XTUUTYUM ARTIKEL 3
Was lërne mer fon Yeesus sayn treene?
“Yeesus hot aan kefang se prile.” (YOOHAN 11:35)
LIIT 17 “Ich wil es!”
WAS TUUN MER SIIN? *
1-3. Warom tuun mer als mool prile?
WËN waar tas letste mool woos tuu keprilt host? Als mool, prile mer weeche frooheet. Awer ti meyerst tsayt, prile mer wayl mer traurich sin. Tas pasiirt, tsum payxpiil, wën yemant woo mer liipe xtërpt. Lorilei, * een xwester in te Fereenichte Xtaate fon Amërika hot kexrip: “Als mool waar ich soo traurich weeche te toot fon mayn meetche, tas niks khont mich treeste. In tiise momënte hon ich ketenkt: ‘Ich khan tas net aus hale; mayn ferprochne hërts tuut tas net phake.’”
2 Awer manich mool, prile mer weeche anere uersache. Hiromi, een pyoneerin in Yaapan, hot kesaat: “Es lost mich traurich wën ich preetiche keen un ti layt wole niks fon te Piipel wise. Als mool, mit treene in mayn aue, peete ich fer Yeehoowa: ‘Piite, helf mich yemant fine woo ti woerheet am suuche is.’”
3 Xpiirst tuu tich als mool soo wii ti xwestere woo mer kraat kexproch hon? Tas pasiirt mit fiile fon uns. (1 Phe. 5:9) Meyer wole ‘Yeehoowa mit frooheet tiine’; awer manich mool, prile mer weeche te toot fon yemant woo mer liipe, wayl mer traurich sin, orer wayl mer etwas mit mache woo xweyer fer uns lost troy tsu Yeehoowa plaype. (Psal. 6:6; 100:2) Wii khene mer wayter aus hale wën mer uns soo xpiire tuun?
4. Was tuun mer in tiise artikel lërne?
4 Meyer khene fiil mit Yeesus sayn payxpiil lërne. Tee hot als mool aach keprilt weeche was eyer mit kemacht hot. (Yoo. 11:35; Luk. 19:41; 22:44; Hep. 5:7) Wole mer etliche fon tiise situatsyoone noo kuke. Soo tuun mer siin was mer khene iwer Yeesus un iwer sayn Fater Yeehoowa lërne. Meyer tuun aach siin was mer mache khene in situatsyoone woo uns prile mache.
YEESUS PRILT WEECHE SAYN FROYNTE
Soo wii Yeesus, helf tii woo yemant im toot ferloer hon (Kuk ti apsetse 5-9.) *
5. Was lërne mer iwer Yeesus wën mer Yoohan 11:32-36 leese?
5 In 32 N.K., is Yeesus sayn froynt Lasaro seer krank kep un kextorep. (Yoo. 11:3, 14) Yeesus hot tee un sayn xwestere Maria un Marta aarich keliipt. Lasaro sayn toot hot sayn tswaay xwestere mechtich traurich kelos. Noo tas Lasaro kextorep is, is Yeesus tsu Petanya kang, tas plats woo Maria un Marta keleept hon. Wii Marta tsum wise kriit hot tas Yeesus am khome waar, is se tëm trefe kang. Xtel tich mool foer wii traurich tii waar wii se kesaat hot: “Hër, wëns tuu too hiir weyerst, weyer mayne pruuter net kextorep.” (Yoo. 11:21) Een pisye xpeeter, wii Yeesus Maria un anere am prile kesiin hot, hot eyer aach “aan kefang se prile”. (Lees Yoohan 11:32-36.) *
6. Warom hot Yeesus keprilt?
6 Warom hot Yeesus in tiise situatsyoon keprilt? Tas puuch Estudo Perspicaz das Escrituras kept uns ti antwort: “Lasaro sayn toot un ti traurichkheet woo sayn xwestere kexpiirt hon, hon Yeesus ‘tiif aan kekrif un eyer hot aan kefang se prile.’” * Im xtant, hot Yeesus ketenkt aan te phayn woo sayn liipe froynt Lasaro mit kemacht hot weeche sayn krankheet. Khan sin tas eyer sich foer kextelt hot was Lasaro kexpiirt hot, wii eyer kemërkt hot tas sayn toot ticht waar. Kewis hot Yeesus aach keprilt wayl eyer kesiin hot wii traurich Maria un Marta waare weeche te toot fon sayn pruuter. Host tuu een ticht froynt orer yemant fon tayn familye im toot ferloer? Tan sicher host tuu was eenliches kexpiirt. Wole mer iwer 3 lisyoone xpreche woo mer lërne khene mit was pasiirt is.
