XTUUTYUM ARTIKEL 4
LIIT 18 Tanke fer tas fray khaaf opfer!
Was lërne mer mim fray khaaf opfer?
“Torich tas, is Kot sayn liip tsu uns taytlich.” (1 YOOHAN 4:9)
WAS TUUN MER SIIN?
Was tas fray khaaf opfer uns in lërnt iwer Yeehoowa un Yeesus sayn xeene kwaliteete.
1. Warom is es kuut fer uns tas mer yeetes yoer tsum Aantenke keen?
WAYL tee uns fiil liipt, hot Yeehoowa uns een weyertlich kexenk kep: tee hot sayn Soon kexikt fer sayn leepe fer ti mënxe ap kepe. (Rom. 5:8; 2 Kor. 9:15) Wayl Yeesus tas kemacht hot, khanst tuu een ticht fraayntxaft mit Yeehoowa hon. Tuu host aach ti hofnung fer eewiche leepe kriin. Yawool, meyer hon fiile uersache fer petanklich tsu Yeehoowa sin. Fer uns helfe wayter petanklich sin un uns nii ferkese was Yeehoowa un Yeesus uns kemacht hon, hot Yeesus uns kexikt yeetes yoer tsum Aantenke fon sayn toot keen. (Luk. 22:19, 20)
2. Iwer was tuun mer in tiise artikel xpreche?
2 Tiise yoer tuut tas Aantenke pasiire am samstaach, 12te april fon 2025. Kewis meyer al pleene tat sin. Es wërt kuut fer uns al sin tsayt hoole foer un noo tëm Aantenke fer triwer noo tenke a aan was Yeehoowa un sayn Soon fer uns kemacht hon. In tiise artikel, tuun mer xpreche iwer was tas fray khaaf opfer iwer Yeehoowa un sayn Soon uns in lërnt. Im neekste artikel, siin mer wii mer khene nutse kriin fom fray khaaf opfer un wii mer unser petanklichkheet tsayche khene.
WAS LËRNT UNS TAS FRAY KHAAF OPFER IWER YEEHOOWA?
3. Wii khent te toot fon eene mënx milyoone layt rete? (Kuk aach tas pilt.)
3 Tas fray khaaf opfer lërnt uns in iwer Yeehoowa sayn kerechtichkheet. (Teut. 32:4) Wii soo? Wii Aatam Yeehoowa unfolicht hot, is eyer een sintiche persoon kep un tee is kextorep. Wayl mer sayn nookhomer sin, hon mer ti sint un te toot keërpt. (Rom. 5:12) Fer uns fon te sint un fom toot pefraye, hot Yeehoowa Yeesus kexikt fer tas fray khaaf opfer fersoriche. Awer wii khent te toot fon eene perfekt mënx milyoone layt rete? Te aphostel Phaul leet aus: “Soo wii torich ti unfolichkheet fon eene mënx [Aatam], sin fiile mënxe tsu sinter kemacht kep, soo aach, torich ti folichkheet fon ploos eene mënx [Yeesus], wëre fiile tsu kerechte kemacht.” (Rom. 5:19; 1 Tim. 2:6) In anere wërter: meyer al sin sklaawe fon te sint un fom toot wayl eene perfekte mënx Kot unfolicht hot. Tes weeche, fer uns pefraye, must eene perfekte mënx Kot foliche.
Eene man hot uns sklaawe fon te sint un fom toot kemacht. Kraat soo, eene man hot uns pefrayt (Kuk te apsats 3.)
4. Warom hot Yeehoowa net aynfach erlaupt tas foliche nookhomer fon Aatam fer imer leepe teete?
4 Waar es wërklich neetich tas Yeesus xtërpe teet fer uns rete? Khent Yeehoowa net aynfach erlaupt hon tas ti foliche nookhomer fon Aatam eewiche leepe kreechte? Fer imperfekte mënxe, khan es aus siin tas es een kuut aat weyer fer te propleem resolwiire. Awer tas xtimt net mit Yeehoowa sayn perfekt kerechtichkheet. Wayl Yeehoowa kerecht is, khent eyer nii sayn aue tsu mache fer Aatam sayn ausferxeemt unfolichkheet.
