XTUUTYUM ARTIKEL 4
Yeehoowa seechent unser aanxtrengung fer tas Aantenke fayre
“Macht tas imer fer aan mich aan se tenke.” (LUKAS 22:19)
LIIT 19 Tas oomtmal fom Hër
WAS TUUN MER SIIN? a
1-2. Warom keen mer tsum Aantenke yeetes yoer?
UNKEFEER 2.000 yoore tsurik, hot Yeesus sayn leepe fer uns kep. Tas hot te weech uf kemacht fer tas eewiche leepe kriin. In te nacht foer sayn toot, hot Yeesus sayn tisipele kexikt sayn liipliche opfer erinere. Tii solte tas mache torich een keweenlich fersamlung mit proot un wayn. (1 Kor. 11:23-26)
2 Meyer heere Yeesus sayn kepoot aan wayl mer tëm aarich fiil liipe. (Yoo. 14:15) Yeetes yoer, in te woche foer un noo tëm Aantenke, tsayche mer unser petanklichkheet fer was Yeesus kemacht hot. Meyer mache tas wën mer triwer noo tenke, mit kepeet, iwer was sayn toot fer ti mënxe petayt. Mit frooheet, mache mer mee in te preetich aarwayt un fersuuche soo fiil layt wiis meechlich is in laate fer mit uns in tiise fersamlung sin. Un kewis, sin mer pextimt niks lose uns um hale im Aantenke keen.
3. Was tuun mer in tiise artikel siin?
3 In tiise artikel, tuun mer 3 aate siin wii Kot sayn folek sayn pestes macht fer tas Aantenke fon Yeesus sayn toot fayre: (1) tii tuun tas Aantenke fayre tëm noo was Yeesus in kelërnt hot; (2) tii laate anere in fer tsum Aantenke keen un (3) tii fayre tas Aantenke soo kaar in xweyere situatsyoone.
MEYER FAYRE TAS AANTENKE TËM NOO WAS YEESUS IN KELËRNT HOT
4. Was fer frooche sin yeetes yoer im Aantenke keantwort un warom sole mer fiil weyert fer tiise woerheete kepe? (Lukas 22:19, 20)
4 Yeetes yoer, im Aantenke, heere mer een piiplix reet woo taytliche antworte fer phaar frooche kept. Tsum payxpiil: Warom prayche ti mënxe een fray khaaf opfer? Wii khan te toot fon eene man ti sinte fon fiile mënxe teke? Was tuun tas proot un te wayn representiire? Weer sol fom proot ese un fom wayn trinke? (Lees Lukas 22:19, 20.) b Meyer tuun aach triwer noo tenke aan te seechen woo tii, woo ti eyertlich hofnung hon, waarte khene. (Isa. 35:5, 6; 65:17, 21-23) Meyer sole fiil weyert fer al tiise woerheete kepe. Pilyoone layt tuun se kaar net ferxteen un wise net wii wichtich Yeesus sayn opfer is. Un tii tuun aach Yeesus sayn toot net fayre soo wii eyer sayn tisipele in kelërnt hot. Warom pasiirt tas?
5. Noo tas ti meyerste aphostele kextorep sin, wii hon ti layt aan kefang Yeesus sayn toot fayre?
5 Noo tas ti meyerste fon Yeesus sayn aphostele kextorep sin, sin falxe kriste teel fon te kemaynt kep. (Mat. 13:24-27, 37-39) Tii hon “fertreetne tinge [kesaat] fer ti tisipele hinich sich nëme”. (Aph. 20:29, 30) Eene fon te “fertreetne tinge” woo se kesaat hon, is tas Yeesus sayn khërper net een mool keopfert kep is “fer ti sinte fon fiile layt wech nëme”, soo wii ti Piipel saat. Xtats tas, hon se in kelërnt tas Yeesus sayn opfer must noo un noo kemacht wëre. (Hep. 9:27, 28) Hayt fiile eerliche layt klaape aan tiise falx inlërnung. Tii keen yeete woch — orer als mool, yeete taach — tsum khërich fer Yeesus sayn opfer fayre. In te Katoolix Khërich is tas wii “Mes Opfer” kenënt. c Ti layt in anere relichyoone tuun Yeesus sayn opfer net soo ofts fayre, awer tii ferxteen net kenau was tas petayt. Etliche khene sich frooe: ‘Tuut Yeesus sayn toot wërklich petayte tas mayn sinte fertsayt wëre khene?’ Als mool, tuun ti layt sich tas frooe wayl se influentsiirt sin fon mënxe woo klaape net tas Yeesus sayn opfer khan wërklich sinte fertsaye. Wii tuun Yeesus sayn woere nookeener ti layt helfe ti woerheet too triwer lërne?
