1. Wii khene mer tsayt mit Yeehoowa fertraype?

 MEYER tuun kërn tsayt aus kepe mit te layt woo mer liipe. Te man un sayn fraa tuun kërn tsayt mitsamer fertraype. Ti yunge sin kërn mit sayn froynte. Un meyer al kepe fiil weyert fer ti tsayt woo mer mit unser priiter un xwestere sin. Awer tas haupste: meyer liipe tsayt mit unser Kot fertraype. Wii khene mer tas mache? Wën mer peete, tëm sayn Wort leese un triwer noo tenke aan tëm sayn xeene kwaliteete un sayn tsiil fer ti mënxe. Sicher, ti tsayt woo mer mit Yeehoowa fertraype is tepay aan te peste momënte fon unser leepe! (Psal. 139:17)

2. Warom is es net imer laycht tsayt mit Yeehoowa fertraype?

² Es is woer tas mer tuun kërn tsayt mit Yeehoowa aus kepe, awer tas is net imer laycht se mache. Meyer hon fiil tings se tuun, un es khan xweyer fer uns sin tsayt hoole fer Yeehoowa aan peete. Unser aarwayt, unser familye un anere aktiwiteete khene fiil fon unser tsayt hoole. Tes weeche, khene mer tenke tas mer kheen tsayt hon fer peete, xtutiire un triwer noo tenke.

3. Was khent unser tsayt xteele wën mer net uf phase?

³ Es kept noch was aneres woo khan unser tsayt hoole. Wën mer net uf phase, khene mer lose tas tinge woo aan sich net ferkheert sin, ti tsayt xteele woo mer hon fer uns tichter pay Yeehoowa xafe. Tsum payxpiil: es is kuut tsayt hoole fer uns ferkniiche. Awer, soo kaar wën ti ferkniichung woo mer raus  suuche kuut is, wën mer net uf phase un tsu fiil tsayt too traan fertraype, tuun mer net kenuuch tsayt hon fer Yeehoowa aan peete. Tes weeche, mise mer ti ferkniichung ufm richtiche plats tuun. (Xpr. 25:27; 1 Tim. 4:8.)

4. Was tuun mer in tiise artikel lërne?

⁴ In tiise artikel, tuun mer siin warom mer mise ëntxlise was ti wichtichste tinge in unser leepe sin. Meyer tuun aach xpreche iwer wii mer khene unser tsayt mit Yeehoowa peser penutse un was fer nutse mer too temit kriin.

5. Wii triwer noo tenke aan Ëfeser 5:15-17 khan een yunge helfe tas peste leepe raus suuche?

⁵ Suuch raus tas peste leepe. Ti yunge mache sich ofts ketanke mit was se mit sayn leepe mache tuun. Khan sin tas, uf een sayt, ti parente woo net Yeehoowa sayn Tsayer sin un ti leerer muute tëne uf tsu te uniwersiteet keen, een kuut aarwayt fine un fiil kelt kriin. Tas mache teet sicher fiil tsayt fon tëne hoole. Uf te aner sayt, tëne sayn eltere un froynte in te kemaynt muute tëne uf sayn leepe in Yeehoowa sayn aarwayt penutse. Was khan een yunge helfe woo Yeehoowa liipt, te pest ëntxlus mache? Es weyer kuut tas eyer leese teet un triwer noo tenke teet in Ëfeser 5:15-17. * (Lees.) Noo te wersikele leese, khent te yunge sich selepst frooe: ‘Was is “Yeehoowa sayn wile”? Was fer ëntxlus tuut tëm kefale? Was fer ëntxlus tuut mich helfe ti tsayt in te pest aat woos meechlich is penutse?’ Ferkes tich net: “ti taache sin xlecht” un tiise welt, woo fon Satanaas rechiirt is, khomt klaych tsum ën. Tes weeche, weyers kluuch unser leepe penutse in een aat woo Yeehoowa froo lost.

6. Was hot Maria raus kesuucht se mache un warom waar tas een kuut ëntxlus?

⁶ Ëntxlis was ti wichtichste tinge in tayn leepe sin. Als mool, fer unser tsayt in te pest aat penutse, mise mer raus suuche tswixich 2 tinge woo net ferkheert sin. Soo was is pasiirt wii Yeesus Maria un Marta pesuucht hot. Marta waar soo froo tas Yeesus tsu sayn haus khom is, tas se wolt een fayn ese foer perayte. Awer Maria hot sich ticht pay sayn Hër kesetst un keheert was eyer kesaat hot. Was Marta kemacht hot waar net ferkheert; awer Yeesus hot kesaat tas Maria hat tas “peste teel raus kesuucht”. (Luk. 10:38-42) Mit te tsayt, hot Maria sich fiilaycht ferkes fon was se in tiise taach kes hon. Awer meyer khene uns sicher sin tas se nii ferkes hot was se in tiise taach mit Yeesus kelërnt hot. Fer Maria, ti tsayt woo se mit Yeesus fertrip hot, hat fiil weyert. Meyer kepe aach fiil weyert fer ti tsayt woo mer mit Yeehoowa fertraype. Wii khene mer tiise tsayt in te pest aat penutse?

