1. Was khomt in tayn ketanke wëns tuu aan Yeehoowa tenkst?

 HOST tuu xon fersuucht tich foer xtele wii Yeehoowa is? Wëns tuu mit tëm im kepeet xprechst, aan was tenkst tuu? Opwool meyer tëm net siin khene, tuut ti Piipel Yeehoowa in unerxiitliche aate pexraype. Tee is kenënt wii “sun un xuts xilt” un aach wii “een fayer woo fernicht”. (Psal. 84:11; Hep. 12:29) Een Piipel xrayper hot Yeehoowa in een wisyoon pexrip wii een safira xteen, een xaynlich metaal un wii een xaynlich reen pooche. (Ese. 1:26-28) Etliche fon tiise wërter iwer Yeehoowa khene uns ferwunere orer soo kaar uns mit pang lose.

2. Was khan es xweyer fer uns lose ticht pay Yeehoowa khome?

² Wayl meyer Yeehoowa net siin khene, es khan fiilaycht xweyer sin se klaape tas eyer uns liipt. Etliche tenke tas Yeehoowa khent se nii liipe weeche ti xlechte tinge woo mit tëne pasiirt sin. Orer fiilaycht hate se nii een papa woo se keliipt hot. Yeehoowa ferxteet soo sorte xpiirunge un ferxteet wii se uns petrefe. Fer uns helfe, tuut eyer uns in lërne torich ti Piipel was fer sort persoon eyer is.

3. Warom sole mer iwer Yeehoowa sayn liip xtutiire?

³ Liip — tas is tas peste wort fer Yeehoowa pexraype. (1 Yo. 4:8) Ti Piipel saat tas Kot is liip. Ales was Yeehoowa macht is weeche liip. Yeehoowa sayn liip is soo krooshërtslich un xtark, tas eyer liip tsaycht soo kaar fer tii woo Tëm net liipe. (Mat. 5:44, 45) In tiise artikel, tuun mer iwer Yeehoowa un sayn liip xtutiire. Woo mee meyer iwer unser Kot lërne, woo mee tuun mer tëm liipe.

 YEEHOOWA LIIPT UNS AARICH FIIL

4. Wii xpiirst tuu tich weeche Yeehoowa sayn liip? (Kuk aach tas pilt.)

⁴ “Yeehoowa [is] aarich liiplich.” (Tya. 5:11) In te Piipel, tuut eyer sich mit een liipliche mama ferklayche. (Isa. 66:12, 13) Xtel tich mool foer een mama woo sayn nëneche liiplich uf phast. Tii halt tëm uf sayn xoos un xprecht mit tëm mit een layse xtim. Wën tas nëneche phayn xpiirt orer prilt, tuut se tëm tas neetiches kepe. Kraat soo, wën mer phayn xpiire, khene mer uns sicher sin fon Yeehoowa sayn liip. Te psalmist hot kexrip: “Wii ti ëngstlichkheete mich unertrikt hon, host tuu mich ketreest un peruycht.” (Psal. 94:19)

5. Was petayt Yeehoowa sayn leaale liip fer tich?

⁵ Yeehoowa is leaal. (Psal. 103:8) Tee lost net noo uns liipe wën mer was ferkheertes mache. Ti israeliiter hon Yeehoowa noo un noo traurich kelos. Awer wii se sich peroyt hon, hot eyer tëne sicher kelos fon Sayn leaale liip. Tee hot tëne, tsum payxpiil, kesaat: “Tuu host fiil weyert foer mayn aue kriit; tuu pist keert kep un ich liipe tich.” (Isa. 43:4, 5) Kot sayn liip hot sich net keënert. Un meyer khene imer too truf traue. Soo kaar wën mer xlime feeler kemacht hon, lost Yeehoowa uns net im xtich. Wën meyer uns peroye un tsurik tsu Yeehoowa khome, tuut eyer uns noch ekaal liipe. Tee ferxprecht uns “krooshërtslich fertsaye”. (Isa. 55:7) Ti Piipel saat was tan pasiirt: ‘Yeehoowa pringt ti tsayte woo eyer aych nay kraft kept.’ (Aph. 3:19)

6. Was lërne mer iwer Yeehoowa mit Sakarias 2:8?

⁶ Lees Sakarias 2:8. a Yeehoowa ferklaycht uns mit “ti phupil fon [sayn] aue”. Ti aue sin een wichtich teel fom khërper un es is laycht tëne wee mache. Tes weeche, is es wii wën Yeehoowa saan teet: ‘Wën yemant tich wee macht, mayn folek, macht eyer wee etwas woo weyertlich fer mich is.’ Wayl Yeehoowa uns liipt, ferxteet eyer unser xpiirunge un tee wil uns xitse. Tee xpiirt unser phayn in sayn hërts. Soo, khene mer peete: ‘Xits mich wii ti phupil fon tayn aue.’ (Psal. 17:8)