6. Was hot een krup Piipel xtutënte ferxtan in 1872?
6 In 1870, hot een krup Piipel xtutënte, woo fon Charles Taze Russell kefiirt waar, aan kefang een tiif xtuutyum fon te Piipel mache. Tii wolte wise was Yeesus sayn opfer wërklich petayt hot un wii sayn opfer solt kefayert sin. In 1872, hon se ferxtan tas Yeesus hot een fray khaaf opfer fer ti kanse mënxe kemacht. Tii hon net, was se kelërnt hon, ploos fer sich selepst pehal. Xtats tas, hon se tiise woerheet fer ti layt pekhant kemacht torich piicher, tsaytunge un piichelcher. Un klaych tëm noo, soo wii ti eyerste kriste, hon se aan kefang ploos een mool tas yoer sich samele fer tas Aantenke fayre.
7. Was fer nutse kriin mer fon te unersuuchung woo ti eyerste Piipel xtutënte kemacht hon?
7 Hayt kriin mer fiil nutse fon te unersuuchung woo tiise eerliche kriste kemacht hon fiile yoore tsurik. Wii soo? Mit Yeehoowa sayn hilef, ferxteen mer was tas fray khaaf opfer is un was fer nutse tas pringt fer ti kanse mënxe. (1 Yo. 2:1, 2) Meyer hon aach kelërnt tas ti Piipel 2 hofnung kept fer ti mënxe woo Yeehoowa kefale: fer etliche layt, unxtërplich leepe im himel; fer milyoone anere layt, eewiche leepe too uf te eyert. Wën mer tenke aan wii fiil Yeehoowa uns liipt un wii fiil nutse mer kriin fon Yeesus sayn fray khaaf opfer, xafe mer uns tichter pay Kot. (1 Phe. 3:18; 1 Yo. 4:9) Soo wii unser troye priiter in te ferkangne yoore, tuun mer ti layt in laate fer tas Aantenke fayre in te aat wii Yeesus in kelërnt hot.
MEYER LAATE TI LAYT IN FER TAS AANTENKE
Was khanst tuu mache fer mee in te kampanya fer ti layt tsum Aantenke in laate, xafe? (Kuk ti apsetse 8-10.) i
8. Was tuut Kot sayn folek mache fer ti anere tsum Aantenke in laate? (Kuk tas pilt.)
8 Torich xon fiile yoore, tuut Yeehoowa sayn folek ti layt in laate fer tas Aantenke. Xon in 1881, hot een pekhantmachung in Te Wachthorm, ti priiter in te Fereenichte Xtaate fon Amërika in kelaat fer sich fersamele im haus fon een pruuter in Pennsylvania. Xpeeter, hot yeete kemaynt tas Aantenke kehal. In mërts fon 1940, is es fer ti puplikatoore kesaat kep tas tii khonte al in sayn teritooryum in laate woo interes ketsaycht hon. In 1960, waar tas eyerste mool woo Petël inlaatunge aus ketrukt hot un fer ti kemaynte kexikt hot. Fon tiise tsayt aan, pilyoone inlaatunge sin aus keteelt kep. Warom tuun mer uns soo fiil aan xtrenge fer ti anere in laate?
9-10. Weer kriit nutse wën mer unser pestes mache fer ti layt tsum Aantenke in laate? (Yoohan 3:16)
9 Een uersach warom mer ti layt in laate fer tas Aantenke mit uns fayre, is wayl mer wole hon tas tii woo tas eyerste mool khome, ti woerheet iwer was Yeesus un Yeehoowa fer uns kemacht hon, wise. (Lees Yoohan 3:16.) d Meyer hofe tas was se im Aantenke siin un heere tëne uf muute tuut mee lërne un Yeehoowa tiine. Awer sin net ploos tii woo nutse fom Aantenke kriin.
