XTUUTYUM ARTIKEL 4
Warom keen mer tsum Aantenke?
“Macht tas imer fer aan mich aan se tenke.” (LUKAS 22:19)
LIIT 20 Yeehoowa hot sayn pestes uns kexenkt
WAS TUUN MER SIIN? *
1-2. (a) Wanee tuun mer hauptseechlich tenke aan een liipe persoon woo kextorep is? (b) Was hot Yeesus kemacht in te nacht foer sayn toot?
HOST tuu xon yemant woos tuu liipst im toot ferloer? Sicher, tuust tuu aan tiise persoon noch traan tenke, ekaal wii lang se xon kextorep is. Un im xtant tuun tiise xpiirunge hauptseechlich xtark wëre, wën te taach noch mool khomt woo ti persoon kextorep is.
2 Yeetes yoer, wën te taach noch mool khomt woo Yeesus Kristus kextorep is — yemant woo mer aarich liipe —, tuun milyoone layt uf te kans welt sich fersamele. (1 Phe. 1:8) In tiise taach, tuun mer traan tenke aan tëm woo sayn leepe fer uns ap kep hot fer uns fon te sint un te toot pefraye. (Mat. 20:28) Yeesus wolt hon tas tëm sayn nookeener aan tëm sayn toot traan tenke teete. In te nacht foer sayn toot, hot Yeesus een ekstra oomtsmaal in kextelt un tee hot aach tas kepoot kep: “Macht tas imer fer aan mich aan se tenke.” (Luk. 22:19)
3. Was tuun mer in tiise artikel noo kuke?
3 Ploos een kleen numer layt woo in tëm Aantenke keen, hon ti hofnung fer im himel se leepe. Awer milyoone layt woo ti hofnung hon fer uf te eyert leepe tuun aach keen. Warom tuun ti 2 krupe in tëm Aantenke keen? Un was fer nutse kriin mer too tefun? Tas is was mer in tiise artikel lërne tuun. Awer eyerst, wole mer siin warom tuun ti kesalpte keen.
WAROM KEEN TI KESALPTE TSUM AANTENKE?
4. Warom tuun ti kesalpte fom proot ese un fom wayn trinke in tëm Aantenke?
4 Yeetes yoer, tuun ti kesalpte woo tsum Aantenke keen fom proot ese un fom wayn trinke. Warom mache se tas? Fer ti antwort fine, kuk mool was pasiirt is in Yeesus sayn letste nacht too uf te eyert. Tee un sayn tisipele hon te yiitixe Oostre Fest kefayert; klaych tëm noo, hot Yeesus in kextelt was mer hayt wii tas Oomtsmaal fom Hër khëne. Tee hot tas proot un te wayn fer sayn 11 troye aphostele torich kep un tii solte tas ese un trinke. Yeesus hot aach mit tëne fertseelt iwer tswaay pakte — te naye pakt un te pakt fom Raych. * (Luk. 22:19, 20, 28-30) Weeche tiise pakte, khente Yeesus say aphostele un een kleen numer fon Yeesus sayn nookeener kheeniche un priister im himel wëre. (Apo. 5:10; 14:1) Tes weeche, ploos ti kesalpte woo noch uf te eyert sin — woo teel fon tiise tswaay pakte mache — khene fom proot ese un fom wayn trinke in tëm Aantenke.
5. Was wise ti kesalpte iwer ti hofnung woo se hon?
5 Weeche was noch tuun ti kesalpte kërn tsum Aantenke keen? In tiise fersamlung, khene se triwer noo tenke iwer sayn hofnung, etwas woo tëne fiil frooheet pringt. (Tit. 2:13) Yeehoowa hot tëne een wunerlich hofnung kep: unxtërplich leepe im himel hon; mit Yeesus un ti anere kesalpte tiine; un tas haupste: te aychne Yeehoowa siin! (1 Kor. 15:51-53; 1 Yo. 3:2) Ti kesalpte wise tas, fer tiise priwilëje kriin un im himel rin keen, mise se troy pis sayn toot plaype. (2 Tim. 4:7, 8) Awer un ti “anere xeef”? (Yoo. 10:16) Warom tuun se tsum Aantenke keen?
