XTUUTYUM ARTIKEL 2
Was khene mer lërne mit Yeesus sayn yinger pruuter?
“Tyako, sklaaw fon Kot un fom Hër Yeesus Kristus.” (TYAKO 1:1)
LIIT 88 Os teus caminhos quero entender
WAS TUUN MER SIIN? *
1. Wii teest tuu Tyako sayn familye pexraype?
TYAKO, Yeesus sayn pruuter, waar teel fon een familye woo troy tsu Yeehoowa waar. * Tëm sayn eltere, Yoosef un Maria, hon Yeehoowa aarich fiil keliipt un tii hon sayn pestes kemacht fer Tëm tiine. Un Tyako hat noch een aner seechen: sayn elste pruuter is te Mesias kep. Teel fon tiise familye mache waar wërklich een ekstra priwilëj fer Tyako kewees!
Tyako hot Yeesus aarich kuut khëne kelërnt wii se mitsamer kroos kewakst sin (Kuk te apsats 2.)
2. Was fer uersache hat Tyako fer sayn elste pruuter respektiire?
2 Tyako hat fiile uersache fer sayn elste pruuter respektiire. (Mat. 13:55) Tsum payxpiil: wën Yeesus ploos 12 yoore alt waar, hot eyer xon ti Xrifte soo kuut ferxtan, tas ti leerer in Yeruusalem sich ferwunert hon. (Luk. 2:46, 47) Im xtant, hot Tyako aach wii tsimerman mit Yeesus kexaft. Wëns wërklich soo waar, sicher hot eyer Yeesus aarich kuut khëne kelërnt. Te pruuter Nathan H. Knorr * hot imer kesaat: “Fer yemant kuut khëne, xaf mit tëm.” Tsiimlich sicher, hot Tyako aach kemërkt tas ‘Yeesus wayter kewakst is, tas eyer imer kluucher kep is, un tas tee waar imer peser foer Kot un ti mënxe aan kesiin’. (Luk. 2:52) Mit tas ales, weyers laycht se rechne tas Tyako eene fon Yeesus sayn eyerste tisipele waar. Awer, tas is net soo pasiirt.
3. Wii hot Tyako sich aan kextelt wii Yeesus aan kefang hot se preetiche?
3 Torich ti kans tsayt woo Yeesus kepreeticht hot, is Tyako net eene fon sayn tisipele kep. (Yoo. 7:3-5) In woerheet, khan sin tas Tyako eene fon Yeesus sayn parente waar woo ketenkt hot tas “tee ferikt kep” is. (Mar. 3:21) Un niks in te Piipel saat tas Tyako mit sayn mama Maria waar, wii Yeesus aan tëm kwel phoste um keprung kep is. (Yoo. 19:25-27)
4. Was fer lisyoone tuun mer in tiise artikel lërne?
4 Awer xpeeter, hot Tyako aan kefang aan Yeesus klaape. Tee is aach een elteste in te kristlich kemaynt kep un ti layt hon tëm fiil respektiirt. In tiise artikel, xpreche mer iwer 2 lisyoone woo mer mit Tyako lërne khene: (1) Warom sole mer teemuutich plaype? (2) Wii khene mer kuute leerer sin?
SOO WII TYAKO, PLAYP WAYTER TEEMUUTICH
Wën Yeesus fer Tyako tsum foer xayn khom is, hot eyer mit teemuut aan kenom tas Yeesus te Mesias waar. Fon tat aan, waar eyer een troy tisipel kewees (Kuk ti apsetse 5-7.)
5. Was hot Tyako kemacht noo tas Yeesus fer tëm tsum foer xayn khom is?
5 Wanee is Tyako een leaal tisipel fon Yeesus kep? Noo tas Yeesus uf kextii is, “is eyer fer Tyako un tan fer ti kanse aphostele, tsum foer xayn khom”. (1 Kor. 15:7) Tas hot Tyako sayn leepe keënert: fon tat aan, hot eyer aan kefang Yeesus noo keen. Tee waar mit te aphostele in Yeruusalem kewees wii se kewaart hon te hayliche kayst kriin. (Aph. 1:13, 14) Xpeeter, hot Tyako een aner frooheet kriit: in te rechiirente khërperxaft tiine. (Aph. 15:6, 13-22; Kal. 2:9) Un een tsayt foer 62 N.K., hot Kot tëm kelënkt een priif fer sayn kesalpte priiter xraype. Noch hayt, tuut tiise priif uns helfe — ekaal ep unser hofnung im himel orer uf te eyert leepe is. (Tya. 1:1) Tëm noo te kexicht unersuucher Josefo, hot te yiitixe Hooche Priister Ananias, soon fon Anaas, kexikt tas Tyako um keprung weyer. Tyako is troy tsu Yeehoowa keplip pis tas ën fon sayn leepe uf te eyert.