7. Warom is es aarich wichtich peete, xtutiire un triwer noo tenke?

⁷ Ferkes tich net: peete, xtutiire un triwer noo tenke sin teel fon unser aanpeetung. Wën mer peete, fertseele mer mit unser Fater im himel woo uns aarich liipe tuut. (Psal. 5:7) Wën mer ti Piipel xtutiire, fine mer ‘ti khëntnis fon Kot’, woo ti kluuchste persoon fom Uniwërsum is. (Xpr. 2:1-5) Wën mer triwer noo tenke aan was mer fon Yeehoowa lërne, tenke mer aan tëm sayn xeene kwaliteete un aach  aan te wunerliche tinge woo eyer kepleent hot fer uns un fer ti kans mënxheet. Kewis, tas is ti pest aat fer unser tsayt penutse, kël? Awer, was khan uns helfe tas mache?

8. Was fer lisyoon khene mer fon Yeesus lërne mit te aat wii eyer sayn tsayt im tesërt penutst hot?

⁸ Wëns meechlich is, suuch een ruych plats raus. Kuk mool Yeesus sayn payxpiil. Eep eyer sayn preetich aarwayt aan kefang hot, hot eyer 40 taache im tesërt fertrip. (Luk. 4:1, 2) In tiise ruych plats, khont Yeesus peete un aach triwer noo tenke aan Yeehoowa sayn wile fer tëm. Tas mache hot sicher Yeesus foer perayt fer ti proope woo klaych khome teete. Was khanst tuu mit Yeesus sayn payxpiil lërne? Wëns tuu een kroos familye host, fiilaycht is es net imer laycht een ruych plats tehëm fine. Tes weeche, im xtant weyer es peser een ruych plats aus tayn haus fine. Tas is was Julie macht wën se wil tsu Yeehoowa peete. Tii un sayn man leepe in een kleene apartament in Frankraych. Tan, is es fer tii xweyer een ruych plats fine woo niks tëne xteert. Julie saat: “Tes weeche, keen ich yeete taach im park laafe. Tat khan ich aleen sin, mich konsentriire un wërklich mit Yeehoowa fertseele.”

9. Opwool Yeesus fiil se tuun hat, wii hot eyer ketsaycht tas sayn froyntxaft mit Yeehoowa aarich wichtich waar?

⁹ Yeesus hat imer fiil se tuun. In te tsayt woo tee kepreeticht hot, fiile layt sin tëm noo kang un wolte imer mit tëm sin. Een mool, hot “ti kans xtat” sich “foer te teer fersamelt” fer tëm siin. Noch soo, hot Yeesus tsayt kehool fer tsu Yeehoowa peete. “Moynts frii, wiis noch tunkel waar”, is eyer tsu een ruych “plats kang woo eyer khent aleen” mit sayn Fater sin. (Mar. 1:32-35)

10-11. Tëm noo Matheus 26:40, 41, was hot Yeesus kesaat fer ti tisipele mache, awer was is tan pasiirt?

¹⁰ In te letst nacht fon Yeesus uf te eyert — wii sayn preetich aarwayt xon fërtich waar —, hot eyer aach een ruych plats kesuucht fer triwer noo tenke un tsu Yeehoowa peete. Tee is pis te Xetsëmani kaate kang. (Mat. 26:36) Tat hot Yeesus etwas wichtiches fer sayn tisipele kesaat iwer tas kepeet.