WAROM KEEN TI ANERE XEEF TSUM AANTENKE?
6. Warom tuun ti anere xeef tsum Aantenke keen?
6 Ti anere xeef keen aach tsum Aantenke, awer tii tuun net fom proot ese orer fom wayn trinke. Noch soo, sin se froo tas se khene tat sin un tas Aantenke kuke. Im yoerkang 1938, waare tii woo ti eyertlich hofnung hon, tas eyerste mool in kelaat fer tsum Aantenke khome. A Sentinela 1te Mërts fon 1938 hot kesaat: “Es is aarich kuut tas ti anere xeef tsum Aantenke khome un tas se kuke was pasiirt. (...) Tas mus sin — un tas is — een tsayt fer tii aach sich fraye.” Ti anere xeef woo tsum Aantenke keen, sin soo wii ti layt woo tsu een hoochtsayt in kelaat sin: tii sin froo tas tii khene tat tepay sin opwool se tas ploos am kuke sin.
7. Warom tuun ti anere xeef kërn ti reet fom Aantenke heere?
7 Ti anere xeef tuun aach aan tëne sayn hofnung triwer noo tenke. Tii tuun kërn ti reet fom Aantenke heere; tiise reet xprecht iwer was Yeesus un ti 144.000 mache tuun fer ti troye mënxe helfe torich ti Tausent Yoore Rechiirung. Yeesus, mit te hilef fon te kesalpte, tuut fon te eyert een paratiis mache un ti mënxe helfe perfekt wëre. Fer ti milyoone layt woo tsum Aantenke keen, is es wunerlich sich foer xtele ti xeen futuer woo tëne waart — een tsayt woo ti profetsiie fon Isaiias 35:5, 6; 65:21-23; un Apokalipsis 21:3, 4 sich erfiile tuun. Wën se tenke in te nay welt un ti frooheet woo se xpiire tuun mit sayn froynte un parente, tas ferxtërkt tëne sayn hofnung un tëne sayn muut fer wayter Yeehoowa tiine. (Mat. 24:13; Kal. 6:9)
8. Weeche was noch tuun ti anere xeef tsum Aantenke keen?
8 Weeche was noch tuun ti anere xeef tsum Aantenke keen? Tii wole tsayche tas se ti kesalpte liipe un uner xtitse. Ti Piipel hot foer raus kesaat tas ti kesalpte un tii woo ti hofnung hon fer uf te eyert leepe, mitsamer xafe teete. Wii soo? Wole mer iwer phaar payxpiile xpreche.
9. Tëm noo Sakarias 8:23 was xpiire ti anere xeef iwer ti kesalpte?
9 Lees Sakarias 8:23. * Tiise tekst tuut xeen pexraype was ti anere xeef iwer sayn kesalpte priiter un xwestere xpiire. Ti wërter “eene yuute” un “aych” pexraype te selwiche krup — ti kesalpte woo noch uf te eyert sin. (Rom. 2:28, 29) Ti “10 mëner fon ale xprooche fon te natsyoone” petayte ti anere xeef. Tii tuun “fest hale” — es wil saan, troy uf te kesalpte sayn sayt plaype — un mitsamer tuun se Yeehoowa tiine. Tan wën se sich in tëm Aantenke mit te kesalpte samele tuun, tsayche ti anere xeef tas se ti kesalpte pay xteen un liipe.