6. Was fer waar ti unerxiit tswixich Tyako un ti relichyeese fiirer fon sayn tsayt?
6 Tyako waar teemuutich kewees. Warom khene mer tas saan? Kuk mool ti unerxiit tswixich Tyako un ti relichyeese fiirer fon tëm sayn tsayt. Wën Tyako taytliche pewaysunge kesiin hot tas Yeesus Kot sayn Soon is, hot eyer tas mit teemuut aan kenom. Awer ti haupste priister in Yeruusalem hon net tas selwiche kemacht. Tsum payxpiil: Yeesus hot Lasaro uf keruuft un tii khonte net saan tas es net pasiirt is. Awer, xtats aan nëme tas Kot Yeesus kexikt hat, hon se fersuucht Yeesus un Lasaro um pringe. (Yoo. 11:53; 12:9-11) Un xpeeter, wii te aychne Yeesus fom toot uf keruuft waar, hon se fersuucht tas fon te layt ferxtekele. (Mat. 28:11-15) Weeche sayn hoochmuut, hon ti relichyeese fiirer Yeesus ap kextos.
7. Warom thërfe mer net hoochmuutich sin?
7 Was is ti lisyoon fer uns? Say teemuutich un los Yeehoowa tich in lërne. Een krankheet khan es xweyer lose fer tas hërts richtich funtsyoniire. Te hoochmuut is wii een krankheet: tee khan unser hërts hart mache un es xweyer lose Yeehoowa foliche. Tas is mit te fariseer pasiirt. Weeche te hoochmuut, is tëne sayn hërts hart kep. Tes weeche, soo kaar wën se pewaysunge hate, hon se net keklaapt tas Yeesus Kot sayn Soon waar un tas eyer Kot sayn kayst hat. (Yoo. 12:37-40) Tas waar mechtich kefeerlich kewees! Weeche te hoochmuut, hon se ti keleechenheet ferloer fer tas eewiche leepe kriin. (Mat. 23:13, 33) Tes weeche, mise mer lose Kot sayn hayliche kayst un tëm sayn Wort unser personaliteet, ketanke un ëntxlise petrefe. (Tya. 3:17) Wayl Tyako teemuutich waar, hot eyer kelos Yeehoowa tëm in lërne. Un wii mer yets siin tuun, weeche sayn teemuut, is Tyako een kuute leerer kep.
SOO WII TYAKO, SAY EEN KUUTE LEERER
8. Was tuut uns helfe kuute leerer wëre?
8 Tyako hot net fiil xuul kehat. Sicher, hon ti relichyeese fiirer ketenkt tas eyer soo wii ti aphostele Pheeter un Yoohan waar: een ‘keweenlich mënx, oone xuul’. (Aph. 4:13) Noch soo, is Tyako een aarich kuute leerer kep. Un meyer khene tas siin wën mer tas piiplix puuch woo tëm sayn naame nëmt, leese. Khan sin tas, soo wii Tyako, hon mer net fiil xuul. Awer mit te hilef fon Yeehoowa sayn hayliche kayst, un mit te iipung fon sayn Orkanisatsyoon, khene mer aach kuute leerer sin. Yets, wole mer Tyako sayn payxpiil wii leerer noo kuke un siin was mer too temit lërne khene.
9. Wii hot Tyako in kelërnt?
9 Tyako hot net xweyere wërter orer ausleyunge penutst. Tes weeche, wën Tyako in kelërnt hot, wuste ti layt was se mache miste un wii khonte se tas mache. Tsum payxpiil: Tyako hot in kelërnt tas ti kriste mise fërtich sin fer unkerechtichkheet aus hale, awer net piterlich too teweeche wëre. Kuk mool ti keweenlich aat wii eyer tas aus keleet hot: “Meyer tuun wii froo aan siin tii woo aus kehal hon. Teyer hot xon keheert iwer Yoop sayn persewerans, un teyer hot kesiin was hot Yeehoowa tëm am ën kep; tan wist teyer xon tas Yeehoowa fiil hërtslich liip un parmhërtslichkheet hot.” (Tya. 5:11) Mërk tas Tyako hot ti Xrifte penutst fer tiise lisyoon fer ti priiter in lërne. Tee hot Yoop sayn payxpiil penutst, woo in Kot sayn Wort xteet, fer se tsayche tas Yeehoowa imer peloone tuut tii woo leaal tsu tëm sin. Tyako hot tas aus keleet in een keweenlich aat un mit keweenliche wërter. Soo, hot eyer acht fer Yeehoowa kep, net fer sich selepst.
