1-2. (a) Warom ferwunert es uns net tas mer propleeme mit mache? (b) Was tuun mer in tiise artikel siin?

 WII Yeehoowa sayn folek, es ferwunert uns net wën mer propleeme mit mache. Meyer erinere uns was ti Piipel saat: “Meyer mise fiile xwiirichkheete mit mache, eep mer im Kot sayn Raych khome.” (Aph. 14:22) Meyer wise aach tas etliche fon unser propleeme wëre ploos resolwiirt in Kot sayn nay welt; tat, kept es “kheen toot mee, kheen traurichkheet, kheen krayxe un kheen phayn”. (Apo. 21:4)

² Yeehoowa tuut uns net fon te propleeme xitse. Awer tee tuut uns helfe tëne aus hale. Mërk mool was te aphostel Phaul fer ti kriste in Roma kesaat hot. Eyerst hot eyer kexproch iwer etliche propleeme woo tee un sayn priiter mit kemacht hon. Tan hot eyer kexrip: “Weeche tee woo uns keliipt hot, khome mer torich tas ales triwer wech.” (Rom. 8:35-37) Tas tsaycht tas Yeehoowa khan tich helfe soo lang wiis tuu een propleem mit machst. Wole mer siin wii Yeehoowa Yoosef keholef hot un wii eyer tich helfe khan.

3. Was fer ënerung is uf een mool in Yoosef sayn leepe pasiirt?

³ Es waar kans taytlich tas Yaakop hot sayn soon Yoosef aarich keliipt. (Xee. 37:3, 4) Tes weeche Yaakop sayn elter soone hon fiil nayt fon Yoosef kriit. Wii se een xans hate, hon se Yoosef fer een krup mityaniitixe kexefts mëner  ferkhaaft. Tiise kexefts mëner hon Yoosef hunerte kilometer wech kenom, pis am Ejipt. Tat is eyer noch mool ferkhaaft kep, yets fer Potifaar, xëf fon te mëner woo Faraoo kexitst hon. Mërk mool wii fiks Yoosef sayn leepe sich keënert hot. Eene taach waar eyer te liipe soon fon sayn fater; te aner, een sklaaw im Ejipt! (Xee. 39:1)

4. Wii khente mer een eenliche propleem mit mache wii Yoosef sayns?

⁴ Ti Piipel saat tas xlechte tinge pasiire fer ale kaar. (Ekl. 9:11) Als mool mache mer xwiirichkheete mit woo ‘keweenlich sin fer ti mënxe’ — es wil saan, propleeme woo ale mënxe mit mache. (1 Kor. 10:13) Orer im xtant layte mer wayl mer Yeesus sayn tisipele sin. Tsum payxpiil, ti anere khene uns ferxpote, sich keeche uns xtele orer soo kaar uns yachte weeche unser klaape. (2 Tim. 3:12) Ekaal was tuu mit machst, Yeehoowa khan tich helfe. Wii hot eyer Yoosef keholef?

5. Ales was Yoosef kemacht hot, is richtich ap kelaaft. Was hot Potifaar too temit kemërkt? (Xeenesis 39:2-6)

⁵ Lees Xeenesis 39:2-6. b Potifaar hot kemërkt tas Yoosef een xlaue un flaysiche khërl waar. Tee wust aach warom. Tee hot kesiin tas “Yeehoowa Yoosef keholef hot in ales was eyer kemacht hot”. Mit te tsayt, hot Potifaar Yoosef wii sayn perseenliche tiiner in kesetst. Yoosef solt aach tas kanse haus fon Potifaar uf phase. Potifaar is too teweeche raych kep. c

6. Wii meecht Yoosef sich kexpiirt hon iwer sayn situatsyoon?

⁶ Xtel tich mool foer wii Yoosef sich kexpiirt hot. Was fer waar Yoosef sayn kreeste wunx? Wolt eyer hon tas Potifaar tëm mërke un peloone teet? Nee. Tsiimlich sicher wolt eyer pefrayt wëre un tsurik tsu sayn fater keen.  Am ën, opwool Yoosef fiile priwilëje in Potifaar sayn haus hat, waar eyer imer noch sklaaw fon een man woo Yeehoowa net aan kepeet hot. Kot hot net kemacht Potifaar Yoosef pefraye. Un Yoosef sayn situatsyoon is noch fiil xlimer kep.