10. Was hot Yeehoowa kemacht fer ti profetsii fon Esekyël 37:15-19, 24, 25 erfiile?
10 Lees Esekyël 37:15-19, * 24, 25. * Yeehoowa hot tiise profetsii erfiilt wën eyer kemacht hot tas ti kesalpte un ti anere xeef eenich xafe teete. Ti profetsii xprecht iwer 2 xtek. Tii woo ti hofnung hon fer im himel se leepe, sin wii te xtok “fer Yuuta” (ti kheeniche fon Israël sin fon tiise xtam raus kesuucht kep). Tii woo ti hofnung hon fer uf te eyert leepe, sin wii te xtok “fon Efraiim”. * Yeehoowa teet tiise 2 krupe eenich mache — tii teete “ploos een xtok” sin. Was wil tas saan? Tii teete eenich tiine unich sayn kheenich Yeesus Kristus. Yeetes yoer, keen ti kesalpte un ti anere xeef tsum Aantenke, net wii 2 keteeltne krupe, awer “wii ploos een trop” unich “een xeefer”. (Yoo. 10:16)
11. Was is ti haupst aat wii “ti xeef” woo in Matheus 25:31-36, 40 xteen, Yeesus sayn priiter helfe?
11 Lees Matheus 25:31-36, * 40. * Weer sin “ti xeef” fon tiise ferklaychung? Tii sin ti kerechte layt in te tsayt fom ën woo ti hofnung hon fer uf te eyert leepe. Yeesus hot se aach wii anere xeef kenënt. Tii tuun ti kesalpte woo noch uf te eyert sin — es wil saan, Kristus sayn priiter — fiil mit helfe. Was is ti haupst aat wii se tas mache? Tii tuun ti kesalpte helfe sayn mechtich kroos flicht erfiile: ti preetich un inlërnung aarwayt uf te kans welt mache. (Mat. 24:14; 28:19, 20)
12-13. In was fer anere aate tuun ti anere xeef tsayche tas se Kristus sayn priiter pay xteen?
12 Yeetes yoer, in te woche foer tas Aantenke, tuun ti anere xeef tsayche tas se ti kesalpte pay xteen wën se in een weltswayt kampanya xafe: tii tuun al in laate fer tsum Aantenke khome. (Kuk te khaste “ Pist tuu tich am foer perayte fer tas Aantenke?”) Ti anere xeef lose aach ales fërtich fer tas Aantenke, soo kaar wën es kheen kesalpte in te kemaynt kept. Fer tii, is es een kroos eer Kristus sayn priiter soo se helfe. Tii wise tas, fer Yeesus, ales was se fer tëm sayn priiter mache, is wii wën se tas fer tëm mache teete. (Mat. 25:37-40)
13 Awer ekaal was unser hofnung is, was fer anere uersache hon meyer al fer tsum Aantenke keen?
WAROM KEEN MER AL TSUM AANTENKE?
14. Wii hon Yeehoowa un Yeesus fiil liip fer uns ketsaycht?
14 Meyer sin petanklich fer ti liip woo Yeehoowa un Yeesus uns ketsaycht hon. Yeehoowa hot xon in fiile aate ketsaycht tas eyer uns liipt. Awer ti haupst is: Tee hot sayn liipe Soon kexikt fer weeche uns layte un xtërpe. (Yoo. 3:16) Un Yeesus hot sayn leepe fer uns ap kep, net wayl eyer ketswung waar, awer wayl eyer uns liipe tuut. (Yoo. 15:13) Meyer kriin nii tsurik petsaalt ti liip woo se fer uns ketsaycht hon. Awer meyer khene tsayche tas mer petanklich sin torich ti aat wii mer leepe. (Kol. 3:15) Wën mer tsum Aantenke keen, tuun mer triwer noo tenke aan te liip woo se uns ketsaycht hon, un mer tuun aach fer tëne liip tsayche.
15. Warom sin ti kesalpte un ti anere xeef petanklich fer tas fray khaaf opfer?
15 Meyer sin aarich petanklich fer tas fray khaaf opfer. (Mat. 20:28) Ti kesalpte kepe fiil weyert fer tas fray khaaf opfer, wayl weeche tas, khene se een wunerlich hofnung hon. Weeche sayn klaape aan tëm fray khaaf opfer, hot Yeehoowa tëne wii kerechte aus kexproch un tëne wii sayn khiner aan kenom. (Rom. 5:1; 8:15-17, 23) Ti anere xeef sin aach petanklich fer tas fray khaaf opfer. Weeche sayn klaape aan tiise opfer, khene se rayn foer Kot sin, tëm tiine in een aat woo tëm kefalt un ti hofnung hon fer ti “kroos tripulatsyoon” iwerleepe. (Apo. 7:13-15) Tan, ekaal was tayn hofnung is, khanst tuu tsayche tas tuu petanklich fer tas fray khaaf opfer pist wëns tuu tsum Aantenke yeetes yoer keest.
