1. Was tsaycht tas hayt es liip in fiile familye feelt?

TI PIIPEL hot foer raus kesaat tas in te letste taache, fiile layt teete “khee liip fer ti familye” hon. (2 Tim. 3:1, 3) Meyer siin tiise profetsii am sich hayt erfiile. Tsum payxpiil, ti tiwors tuut milyoone familye aus naner mache; weeche tas, ti eltere plaype pees eene mim aner un ti khiner xpiire tas se net keliipt sin. Soo kaar ti familye woo in tëm selwich haus woone, fiilaycht tuun sich neekst wii frëmte siin. Eene familye aanreeter saat: “Muter, fater un khiner tuun net eene mit te anere fertseele, un tii fertraype neekst sayn kanse tsayt mit te komputatoore, tablets, selulaare orer videogames. Opwool tiise familye unich te selwich tach leepe, tuun se sich neekst net khëne.”

2-3. (a) Tëm noo Romanos 12:10, iwer weem sole mer hërtslich liip hon? (b) Iwer was tuun mer in tiise artikel xpreche?

² Meyer wole net kemustert wëre fon tiise welt sayn unliiplich kayst. (Rom. 12:2) Xtats tas, prayche mer hërtslich liip, net ploos iwer unser familye ëntwikele, awer aach iwer unser priiter un xwestere in te kemaynt. (Lees Romanos 12:10.) * Was is hërtslich liip? Es is was ti familye mitkliiter xpiire wën se een tiif un liiplich froyntxaft eene mit te anere hon. Tas is ti sort liip woo mer sole ëntwikele fer unser priiter un xwestere in te kemaynt. Wën mer hërtslich liip tsayche, helfe mer ti eenichkheet hale, woo een wichtich teel fon te woere aanpeetung is. (Miq. 2:12)

 ³ Fer uns helfe hërtslich liip ëntwikele un tsayche, wole mer siin was khene mer mit te piiplixe payxpiile lërne.

4. Was saat uns Tiago 5:11 iwer Yeehoowa sayn liip?

⁴ Ti Piipel xprecht uns iwer Yeehoowa sayn xeene kwaliteete. Tsum payxpiil, tii saat tas “Kot is liip”. (1 João 4:8) Ploos tiise wërter xafe uns xon tichter pay Yeehoowa. Awer ti Piipel saat uns aach tas Yeehoowa “fiil hërtslich liip” hot. (Lees Tiago 5:11.) * Was fer een xeene aat fer Yeehoowa sayn tiife xpiirunge tsu uns pexraype!

5. Wii tsaycht Yeehoowa parmhërtslichkheet, un wii khene mer tëm noo mache?

⁵ Mërk tas Tiago 5:11 ferpiint Yeehoowa sayn hërtslich liip mit een aner kwaliteet woo xaft uns tichter pay tëm — sayn parmhërtslichkheet. (Êxo. 34:6) Eene aat wii Yeehoowa sayn parmhërtslichkheet noo uns tsaycht, is wën eyer unser feeler fertsayt. (Sal. 51:1) Awer in te Piipel, ti parmhërtslichkheet petayt fiil mee wii ploos yemant fertsaye. Tii is een tiife xpiirung woo een persoon uf rechent yemant helfe, wën eyer siit se am layte. Yeehoowa saat tas te xtark wunx woo eyer hot fer uns helfe is tiifer wii ti xpiirunge woo een muter noo sayn nëneche hot. (Isa. 49:15) Wën mer am layte sin, Yeehoowa sayn parmhërtslichkheet tuut tëm uf rechne uns helfe. (Sal. 37:39; 1 Cor. 10:13) Meyer khene tiise kwaliteet fer unser priiter un xwestere tsayche wën mer tëne fertsaye un net pees mit tëne plaype wën se uns ëriche. (Efé. 4:32) Een aner wichtich aat fer parmhërtslichkheet tsayche is unser priiter un xwestere uner xtitse wën se kefoere mit mache. Wën ti liip tuut uns uf rechne parmhërtslich mit te anere sin, mache mer Yeehoowa noo — tas kreeste payxpiil fon hërtslich liip. (Efé. 5:1)

6. Wii hon Yoonatan un Tawi hërtslich liip eene fer te aner ketsaycht?

⁶ Ti Piipel xprecht iwer imperfekte mënxe woo hon hërtslich liip ketsaycht. Kuk mool tas payxpiil fon Yoonatan un Tawi. Ti Piipel saat: “Yoonatan un Tawi hon sich in een xtark froyntxaft ferpunt, un Yoonatan hot aan kefang Tawi wii sich selepst liipe.” (1 Sam. 18:1) Yeehoowa hot Tawi raus kesuucht fer kheenich noo Saul sin. Noo tas, Saul hot aan kefang piter xpiirunge iwer Tawi hon un hot fersuucht tëm um pringe. Awer Yoonatan, Saul sayn soon, hot net sayn fater uner xtitst. Yoonatan un Tawi hon ferxproch sayn froyntxaft hale un sich imer naner xtitse. (1 Sam. 20:42)

7. Was khent Yoonatan un Tawi um kehal hon froynte wëre?

⁷ Ti hërtslich liip tswixich Yoonatan un Tawi siit noch xeener aus wën mer tenke aan welche tinge woo khente tëne um kehal hon sayn froyntxaft ëntwikele. Tsum payxpiil, Yoonatan waar unkefeer 30 yoore elter wii Tawi kewees. Yoonatan khont ketenkt hon tas eyer khent nii mools froynt wëre fon yemant woo fiil yinger waar un woo weenich speryens hat. Soo wii soo, Yoonatan hot net Tawi aan kesiin orer pehantelt wii wën eyer weenicher weyer.