7. Was lërne mer iwer Yeehoowa fon Yeesus sayn treene?
7 Yeehoowa ferxteet was mer xpiire. Yeesus is “tas perfekt pilt” fon sayn Fater. (Hep. 1:3) Tan, wii eyer keprilt hot, hot eyer aach ketsaycht wii sayn Fater sich xpiire tuut wën een keliipte xtërpt. (Yoo. 14:9) Tes weeche, wën yemant woos tuu liipst kextorep is, say tich sicher: Yeehoowa tuut net ploos tayn traurichkheet mërke; tee tuut aach tich taure. Tee wil tayn ferprochne hërts heele. (Psal. 34:18; 147:3)
8. Warom khene mer uns sicher sin tas Yeesus unser parente un froynte fom toot uf ruufe tuut?
8 Yeesus wil ti layt woos tuu liipst fom toot uf ruufe. Een pisye foer Yeesus prile, hot eyer Marta sicher kelos: “Tayne pruuter xtayt noch mool uf.” Un Marta hot aan Yeesus keklaapt. (Yoo. 11:23-27) Wayl se Yeehoowa aan kepeet hot, wust se xon tas in te ferkangne yoore, ti profeete Eliias un Eliseu hate xon layt fom toot uf keruuft. (1 Khe. 17:17-24; 2 Khe. 4:32-37) Un tsiimlich sicher, hot se tsum wise kriit fon te layt woo Yeesus uf keruuft hat. (Luk. 7:11-15; 8:41, 42, 49-56) Tuu khanst tich aach sicher sin tas tayn froynte un parente woo xon kextorep sin tuun noch mool tsum leepe khome. Yeesus wil ti toote uf ruufe; ti treene woo tëm runer kelaaft sin wii eyer sayn froynte ketreest hot, lose uns too tefun sicher.
9. Soo wii Yeesus, wii khene mer helfe tii woo traurich sin weeche te toot fon yemant woo se liipe? Kep een payxpiil.
9 Tuu khanst helfe tii woo traurich sin weeche te toot fon yemant woo se liipe. Yeesus hot mee kemacht wii ploos prile: tee hot Marta un Maria keheert un ketreest. Meyer khene tas selwiche mache fer tii woo yemant im toot ferloer hon. Dan, een elteste woo in Austraalya leept, saat: “Ich must hilef hon noo tas ich mayn fraa im toot ferloer hon. Fiile priiter un sayn fraae waare imer fërtich fer mich heere — taach un nacht. Tii hon mich kelos mayn traurichkheet tsayche, un tii hon sich net xpasich aan kextelt wii ich keprilt hon. Wëns mich net kuut aan waar, hon se mich aach mit anere tinge keholef, soo wii te khare wexe, tinge khaafe, un fer mich khoche. Tii hon aach ofts mit mich kepeet. In te ‘unruyche tsayte’, hon se mich ketsaycht tas se mayn woere froynte un priiter waare.” (Xpr. 17:17)
YEESUS PRILT WEECHE TI ANERE
10. Pexrayp ti ewënte in Lukas 19:36-40 un was tëm noo pasiirt is.
10 Am 9te nisan fom yoerkang 33 N.K., is Yeesus tsu Yeruusalem kang. Wii eyer ticht pay te xtat waar, hon fiile layt sayn mantele ufm weech foer tëm keleet fer se tsayche tas se iim wii kheenich aan kenom hate. Tas waar sicher een froo xtun kewees! (Lees Lukas 19:36-40.) * Tes weeche, was neekst pasiirt is, hot im xtant tëm sayn tisipele ferwunert. “Wii [Yeesus] ticht pay te xtat khom is, hot eyer se kesiin un hot weeche tii keprilt.” Mit treene in sayn aue, hot Yeesus kexproch iwer ti xrekliche tinge woo teete klaych tsu Yeruusalem sayn pewooner pasiire. (Luk. 19:41-44)