5. Warom khene mer uns sicher sin tas Yeehoowa imer macht was richtich is?
5 Un wën Yeehoowa tas fray khaaf opfer net fersoricht hët? Un wën eyer ti kerechtichkheet uf sayt kelos hët un erlaupt hët tas imperfekte nookhomer fon Aatam eewiche leepe kreechte? Wën tas pasiirt weyer, khente ti layt mit te tsayt aan fange se tswayfele iwer Yeehoowa sayn kerechtichkheet in anere sache. Tsum payxpiil, etliche khente sich frooe: ‘Meecht Yeehoowa al sayn ferxpreche erfiile?’ Tsum klik, prayche mer uns net ketanke too triwer mache. Opwool eyer must tas leepe fon sayn aychne liipe Soon kepe, hot Yeehoowa ëntxlist tas kerechtes mache. Tes weeche, khene mer uns sicher sin tas eyer imer mache tuut was richtich is.
6. Weeche was noch hot Yeehoowa sayn Soon kexikt? (1 Yoohan 4:9, 10)
6 Es is woer tas tas fray khaaf opfer helft uns ferxteen tas Yeehoowa kerecht is. Awer es helft uns hauptseechlich ferxteen wii tiif tëm sayn liip tsu uns is. (Yoo. 3:16; lees 1 Yoohan 4:9, 10. b) Tas fray khaaf opfer lërnt uns in tas Yeehoowa wil net ploos hon tas mer fer imer leepe, awer aach tas mer teel fon sayn familye wëre. Tenk mool noo: wii Aatam kesint hot, khent eyer net mee teel fon Yeehoowa sayn familye wëre. Tes weeche, wii mer uf te welt khom sin, waare mer aach net teel fon Yeehoowa sayn familye. Awer weeche tas fray khaaf opfer, khene al ti mënxe woo aan Yeehoowa klaape un tëm foliche, eene taach teel fon sayn familye wëre. Xon yets, khene mer een ticht fraayntxaft mit Yeehoowa un unser priiter un xwestere hon. Yeehoowa tuut uns wërklich liipe! (Rom. 5:10, 11)
7. Yeesus hot fiil kelit fer tas fray khaaf opfer fersoriche. Was lërne mer iwer Yeehoowa sayn liip tsu uns too temit?
7 Meyer khene peser ferxteen wii fiil Yeehoowa uns liipt wën mer uns traan tenke wii tayer tas fray khaaf opfer tëm kekhost hot. Satanaas saat tas khee eene fon Kot sayn tiiner tuut leaal tsu Tëm plaype wën es xweyer is tas mache. Fer se pewayse tas Satanaas een liichner is, hot Yeehoowa erlaupt tas Yeesus layte teet foer se xtërpe. (Yoop 2:1-5; 1 Phe. 2:21) Yeehoowa hot kesiin wii ti layt Yeesus ferxpot hon, wii ti soltaate tëm ferklopt hon un wii se tëm uf een kweel phoste aan kenaachelt hon. Tan hot Kot kesiin sayn Soon fiil layte pis eyer kextorep is. (Mat. 27:28-31, 39) Yeehoowa hat ti kraft fer tas ales um hale. Tsum payxpiil, wën ti layt kesaat hon: “Kot sol tëm yets rete, wën eyer Kot kefalt”, khent Yeehoowa kraat tas kemacht hon. (Mat. 27:42, 43) Awer wën Yeehoowa tas kemacht hët, weyer tas fray khaaf opfer net petsaalt un soo hëte mer khee hofnung. Tes weeche hot Yeehoowa erlaupt tas sayn Soon layte teet pis eyer kextorep is.
8. Warom khene mer uns sicher sin tas Yeehoowa fiil phayn kexpiirt hot wii eyer kesiin hot sayn Soon layte? (Kuk aach tas pilt.)
8 Meyer sole net tenke tas, wayl Yeehoowa te Ale Mechtiche is, hot eyer khee xpiirunge. Meyer sin tëm noo Kot sayn pilt kemacht kep. Tes weeche, wayl mer xpiirunge un emotsyoone hon, khene mer uns sicher sin tas es aach soo mit Kot is. Tsum payxpiil, ti Piipel saat tas Yeehoowa sich “traurich” kexpiirt hot. (Psal. 78:40, 41) Tenk iwer was mit Apraham un Isak pasiirt is. Yeehoowa hot Apraham kexikt sayn eensiche soon opfere. (Xee. 22:9-12; Hep. 11:17-19) Xtel tich mool foer wii traurich Apraham waar wii eyer sich foer perayt hot fer sayn aychne soon um pringe. Un yets, xtel tich mool foer wii trauricher meecht Yeehoowa sich kexpiirt hon wii eyer kesiin hot ti layt sayn Soon kweele un um pringe. (Kuk te wiiteo Mach sayn klaape noo — Apraham, Teel 2 im jw.org.)