10. Wii khene mer Tyako noo mache wën mer in lërne?
10 Was is ti lisyoon fer uns? Tuu in een keweenlich aat in lërne un penuts ti Piipel. Was sol unser tsiil sin wën mer ti layt in lërne? Is tsayche wii fiil khëntnis mer hon? Nee. Meyer wole tsayche wii fiil Yeehoowa wees un wii fiil eyer sich mit tëne khimert. (Rom. 11:33) Meyer khene tiise tsiil trefe wën mer ti Piipel imer penutse wën mer in lërne. Tsum payxpiil: xtats fer te xtutënt saan was meyer in tëm sayn situatsyoon mache teete, weyers peser payxpiile fon te Piipel tsayche. Tan, khene mer tëm helfe aan tiise payxpiile triwer noo tenke un ferxteen was Yeehoowa too triwer tenkt un xpiirt. Soo, tuut tee aan wëne was tee lërnt wayl tee wil Yeehoowa kefale, net uns.
11. Was fer propleeme hate etliche priiter in Tyako sayn taache un was fer aanreete hot eyer tëne kep? (Tyako 5:13-15)
11 Tyako hot ti tinge kesiin wii se wërklich waare. Wën mer Tyako sayn priif leese, is es taytlich tas eyer wust iwer ti propleeme woo ti priiter un xwestere mit kemacht hon. Tsum payxpiil: tee hot ferxtan tas etliche priiter een pisye lamsam waare fer ti aanreete aan wëne. (Tya. 1:22) Anere hon peser pehantelt tii woo kelt hate. (Tya. 2:1-3) Un tee wust aach tas, fer anere, waar es xweyer sayn tsung kontroliire. (Tya. 3:8-10) Tiise kriste hate xweyere propleeme, awer Tyako hot net fon tëne uf kep. Tee hot tëne liipliche, awer taytliche aanreete kep. Tee hot aach ti priiter uf kemuut, woo hilef praychte, ti elteste suuche fer es hin kriin ti neetiche ënerunge mache. (Lees Tyako 5:13-15.) *
12. Was tuut uns helfe net ti hofnung ferliire wën mer ti Piipel xtutënte helfe tuun?
12 Was is ti lisyoon fer uns? Sii ti tinge wii se wërklich sin un ferliir net ti hofnung. Fer fiile woo mit uns ti Piipel xtutiire, is es xweyer ti piiplixe oryentiirunge aan wëne. (Tya. 4:1-4) Im xtant, tuun se mee tsayt nëme fer xlechte kewoonheete im xtich lose un kristliche kwaliteete ëntwikele. Soo wii Tyako, mise mer koraaj hon fer mit unser xtutënte fertseele iwer ti ënerunge woo se mache mise. Awer meyer sole net ti hofnung ferliire — mer mise imer traue tas Yeehoowa ti teemuutiche layt tsu tëm tsiie tuut un tas eyer tëne kraft kept fer ti neetiche ënerunge mache. (Tya. 4:10)
13. Tëm noo Tyako 3:2 un ti noote, was hot Tyako erkhënt?
13 Tyako hot net ketenkt tas eyer peser wii ti anere waar. Tee hot net kemënt tas eyer peser wii ti anere waar wayl eyer Yeesus sayn pruuter waar orer weeche ti wichtiche flichte woo eyer hat. Tee hot ti anere kriste wii “mayn liipe priiter” keruuft. (Tya. 1:16, 19; 2:5) Tee hot sich aach net aan kextelt wii wën eyer perfekt weyer. Xtats tas, hot eyer sich tepay ketseelt wën eyer kesaat hot: “Meyer al tuun fiil mools feeler mache.” (Lees Tyako 3:2 un ti noote.) *
14. Warom is es wichtich fer unser xtutënte saan tas mer aach feeler mache?
14 Was is ti lisyoon fer uns? Ferkes tich net tas meyer al sinte mache. Meyer thërfe net tenke tas mer peser wii unser xtutënte sin. Warom net? Wën mer fer unser xtutënt aus siin mache tas mer khee feele hon, fiilaycht tuut eyer oone muut wëre un tenke: ‘Ich tuun nii net es hin kriin se mache was Kot fon mich ferlangt.’ Wii khene mer unser xtutënt helfe se ferxteen tas eyer khan es hin kriin Yeehoowa tiine? Meyer khene eerlich sin un saan tas es net imer laycht fer uns waar ti piiplixe oryentiirunge aan wëne. Meyer khene aach fertseele iwer wii Yeehoowa uns keholef hot ti neetiche ënerunge mache.