10 Meyer laate aach in tii woo Yeehoowa net mee tiine. Meyer mache tas fer tëne erinere tas Kot se noch liipe tuut. Fiile tuun unser inlaatung aan nëme, un es frayt uns aarich fiil wën mer tëne siin. Wën se khome, tuun se sich traan tenke wii kuut hon se sich kexpiirt wii se Yeehoowa friier ketiint hon. Kuk mool Monica e sayn payxpiil. Torich ti pantemii fon coronavirus, hot se aan kefang noch mool preetiche. Noo tas se tsum Aantenke fon 2021 kang is, hot se kesaat: “Tiise Aantenke waar wërklich was ekstras fer mich. Tas is tas eyerste mool in 20 yoore woo ich khont fer ti layt preetiche un tëne fer tas Aantenke in laate. Ich hon mayn pestes kemacht fer ti layt in laate, wayl ich sin aarich petanklich fer was Yeehoowa un Yeesus fer mich kemacht hon.” (Psal. 103:1-4) Ekaal ep se tas aan nëme orer net, mache mer unser pestes fer ti layt tsum Aantenke in laate, wayl mer wise tas Yeehoowa fiil weyert fer unser aanxtrengung kept.
11. Wii seechent Yeehoowa unser aanxtrengung fer ti layt tsum Aantenke in laate? (Axeu 2:7)
11 Yeehoowa tuut unser aanxtrengung fer ti layt tsum Aantenke in laate, fiil seechne. In 2021, opwool ti krënse woo weeche ti pantemii fon coronavirus kextelt kep sin, 21.367.603 layt sin tsum Aantenke khom. Tas waar ti kreest numer layt woo xon khom is! Tas is neekst 2 un halpe mool ti numer Yeehoowa sayn Tsayer uf te kans welt. Kewis numere sin net tas haupste fer Yeehoowa: tee khimert sich mit yeete eene woo khomt. (Luk. 15:7; 1 Tim. 2:3, 4) Meyer khene uns sicher sin tas Yeehoowa penutst unser aarwayt fer ti layt in laate, fer uns helfe ti layt fine woo een kuut hërts hon. (Lees Axeu 2:7.) f
MEYER FAYRE TAS AANTENKE SOO KAAR WËN TAS XWEYER FER UNS IS
Yeehoowa seechent unser aanxtrengung fer tsum Aantenke keen (Kuk te apsats 12.) j
12. Was khan es xweyer fer uns lose tas Aantenke fayre? (Kuk tas pilt.)
12 Yeesus hot foer raus kesaat tas, in te letste taache, teete mer ale sorte xwiirichkheete mit mache — wii opositsyoon fon te familye, yachtung, kriiche, krankheete un soo wayter. (Mat. 10:36; Mar. 13:9; Luk. 21:10, 11) Als mool, khene tiise xwiirichkheete es xweyer fer uns lose tas Aantenke fayre. Was hon etliche fon unser priiter un xwestere kemacht fer torich tiise propleeme triwer wech khome? Un wii hot Yeehoowa se keholef?
13. Wii hot Yeehoowa Artem sayn koraaj un pextimung fer tas Aantenke fayre, keseechent?
13 Inxpërtnung. Unser priiter woo in te katee sin weeche sayn klaape, mache was se khene fer tas Aantenke fayre. Kuk mool Artem sayn payxpiil. In 2020, in te tsayt fom Aantenke, waar eyer inkexpërt in een sëla woo 17 kwatrat meter hat. In tiise sëla, hon se pis 5 mëner in kexpërt. Opwool eyer inkexpërt waar, khont Artem etliche tinge samele fer im Aantenke penutse. Un tee hot kepleent ti reet fom Aantenke fer sich selepst hale. Awer ti anere mëner in sayn sëla hon kerauch un waare imer trekiche wërter am penutse. Was hot Artem kemacht? Tee hot tëne ferlangt ep se khonte noo lose se rauche un trekiche wërter penutse torich 1 xtun. Artem hot sich ferwunert wii ti mëner too temit kextimt hon. Tee saat: “Ich hon se kefroot ep se wolte iwer tas Aantenke wise.” Tii hon kesaat tas se wolte niks wise; awer noo tas se Artem kesiin un keheert hon tas Aantenke fayre, hon se tëm too triwer kefroot.
14. Wii hot Yeehoowa sayn folek tas Aantenke kefayert opwool ti pantemii fon coronavirus?
14 Ti pantemii fon coronavirus. Weeche ti pantemii, khont Yeehoowa sayn folek net tsum Aantenke perseenlich keen. Awer tas hot se net um kehal tas Aantenke fayre. g Kemaynte woo internet hate, hon tas torich wiiteokonferëns kemacht. Awer un ti milyoone woo khee internet hate? In fiile lënter, hon ti filyaale pleen kemacht tas ti layt khonte ti reet fom Aantenke torich ratyo heere orer im TV kuke. Un noch: etliche filyaale hon ti reet in mee wii 500 xprooche krawiirt. Soo, khonte soo kaar layt woo kans wech keleept hon, tas Aantenke fayre. Troye priiter hon ti krawatsyoone kenom fer ti layt woo in tiise pletse keleept hon.