16. Weeche was noch keen mer tsum Aantenke?
16 Een aner uersach warom mer tsum Aantenke keen is wayl mer wole Yeesus aan heere. In te nacht woo eyer tas Aantenke in kextelt hot, hot eyer kesaat: “Macht tas imer fer aan mich aan se tenke.” Ekaal was unser hofnung is, meyer wole Yeesus sayn kepoot aan heere. (1 Kor. 11:23, 24)
WAS FER NUTSE KRIIN MER AL WËN MER TSUM AANTENKE KEEN?
17. Wii helft tas Aantenke uns tichter pay Yeehoowa xafe?
17 Meyer xafe uns tichter pay Yeehoowa. (Tya. 4:8) Wii mer xon kesiin hon, tas Aantenke is een kuut tsayt fer se triwer noo tenke aan te hofnung woo Yeehoowa uns kep hot un aan te kroos liip woo eyer uns ketsaycht hot. (Yee. 29:11; 1 Yo. 4:8-10) Wën mer tas mache, wërt unser liip tsu Yeehoowa kreeser un unser froyntxaft mit tëm, xtërker. (Rom. 8:38, 39)
18. Wën mer iwer Yeesus sayn payxpiil triwer noo tenke, ferxtërke mer unser muut fer was se mache?
18 Meyer ferxtërke unser muut fer Yeesus sayn payxpiil noo mache. (1 Phe. 2:21) In te taache foer tas Aantenke, leese mer phaar xtike fon te Piipel woo xpreche iwer ti letste woch fon Yeesus uf te eyert, iwer sayn toot un iwer sayn ufxtaye. Tan, in te nacht fom Aantenke, tuut ti reet uns helfe traan tenke aan wii fiil Yeesus uns liipt. (Ëfe. 5:2; 1 Yo. 3:16) Wën mer leese un triwer noo tenke aan Yeesus sayn payxpiil, ferxtërke mer unser muut fer “wayter leepe soo wii Yeesus keleept hot”. (1 Yo. 2:6)
19. Wii khene mer in Kot sayn liip plaype?
19 Unser wunx fer uf Yeehoowa sayn liip plaype wërt kreeser. (Yuu. 20, 21) Meyer plaype in Yeehoowa sayn liip wën mer mache ales was mer khene fer tëm aan heere, sayn naame ferhayliche un tëm sayn hërts froo lose. (Xpr. 27:11; Mat. 6:9; 1 Yo. 5:3) Wën mer tsum Aantenke keen, wërt unser wunx ferxtërkt fer se leepe in een aat woo Yeehoowa froo lost; wii wën mer yeete taach saan teete: ‘Ich wil in tayn liip fer imer plaype!’
20. Was fer kuute uersache hon mer fer tsum Aantenke keen?
20 Ekaal ep unser hofnung im himel orer uf te eyert leepe is, meyer hon kuute uersache fer tsum Aantenke keen. Yeetes yoer, in tiise taach, tuun mer traan tenke aan tëm toot fon yemant woo mer fiil liipe, Yeesus Kristus. Un tas haupste: meyer tuun traan tenke aan te liip woo Yeehoowa uns ketsaycht hot wën eyer uns sayn Soon wii fray khaaf opfer kep hot. In tiise yoer, wërt tas Aantenke kehal am fraytaach, 15te april fon 2022. Meyer liipe Yeehoowa un sayn Soon; tes weeche, in tiise taach, niks is wichticher fer uns wii tsum Aantenke keen.
LIIT 16 Jeová escolheu nosso Rei
^ Fer uns, is es een kroos eer tsum Aantenke yeetes yoer keen — ekaal ep unser hofnung im himel leepe is orer ufm Paratiis too uf te eyert. Was fer uersache kept uns ti Piipel fer tsum Aantenke keen? Un was fer nutse kriin mer too tefun? Tas is was mer in tiise artikel lërne tuun.
