XTUUTYUM ARTIKEL 1
“Es feelt niks kuutes fer tii woo Yeehoowa suuche”
UNSER YOERS TEKST FER 2022: “Es feelt niks kuutes fer tii woo Yeehoowa suuche.” (PSALM 34:10)
LIIT 4 “Yeehoowa is mayn Xeefer”
WAS TUUN MER SIIN? *
Tawi hot kexpiirt tas soo kaar in xweyere tsayte, ‘niks kuutes tëm kefeelt hot’ (Kuk ti apsetse 1-3.) *
1. Was fer xweyer situatsyoon hot Tawi mit kemacht?
TAWI waar am aus rayse fer sayn leepe rete. Saul, te mechtiche kheenich fon Israël, waar pextimt fer tëm um pringe. Tawi is aan te xtat fon Noop xtil kehal. Tat hot eyer fer te priister Aimelek 5 proot ferlangt, fer sich un fer sayn mëner. (1 Sam. 21:1, 3) Xpeeter, hon Tawi un sayn mëner sich in een heel ferxtekelt. (1 Sam. 22:1) Warom waar Tawi in tiise situatsyoon?
2. Was fer xlechte tinge hot Saul kemacht? (1te Samuël 23:16, 17)
2 Saul hat fiil nayt fon Tawi, wayl eyer een kuute kriicher waar un ti layt tëm kërn kehat hon. Saul wust aach tas wayl eyer net Yeehoowa aan keheert hot, hot Yeehoowa tëm wii kheenich ap kextos un hot Tawi raus kesuucht wii te neekste kheenich. (Lees 1te Samuël 23:16, 17.) * Awer Saul waar noch te kheenich fon Israël, un tee hat noch een kroos militeer un fiile layt woo tëm uner xtitst hon. Tes weeche, must Tawi aus rayse fer sayn leepe rete. Meecht Saul wërklich ketenkt hon tas eyer khent Yeehoowa um hale Tawi wii kheenich in xtele? (Isa. 55:11) Ti Piipel tuut net tiise frooch antworte, awer meyer khene uns sicher fon een tings sin: Saul waar sayn aychne kraap am mache. Tii woo keeche Yeehoowa khëmpfe tuun imer ferliire!
3. Opwool sayn situatsyoon, wii hot Tawi sich kexpiirt?
3 Tawi waar een teemuutiche man. Tee hot net raus kesuucht kheenich fon Israël sin — Yeehoowa hat tëm raus kesuucht. (1 Sam. 16:1, 12, 13) Saul hot Tawi wii sayn kreeste faynt kesiin. Awer Tawi hot net ti xult fer Yeehoowa kep wayl eyer in tiise kefeerlich situatsyoon waar. Tawi hot sich aach net pexweert wayl eyer weenich ese hat un wayl eyer must sich in een heel ferxtekele. Nee, kans anerste! Fiilaycht, waar es in tiise momënt, woo eyer sich in tiise heel am ferxtekele waar, woo eyer ti xeene wërter kexrip hot woo im yoers tekst xteen: “Es feelt niks kuutes fer tii woo Yeehoowa suuche.” (Psal. 34:10)
4. Was fer frooche tuun mer yets noo kuke, un warom sin se wichtich?
4 Hayt, fiile fon Yeehoowa sayn tiiner hon net kenuuch fer se ese orer anere tinge woo se prayche. * Tas pasiirt hauptseechlich yets torich ti pantemii fon coronavirus. Un woo tichter mer fon te “kroos tripulatsyoon” sin, woo xweyere wëre ti tinge sin. (Mat. 24:21) Mit tas im khop, wole mer ti antwort fer tiise 4 frooche fine: In was fer aat hot “niks kuutes” fer Tawi kefeelt? Warom mise mer lërne tsufriite sin mit was mer hon? Warom khene mer uns sicher sin tas Yeehoowa uns uf phase tuut? Un wii khene mer uns yets foer perayte fer was noch khomt?
“NIKS WËRT MICH FEELE”
5-6. Wii tuut te Psalm 23:1-6 uns helfe te yoers tekst ferxteen?