15. Was lërnst tuu mim payxpiil fon een Piipel xtutëntin woo Sue heest?
15 Opositsyoon fon te familye. Fer etliche, tas is tas kreeste kefoer fer tas Aantenke fayre. Kuk mool tas payxpiil fon een Piipel xtutëntin woo Sue heest. In 2021, am taach foer tas Aantenke, hot Sue fer sayn Piipel leerin kesaat tas, weeche ti opositsyoon tehëm, teet se net tas Aantenke fayre. Ti leerin hot Lukas 22:44 fer Sue kelees. Tan hot se aus keleet tas, wën mer proope mit mache, mise mer Yeesus sayn payxpiil noo mache: mit Yeehoowa im kepeet xpreche un kans uf tëm traue. Im neekste taach, hot Sue tas proot un wayn in kericht un ti ekstra Moynts Aanpeetung im jw.org kekukt. Oomts, wii se aleen in sayn tsimer waar, hot se tas Aantenke torich telefoon kehoricht. Xpeeter, hot Sue fer sayn Piipel leerin kexrip: “Keeste host tuu mich fiil uf kemuut. Ich hon mayn pestes kemacht fer tas Aantenke fayre, un Yeehoowa hot mich keholef. Ich khan kaar net aus leye wii froo un petanklich ich sin.” Mënst tuu tas Yeehoowa tich helfe khan wëns tuu was eenliches mit machst?
16. Warom khene mer uns sicher sin tas Yeehoowa unser aanxtrengung seechne tuut fer tsum Aantenke keen? (Romaaner 8:31, 32)
16 Yeehoowa kept fiil weyert fer unser aanxtrengung fer tas Aantenke fon Yeesus sayn toot fayre. Meyer khene uns sicher sin tas eyer uns seechne tuut wën mer petanklichkheet tsayche fer ales was tee fer uns kemacht hot. (Lees Romaaner 8:31, 32.) h Soo wole mer pextimt sin tsum Aantenke tiise yoer keen. Un in te woche foer un noo tëm Aantenke, wole mer uns aan xtrenge fer mee fer Yeehoowa mache.
LIIT 18 Tanke fer tas fray khaaf opfer!
a Am tiinstaach, 4te april fon 2023, tuun milyoone layt uf te kans welt tas Aantenke fon Yeesus sayn toot fayre. Fiile wëre tat tas eyerste mool. Anere, woo noo kelos hon Yeehoowa tiine un net tsum Aantenke kang sin torich fiile yoore, wëre aach tat. Noch anere mise torich xwiirichkheete triwer wech khome fer se keen. Ekaal tayn situatsyoon, khanst tuu tich sicher sin tas Yeehoowa froo wërt wëns tuu tich aan xtrengst fer se keen.
b (Lukas 22:19, 20) Tee hot aach een proot kehool un ketankt. Too hot eyer es keproch un tëne kep, un hot kesaat: “Tas representiirt mayn khërper, woo fer aych kep wërt. Macht tas imer fer aan mich aan se tenke.” 20 Noo se ese, hot eyer aach tas selwiche mit tëm khelich kemacht. Un hot kesaat: “Te khelich petayt te naye pakt woo torich mayn pluut kemacht wërt, woo fer aych aus kexut wërt sin.
c Ti aanpeeter klaape tas, in te Mes Opfer, sin tas proot un te wayn tsu Yeesus sayn khërper un pluut keënert. Tii klaape tas Yeesus sayn khërper un pluut sin keopfert imer wën yemant een teel too temit hot.
d (Yoohan 3:16) Wayl Kot ti welt soo fiil keliipt hot, hot eyer sayn eensiche kepoerne Soon kep, tas yeete eene woo aan tëm klaapt net fernicht wërt, awer eewiche leepe kriit.
e Etliche naame waare keënert.
f (Axeu 2:7) “‘Un ich tuun ti kanse natsyoone xiitele, un ti weyertliche tinge fon ale natsyoone tuun rin khome; un ich tuun tiise haus mit hërlichkheet fol mache’, saat Yeehoowa fom militeer.
g Kuk ti artikele “Celebração de 2021” im jw.org.
h (Romaaner 8:31, 32) Tan, was khene mer too triwer saan? Wën Kot pay uns is, weer khan sich keeche uns xtele? 32 Wën eyer soo kaar sayn aychne Soon net kexoont hot, awer hot iim fer uns al ap kep, meecht eyer, mit sayn Soon, net kuuthërtslich al ti anere tinge fer uns kepe tuun?