11. Warom hot Yeesus keprilt weeche ti layt woo in Yeruusalem keleept hon?
11 Warom waar Yeesus traurich opwool eyer soo kuut aan kenom kep is? Is wayl eyer wust tas ti meyerste yuute teete net ti kuute notisye fom Raych aan nëme. Tes weeche, teet Yeruusalem fernicht kepe; un ti yuute woo iwerleepe teete, teete sklaawe wëre. (Luk. 21:20-24) Es is xaat, awer wii Yeesus foer raus kesaat hot, hon ti meyerste layt tëm net aan kenom. Un woos tuu woonst? Tuun ti meyerste layt ti kuute notisye kuut aan nëme? Wën weenich layt tas mache, was khanst tuu mit Yeesus sayn treene lërne? Wole mer iwer 3 lisyoone xpreche.
12. Was tuun Yeesus sayn treene weeche Yeruusalem sayn pewooner uns iwer Yeehoowa lërne?
12 Yeehoowa khimert sich mit te layt. Yeesus sayn treene erinere uns iwer wii fiil Yeehoowa sich mit te layt khimere tuut. ‘Eyer winxt net tas yemant fernicht wërt, awer winxt tas se al sich peroye.’ (2 Phe. 3:9) Un wii khene mer tsayche tas mer ti anere liipe? Meyer mise wayter ti kuute notisye preetiche un uns aan xtrenge fer ti layt sayn hërts krayfe. (Mat. 22:39)
Soo wii Yeesus, ëner ti xtun woos tuu preetichst (Kuk ti apsetse 13-14.) *
13-14. Wii hot Yeesus mitlayt fer ti layt ketsaycht, un wii khene mer tiise kwaliteet noo mache?
13 Yeesus hot xtram kexaft aan te preetich aarwayt. Tee hot yeete keleechenheet penutst fer ti layt in lërne un soo hot eyer liip ketsaycht. (Luk. 19:47, 48) Warom hot eyer sich soo fiil aan kextrengt? Yeesus hot mitlayt fon te layt kexpiirt. Als mool, soo fiil layt wolte Yeesus sayn wërter heere tas tee un sayn tisipele khonte “soo kaar net ese”. (Mar. 3:20) Un een mool, wolt eene man mit Yeesus oomts xpreche un Yeesus hot tas kemacht. (Yoo. 3:1, 2) Ti meyerste layt woo Yeesus sayn wërter keheert hon, sin net tëm sayn tisipele kep. Awer tii al hon een kuut tsaye kriit. Hayt, meyer wole aach tas al ti kuute notisye heere. (Aph. 10:42) Awer fer tas hin kriin, im xtant mise mer ënere ti aat wii mer preetiche.
14 Say wilich fer ënerunge in te aat wiis tuu preetichst mache. Etliche layt teete kërn iwer ti kuute notisye heere; awer wën mer imer in te selwich xtun preetiche, im xtant tuun mer se net trefe. Een pyoneerin, woo Matilda heest, saat: “Ich un mayn man fersuuche in unerxiitliche xtune preetiche. Moynts frii, tuun mer in te kexefts pletse preetiche. Mitaachs, wën fiile layt uf te xtroos sin, tuun mer mit tëm puplikatsyoon khareche xafe. Foer nacht, fine mer mee layt tehëm.” Meyer mise preetiche net ploos wën es kuut fer uns is, awer aach in te xtune woo mer mee layt trefe tuun. Wën mer wilich sin fer tas mache, sicher tuut Yeehoowa froo mit uns wëre.