5 Tawi hot kesaat tas ‘niks kuutes feele teet’ fer tii woo Yeehoowa suuche. Was wolt tee saan? Wii Tawi te Psalm 23 kexrip hot, hot eyer eenliche wërter penutst. Tan, tiise psalm khan uns helfe ferxteen was eyer saan wolt. (Lees Psalm 23:1-6.) * Tawi fangt aan mit te wërter: “Yeehoowa is mayn Xeefer. Niks wërt mich feele.” Un in tëm rest fon tiise psalm, tuut Tawi xpreche iwer ti tinge woo wërklich wichtich sin — soo wii ti kuute tinge woo Yeehoowa tëm kep hat wayl eyer Yeehoowa wii sayn Xeefer aan kenom hat. Yeehoowa hot Tawi kefiirt “in te weeche fon kerechtichkheet”, un tee waar imer pay Tawi — in te kuute un xlechte tsayte. Fer Tawi, Yeehoowa tiine waar wii sich ufm ‘kriines kraas leye’; awer tee wust tas noch soo, teet eyer propleeme un faynte in sayn leepe hon. Als mool, hot eyer sich oone muut kexpiirt, wii wën eyer “torich tas taal fon tiif tunkelheet” keengt. Awer wayl Yeehoowa tëm sayn Xeefer waar, hot Tawi “khee pang” kexpiirt.
6 Tan, tas is ti antwort fer unser eyerste frooch: In was fer aat hot “niks kuutes” fer Tawi kefeelt? Tee hat ales was eyer praycht fer ticht pay Yeehoowa plaype. Tawi praycht net fiile materyaalixe tinge hon fer froo sin. Tee waar tsufriite mit was Yeehoowa tëm kep hat. Tas haupste fer tëm waar Yeehoowa sayn seechen un xitsung.
7. Tëm noo Lukas 21:20-24, was fer xweyer situatsyoon hon ti kriste woo in Yutea keleept hon mit kemacht?
7 Tawi sayn wërter lërne uns wii wichtich es is ti materyaalixe tinge in te richtich aat siin. Es is net ferkheert materyaalixe tinge hon, awer tii thërfe net tas haupste in unser leepe sin. Tas waar een wichtich lisyoon woo etliche kriste woo in Yutea keleept hon ferxtan hon. (Lees Lukas 21:20-24.) * Yeesus hat xon foer raus kesaat tas ‘een militeer teet um Yeruusalem rom akampiire’. Wën tas pasiire teet, miste se “fer ti përiche aus rayse”. Tas mache, teet tëne sayn leepe rete, awer tii miste fiile tinge uf kepe. Phaar yoore tsurik, hot Te Wachthorm tas soo aus keleet: “Tii hon sayn hayser un khemp hiner kelos; noch net mool ti tinge fon sayn haus, hon se raus kehool. Tii waare sich sicher tas Yeehoowa teet tëne xitse un helfe. Tes weeche, hon se Yeehoowa sayn aanpeetung im eyerste plats ketuun, foer yeete aner tings woo fer tëne wichtich khent sin.”
8. Was fer ërnst lisyoon khene mer lërne mit was pasiirt is mit te kriste woo in Yutea keleept hon?
8 Was fer ërnst lisyoon khene mer lërne mit was pasiirt is mit te kriste woo in Yutea keleept hon? Te Wachthorm woo mer im letste apsats kexproch hon, saat noch: “In te futuer, fiilaycht tuun mer proope mit mache woo uns tsayche tuun wii wichtich ti materyaalixe tinge fer uns sin — sin se tas haupste fer uns? Orer is es wichticher fer uns troy tsu Yeehoowa plaype un soo keret wëre? Yawool, wën tas ën khome tuut, im xtant mise mer fon etliche tinge uf kepe un xwiirichkheete mit mache. Meyer mise fërtich sin fer se mache ales was neetich is, soo wii ti kriste woo fon Yutea aus keris sin.” *
9. Wii tuut Phaul sayn aanreet fer ti hepreeyer tich uf muute?
9 Khanst tuu tich foer xtele wii xweyer tas waar fer tiise kriste neekst ales hiner lose un een naye leepe in een aner plats aan fange? Tii miste klaape tas Yeehoowa tëne helfe teet ti neetiche tinge imer hon. Es kept noch een aner tings woo ti kriste keholef hot. Finef yoore foer ti romaaner um Yeruusalem rom akampiire, hot Phaul tiise aanreet fer ti hepreeyer kep: “Ayre leepe mus fray fon te liip tsum kelt sin; sayt tsufriite mit was teyer hot. Wayl eyer hot kesaat: ‘Ich tuun tich nii lose un ich tuun tich nii im xtich lose.’ Tas mer khene fol koraaj sin un saan: ‘Yeehoowa is mayn helfer; ich tuun khee pang hon. Was khan te mënx mich mache?’” (Hep. 13:5, 6) Kewis, es waar fiil laychter fer tii woo tiise aanreet aan kewënt hon, tsufriite sin mit een keweenlich leepe aus Yutea. Tii khente sich sicher sin tas Yeehoowa teet tëne sayn neetichkheete uf phase. Phaul sayn wërter helfe uns ti selwich sicherheet hon: Yeehoowa tuut uns imer fersoriche was mer prayche.
