IN TËM Piiplixe Lënter Museum, in Yeruusalem, kepts eene xteen mit een inxrift woo is tswixich ti yoore 700-600 F.K. kemacht kep. Te xteen is in een kraap heel kefun kep, net tsu wayt fon Hepron, in Israël. Ti inxrift saat: “Ferfluucht wërt Hagaf soon fon Hagav fon Yahweh Sabaot.” Wii tuut tiise inxrift ti Piipel uner xtitse? Es tsaycht tas, in te piiplixe tsayte, Kot sayn naame, Yeehoowa — woo is YHWH kexrip in te friirixe hepreeyxe puuchxtaawe —, waar pekhant un in tëm taach tsu taach penutst. In tiise heele, waare anere inxrifte kefun, woo ti layt — woo teete sich in tiise heele aan trefe orer ferxtekele — kemacht hon. Tii hon eftas Kot sayn naame in te wënte kexrip, un aach ti naame fon layt woo hate Kot sayn naame in te mite.

Ti Dr. Rachel Nabulsi fon te Uniwersiteet fon Georgia saat iwer tiise inxrifte: “Te naame YHWH noo un noo penutse is etwas wichtiches. (...) Ti tekste un inxrifte tsayche wii wichtich YHWH in tëm leepe fon Israël un Yuuta waar.” Tas xtitst ti Piipel uner, woo Kot sayn naame — woo is YHWH kexrip in te hepreeyxe puuchxtaawe — tuut tausente mools foer khome. Eftas, waar Kot sayn naame tepay aan te layt sayn naame kewees.

Ti wërter “Yahweh Sabaot”, woo waare in tëm xteen in kexrip, petayte “Yeehoowa fon te militeer”. Tan, es siit aus tas ti layt in te piiplixe tsayte hon eftas Kot sayn naame un aach te thitel “Yeehoowa fon te militeer” penutst. Tas xtitst aach ti Piipel uner wën se ti wërter “Yeehoowa fon te militeer” penutst, woo tuut mee wii 250 mools foer khome in te Hepreeyxe Xrifte, hauptseechlich in te piicher fon Isaías, Jeremias un Zacarias.