7. Warom mise mer unser sicherheet ferxtërke tas Yeehoowa uns liipt?

⁷ Yeehoowa wil hon tas tuu tich sicher wërst  tas eyer tich liipt. Awer tee wees tas weeche was mer xon mit kemacht hon, khene mer uns frooe op eyer uns wërklich liipe khan. Orer khan sin tas mer yets een situatsyoon mit mache woo uns tswayfele macht fon Yeehoowa sayn liip. Was khan uns sicher lose tas Yeehoowa uns liipt? Meyer khene lërne wii Yeehoowa liip tsu Yeesus, ti kesalpte un meyer al tsaycht.

WII TUUT YEEHOOWA SAYN LIIP TSAYCHE?

8. Warom waar Yeesus sich sicher fon Yeehoowa sayn liip?

⁸ Im uniwërsum, kepts khee fraayntxaft woo soo alt is wii Yeehoowa un Yeesus sayns. Torich ti pilyoone yoore woo se paysamer im himel waare, sin se imer tichter khom. Un tii hon een xtark liip eene tsum anere ëntwikelt. Yeehoowa hot sayn liip tsu Yeesus taytlich kelos, wii mer siin khene in Matheus 17:5. Yeehoowa khent aynfach kesaat hon: ‘Tas is tee woo ich aan nëme.’ Awer eyer wolt tsayche wii fiil eyer Yeesus liipt. Tes weeche, hot Yeehoowa kesaat: “Tas is mayn liipe soon.” Yeehoowa waar froo mit Yeesus, hauptseechlich wayl eyer sayn leepe fer uns kepe teet. (Ëfe. 1:7) Un Yeesus waar sich sicher tas sayn Fater tëm keliipt hot. Yeehoowa sayn liip waar soo reaal fer Yeesus tas eyer noo un noo kesaat hot tas te Fater tëm keliipt hot. (Yoo. 3:35; 10:17; 17:24)

9. Mit was khan Yeehoowa sayn liip fer ti kesalpte ferklaycht wëre? Lee tas aus. (Romaaner 5:5)

⁹ Yeehoowa tsaycht aach liip fer ti kesalpte. (Lees Romaaner 5:5.) b Mërk mool tas te tekst ferklaycht Yeehoowa sayn liip mit waser. Tas is in te kesalpte sayn hërts “aus kexut”. Een puuch woo ti Piipel komentiirt, pexraypt tas wii “een flus”. Tas tuut taytlich tsayche wii fiil Yeehoowa ti kesalpte liipt. Ti kesalpte wise tas se fon Kot keliipt sin. (Yuu. 1) Te aphostel Yoohan hot tiise xpiirunge aus keleet wii eyer kexrip hot: “Kuk mool wii kroos is te Fater sayn liip tsu uns — soo kroos tas mer Kot sayn khiner kenënt sin!” (1 Yo. 3:1) Awer meecht Yeehoowa ploos ti kesalpte liipe? Nee, tee hot sayn liip tsu uns al pewayst.

10. Was is ti kreest pewaysung fon Yeehoowa sayn liip tsu tich?

¹⁰ Was is ti kreest pewaysung fon Yeehoowa sayn liip? Tas fray khaaf opfer — noch nii hot yemant soo fiil liip ketsaycht! (Yoo. 3:16; Rom. 5:8) Yeehoowa hot sayn liipe Soon uns kep. Tee hot kelos tas eyer fer al ti mënxe xtërpe teet, soo tas mer khonte fertsayung fon unser sinte kriin un Kot sayn fraaynte wëre. (1 Yo. 4:10) Woo tiifer mer triwer noo tenke aan te prays woo Yeehoowa un Yeesus petsaalt hon, woo peser tuun mer ferxteen wii fiil se uns liipe. (Kal. 2:20) Tas fray khaaf opfer waar petsaalt net ploos weeche Yeehoowa sayn kerechtichkheet. Tee hot uns tiise kexenk kep weeche liip. Fer Yeehoowa, niks un nimant hot mee weyert wii sayn Soon Yeesus. Awer Tee hot kelos Yeesus fer uns layte un xtërpe un soo hot Eyer Sayn liip fer uns pewayst.