^ Fer mee se wise iwer te naye pakt un te pakt fom Raych kuk te artikel “Vocês se tornarão ‘um reino de sacerdotes’”, in A Sentinela 15te Oktooper fon 2014, sayte 15 pis 17.
^ (Sakarias 8:23) “Tas is was Yeehoowa, te Kot fon militeer saat: ‘In tiise taache, 10 mëner fon ale xprooche fon te natsyoone tuun eene yuute sayn tsaych krayfe, yaa, tuun fest hale un saan: “Meyer wole mit aych keen, wayl mer keheert hon tas Kot mit aych is.”’”
^ (Esekyël 37:15-19) Ich hon Yeehoowa sayn wort noch mool kriit: 16 “Tuu mënxe soon, hool een xtok un xrayp aan tëm: ‘Fer Yuuta un fer ti layt fon Israël sayn folek woo mit tëm sin.’ Tan, hool een aner xtok un xrayp aan tëm: ‘Fer Yoosef — te xtok fon Efraiim — un fer ale tii fon Israël sayn haus woo mit tëm sin.’ 17 Tan, samel ti tswaay xtek in tayn hant, tas se ploos een xtok wëre. 18 Wën tayn folek tich frooe tuut: ‘Tuust tuu uns net saan was tas ales petayt?’, 19 tuu soo antworte: ‘Tas is was te Soweraan Hër Yeehoowa saat: “Ich hoole Yoosef sayn xtok, woo in Efraiim sayn hant is, tepay mit te xteme fon Israël woo mit tëm sin, un ich tuun se samele mit Yuuta sayn xtok. Un ich mache fon tëne ploos een xtok; tii wëre ploos een in mayn hant sin.”’
^ (Esekyël 37:24, 25) “‘“Mayn tiiner Tawi wërt tëne sayn kheenich sin un tii al tuun ploos een xeefer hon. Tii tuun mayn kerichts ëntxlise foliche un mayn kepoote mit acht aan heere. 25 Tii tuun im lant woone woo ich fer mayn tiiner Yaakop kep hon, tas lant woo ayre foerkhomer keleept hon. Tii tuun fer imer uf tiise lant woone, tii un sayn khiner, un aach ti khiner fon sayn khiner; un mayne tiiner Tawi wërt tëne sayn prins fer imer sin.
^ Fer mee se wise iwer ti profetsii fon te 2 xtek, woo in Esekyël kapitel 37 xteet, kuk tas puuch A Adoração Pura de Jeová É Restaurada!, sayte 130 pis 135, apsetse 3 pis 17.
^ (Matheus 25:31-36) “Wën te Mënxe Soon in sayn hërlichkheet khomt, un ale engele mit tëm, tan tuut eyer sich uf sayn hërlich troon setse. 32 Ale natsyoone wëre foer tëm kesamelt, un eyer tuut ti mënxe aus naner teele, soo wii te xeefer ti xeef fon te kaprite aus naner teelt. 33 Un eyer tuut ti xeef uf sayn rechts sayt, awer ti kaprite uf sayn links sayt. 34 “Tan, tuut te Kheenich fer tii uf sayn rechts sayt saan: ‘Khomt iir al, woo mayn Fater keseechent hot, ërpt tas Raych woo fer aych foer perayt is fom aanfang fon te welt aan. 35 Wayl ich hat hunger, un teyer hot mich was tsum ese kep. Ich hat torst, un teyer hot mich was tsum trinke kep. Ich waar een frëmte, un teyer hot mich liiplich aan kenom. 36 Ich waar nakich, un teyer hot mich aan ketsoo. Ich waar krank, un teyer hot mich uf kephast. Ich waar in te katee, un teyer sayt mich pesuuche khom.’
^ (Matheus 25:40) Un te Kheenich tuut tëne soo antworte: ‘Ich saan aych mit kans sicherheet: was teyer tsu eene fon te kleenste fon mayn priiter kemacht hot, hot teyer tas tsu mich kemacht.’