YEESUS PRILT WEECHE YEEHOOWA SAYN NAAME
Soo wii Yeesus, hal tsu Yeehoowa aan wëns tuu unruych pist (Kuk ti apsetse 15-17.) *
15. Tëm noo Lukas 22:39-44, was is in te letst nacht fon Yeesus sayn leepe pasiirt?
15 In te nacht fon 14te nisan fon 33 N.K., is Yeesus tsu te Xetsëmani kaate kang. Tat hot eyer sayn hërts tsu Yeehoowa uf kemacht. (Lees Lukas 22:39-44.) * In tiise xtun, hot eyer “aan kehal mit fiile krayxe un treene”. (Hep. 5:7) Iwer was hot Yeesus kepeet in te nacht foer sayn toot? Tee hot kraft fer Yeehoowa ferlangt fer troy tsu tëm plaype un fer sayn wile mache. Yeehoowa hot Yeesus sayn hërtslich kepeet keheert un hot een engel kexikt fer sayn Soon ferxtërke.
16. Warom waar Yeesus unruych wii eyer am peete waar im Xetsëmani kaate?
16 Warom hot Yeesus keprilt wii eyer am peete waar im Xetsëmani kaate? Kewis waar eyer unruych wayl ti layt teete tëm siin wii yemant woo khee respekt tsu Kot sayn naame ketsaycht hot. Tee hot sich aach ketanke kemacht weeche sayn kroos flicht: troy tsu Yeehoowa plaype un Kot sayn naame sauwer mache. Machst tuu aach een propleem mit woo es xweyer fer tich lost troy tsu Yeehoowa plaype? Tan, was khanst tuu mit Yeesus sayn treene lërne? Wole mer iwer 3 anere lisyoone xpreche.
17. Was lërne mer mit Yeehoowa sayn antwort fer Yeesus sayn hërtsliche kepeete?
17 Yeehoowa heert tich wëns tuu tsu tëm aan halst. Yeehoowa hot Yeesus sayn hërtsliche kepeete keheert. Warom? Wayl tas haupste fer Yeesus waar troy tsu Yeehoowa plaype un tëm sayn naame sauwer mache. Yeehoowa tuut unser kepeete aach antworte wën tas haupste fer uns is troy tsu tëm plaype un tëm sayn naame sauwer mache. (Psal. 145:18, 19)
18. Wii soo is Yeesus een froynt woo uns ferxteen khan?
18 Yeesus ferxteet was mer xpiire. Wën mer unruych sin weeche een propleem, was uns fiil helfe khan is een froynt woo etwas eenliches mit kemacht hot — yemant woo ferxteet wii mer uns xpiire. Yeesus is soo een sort froynt! Tee wees wii es is sich xwach xpiire un hilef prayche. Tee ferxteet unser xwacheete un tee tuut mache tas mer hilef kriin “in te richtich tsayt”. (Hep. 4:15, 16) Soo wii Yeesus ti hilef fon een engel aan kenom hot in tëm Xetsëmani kaate, mise mer aach wilich sin fer Yeehoowa sayn hilef aan nëme. Tas khan khome torich een puplikatsyoon, een wiiteo, een reet orer torich een ufmuutich pesuuch fon een elteste orer een aner pruuter orer xwester.
19. Wii khanst tuu kraft kriin? Kep een payxpiil.
19 Yeehoowa kept tich tëm “sayn friit”. Wii tuut Yeehoowa uns ferxtërke? Wën mer peete, kriin mer “Kot sayn friit, woo keet iwer ales woo ti mënxe ferxteen khene”. (Fili. 4:6, 7) Te friit woo mer fon Yeehoowa kriin, peruycht unser hërts un helft uns taytlicher tenke. Kuk mool was Luz saat, een xwester woo kemërkt hot wii tas wërklich woer is: “Ofts xpiire ich mich aleen. Weeche tiise xpiirunge, tuun ich als mool tenke tas Yeehoowa mich net liipe tuut. Awer wën tas pasiirt, tuun ich klaych fer Yeehoowa saan wii ich mich xpiire. Tas kepeet helft mich mayn xpiirunge unich kontrol hale.” Soo wii Luz sayn speryens tsaycht, khene mer friit torich ti kepeete fine.