“MEYER SIN MIT TAS TSUFRIITE”
10. Was fer lisyoon hot Phaul mit uns keteelt?
10 Phaul hot een eenlich aanreet fer Timoteus kep un tiise aanreet kilt fer uns aach. Tee hot kexrip: “Soo, wën meyer tsum ese un tsum aan tsiie hon, sin mer mit tas tsufriite.” (1 Tim. 6:8) Wil tas saan tas es ferkheert is etwas kuutes ese, een xeen plats hon fer se leepe orer als mool een nay tsaych khaafe? Nee; is net tas was Phaul wolt saan. Phaul wolt saan tas mer mise tsufriite sin mit was mer hon — ekaal ep tas fiil orer weenich is. (Fili. 4:12) Tas waar ti lisyoon woo Phaul kelërnt hot. Tas wichtichste woo mer hon is unser froyntxaft mit Yeehoowa, net ti materyaalixe tinge. (Hap. 3:17, 18)
Fer ti israeliiter, hot ‘niks kuutes kefeelt’ torich ti 40 yoore im tesërt. Un meyer: meechte mer tsufriite sin mit was mer hon? (Kuk te apsats 11.) *
11. Was fer lisyoon iwer tsufriite sin lërne mer mit Mooses sayn wërter fer ti israeliiter?
11 Khan sin tas mer tenke tas etwas neetich is; awer meecht Yeehoowa aach soo tenke? Mërk mool was Mooses kesaat hot fer ti israeliiter, noo se 40 yoore im tesërt keplip sin: “Wayl Yeehoowa, ayre Kot, hot aych keseechent in ales was teyer kemacht hot. Tee khënt kans kenau ayre rees torich tiise kroose tesërt. Yeehoowa, ayre Kot, waar mit aych torich tiise 40 yoore, un niks hot aych kefeelt.” (Teut. 2:7) Torich tiise 40 yoore, hot Yeehoowa fer ti israeliiter manaa kep fer se ese. Un wayl tëne sayn tsaych sich net aus kenutst hot, hate se noch tas selwiche tsaych woo se fom Ejipt raus kang sin. (Teut. 8:3, 4) Fiilaycht hon etliche ketenkt tas tiise tinge net kenuuch waare. Awer Mooses hot ti israeliiter erinert tas se hate ales was se praychte. Yeehoowa wërt froo mit uns sin wën mer lërne tsufriite sin. Tee wil hon tas mer petanklich sin soo kaar fer ti keweenliche tinge woo eyer uns kept, un tas mer tëne wii een kexenk siin.
SAY TICH SICHER TAS YEEHOOWA TICH UF PHASE TUUT
12. Was tsaycht uns tas Tawi aan Yeehoowa ketraut hot un net aan sich selepst?
12 Tawi wust tas Yeehoowa leaal is un tas Eyer sich wërklich khimert mit tëne woo Tëm liipe. Tawi sayn leepe waar ins kefoer wii eyer te Psalm 34 kexrip hot; awer tëm sayn klaape aan Yeehoowa waar soo xtark, tas es waar wii wën eyer siin khent “Yeehoowa sayn engel” um tëm rom akampiirt. (Psal. 34:7) Fiilaycht waar Tawi Yeehoowa sayn engel am ferklayche mit een soltaat woo imer am uf phase is ep een faynt am khome is. Tawi waar een koraajiche soltaat un tee waar kwap fer ti xwaart penutse un xteen mit een xlayter xmayse. Yeehoowa hot tëm aach ferxproch tas eyer teet te kheenich sin. Soo wii soo, hot Tawi net uf sayn aychne apiliteete ketraut fer ti faynte ap kewine; tee hot uf Yeehoowa ketraut, un tee waar sich sicher tas Yeehoowa sayn engel ‘ret tii woo Kot tiif respektiire’. (1 Sam. 16:13; 24:12) Kewis, hayt waarte mer net tas Yeehoowa een wuner macht fer uns xitse. Awer meyer wise tas al woo uf Yeehoowa traue, tuun eewiche leepe kriin, soo kaar wën se yets xtërpe.