8. Was mënst tuu: warom waar Yoonatan een kuute froynt fer Tawi kewees?

⁸ Yoonatan khent ayfersuucht fon Tawi kehat hon. Wayl eyer te kheenich Saul sayn soon waar, khont Yoonatan ketenkt hon tas eyer tas recht hat fer te neekste kheenich sin. (1 Sam. 20:31) Awer Yoonatan waar teemuutich un leaal tsu Yeehoowa. Tan, hot eyer Yeehoowa sayn ëntxlus — Tawi wii neekste kheenich in xtele — mit kans hërts uner xtitst. Tee waar aach leaal tsu Tawi kewees, opwool tas hot Saul aarich pees kelos. (1 Sam. 20:32-34)

9. Hot Yoonatan Tawi wii een faynt aan kesiin? Lee tas aus.

⁹ Yoonatan hat hërtslich liip noo Tawi; tan, hot eyer Tawi net wii een faynt aan kesiin. Yoonatan waar kwap in tëm fletxe un poochen penutse un waar een koraajiche kriicher. Ti layt hon kesaat tas eyer un sayn fater “waare xneler wii ti atler un xtërker wii ti leepe kewees”. (2 Sam. 1:22, 23) Tes weeche, Yoonatan khent sich keproost hon weeche al ti koraajiche tinge woo eyer kemacht hat. Awer, Yoonatan waar net yemant woo wolt imer te pest sin orer woo hot piter xpiirunge pehal. Kans anerste, Yoonatan hot fiil respekt tsu Tawi kehat weeche Tawi sayn koraaj un fertrau aan Yeehoowa. In woerheet, es waar noo tas Tawi Kolias um keprung hat, tas Yoonatan hot aan kefang Tawi wii sich selepst liipe. Wii khene mer soo een sort hërtslich liip fer unser priiter un xwestere tsayche?

10. Was petayt “een tiif liip, fom hërts, eene tsu te anere hon”?

¹⁰ Ti Piipel saat uns fer “een tiif liip, fom hërts, eene tsu te anere hon”. (1 Ped. 1:22) Yeehoowa kept uns tas payxpiil. Sayn liip tsu uns is soo tiif tas wën mer troy tsu tëm plaype, niks khan tiise ferpiinung ferpreche. (Rom. 8:38, 39) Tas kreekix wort woo iwersetst is “tiif”, kept ti aanung fon sich “xtreke”, soo kaar mit kewalt — es wil saan, sich aan xtrenge fer liip tsayche. Als mool, prayche mer uns “xtreke”, soo kaar mit kewalt, fer hërtslich liip fer een pruuter orer een xwester tsayche. Wën ti anere uns ëriche, prayche mer “wayter eene ti anere in liip aus hale” un uns “ërnst aan xtrenge fer ti eenichkheet  fom kayst hale, torich ti ferpiinung fom friit”. (Efé. 4:1-3) Wën mer uns aan xtrenge fer “ti ferpiinung fom friit” hale, tuun mer uns net traan hale aan te priiter sayn feeler. Meyer tuun unser pestes mache fer unser priiter siin soo wii Yeehoowa tëne siit. (1 Sam. 16:7; Sal. 130:3)

11. Warom khan es als mool xweyer sin hërtslich liip tsayche?

¹¹ Es is net imer laycht hërtslich liip fer unser priiter un xwestere tsayche, hauptseechlich wën mer tëne sayn feeler mërke. Siits aus tas es een kefoer waar fer welche fon te eyerste kriste. Tsum payxpiil, Ewootya un Sintik tsiimlich sicher hate khee propleem fer mit Phaul ti kuute oter preetiche. Meyer wise net warom, awer es waar tëne xweyer kuut naner rom khome. Tan, Phaul hot tëne aan kereet fer “te selwiche ferxtant in eenichkheet mit tëm Hër hon”. (Fil. 4:2, 3)

12. Wii khene mer hërtslich liip fer unser priiter un xwestere ëntwikele?

¹² Wii khene mer hërtslich liip fer unser priiter un xwestere hayt ëntwikele? Wën mer unser priiter un xwestere peser khëne lërne, fine mer es laychter tëne ferxteen un hërtslich liip tsu tëne ëntwikele. Een unerxiitlich elter orer kultuer thërft uns net tsurik hale. Eriner tich: Yoonatan waar unkefeer 30 yoore elter wii Tawi kewees; soo wii soo, hot eyer een ticht froyntxaft mit tëm ëntwikelt. Khanst tuu froynt wëre fon yemant woo elter orer yinger wiis tuu is? Wëns tuu tas machst, khanst tuu tsayche tas tuu “ti kans pruuterxaft” liipst. (1 Ped. 2:17)