11. Was lërne mer fon Yeeremias 31:3?

¹¹ Wii mer kesiin hon, tuut Yeehoowa net ploos liip xpiire, awer tee tuut tas aach tsayche. (Lees Yeeremias 31:3.) c Tee hot uns tsu tëm ketsoo wayl eyer uns liipt. (Kuk aach Teuteronoomyum 7:7, 8.) Niks un nimant khan uns fon tiise liip aus naner mache. (Rom. 8:38, 39) Wii xpiirst tuu tich weeche tiise liip? Lees te Psalm 23, un mërk wii Tawi sich kexpiirt hot iwer Yeehoowa sayn liip un wii tas uns al petrefe khan.

 WII XPIIRST TUU TICH WEECHE YEEHOOWA SAYN LIIP?

12. Wii teest tuu te Psalm 23 in khortse wërter pexraype?

¹² Lees Psalm 23:1-6. d Im Psalm 23, hot Tawi ketsaycht tas eyer sich sicher waar tas Yeehoowa tëm keliipt un uf kephast hot. Tee hot ti xtark fraayntxaft pexrip tswixich tëm un sayn Xeefer, Yeehoowa. Tawi hot kelos Yeehoowa tëm lenke un tee hot kans uf Tëm ketraut. Tes weeche, hat eyer khee pang. Tawi wust tas Yeehoowa teet Sayn liip tsu tëm yeete taach fom leepe tsayche. Warom waar eyer sich soo sicher?

13. Warom waar Tawi sich sicher tas Yeehoowa tëm uf phase teet?

¹³ “Niks wërt mich feele.” Yeehoowa hot imer tas neetiches fer Tawi fersoricht. Un tes weeche, hot Tawi kexpiirt tas eyer kuut uf kephast waar. Tawi hat aach een fraayntxaft mit Yeehoowa un hot Tëm kefalt. Tes weeche, waar Tawi sich sicher tas Yeehoowa tëm keliipt hot un wayter uf phase teet ekaal was noch pasiire khent. Tas hot tëm keholef froo un tsufriite sin, un net ëngstlich wëre. (Psal. 16:11)

14. Wii khan Yeehoowa uns liiplich uf phase?

¹⁴ Yeehoowa tuut uns liiplich uf phase, hauptseechlich wën xlime tinge in unser leepe pasiire. Claire, e woo xon mee wii 20 yoore in  Petël tiint, wust net was se mache wii sayn familye een propleem noom aner mit kemacht hot. Sayn papa hot een xlaach kriit, eene fon sayn xwestere is tesasosiirt kep un sayn familye hot ekonoomixe propleeme mit kemacht un sayn haus ferloer. Wii hot Yeehoowa se liiplich uf kephast? Claire saat: “Weeche Yeehoowa, hat mayn familye imer tas neetiches fer yeete taach. Fiil mool, hot Yeehoowa soo kaar uns mee kep wii mer praychte. Ich tenke mich ofts traan wii Yeehoowa uns keholef hot un ich tuun sayn liip nii ferkese. Tiise erinerunge hon mich keholef Yeehoowa wayter tiine soo kaar wën anere propleeme foer khom sin.”

15. Wii hot Tawi nay kraft kriit? (Kuk aach tas pilt.)

¹⁵ “Eyer xenkt mich nay kraft.”  Als mool, is Tawi oone muut kep weeche al ti propleeme woo eyer mit kemacht hot. (Psal. 18:4-6) Awer Yeehoowa sayn liip hot tëm nay kraft kep. Yeehoowa hot sayn fraaynt woo miit waar, tsu “kriines kraas” kefiirt un tsu “pletse mit fiil waser fer se ruue”. Soo, hot Tawi noch mool kraft kriit un khont wayter Yeehoowa mit frooheet tiine. (Psal. 18:28-32)

16. Wii hot Yeehoowa sayn liip tich xon ferxtërkt?

¹⁶ Kraat soo hayt, ‘is es weeche Yeehoowa sayn leaale liip tas ti xwiirichkheete uns net fernicht hon’. (Yaa. 3:22; Kol. 1:11) Kuk mool Rachel sayn payxpiil. Torich ti pantemii fon coronavirus, hot sayn man tii un Yeehoowa im xtich kelos. Tii is mechtich traurich kep! Was hot Yeehoowa fer Rachel kemacht? “Yeehoowa hot kemacht tas ich mich keliipt xpiire teet — saat se. — Tee hot mich fiile fraaynte kep woo tsayt mit mich keplip sin, mich ese keprung hon, xeene mensagens kexikt hon, ufmuutiche tekste ketsaycht hon, mich fraayntlich pehantelt hon un mich erinert hon tas Yeehoowa mich uf kephast hot. Ich tuun Yeehoowa imer tanke weeche ti kroos un liiplich familye woo eyer mich kep hot.”

