XTUUTYUM ARTIKEL 3
LIIT 124 Imer leaal sin
Yeehoowa helft tich torich ti xweyere tsayte
“[Yeehoowa] tuut aych fest mache.” (1 PHEETER 5:10)
WAS TUUN MER SIIN?
Was mer mache khene fer nutse fon Yeehoowa sayn hilef kriin torich ti xweyere tsayte.
1-2. Was fer sorte xwiirichkheete khene Yeehoowa sayn troye tiiner mit mache?
UNSER leepe khan sich fiks ënere noo een xlim ewënt. Tsum payxpiil: een troye pruuter woo Luis a heest, hot tsum wise kriit tas eyer kreeps hat. Te tokter hot tëm kesaat tas eyer ploos noch phaar moonate leepe teet. Monika un sayn man hate fiil se tuun in Yeehoowa sayn tiinst. Awer tan, hot Monika tsum wise kriit tas sayn man, een elteste, hat een xweyer sint torich phaar yoore pratikiirt. Olivia, een letich xwester, must fon sayn haus aus rayse weeche een triles xtorm. Wii se tsurik khom is, hot se kesiin tas te xtorm sayn haus fernicht hat. Tas leepe fon tiise priiter un xwestere hot sich uf een mool kans keënert. Host tuu xon soo was mit kemacht?
2 Es is woer tas mer troye tiiner fon Yeehoowa sin; awer soo wii ti anere layt, sin mer net fray fon xwiirichkheete un krankheete. Meyer khene aach opositsyoon orer yachtung mit mache fon te layt woo Kot sayn folek hase. Yeehoowa pefrayt uns net fon tiise xwiirichkheete, awer tee ferxprecht uns helfe. (Isa. 41:10) Mit tëm sayn hilef, khene mer uns froo hale, kuute ëntxlise mache un troy tsu Tëm plaype, soo kaar wën mer torich ti xlimste proope keen. In tiise artikel, kuke mer 4 aate wii Yeehoowa uns helft wën mer torich xlime propleeme keen. Meyer siin aach was mer mache mise fer nutse kriin fon te hilef woo eyer uns kept.
YEEHOOWA TUUT TICH XITSE
3. Wën mer een unklik layte, was khan xweyer fer uns sin se mache?
3 Was khan xweyer sin? Wën mer een unklik mit mache, khan es xweyer sin taytlich tenke un kuute ëntxlise mache. Warom? Wayl fiilaycht xpiire mer uns traurich un ëngstlich. Khan sin tas mer konfus un net sicher sin iwer was mer neekst mache sole. Mërk mool wii ti 2 xwestere fom apsats 1 sich kexpiirt hon torich sayn xwiirichkheete. Olivia saat: “Noo tas te triles xtorm mayn haus fernicht hot, hon ich mich ër un iwerlaat kexpiirt.” Monika saat iwer was sayn man kemacht hot: “Saan tas ich traurich waar, is net kenuuch. Fer mich, es waar wii wën mayn hërts ferproch weyer… Soo kaar ti keweenliche tinge waare xweyer fer mich se mache. Ich hon nii ketenkt tas soo was mit mich pasiire khent.” Wën mer uns iwerlaat xpiire, wii ferxprecht Yeehoowa uns helfe?
4. Tëm noo Filiper 4:6, 7, was ferxprecht uns Yeehoowa?
4 Wii helft uns Yeehoowa? Tee ferxprecht uns kepe was ti Piipel nënt wii “Kot sayn friit”. (Lees Filiper 4:6, 7.) b Tiise friit is ti ruu woo mer xpiire wayl mer een ticht fraayntxaft mit Yeehoowa hon. Tiise friit “keet iwer ales woo ti mënxe ferxteen khene” — es wil saan, is wunerlicher wii mer uns foer xtele khene. Tsum payxpiil, host tuu xon een mool hërtslich tsu Yeehoowa kepeet un tan een unkeweenlich ruu kexpiirt? Wën yaa, tuu host “Kot sayn friit” kexpiirt.
5. Wii tuut Kot sayn friit unser ketanke un hërtse xitse?
5 Filiper 4:6, 7 saat aach tas Kot sayn friit tuut unser “hërtse un ketanke (…) xitse”. Im orixinaal xprooch, tas wort “xitse” hat se tuun mit soltaate woo een xtat fon te faynte kexitst hon un in sicherheet kehal hon. Ti layt fon te xtat hon sich in sicherheet kexpiirt, wayl tii wuste tas ti soltaate waare se am xitse. Kraat soo, wën Kot sayn friit unser hërts un ketanke xitst, xpiire mer uns in ruu, wayl mer wise tas mer in sicherheet sin. (Psal. 4:8) Soo wii Ana, khene mer in friit sin soo kaar wën unser situatsyoon sich net klaych ënert. (1 Sam. 1:16-18) Un wën mer uns in ruu xpiire, es is ofts laychter taytlich tenke un kluuche ëntxlise mache.