13. Warom fiilaycht fine mer uns tichter pay welche in te kemaynt?

¹³ Wayl mer hërtslich liip fer unser priiter un xwestere xpiire, wil tas saan tas mer tuun een ticht froyntxaft mit ale kaar in te kemaynt hon? Nee; tas weyer unmeechlich. Es is net ferkheert sich tichter pay welche xafe wayl se ti selwiche interese hon. Yeesus hot al ti aphostele wii “froynte” keruuft, awer eyer hot een ekstra liip fer Yoohan kehat. (João 13:23; 15:15; 20:2) Awer, Yeesus hot net Yoohan peser wii ti anere pehantelt. Tsum  payxpiil, wën Yoohan un sayn pruuter Tyako hon een wichtich xtel in Kot sayn Raych ferlangt, Yeesus hot tëne kesaat: “Ich thërfe net ëntxlise weer sich aan mayn rechts orer links sayt setst.” (Mar. 10:35-40) Soo wii Yeesus, sole mer net unser tichte froynte peser wii ti anere pehantele. (Tia. 2:3, 4) Wën net, teete mer net unser teel mache fer ti kemaynt in friit hale. (Judas 17-19)

14. Tëm noo Filipenses 2:3, was tuut uns helfe net fersuuche peser wii ti anere sin?

¹⁴ Wën mer uns naner hërtslich liip tsayche, tuun mer net fersuuche peser wii ti anere in te kemaynt sin. Eriner tich tas Yoonatan hot net ayfersuucht fon Tawi kehat, un hot net fersuucht kheenich uf Tawi sayn plats sin. Meyer khene al Yoonatan sayn payxpiil noo mache. Tuu net tayn priiter un xwestere wii faynte weeche sayn apiliteete aan siin, awer ‘mit teemuut, tenk aan te anere wii kreeser wii tich’. (Lees Filipenses 2:3.) * Eriner tich tas yeete eene fon uns khan etwas mache fer ti kemaynt helfe. Wën mer uns teemuutich hale, kriin mer ti xeene kwaliteete fon unser priiter un xwestere siin un fon tëne sayn troye payxpiil lërne. (1 Cor. 12:21-25)

15. Was lërnst tuu fon te speryens fon Tanya un sayn familye?

¹⁵ Wën mer unkerechentne kefoere mit mache, Yeehoowa treest uns torich ti hërtslich liip un praktix hilef woo mer fon unser priiter un xwestere kriin. Kuk mool was pasiirt is mit een familye in te Fereenichte Xtaate fon Amërika, noo tëm samstaachs prokram in eene fon te Internatsyonaale Konkrëse “Ti liip hot khee  ën!” fon 2019. Tanya, een muter mit tray khiner, saat: “Meyer waare tsurik tsu tëm hotel am faare wën een aner khare is keeche uns wiiter khom. Nimant hot sich wee kemacht, awer mer sin ausm khare kang un sin mer in te xtroos xteen keplip. Meyer hon uns ferxrok. Yemant aan te aner sayt fon te xtroos waar uns am winge un ruufe fer pis sayn khare keen fer in sicherheet plaype. Es waar eene fon unser priiter woo is kraat ausm konkrës kang. Un tee waar net te eensiche woo xtiil kehal hot. Finef Yeehoowa sayn Tsayer fon Xweete, woo in tëm konkrës waare, hon aach xtiil kehal. Ti xwestere hon mich un mayn meetche xtark um kekrif, etwas woo mer prauchte wërklich kriin. Ich hon tëne kesaat tas ales teet kuut ap laafe, awer tii hon uns net aleen kelos. Tii sin mit uns keplip soo kaar noo tas ti paramédicos khom sin. Un tii wolte sich sicher sin tas mer ales woo mer prauchte hëte. Torich tiise xweyer tsayt, hon mer Yeehoowa sayn liip kexpiirt. Tiise speryens hot unser liip fer ti priiter un xwestere ferxtërkt, un unser liip un petanklichkheet tsu Yeehoowa ferkreest.” Erinerst tuu tich fon een situatsyoon woos tuu prauchst hilef kriin un een pruuter orer xwester hot tich hërtslich liip ketsaycht?

16. Weeche was sole mer hërtslich liip eene fer ti anere tsayche?

¹⁶ Tenk iwer ti kuute tinge woo pasiire tuun wën mer hërtslich liip eene fer ti anere tsayche. Meyer treeste unser priiter un xwestere wën se propleeme mit mache un ferxtërke mer ti eenichkheet tswixich Kot sayn folek. Meyer pewayse tas mer Yeesus sayn tisipele sin un tas tsiit eerliche layt aan fer Yeehoowa tiine. Un tas haupste: meyer eere Yeehoowa, “te parmhërtsliche Fater un te Kot fom kanse troost”. (2 Cor. 1:3) Wole mer al wayter hërtslich liip ëntwikele un tsayche!