Tyako sayn ferklaychunge waare keweenlich, taytlich un kuut (Kuk ti apsetse 15-16.) *
15. Wii teest tuu Tyako sayn ferklaychunge pexraype? (Tyako 3:2-6, 10-12)
15 Tyako hot ferklaychunge penutst woo ti layt sayn hërts aan kekrif hon. Kewis hat Tyako ti hilef fom hayliche kayst. Awer tsiimlich sicher, hot eyer aach fiil kelërnt mit te ferklaychunge woo sayn elste pruuter Yeesus penutst hot. Ti ferklaychunge in Tyako sayn priif sin keweenlich un ti lisyoone hiner traan sin taytlich. (Lees Tyako 3:2-6, * 10-12. *)
16. Warom sole mer kuute ferklaychunge penutse?
16 Was is ti lisyoon fer uns? Penuts ferklaychunge woo ti layt sayn hërts aan krayfe. Wën mer soo sorte ferklaychunge penutse, helfe mer ti layt net ploos heere was mer saan, awer aach sich foer xtele was mer in lërne. Tas lost es laychter fer ti layt sich erinere fon wichtiche woerheete fon te Piipel. Yeesus hot soo sorte ferklaychunge penutst un sayn pruuter Tyako hot tëm noo kemacht. Wole mer een fon Tyako sayn ferklaychunge noo kuke un siin warom se soo kuut is.
17. Warom is ti ferklaychung in Tyako 1:22-25 soo kuut?
17 Lees Tyako 1:22-25. * Weeche phaar uersache, is Tyako sayn ferklaychung iwer te xpiichel soo kuut. Eyerst, Tyako wust xon was eyer in lërne wolt: tee wolt tsayche tas, fer nutse fon Kot sayn Wort kriin, mise mer mee mache wii ploos tëne leese — meyer mise aan wëne was mer leese. Tyako hot aach een ferklaychung kemacht woo ti layt kuut ferxteen khonte: een persoon woo sich im xpiichel kukt. Was fer lisyoon wolt eyer in lërne? Wën eene man sich in een xpiichel aan kuke teet, een feele mërke teet, un tan niks too triwer mache teet, tas weyer een tumheet. In te selwich aat, es weyer een tumheet Kot sayn Wort leese, mërke tas mer mise etwas in unser personaliteet orer leepe ënere, un tan niks too triwer mache.
18. Was fer 3 tinge mise mer mache wën mer een ferklaychung penutse?
18 Wii khene mer Tyako noo mache wën mer ferklaychunge penutse? Tuu khanst 3 tinge mache: (1) Say tich sicher tas ti ferklaychung tuut tich helfe aus leye was tuu in lërne wilst. (2) Penuts een ferklaychung woo net xweyer is fer ti layt ferxteen. (3) Los taytlich was fer lisyoon wilst tuu mit te ferklaychung in lërne. Is es xweyer fer tich kuute ferklaychunge uf pringe? Tan, khanst tuu te Índice das Publicações da Torre de Vigia penutse. Unich tëm theema “Ilustrações” finst tuu kuute payxpiile. Awer, meyer mise imer traan tenke: ti ferklaychunge sin wii een mikrofoon. Te mikrofoon lost ti layt sayn xtim hërter. Kraat soo, ti ferklaychunge pringe fiil acht fer te phunkt woo mer ferklayche tuun. Tes weeche, tsu fiil ferklaychunge mache, khan ti layt konfus lose. Tan, es is peser ferklaychunge penutse ploos fer ti haupste phunkte aus leye. Kewis, wën mer wole kuute leerer sin, unser haupste opjetiiw is net acht fer uns selepst ruufe, awer ti kreeste numer layt helfe teel fon Yeehoowa sayn froo familye mache.
19. Wii khene mer tsayche tas mer unser priiter un xwestere liipe?
19 Nimant fon uns hat ti priwilëj woo Tyako hat: mit een elste pruuter wakse woo perfekt waar. Awer meyer hon ti eer fer teel fon een kroos familye fon priiter un xwestere mache. Wii khene mer tsayche tas mer tëne liipe? Meyer khene tsayt mit tëne fertraype, fon tëne sayn payxpiil lërne, un troy mit tëne xafe in te preetich un inlërnung aarwayt. Tan, wole mer Tyako sayn payxpiil noo mache in unser aanxtelung, aktsyoone un inlërnung. Soo, kepe mer eer fer Yeehoowa un mer helfe eerliche layt tichter pay unser liipliche Fater khome.