Peet pis tuu xpiirst “Kot sayn friit” tayn hërts un ketanke xitse (Kuk ti apsetse 4-6.)
6. Was mise mer mache fer Kot sayn friit xpiire? (Kuk aach tas pilt.)
6 Was mise mer mache? Peet pis tuu Kot sayn friit xpiirst. Soo wii ti pewooner fon te xtat khonte xitsung fon te soltaate ferlange, khene mer Yeehoowa sayn xitsung ferlange wën mer uns ëngstlich xpiire. (Luk. 11:9; 1 The. 5:17) Luis, fom apsats 1, hot aus keleet wii tee un sayn fraa Ana, ti situatsyoon kephakt hon wii se tsum wise kriit hon tas eyer ploos noch phaar moonate leepe teet: “In soo sorte situatsyoone, is es aarich xweyer ëntxlise iwer kesuntheet un anere sache mache. Awer tas kepeet kept uns friit fer torich tiise propleeme keen.” Luis un sayn fraa hon kesaat tas se ofts un hërtslich kepeet hon. Tii hon tsu Yeehoowa ferlangt friit im ketanke, ruu im hërts un kluucheet fer kuute ëntxlise mache. Un tii hon tiise hilef kexpiirt. Wëns tuu een xwiirichkheet mit machst, tuu wayter peete; soo xpiirst tuu Kot sayn friit tayn hërts un ketanke xitse. (Rom. 12:12)
YEEHOOWA TUUT TICH FEST MACHE
7. Wii khene mer uns xpiire wën mer een xwiirichkheet mit mache?
7 Was khan xweyer sin? Wën mer torich een xwiirichkheet keen, fiilaycht khene mer net mee unser ketanke, xpiirunge un aktsyoone kontroliire wii friier. Soo wii een xif woo hiner un heyer fon te weele kexupt is, khene mer een torich naner fon xpiirunge hon. Ana saat tas se fiile unerxiitliche emotsyoone kexpiirt hot noo Luis sayn toot. “Als mool, waar ich tiifsinich — saat se. — Un ich hon aan kefang mich selepst taure. Ich sin aach pees kep wayl eyer mich aleen kelos hot.” In etliche momënte, hot Ana sich aleen kexpiirt. In anere, is se oone muut kep wayl se ti sache uf phase must woo Luis friier kuut uf kephast hat. Als mool hot se kexpiirt wii wën se in een xtorm im meer weyer. Wii meecht Yeehoowa uns helfe wën mer aan fange uns “fersaufe” weeche tiise emotsyoone?
8. Tëm noo 1 Pheeter 5:10, was fer sicherheet kept uns Yeehoowa?
8 Wii helft uns Yeehoowa? Tee lost uns sicher tas eyer uns fest mache tuut. (Lees 1 Pheeter 5:10.) c Wën een xtorm im meer pasiirt, khan een xif aan fange hiner un heyer keen un tas khan kefeerlich sin. Fer tas um hale, hon fiile xif een sort ekipamënt unich tëne woo se fest halt. Tas helft ti layt im xif sich peser un in sicherheet xpiire. Awer tiise ekipamënt funtsyoniirt peser wën tas xif foran keet. Kraat soo, tuut Yeehoowa uns fest mache wën mer tëm wayter troy tiine torich ti xweyere tsayte.
Penuts unser unersuuchung feramente fer tich fest hale (Kuk ti apsetse 8-9.)
9. Wii khene ti unersuuchung feramente uns helfe unser xpiirunge kontroliire? (Kuk aach tas pilt.)
9 Was mise mer mache? Wëns tuu iwerlaat weeche tayn xpiirunge pist, xtreng tich aan fer wayter tayn kaystlich rutiin hale. Kewis, fiilaycht khanst tuu net soo fiil mache wiis tuu friier kemacht host, awer eriner tich tas Yeehoowa net xtreng is. (Kuk aach Lukas 21:1-4.) Hool tich aach tsayt fer tayn perseenlich xtuutyum mache un fer triwer noo tenke. Warom is tas wichtich? Torich sayn Orkanisatsyoon, tuut Yeehoowa uns fiile xeene artikele un wiiteos kepe woo uns helfe khene unser xpiirunge kontroliire torich ti xweyere tsayte. Fer se fine was tuu prauchst, khanst tuu ti unersuuchung feramente penutse, soo wii ti aplikatiiw JW Library®, te Índice das Publicações da Torre de Vigia un te Guia de Pesquisa para Testemunhas de Jeová. Monika, iwer weem mer foner traan kexproch hon, hot kesaat tas se aan kefang hot tiise feramente penutse imer wën sayn phayn xweyer kep is. Tii hot, tsum payxpiil, tas wort “peesheet” unersuucht. Anere mool, hot se ti wërter “hinerkeenung” orer “leaaliteet” kesuucht. Tan hot se kelees pis se sich peser kexpiirt hot. Tii hot kesaat: “Ich hon mayn unersuuchung ëngstlich aan kefang, awer soo lang wii ich kelees hon, hon ich kexpiirt tas Yeehoowa mich am um krayfe waar. Mayn unersuuchung hot mich keholef se siin tas Yeehoowa mayn unerxiitliche xpiirunge ferxtan hot un tas eyer mich am helfe waar.” Yeehoowa khan tich aach helfe tayn emotsyoone kontroliire pis tuu tich peser xpiirst. (Psal. 119:143, 144)