20. Was hon mer fon Yeesus sayn treene kelërnt?
20 Iwer Yeesus sayn treene lërne hot uns fiil ketreest un mer hon fiile lisyoone kelërnt. Meyer hon kesiin tas mer mise helfe tii woo yemant im toot ferloer hon; un meyer khene uns aach sicher sin tas Yeehoowa un Yeesus uns helfe tuun wën meyer tas mit mache. Meyer hon aach kelërnt tas mer mise mitlayt tsayche wën mer preetiche un in lërne; soo tuun mer Yeehoowa un Yeesus noo mache, woo tiise xeen kwaliteet tsayche. Meyer hon aach kesiin tas Yeehoowa un Yeesus ferxteen unser xwacheete un wii mer uns xpiire un tii tuun uns helfe wayter troy plaype. Wole mer wayter aan wëne ales was mer in tiise artikel kelërnt hon, pis te taach wën Yeehoowa sayn wunerlich ferxpreche erfiilt un “yeete treene fon [unser] aue ap trokne” tuut! (Apo. 21:4)
LIIT 120 Seja humilde como Jesus
^ Yeesus hot als mool keprilt. In tiise artikel, tuun mer iwer 3 situatsyoone xpreche woo Yeesus keprilt hot un was mer khene too temit lërne.
^ Etliche naame waare keënert.
^ (Yoohan 11:32-36) Tan is Maria tsum plats khom woo Yeesus waar. Wii se tëm kesiin hot, hot se sich foer tëm kepikt un kesaat: “Hër, wëns tuu too hiir weyerst, weyer mayne pruuter net kextorep.” 33 Yeesus hot kesiin tas tii un ti yuute mit tëne am prile waare. Tas hot tëm tiif aan kekrif un tee is unruych kep. 34 Tee hot kefroot: “Woo hot teyer tëm hin keleet?” Tii hon keantwort: “Khom Hër, un tuu siist.” 35 Un Yeesus hot aan kefang se prile. 36 Tes weeche, hon ti yuute kesaat: “Kuk mool wii fiil hot eyer tëm keliipt!”
^ Kuk tas puuch Estudo Perspicaz das Escrituras, wolum 2, sayt 96.
^ (Lukas 19:36-40) Wii eyer foran kang is, hon se sayn mantele ufm weech keleet. 37 Soo wii eyer ticht khom is paym weech woo fon Oliiwe Përich runer keet, sin ti kanse tisipele froo kep un tii hon aan kefang Kot loope mit hart xtim weeche al ti wunere woo se kesiin hate. 38 Tii hon kesaat: “Keseechent is tee woo wii Kheenich in Yeehoowa sayn naame khomt! Friit im himel un hërlichkheet oowe in te heech!” 39 Awer etliche fariseer woo tswixich tas folek waare hon tëm kesaat: “Leerer, tisipliniir tayn tisipele.” 40 Awer tee hot keantwort: “Ich saan aych: wën tii ruych plaype teete, teete ti xteen xraaye.”
^ (Lukas 22:39-44) Wii tee raus kang is, is tee, wii tee keweent waar, tsum Oliiwe Përich kang, un ti tisipele sin tëm aach noo kang. 40 Wii se tsum plats hin khom sin, hot tee fer tëne kesaat: “Tuut wayter peete, tas teyer net in fersuuchunge falt.” 41 Un tee is fon tëne wech kang soo wayt wii ma een xteen xmayse khan. Tat, hot eyer sich kekniit un hot aan kefang se peete, 42 un saan: “Fater, wëns tuu wilst, tuu te khelich fon mich wech hoole. Awer tas tayn wile kemacht wërt, net mayns.” 43 Tan is een engel fom himel fer tee tsum foer xayn khom un hot tee kextërkt. 44 Awer tee is soo ëngstlich keplip tas eyer noch mee kepeet hot; un tëm sayn xwits sin wii pluut trope kep woo ufm pootem kefal sin.
^ PILT AUSLEYUNG: Yeesus hot Maria un Marta ketreest. Meyer khene aach ti layt treeste woo yemant im toot ferloer hon.
^ PILT AUSLEYUNG: Yeesus hot Nikotemus oomts in kelërnt. Meyer mise ti Piipel mit te layt xtutiire wëns peser fer tëne is.
^ PILT AUSLEYUNG: Yeesus hot kraft im kepeet ferlangt fer troy tsu Yeehoowa plaype. Wën mer proope mit mache, mise mer tas selwiches mache.