¹¹ Kuk mool was pasiirt is. Wii Yeesus un sayn tisipele tsum Xetsëmani kaate hin khom sin, es waar xon xpeet, im xtant torich halp nacht. Yeesus hot fer sayn tisipele ferlangt tas tii solte ‘wach plaype’; un tan, is eyer tsu een aner plats kang fer se peete. (Mat. 26:37-39) Awer ti tsayt woo Yeesus am peete waar, sin ti tisipele in kexloof. Wii Yeesus tsurik khom is, hot eyer se am xloofe kefun. Too, hot eyer noch mool kesaat: “Tuut aych wach hale un tuut wayter peete.” (Lees Matheus 26:40, 41.) * Yeesus wust tas tii aarich miit un ëngstlich waare; tee hot mitlayt ketsaycht un  hot erkhënt: “Tas flayx is xwach.” Awer was is tan pasiirt? Noch 2 mool is Yeesus fat kang fer se peete, un imer wën eyer tsurik khom is, hot eyer sayn tisipele am xloofe kefun, xtats am peete. (Mat. 26:42-45)

12. Was khene mer mache wën mer uns tsu miit orer stresiirt xpiire fer se peete?

¹² Tuu ti richtich tsayt raus suuche. Als mool, khene mer uns tsu miit orer stresiirt xpiire fer se peete. Wën tas xon mit tich pasiirt is, tuu pist net te eensiche. Tan, was khanst tuu too triwer mache? Etliche woo keweent waare se peete foer se xloofe keen, hon kemërkt tas es tëne peser is een pisye friier peete, wën se net tsu miit sin. Anere hon kemërkt tas se khene sich peser konsentriire wën se in een spetsifix positsyoon peete, tsum payxpiil, wën se sich kniie orer setse. Awer was khanst tuu mache wëns tuu tich tsu ëngstlich orer oone muut xpiirst fer se peete? Saa fer Yeehoowa wiis tuu tich xpiirst. Tuu khanst tich sicher sin tas unser parmhërtsliche Fater tuut tas ferxteen. (Psal. 139:4)

13. Wii khene ti eletroonixe aparate unser acht ap lënke in te tsayt woo mer mit Yeehoowa fertraype?

¹³ Wëns tuu xtutiirst, los niks tayn acht ap lënke. Tas kepeet is net ti eensich aat wii mer khene unser froyntxaft mit Yeehoowa ferxtërke. Ti Piipel xtutiire un in te fersamlunge keen tuun aach uns helfe tichter pay Yeehoowa khome. Was khanst tuu mache fer ti tsayt kuut penutse woos tuu kehool host fer tiise aktiwiteete? Froo tich: ‘Was tuut mayn acht ap lënke wën ich in te fersamlunge sin orer wën ich fersuuche xtutiire?’ Etwas woo uns xteere khan, is wën yemant uns telefoniirt orer wën mer een e-mail orer een mensagem kriin torich te selulaar un anere eletroonixe aparate. Tiise aparate sin aarich nutslich un pilyoone layt tuun se penutse. Awer, etliche unersuucher saan tas ploos een selulaar ticht pay uns hon, khan xon unser acht ap lënke. Een leerer fon psikoloxii saat: “Wën te selulaar ticht is, fiilaycht froost tuu tich: ‘Was sin ti anere am mache?’ Tan konsentriirst tuu tich net aan was tuu am mache pist. Tayn ketanke sin wayt  wech.” Eep unser konkrëse aan fange, heere mer een pekhantmachung, tas mer sole unser eletroonixe aparate in een aat lose tas se net ti anere xteere. Meechte mer khene tas selwiche mache wën mer aleen sin un tsayt mit Yeehoowa fertraype? Khene mer unser aparate in een aat xtele tas se net unser acht ap lënke?

14. Tëm noo Filiper 4:6, 7, wii tuut Yeehoowa uns helfe uns konsentriire?

¹⁴ Ferlang Yeehoowa sayn hilef fer tich konsentriire. Als mool, wën mer am xtutiire sin orer in te fersamlunge sin, khene mer aan fange aan was aneres se tenke. Wën tas mit uns pasiirt, mise mer Yeehoowa sayn hilef ferlange. Es is woer tas es khan xweyer fer uns sin uns konsentriire in Kot sayn Wort wën mer ëngstlich orer uns ketanke am mache sin mit etwas. Awer tas mache is seer wichtich. Tan peet un ferlang Kot sayn friit woo tuut net ploos tayn hërts xitse, awer aach tayn “ketanke”. (Lees Filiper 4:6, 7.) *

15. Was fer nutse kriin mer wën mer tsayt mit Yeehoowa fertraype?

¹⁵ Wëns tuu tsayt hoolst fer mit Yeehoowa fertseele, tëm horiche un iwer tëm triwer noo tenke, tuust tuu fiil nutse kriin. Wii soo? Eyerst: tuu tuust peser ëntxlise mache. Ti Piipel lost uns sicher tas “weer mit kluuche layt um keet, wërt kluuch”. (Xpr. 13:20) Tan, wëns tuu tsayt aus kepst mit te kluuchste persoon fom Uniwërsum, Yeehoowa, wërst tuu kluucher. Tuu tuust peser ferxteen wii tëm kefale un wii tich wech hale fon ëntxlise woo khente tëm traurich lose.