Khan sin tas, torich ti kroos tripulatsyoon, Kook fon Makook fersuucht uns in unser hayser iwerfale. Awer, meyer khene uns sicher sin tas Yeesus un sayn engele tuun mit acht kuke was am pasiire is un tuun uns xitse (Kuk te apsats 13.)
13. Wën Kook fon Makook atakiirt, warom khan es aus siin tas mer khene uns net xitse, awer warom prayche mer khee pang hon? (Kuk tas pilt am aanfang fom piichelche.)
13 Meechte mer klaape hon tas Yeehoowa uns xitse tuut? Klaych wërt tas im proop kextelt. Wën Kook fon Makook — es wil saan, een krup fon natsyoone — Kot sayn folek atakiirt, fiilaycht khene mer tenke tas tii tuun uns fernichte. Meyer mise uns sicher sin tas Yeehoowa khan un tuut uns rete. Fer ti natsyoone, tuun mer aus siin wii xeef woo khene sich net xitse un woo aleen sin. (Ese. 38:10-12) Meyer tuun khee wafe hon, un mer sin net keiipt fer se khëmpfe. Ti natsyoone tuun tenke tas se khene uns laycht ap kewine. Tii wise net tas Yeehoowa sayn engele fërtich sin fer uns xitse. Awer meyer, weeche unser klaape, sin uns too tefun sicher. Khanst tuu tich foer xtele wii fiil ti natsyoone sich ferxreke tuun wën se siin ti himlixe militeer khëmpfe fer uns xitse? (Apo. 19:11, 14, 15)
TUU TICH YETS FOER PERAYTE FER WAS NOCH KHOMT
14. Was khene mer yets mache fer uns foer perayte fer was noch khome tuut?
14 Was khene mer yets mache fer uns foer perayte fer was noch khome tuut? Eyerst: meyer thërfe net tenke tas ti materyaalixe tinge tas haupste sin, wayl eene taach mise mer tëne hiner lose. Meyer mise aach tsufriite sin mit was mer hon un ti kreest frayt fine in unser froyntxaft mit Yeehoowa. Woo peser mer Kot khëne, woo sichere mer wëre tas Kot uns xitse khan wën Kook fon Makook atakiirt.
15. Was is mit Tawi pasiirt wii eyer yung waar woo tëm sicher kelos hot tas Yeehoowa teet tëm imer helfe?
15 Kuk mool was noch Tawi keholef hot; tas khan uns aach helfe uns foer perayte fer ti proope. Tawi hot kesaat: “Xmekt un siit tas Yeehoowa kuut is; froo is te mënx woo xuts aan tëm fint.” (Psal. 34:8) Tiise wërter tsayche uns warom khont Tawi uf Yeehoowa traue fer unerxtitsung kriin. Tee hot imer uf Yeehoowa ketraut un Yeehoowa hot tëm nii net im xtich kelos. Wii Tawi yung waar, hot eyer keeche te mechtich kroos filisteer Kolias kekhëmpft. Tee hot fer tiise xtarke faynt kesaat: “Hayt tuut Yeehoowa tich in mayn hënt ap kepe!” (1 Sam. ) Xpeeter, wii Tawi te kheenich Saul ketiint hot, hot Saul phaar mools fersuucht Tawi um pringe. Awer ‘Yeehoowa waar mit Tawi kewees’. ( 17:461 Sam. 18:12) Tawi hot ofts Yeehoowa sayn hilef friier kexpiirt. Tas hot tëm sicher kelos tas Yeehoowa teet tëm aach helfe mit sayn propleeme in tiise momënt um keen.
16. In was fer aate khene mer Yeehoowa sayn kuutheet xpiire?
16 Woo mee mer uf Yeehoowa yets traue, woo kreeser wërt unser sicherheet tas eyer khan uns in te futuer rete. Tsum payxpiil: meyer mise klaape aan Yeehoowa hon un uf tëm traue fer mit unser xëf xpreche wën mer mise een taach feele fer unser konkrës kuke. Meyer mise aach klaape hon fer mit unser xëf xpreche fer unser xtune ënere, tas mer khene al ti fersamlunge kuke orer mee in te preetich aarwayt xafe. Awer iwerlee tich tas te xëf tas net aan nëme tuut un tes weeche ferliire mer unser aarwayt. Meechte mer aan Yeehoowa klaape tas eyer uns nii im xtich lose tuut un tas eyer uns fersoriche tuut ales was mer prayche? (Hep. 13:5) Fiile woo in te fol tsayt tiinst xafe, khene tich speryense fertseele woo tsayche wii Yeehoowa tëne keholef hot in te momënte woo se muste tas hon. Yeehoowa is troy: tee tuut tich nii im xtich lose!