YEEHOOWA TUUT TICH HELFE
10. Wii khene mer uns xpiire wën mer was xlimes mit mache?
10 Was khan xweyer sin? Wën was xlimes mit uns pasiirt, khene mer uns als mool fiisix un emotsyonaal xwach xpiire. Meyer khene uns soo wii een atlët xpiire woo friier xnel xpringe khont, awer woo sich wee kemacht hot un mus yets wii een laam persoon laafe. Ti tinge woo mer laycht un kërn kemacht hon, sin yets xweyer un es feelt uns te muut. Soo wii mit Eliias pasiirt is, khan es xweyer fer uns sin uns uf xtele un fiilaycht wole mer ploos xloofe. (1 Khe. 19:5-7) Was ferxprecht Yeehoowa mache wën mer uns xwach xpiire?
11. Wii noch tuut Yeehoowa uns helfe? (Psalm 94:18)
11 Wii helft uns Yeehoowa? Tee ferxprecht uns unerxtitse. (Lees Psalm 94:18.) d Soo wii een atlët woo sich wee kemacht hot hilef praycht fer se laafe, mise mer hilef kriin fer wayter Yeehoowa tiine. In tiise momënt, kept Yeehoowa uns ti sicherheet: “Ich, Yeehoowa, tayn Kot, hale tayn recht hant fest; ich sin tee woo tich saat: ‘Tuu khee pang hon. Ich tuun tich helfe.’” (Isa. 41:13) Te kheenich Tawi hot tiise hilef kexpiirt. Wii eyer foer proope un faynte waar, hot eyer fer Yeehoowa kesaat: “Tayn recht hant tuut mich unerxtitse.” (Psal. 18:35) Awer wii tuut Yeehoowa uns unerxtitse?
Nëm aan ti hilef fon tayn familye, fraaynte un elteste (Kuk ti apsetse 11-13.)
12. Weem khan Yeehoowa penutse fer uns helfe wën mer xwach sin?
12 Ofts, fer uns unerxtitse, tuut Yeehoowa anere uf muute uns helfe. Tsum payxpiil, een mool, wii Tawi sich xwach kexpiirt hot, hot sayn fraaynt Yoonatan tëm pesuucht fer tëm ferxtërke un uf muute. (1 Sam. 23:16, 17) Kraat soo, hot Yeehoowa Eliseu raus kesuucht fer praktix hilef fer Eliias kepe. (1 Khe. 19:16, 21; 2 Khe. 2:2) Hayt, khan Yeehoowa unser familye, fraaynte orer ti elteste penutse fer uns helfe. Awer wën mer tiifsinich sin, fiilaycht wole mer aleen plaype, wayt wech fon te anere. Tas is normaal. Awer was khene mer mache fer Yeehoowa sayn hilef kriin?
13. Was mise mer mache fer nutse fon Yeehoowa sayn hilef kriin? (Kuk aach tas pilt.)
13 Was mise mer mache? Khëmpf keeche te wunx fer sich aleen hale. Wën mer uns aleen hale, khene mer aan fange se tenke ploos aan uns selepst un aan unser propleeme. Tas khan es xweyer lose kuute ëntxlise mache. (Xpr. 18:1) Kewis meyer al mise als mool aleen plaype, hauptseechlich wën was xlimes mit uns pasiirt is. Awer wën mer een lang tsayt wayt wech fon te anere plaype, khene mer fiilaycht ap xtose ti hilef woo Yeehoowa uns kepe wil. Aach wën tas net laycht is se mache torich ti xweyere tsayte, nëm ti hilef aan fon tayn fraaynte, familye un elteste. Eriner tich tas Yeehoowa is tëne am penutse fer tich helfe. (Xpr. 17:17; Isa. 32:1, 2)
YEEHOOWA TUUT TICH TREESTE
14. Was fer situatsyoone khene uns pang kepe?
14 Was khan xweyer sin? Als mool mache mer situatsyoone mit woo uns pang kepe. In te Piipel, hon etliche troye tiiner fon Yeehoowa kexproch iwer momënte woo se sich traurich un mit pang kexpiirt hon weeche ti faynte orer anere propleeme. (Psal. 18:4; 55:1, 5) Kraat soo, khan sin tas mer opositsyoon in te xuul, in te aarwayt, in te familye orer fon te rechiirung mit mache. Meyer khene soo kaar pang fom toot kriin weeche een krankheet. In soo sorte momënte, khene mer uns wii een khint xpiire woo sich net aleen xitse khan. Wii tuut Yeehoowa uns helfe in tiise situatsyoone?
