IN TE orixinaal xprooch, tas wort woo “waan” in te Piipel iwersetst is, khan iwer unerxiitliche sorte ween xpreche. (Aph. 8:28, 29, 38) Awer es siit aus tas te etioper uf een waan kereest hot woo kreeser waar wii ti ween woo penutst waare im kriich un in te xpringeray. Warom khene mer tas saan? Kuk mool 3 uersache.

Te etioper waar een wichtich ofitseer woo een lang rees kemacht hot. Tee waar “een hooche aankexteltner fon Kantase, kheenichin fon te etioper, woo sayn kanse raychtum uf kephast hot”. (Aph. 8:27) In te friirixe tsayte, was mer hayt khene wii Sutaan un een teel fon siit Ejipt, waare teel fon Etyoopya. Tsiimlich sicher hot te man net ti kans rees im selwiche waan kemacht un fiilaycht hot eyer fiile tinge mit kenom. Etliche ween woo ti layt im eyerste yoer hunert penutst hon fer se reese, hate 4 reete un aach een tek. Een komentaar iwer tas puuch Aphostele sayn Kexicht saat: “Tiise sort waan hat fiilaycht mee plats fer thaxe un anere neetiche tinge traan. Mit tiise sort waan, waars fiilaycht meechlich tas ti layt lënger reese mache teete un tas hot ti rees aach laychter kelos.”

Te etioper waar am leese wii Fiilip tëm ketrof hot. Ti Piipel saat tas “Fiilip is neewich te waan kexprung un hot keheert te eunuuk in hart xtim te profeet Isayas leese”. (Aph. 8:30) Ti ween woo penutst waare fer reese mache, sin net kepaut kep fer xnel wëre. Soo khont te etioper leese un Fiilip khont xnel kenuuch xpringe fer te waan tsu fuus erayche.

Te etioper hot “ferlangt tas Fiilip ruf xtaye solt un sich pay iim setse solt”. (Aph. 8:31) In te ween woo fer ti xpringeray kepaut waare, sin ti layt xteen keplip. Awer in tiise waan, woo kepaut waar fer se reese, waar een plats fer Fiilip un te etyoopixe eunuuk sich setse.

Tëm noo Aphostele sayn Kexicht kapitel 8 un anere pewaysunge, hon unser puplikatsyoone khërtslich ketsaycht te etyoopixe eunuuk uf een kroose waan, xtats een kleen waan woo penutst waar im kriich un in te xpringeray.