7. Wii is Yoosef sayn situatsyoon yeete taach xlimer kep? (Xeenesis 39:14, 15)

⁷ Tëm noo Xeenesis 39, Potifaar sayn fraa wolt sich mit Yoosef leye, un noo un noo hot se tëm fersuucht tas mache. Yeetes mool hot Yoosef ‘nee’ kesaat. Tsum xlus, is se aarich pees mit Yoosef kep un hot kesaat tas eyer fersuucht hat tii iwerfale. (Lees Xeenesis 39:14, 15.) d Wii Potifaar tas tsum wise kriit hot, hot eyer Yoosef in te katee kexmis, un tee is tat phaar yoore keplip. (Xee. 39:19, 20) Wii waar ti katee kewees? Tas hepreeyxe wort woo Yoosef fer “katee” penutst hot, khan aach petayte “sistërn” orer “loch”. Tas tsaycht tas es tsiimlich sicher tunkel waar un tas eyer khee hofnung kexpiirt hot. (Xee. 40:15, noote) Ti Piipel tuut aach tsayche tas, fer een tsayt, waare Yoosef sayn fiis un hals mit khete ferpun. (Psal. 105:17, 18) Yoosef sayn situatsyoon is yeete taach xlimer kep — fon een sklaaw aan weem sayn hër ketraut hot, tsu een inkexpërtne, woo khee weyert hat.

8. Soo kaar wën ti xwiirichkheet xlimer wërt, fon was khene mer uns sicher sin?

⁸ Host tuu xon mit keleept een situatsyoon woo imer xlimer kep is opwool tayn hërtsliche kepeete? Tas khan pasiire. Yeehoowa tuut uns net xitse fon te proope in een welt woo fon Satanaas rechiirt is. (1 Yo. 5:19) Awer tuu khanst tich sicher sin tas Yeehoowa mërkt was tuu mit machst un tee khimert sich mit tich. (Mat. 10:29-31; 1 Phe. 5:6, 7) Tee hot aach ferxproch: “Ich tuun tich nii lose un ich tuun tich nii im xtich lose.” (Hep. 13:5) Yeehoowa khan tich helfe aus hale soo kaar wëns tuu khee hofnung fer tayn situatsyoon siist. Wole mer siin wii tas mit Yoosef pasiirt is.

9. Was tsaycht tas Yeehoowa mit Yoosef waar ti tsayt woo eyer in te katee keplip is? (Xeenesis 39:21-23)

⁹ Lees Xeenesis 39:21-23. e Soo kaar torich ti xweyer tsayt woo Yoosef in te katee waar, hot Yeehoowa tëm keholef. Wii? Mit te tsayt, hot te xëf fon te katee, soo wii Potifaar, aan kefang uf Yoosef traue un tëm respektiire. Tee hot Yoosef in kextelt fer ti anere inkexpërtner uf phase. Ti Piipel saat tas “te xëf fon te katee hot sich mit kaar niks ketanke kemacht iwer was Yoosef uf kephast hot”. Yets hat Yoosef etwas fer se mache un sich konsentriire: een nutslich aarwayt. Tas waar een unkewaartne ënerung! Wii khent yemant, woo akusiirt kep is fon fersuuche ti fraa fon een wichtiche man iwerfale, soo een xtel kriin? Es kept ploos een antwort. Xeenesis 39:23 saat: ‘Yeehoowa waar mit Yoosef un hot tëm keholef in ales was eyer kemacht hot.’