17. Was is te yoers tekst fer 2022, un warom is tee raus kesuucht kep?
17 Mit Yeehoowa uf unser sayt, prayche mer khee pang hon iwer was noch khomt. Wën mer Yeehoowa sayn wile im eyerste plats in unser leepe tuun, khene mer uns sicher sin tas eyer uns imer helfe tuut. Fer uns helfe ti sicherheet hon tas Yeehoowa uns nii im xtich lost, un fer uns erinere wii wichtich es is uns yets foer perayte fer ti xwiirichkheete woo noch khome, hot ti Rechiirente Khërperxaft Psalm 34:10 raus kesuucht wii unser yoers tekst fer 2022: “Es feelt niks kuutes fer tii woo Yeehoowa suuche.”
LIIT 38 Yeehoowa Halt tich Xtark
^ Ti wërter fon unser yoers tekst xteen in Psalm 34:10: “Es feelt niks kuutes fer tii woo Yeehoowa suuche.” Fiile fon Yeehoowa sayn Tsayer hayt tsu taach hon weenich kelt un weenich tinge. Tan, warom khene mer saan tas “es feelt niks kuutes” fer tëne? Un, wii tiise tekst ferxteen khan uns helfe uns foer perayte fer ti xweyere tsayte woo noch khome tuun?
^ (1te Samuël 23:16, 17) Too is Yoonatan, Saul sayn soon, Tawi in Horësa trefe kang. Tee hot tëm keholef noch mee aan Yeehoowa traue. 17 Tee hot tëm kesaat: “Tuu khee pang hon, wayl mayn fater Saul tuut tich net fine. Tuu wërst kheenich fon Israël sin, un ich wëre te tsweete man. Mayn fater Saul wees tas aach.”
^ Kuk te artikel “Perguntas dos Leitores” in A Sentinela 15te Septemper fon 2014.
^ (Psalm 23:1-6) Yeehoowa is mayn Xeefer. Niks wërt mich feele. 2 Uf kriines kraas macht eyer mich hin leye; un eyer fiirt mich tsu pletse mit fiil waser fer se ruue. 3 Eyer xenkt mich nay kraft. Eyer fiirt mich in te weeche fon kerechtichkheet weeche sayne naame. 4 Opwool ich torich tas taal fon tiif tunkelheet keen, kriin ich khee pang, wayls tuu pay meer pist; tayn xtang un tayn xtok kepe meer ti sicherheet. 5 Tuu tuust een tix fer mich in richte foer mayn faynte. Tuu khiilst mayne khop mit eel; mayne khelich is kans fol. 6 Sicher, wërt ti kuutheet un leaal liip pay mich sin mayn leepe lang, un ale mayn taache, wëre ich in Yeehoowa sayn haus woone.
^ (Lukas 21:20-24) “Awer, wën teyer siit tas militeer um Yeruusalem rom akampiirt, wist tas sayn fernichtung ticht is. 21 Tan, tii woo in Yutea sin, sole fer ti përiche aus rayse; tii woo in te xtat sin, sole raus keen; un tii woo in te khemp sin, sole net in te xtat rin keen. 22 Wayl tas is ti tsayt fer kerechtichkheet pringe, fer se erfiile ales was kexrip is. 23 Xaat fer ti fraae woo xwanger sin un tii woo milich fer sayn neneche kepe! Wayl es khomt een kroos unruychkheet iwer tiise lant, un wuut keeche tiise folek. 24 Un tii tuun torich tas xwaart fale un wëre tsu ale natsyoone kefang kenom. Un Yeruusalem wërt fon te natsyoone fertreet, pis ti pextimte tsayte fon te natsyoone rom keen.
^ PILT AUSLEYUNG: Tawi must sich in een heel ferxtekele fer fon tëm kheenich Saul aus rayse. Noch soo, waar eyer petanklich fer ales was Yeehoowa tëm kep hot.
^ PILT AUSLEYUNG: Noo te israeliiter ausm Ejipt kang sin, hot Yeehoowa tëne manaa fersoricht un tee hot aach kemacht tas tëne sayn tsaych sich net aus nutse teet.