15. Was fer sicherheet kept uns Psalm 94:19?
15 Wii helft uns Yeehoowa? Tee tuut uns treeste. (Lees Psalm 94:19.) e Wën mer Psalm 94:19 leese, fiilaycht tenke mer aan een meetche woo pang kriit un woo net xloofe khan weeche een xlim xtorm. Meyer khene uns foer xtele tas te papa im tsimer khomt, se um krayft un se halt pis se in xlooft. Te xtorm is noch net rom kang, awer tas meetche xpiirt sich sicher un in ruu, wayl se im umaarem fon sayn papa is. Wën mer proope mit mache woo uns pang kepe, fiilaycht prayche mer tas unser himlixe Fater uns “um krayft” pis mer uns in ruu xpiire. Wii khene mer soo een sort troost fon Yeehoowa kriin?
Los tayn himlixe Fater tich treeste torich ti Piipel (Kuk ti apsetse 15-16.)
16. Wii khene mer nutse fon Yeehoowa sayn troost kriin? (Kuk aach tas pilt.)
16 Was mise mer mache? Tuu imer tsayt mit Yeehoowa fertraype — peet tsu Tëm un lees Sayn Wort. (Psal. 77:1, 12-14) Wëns tuu tiise kewoonheet host, tsiimlich sicher tas eyerste tings woos tuu mache tuust wëns tuu stresiirt pist, is hilef fer tayn himlixe Fater ferlange. Xprech mit Yeehoowa iwer tayn pang un soriche. Tan los eyer mit tich xpreche un tich treeste torich ti Piipel. (Psal. 119:28) Etliche piicher fon te Piipel khene tich treeste wëns tuu pang kriist. Tsum payxpiil: ti piicher fon Yoop, Psalme, Xpriiche un aach Yeesus sayn wërter in Matheus kapitel 6 khene tich uf muute. Wëns tuu tsu Yeehoowa peetst un Sayn Wort leest, tuust tuu tëm sayn troost xpiire.
17. Was fer sicherheet khene mer hon?
17 Meyer khene uns sicher sin tas Yeehoowa uns imer helfe tuut wën unklike in unser leepe pasiire. Meyer wëre nii aleen. (Psal. 23:4; 94:14) Yeehoowa ferxprecht uns xitse, fest mache, helfe un treeste. Isayas 26:3 saat iwer Yeehoowa: “Tuu tuust xitse tii woo uf tich kans traue; tuu tuust tëne eewich friit xenke, wayl se uf tich traue tuun.” Soo trau uf Yeehoowa un mach tayn pestes fer nutse fon Sayn hilef kriin. Wëns tuu tas machst, kriist tuu noch mool kraft, soo kaar torich ti xweyere tsayte.
WII TEEST TUU ANTWORTE?
-
Wanee wërts hauptseechlich neetich Yeehoowa sayn hilef kriin?
-
In was fer 4 aate helft uns Yeehoowa torich ti xweyere tsayte?
-
Was khene mer mache fer nutse fon Yeehoowa sayn hilef kriin?
LIIT 12 Nosso grandioso Deus, Jeová
a Etliche naame waare keënert.
b (Filiper 4:6, 7) Tuut weeche niks ëngstlich wëre. Awer, in yeete situatsyoon, ferlangt Kot sayn hilef torich peete, aan hale un tanke; 7 un Kot sayn friit, woo keet iwer ales woo ti mënxe ferxteen khene, tuut ayre hërtse un ketanke torich Yeesus Kristus xitse.
c (1 Pheeter 5:10) Awer, noo tas teyer fer een khorts tsayt kelit hot, te Kot fon te kans unfertiint kuutheet, woo aych tsu Sayn eewich hërlichkheet in eenichkheet mit Kristus keruuft hot, tuut ayre iipung fërtich pringe. Tee tuut aych fest mache, tee tuut aych xtark hale, tee tuut aych fest xtele.
d (Psalm 94:18) Wën ich saat: “Mayn fiis tuun ap ritxe”, tayn leaale liip, oo Yeehoowa, hot mich kextitst.
e (Psalm 94:19) Wii ti ëngstlichkheete mich unertrikt hon, host tuu mich ketreest un peruycht.