10. Meecht Yoosef kexpiirt hon tas Yeehoowa tëm in ales am helfe waar? Lee tas aus.

¹⁰ Fersuuch tich noch mool foer xtele wii Yoosef sich kexpiirt hot. Noo falx akusiirt un  in kexpërt wëre, mënst tuu tas eyer kexpiirt hot tas Yeehoowa tëm in ales am helfe waar? Was fer waar Yoosef sayn kreeste wunx? Waar te xëf fon te katee kefale? Nee. Sicher wolt Yoosef pefrayt wëre. Tee hot soo kaar fer een aner inkexpërtne ferlangt, woo klaych pefrayt weyer, mim Faraoo iwer tëm xpreche, tas tee khont aus te xreklich katee khome. (Xee. 40:14) Awer te man hot net klaych mit Faraoo kexproch. Tes weeche is Yoosef noch 2  yoore in te katee keplip. (Xee. 40:23; 41:1, 14) Noch soo, hot Yeehoowa tëm wayter keholef. Wii?

11. Was fer apiliteet hot Yeehoowa fer Yoosef kep, un wii hot tas keholef Kot sayn tsiil trefe?

¹¹ Wii Yoosef noch in te katee waar, hot Yeehoowa 2 treem fer Faraoo kep. Te kheenich fom Ejipt is unruych kep un wolt wise was se petayt hon. Wii eyer raus kriit hot tas Yoosef ti apiliteet hat fer treem aus leye, hot eyer kexikt tëm ruufe. Mit Yeehoowa sayn hilef, hot Yoosef ti treem aus keleet un Faraoo ferwunert mit sayn praktixe aanreete. Faraoo hot erkhënt tas Yeehoowa Yoosef keholef hot; tes weeche hot eyer tëm in kesetst wii ese atministratoer fom kanse Ejipt. (Xee. 41:38, 41-44) Xpeeter is een kroos hungernoot pasiirt in Ejipt un Kanaan, tas lant woo Yoosef sayn familye keleept hot. Yoosef khont yets sayn familye rete un soo ti foerkhomer fon tëm Mesias xitse.

12. Wii hot Yeehoowa Yoosef keholef?

¹² Tenk aan te unkeweenliche tinge woo in Yoosef sayn leepe pasiirt sin. Weer hot kemacht tas Potifaar acht kepe teet tsu Yoosef, een keweenliche sklaaw? Weer hot kemacht tas te xëf fon te katee sich mit Yoosef kefale teet, woo ploos een inkexpërtne waar? Weer hot fer Faraoo treem kep, woo tëm ëngstlich kelos hon? Weer hot fer Yoosef ti apiliteet kep fer ti treem aus leye? Weer hot Faraoo uf kemuut Yoosef wii ese atministratoer fom Ejipt in setse? (Xee. 45:5) Es is taytlich tas Yeehoowa hot Yoosef in ales keholef. Opwool Yoosef sayn priiter tëm um pringe wolte, hot Yeehoowa ti situatsyoon keënert tas Eyer khont sayn wile erfiile.

13. Meecht Yeehoowa kontroliire ales was mit uns pasiirt? Lee tas aus.

¹³ Was lërne mer fon Yoosef sayn kexicht? Meecht Yeehoowa kontroliire ales was mit  uns pasiirt? Tuut eyer yeete ewënt fon unser leepe lënke, soo tas imer wën was xlechtes pasiirt, een kuute uersach hiner traan is? Nee. Ti Piipel tuut tas net in lërne. (Ekl. 8:9; 9:11) Noch soo, hon mer tiise sicherheet: wën mer xwiirichkheete mit mache, Yeehoowa mërkt tas un tee heert unser hërtsliche kepeete fer hilef kriin. (Psal. 34:15; 55:22; Isa. 59:1) Un noch: Yeehoowa khan uns helfe ti xwiirichkheete aus hale. Wii?