LIIT 114 Seja paciente
^ Tyako un Yeesus sin in te selwich familye kroos kewakst. Weeniche layt fon Tyako sayn taache hon Kot sayn perfekte Soon soo kuut kekhënt wii tee. Tyako, Yeesus sayn yinger pruuter, hot ti kemaynt im eyerste yoer hunert keholef xtark plaype. Was khene mer mit tëm sayn leepe un inlërnung lërne? Tas is was mer in tiise artikel siin tuun.
^ In tiise artikel, tuun mer Tyako wii Yeesus sayn pruuter ruufe, opwool eyer in woerheet tëm sayn xtif pruuter waar. Es waar Tyako kewees woo tas piiplix puuch woo tëm sayn naame nëmt, kexrip hot.
^ Nathan H. Knorr waar een mitkliit fon te Rechiirente Khërperxaft. In 1977, is sayn leepe uf te eyert tsum ën khom.
^ (Tyako 5:13-15) Is yemant tswixich aych am layte? Tas eyer wayter peete tuut. Is yemant froo? Tas eyer psalme singt. 14 Is yemant krank tswixich aych? Tas eyer ti elteste fon te kemaynt ruuft un tas se fer tëm peete tuun; un tas se eel iwer tëm tuun in Yeehoowa sayn naame. 15 Un tas kepeet woo mit klaape kemacht is, macht tas te kranke mënx kuut wërt, un Yeehoowa tuut tëm uf xtele. Un wën eyer een sint kemacht hot, wërt tas fertsayt.
^ (Tyako 3:2) Wayl meyer al tuun fiil mools xtolpere (noote: orer, “feeler mache”). Wën yemant net in wërter xtolpere tuut, is tee een perfekt mënx, un khan aach sayn kans khërper kontroliire.
^ (Tyako 3:2-6) Wayl meyer al tuun fiil mools xtolpere. Wën yemant net in wërter xtolpere tuut, is tee een perfekt mënx, un khan aach sayn kans khërper kontroliire. 3 Wën mer een tsaum aan te kayl sayn maul tuun, tas tii uns aan heere, tuun mer aach tëne sayn kanse khërper lënke. 4 Tenkt mool aach aan te xif: tii sin mechtich kroos un sin fon xtarke winte kexupt; awer tii sin torich een kleen xtik hols kelënkt. Soo, khan te man woo tas xif lënkt, tas fiire tsum plats woo eyer wil. 5 In te selwich aat, is ti tsung een kleen teel fom khërper, awer tuut sich fon kroose tinge proose. Kukt wii ploos een kleen flam is kenuuch fer fayer in een kroos walt paue! 6 Ti tsung is soo wii tas fayer. Ti tsung representiirt een welt fon unkerechtichkheet tswixich ti teele fon unser khërper, wayl tii tuut te kans khërper petrefe un khan tas leepe fon yemant fernichte, un tuut fernichtung pringe, soo wii ti Xehena.
^ (Tyako 3:10-12) Aus tëm selwich maul khome seechen un ferfluuche. Mayne priiter, tas sol net pasiire. 11 Meecht fon te selwich waser kwel siis waser un pite waser raus khome? 12 Mayne priiter, meecht te fayche paam, oliiwe kepe, orer ti traupe krist fayche kepe? Soo aach ti kwel fon salsich waser khan net siis waser kepe.
^ (Tyako 1:22-25) Awer, tuut tas wort aan wëne, net ploos horiche; wën net, tuut teyer aych mit falxe aanunge hiner keen. 23 Wayl wën yemant tas wort horicht, awer es net aan wënt, es is wii eene man woo sayn kesicht im xpiichel kukt: 24 tee kukt sich aan un, wën eyer fat keet, tuut xon klaych ferkese was fer sort persoon tee is. 25 Awer tee woo mit acht noo kukt tas perfekt kesets, woo frayheet pringt, un sich aan tëm halt, tuut net tas horiche un klaych ferkese, awer tuut ti aarwayt mache; un eyer wërt froo weeche tas.
^ PILT AUSLEYUNG: Tyako hot een ferklaychung mit een flam kemacht. Tee wolt tsayche wii kefeerlich es is ti tsung xlecht penutse. Tas waar een kuut ferklaychung kewees, wayl ale kaar khonte tas laycht ferxteen.
