste yeetes yoer hon. Tas wërt kehal noo te Sun sayn unerkang am samstaach, 27te mërts fon 2021. Fiile woo in tiise fersamlung keen, tuun tas in frayheet mache. Anere keen opwool welche tekeeche sin. Un etliche tuun tas Aantenke fayre opwool se inkexpërt sin. Soo lang wii Yeehoowa, Yeesus un tas himlix teel fon Kot sayn familye es peopachte, tas yeete kemaynt, krup un persoon khan een wunerlich Aantenke hon!
LIIT 150 Suucht Kot tas eyer aych pefrayt
^ parágrafo 5 27te Mërts fon 2021 is eene wichtiche taach fer Yeehoowa sayn Tsayer. In tiise oomt, tuun mer tas Aantenke fon Yeesus Kristus sayn toot fayre. Ti meyerste woo in tiise fersamlung keen tuun, sin fon te krup woo Yeesus wii “anere xeef” keruuft hot. Was fer woerheet hon Yeehoowa sayn Tsayer iwer tiise krup kelërnt im yoerkang 1935? Was fer wunerlich hofnung waart ti anere xeef noo te kroos tripulatsyoon? Un wii khene ti anere xeef Kot un Kristus loope wën se tsu tëm Aantenke keen?
^ parágrafo 2 TUU PESER FERXTEEN: Ti anere xeef sin layt woo tuun Kristus noo keen un woo hofe fer imer uf te eyert leepe. Welche fon tëne hon aan kefang Yeehoowa aan peete torich ti letste taache. Tas kroose folek sin tii fon te anere xeef woo lepeentich sin tuun wën Kristus ti mënxheet torich ti kroos tripulatsyoon richte tuut; un tii tuun ti kroos tripulatsyoon iwerleepe.
^ parágrafo 7 (Apocalipse 7:9, 10) Nochter, hon ich een kroos folek kesiin, woo khee man tseele khont, fon ale natsyoone, xteme, foleke un xprooche, woo foer tëm troon un foer tëm Lam kextan hon. Tii hate lang ways tsaych aan un hate phalm rayse in tëne sayn hënt. 10 Un tii hon in hart xtim kesaat: “Unser retung khomt fon unser Kot, woo uf tëm troon setst, un fon tëm Lam.”
^ parágrafo 8 (Apocalipse 7:11, 12) Al ti engele waare xteen keplip um ti elteste sayn troon un um ti lepeentiche kriatuure rom; un tii hon sich foer tëm troon kepikt un sayn kesicht uf tëm pootem ketuun un Kot aan kepeet 12 un kesaat: “Amen! Tas loop, ti hërlichkheet, ti kluucheet, ti tanke, ti eer, ti macht un ti kraft keheere tsu unser Kot fer imer. Amen.”
^ parágrafo 9 (Apocalipse 7:13-15) Tan, eene fon te elteste hot mich kefroot: “Tii woo hon lang ways tsaych aan, weer sin tii un fon woo sin se heyer?” 14 Soo, hon ich tëm klaych kesaat: “Mayn hër, tuu weest es.” Too hot tee fer mich kesaat: “Tas sin tii woo fon te kroos tripulatsyoon raus khom sin; un tii hon sayn lang tsaych kewext un im pluut fom Lam ways kemacht. 15 Weeche tas, sin se foer Kot sayn troon, un tuun se tëm hayliche tiinst taach un nacht in sayn thempel mache; Tee woo uf tëm troon setst, tuut sayn parak iwer tii xpane.
^ parágrafo 11 (Apocalipse 7:16, 17) Tii tuun khee hunger mee xpiire, un aach khee torst, un ti sun un ti hits tuun se nii mee kweele, 17 wayl tas Lam, woo in te mite fom troon is, tuut se wii een xeefer uf phase un tsu waser kwele fom leepe lënke. Un Kot tuut yeete treene fon tëne sayn aue ap trokne.”