16. Wii khan tsayt mit Yeehoowa fertraype uns helfe peser leerer wëre?

¹⁶ Tsweet: tuu tuust een peser leerer sin. Wën mer ti Piipel mit yemant xtutiire, eene fon unser haupste opjetiiwe is unser xtutënt helfe sich tichter pay Yeehoowa xafe. Woo mer mee tsu Yeehoowa peete un tëm khëne, woo xtërker wërt unser liip tsu tëm. Un tan, wërt es laychter fer uns unser xtutënte in lërne Yeehoowa liipe. Tas is mit Yeesus pasiirt. Tee hot soo liiplich iwer Yeehoowa kexproch, tas sayn tisipele uf kemuut kep sin fer Yeehoowa aach liipe. (Yoo. 17:25, 26)

17. Warom tas perseenlich xtuutyum un tas kepeet helfe unser klaape ferxtërke?

¹⁷ Trit: tayn klaape wërt xtërker. Kuk mool was pasiirt wëns tuu troost, oryentiirung un hilef fer Kot ferlangst. Yeetes mool woo  Yeehoowa tayn kepeete antwort, wërt tayn klaape aan tëm xtërker. (1 Yo. 5:15) Was noch khan tich helfe tayn klaape ferxtërke? Tas perseenlich xtuutyum. Tas is soo wii ti Piipel saat: “Te klaape keet noo was ma heert.” (Rom. 10:17) Awer, fer een xtarke klaape hon, is es net kenuuch ploos lërne. Was noch mise mer mache?

18. Wii tsaycht te Psalm 77 tas es wichtich is triwer noo tenke?

¹⁸ Meyer mise triwer noo tenke aan was mer lërne. Kuk mool was pasiirt is mit tëm xrayper fon tëm Psalm 77. Tee is unruych kep wayl tee hot ketenkt tas Yeehoowa hat tee un ti anere israeliiter im xtich kelos. Tee hot sich soo fiil ketanke too triwer kemacht, tas eyer khont net xloofe. (Wersikele 2-8) Was hot eyer tan kemacht? Tee hot fer Yeehoowa kesaat: “Ich tuun triwer noo tenke aan ales was tuu machst un aan tayn aktsyoone.” (Wersikel 12) Sicher, te psalmist wust iwer ales was Yeehoowa fer sayn folek in te friirixe tsayte kemacht hat. Noch soo, is eyer ëngstlich kep un hot sich kefroot: “Meecht Kot sich ferkes hon uns sayn kefale xenke? Orer hot eyer noo kelos parmhërtslichkheet tsayche weeche sayn wuut?” (Wersikel 9) Tan, hot te psalmist triwer noo ketenkt aan Yeehoowa sayn aktsyoone, un aach tas Yeehoowa hat parmhërtslichkheet un mitlayt in te friirixe tsayte ketsaycht. (Wersikel 11) Was fer waar te resultaat? Te psalmist is sich sicher kep: Yeehoowa teet sayn folek nii im xtich lose. (Wersikel 15) In te selwich aat, wëns tuu triwer noo tenkst aan was Yeehoowa xon fer sayn folek un fer tich kemacht hot, wërt tayn klaape xtërker.

19. In was fer aner aat khene mer nutse kriin fon tsayt mit Yeehoowa fertraype?

¹⁹ Fiert, un tas haupste: tayn liip tsu Yeehoowa wërt xtërker. Peser wii anere kwaliteete, tuut ti liip tich uf muute Yeehoowa aan heere, fon tinge uf kepe fer tëm kefale un fer kwalkee proop aus hale. (Mat. 22:37-39; 1 Kor. 13:4, 7; 1 Yo. 5:3) Niks hot kreeser weyert wii een liiplich un ticht froyntxaft mit Yeehoowa. (Psal. 63:1-8)

20. Wii pleenst tuu tayn tsayt mit Yeehoowa kuut penutse?

²⁰ Ferkes tich net: peete, xtutiire un triwer noo tenke sin teel fon unser aanpeetung. Soo wii Yeesus, suuch een ruych plats fer tsayt mit Yeehoowa fertraype. Los niks tayn acht ap lënke. Ferlang Yeehoowa sayn hilef fer tich konsentriire wëns tuu in te fersamlunge keest un tayn perseenlich xtuutyum machst. Wëns tuu tayn tsayt yets kuut penutst, tuut Yeehoowa tich peloone mit eewiche leepe in tëm sayn naye welt. (Mar. 4:24)