14. Wii tuut Yeehoowa uns helfe wën mer xwiirichkheete mit mache?

¹⁴ Fer uns helfe, tuut Yeehoowa, tsum payxpiil, uns treeste un uf muute. Ofts macht eyer tas kraat in te richtich tsayt. (2 Kor. 1:3, 4) Tas is mit Eziz pasiirt, een pruuter in Turkmenistan. Tee is kexikt kep 2  yoore in te katee plaype weeche sayn klaape. Tee saat: “Im taach fon mayn kericht, hot een pruuter mich Isaiias 30:15 ketsaycht, woo saat: ‘Ayre kraft khomt fon in ruu plaype un aan mich traue.’ Tiise wersikel hot mich keholef in ruu plaype un uf Yeehoowa in ales traue. Too triwer noo tenke hot mich keholef ti kans tsayt woo ich inkexpërt waar.” Hot Yeehoowa tich xon ketreest un uf kemuut kraat in te xtun woos tuu es te meyerst hon must?

15-16. Was lërnst tuu mit Tori sayn speryens?

¹⁵ Ofts tuun mer ploos mërke wii Yeehoowa uns keholef hot een xwiirichkheet aus hale, noo tas es xon rom is. Een xwester, woo Tori heest, hot kemërkt wii tas woer is. Sayn soon, Mason, hot 6  yoore keeche een kreeps kekhëmpft, pis eyer kextorep is. Kewis is Tori mechtich traurich kep. Tii saat: “Wii een muter, ich tenke tas es kept khee propleem orer xwiirichkheet woo khent kreeser fer mich sin. Siin tayn khint layte is xlimer wii eene selepst tas mit mache; un ich sin mich sicher tas anere eltere tuun mit mich xtime.”

 ¹⁶ Opwool ti xwiirichkheet aarich xlim waar, hot Tori xpeeter triwer noo ketenkt aan wii Yeehoowa se keholef hot tas aus hale. “Wën ich tsurik kuke — saat se —, khan ich siin wii Yeehoowa mich keholef hot torich ti krankheet fon mayn soon. Tsum payxpiil, soo kaar wii Mason tsu xlecht traan waar fer pesuuche kriin, hon priiter un xwestere 2 xtune kefaart pis tsum krankehaus. Es waar imer yemant tat, fërtich un wilich fer uns helfe. Ti priiter un xwestere hon uns aach keholef tas neetiches hon. Soo kaar in te xweyerste tsayte, hot uns niks kefeelt.” Yeehoowa hot fer Tori un Mason kep was se praychte fer aus se hale. (Kuk te khaste “ Yeehoowa hot uns kep kraat was mer praychte”.)

17-18. Was tuut uns helfe Kot sayn hilef torich ti xweyere tsayte mërke un petanklich too teweeche sin? (Psalm 40:5)

¹⁷ Lees Psalm 40:5. f Een mënx woo een përich ruf krapelt, wil pis aan te khip hin khome. Awer es kept fiile pletse im weech woo eyer khan xtil hale fer ti xeene tinge peopachte. Kraat soo, hool tich imer tsayt fer xtil hale un triwer noo tenke aan wii Yeehoowa tich am helfe is torich ti xwiirichkheete. Am ën fon yeete taach, froo tich: ‘Wii hot Yeehoowa mich hayt keseechent? Opwool te propleem net faart kang is, wii is Yeehoowa mich am helfe tas aus hale?’ Fersuuch ferweenichst een tings fine woo Yeehoowa kemacht hot fer tich helfe.

¹⁸ Sicher tuust tuu peete tas tayn propleem rom keet. Tas is tsum ferxteen un is net ferkheert. (Fili. 4:6) Awer meyer mise aach mërke ti seechen woo mer xon yets hon, wayl am ën, Yeehoowa ferxprecht uns ferxtërke un helfe aus hale. Tes weeche say imer petanklich fer Yeehoowa sayn hilef. Wëns tuu tas machst, tuust tuu Yeehoowa sayn hant siin torich ti xweyere tsayte, soo wii Yoosef tas kesiin hot. (Xee. 41:51, 52)