17. Warom hat Tawi “khee pang”?

¹⁷ ‘Ich kriin khee pang, wayls tuu pay mich pist.’ Tawi sayn leepe waar ofts ins kefoer un tee hat xtarke faynte. Awer weeche Yeehoowa sayn liip, hot eyer sich sicher un kexitst kexpiirt. Tawi khont xpiire tas Yeehoowa imer mit tëm waar. Un tas hot tëm ketreest. Tes weeche, khont eyer singe: “[Yeehoowa] hot mich fon mayn kanse pang fray kemacht.” (Psal. 34:4) Tawi sayn pang waar reaal, awer Yeehoowa sayn liip waar xtërker wii sayn pang.

18. Wii tuut ti sicherheet tas Yeehoowa uns liipt uns ferxtërke wën mer xlime situatsyoone mit mache?

¹⁸ Wii tuut ti sicherheet tas Yeehoowa uns liipt uns ferxtërke wën mer xlime situatsyoone  mit mache? Een pyoneerin woo Susi heest, leet aus wii tii un sayn man sich kexpiirt hon, wii tëne sayn soon sayn aychne leepe tsum ën keprung hot: “Wën soo was in tayn leepe pasiirt, es tuut tich tiif petrefe un tuu tenkst tas noch anere xlime tinge pasiire tuun. Awer weeche Yeehoowa sayn liip, xpiire mer uns sicher un kexitst.” Rachel, iwer wën mer foner traan kexproch hon, erinert sich: “Eene nacht, waar ti phayn in mayn hërts soo xlim un ich waar soo ëngstlich un fol pang tas ich in hart xtim tsu Yeehoowa aan kehal hon. In te selwich xtun, hon ich kexpiirt tas Eyer mayn hërts peruycht hot, soo wii een mama sayn nëneche peruycht, un ich sin in kexloof. Ich tuun tas nii ferkese.” Een elteste woo Tasos heest, is 4 yoore in te katee keplip wayl eyer net im militeer tiine wolt. Wii hot eyer Yeehoowa sayn liip kexpiirt? “Yeehoowa hot mich tas neetiches fersoricht — saat eyer — un noch fiil mee. Tes weeche, hon ich noch mee uf tëm ketraut. Un torich sayn kayst, hot Yeehoowa mich frooheet kep, opwool ich in te katee waar, eene trauriche plats. Tas hot mich keholef etwas ferxteen: woo mee ich uf Yeehoowa traue, woo peser tuun ich sayn liip xpiire. Tes weeche, hon ich aan kefang wii rekulaar pyoneer in te katee tiine.”

KHOM TICHTER PAY TAYN LIIPLICHE KOT

19. (a) Meyer wise tas Kot uns liipt. Wii tuut tas unser kepeete petrefe? (b) Was is tayn liipst pexraypung fon Yeehoowa sayn liip? (Kuk te khaste “ Wërter woo Yeehoowa sayn liip pexraype”.)

¹⁹ Ti speryense woo meyer kesiin hon, pewayse tas Yeehoowa, “te Kot fon liip”, pay uns is! (2 Kor. 13:11) Tee khimert sich mit yeete eene fon uns. Meyer sin uns sicher tas ‘sayn leaale liip um uns rom is’. (Psal. 32:10) Woo mee mer aan sayn liip triwer noo tenke, woo eftas tuun mer sayn hant in unser leepe siin un woo tichter pay tëm meyer khome. Meyer khene tsu tëm peete oone pang un tëm saan wii sayn liip neetich fer uns is. Meyer khene iwer unser soriche mit tëm xpreche, wayl meyer uns sicher sin tas eyer uns ferxteet un uns helfe wil. (Psal. 145:18, 19)

20. Wii tuut Yeehoowa sayn liip uns tichter pay tëm xafe?

²⁰ Soo wii mer wole ticht pay een fayer plaype in een khalte taach, wole mer ticht pay Yeehoowa sayn liip plaype. Tas fayer is mechtich, awer tuut uns aach wërme. Kraat soo, is Yeehoowa sayn liip mechtich, awer tuut aach unser hërts “wërme”. Tes weeche, nëm Yeehoowa sayn liip aan. Soo, khanst tuu aach saan: “Ich liipe Yeehoowa”! (Psal. 116:1)