Yeehoowa hot fiil phayn kexpiirt wii eyer kesiin hot sayn Soon layte (Kuk te apsats 8.)
9. Was lërnst tuu in Romaaner 8:32, 38, 39 iwer Yeehoowa sayn liip?
9 Tas fray khaaf opfer lërnt uns in tas nimant liipt uns soo fiil wii Yeehoowa — noch net mool unser liipste parent orer peste fraaynt. (Lees Romaaner 8:32, c 38, 39. d) Sicher, tuut eyer uns mee liipe wii meyer uns selepst liipe. Wilst tuu fer imer leepe? Yeehoowa noch mee! Wilst tuu fertsayung fon tayn sinte kriin? Yeehoowa noch mee! Tee ferlangt ploos tas mer petanklich sin weeche was eyer fer uns kemacht hot un tas mer uf tëm klaape un tëm foliche. Tas fray khaaf opfer is een weyertlich kexenk woo tsaycht Yeehoowa sayn tiif liip tsu uns. Un in te nay welt, tuun mer noch mee iwer Yeehoowa sayn liip lërne. (Ekl. 3:11)
WAS LËRNT UNS TAS FRAY KHAAF OPFER IWER YEESUS?
10. (a) Warom waar Yeesus ëngstlich weeche sayn toot? (b) Wii hot Yeesus Yeehoowa sayn naame ferhaylicht? (Kuk aach te khaste “ Yeesus sayn troyheet hot Yeehoowa sayn naame ferhaylicht”.)
10 Yeesus khimert sich fiil mit was ti layt iwer sayn Fater tenke. (Yoo. 14:31) Yeesus weyer um keprung wii een kriminoos woo Kot ferfluucht hat un tee waar mechtich ëngstlich tas ti layt was xlechtes iwer sayn Fater too teweeche tenke teete. Soo hot eyer kepeet: “Mayn fater, wëns meechlich is, los te khelich wayt wech fon mich.” (Mat. 26:39) Awer wayl Yeesus pis sayn toot troy keplip is, hot eyer ketsaycht tas was Satanaas iwer Yeehoowa kesaat hat, een lii waar.
11. Wii hot Yeesus sayn tiif liip tsu te layt ketsaycht? (Yoohan 13:1)
11 Tas fray khaaf opfer lërnt uns aach in tas Yeesus sich fiil mit te layt khimert, hauptseechlich mit sayn tisipele. (Xpr. 8:31; lees Yoohan 13:1. e) Tsum payxpiil: Yeesus wust tas etliche tinge woo eyer must too uf te eyert mache, weyere aarich xweyer, hauptseechlich layte un xtërpe. Yeesus hot tas kemacht net ploos wayl sayn Fater es kexikt hot, awer hauptseechlich wayl eyer ti layt keliipt hot. Yeesus hot fiil liip tsu te layt ketsaycht wii eyer kepreeticht, in kelërnt un se keholef hot. Soo kaar in te nacht foer sayn toot, hot eyer tsayt kehool fer ti fiis fon sayn aphostele wexe, un fer tëne in lërne, uf muute un treeste. (Yoo. 13:12-15) Tan, wii eyer am kweel phoste kelit hot, hot eyer hofnung kep fer een kriminoos woo am xtërpe waar. Tee hot aach fer Yoohan ferlangt sayn mama Maria uf phase. (Luk. 23:42, 43; Yoo. 19:26, 27) Soo hot Yeesus sayn tiif liip tsu te mënxe ketsaycht, net ploos wën eyer am xtërpe waar, awer torich sayn kanse leepe too uf te eyert.
12. Was is Yeesus fer uns yets am mache?
12 Es is woer tas Yeesus “een mool fer imer kextorep [is]”; awer tee is noch fiil fer uns am mache. (Rom. 6:10) Wii soo? Tee tuut wayter xafe tas mer khene nutse fom fray khaaf opfer kriin. Tee hot fiil se tuun wii unser Kheenich, Hooche Priister un khop fon te kemaynt. (1 Kor. 15:25; Ëfe. 5:23; Hep. 2:17) Tee fiirt ti aarwayt fer ti kesalpte un tas kroos folek samele, een aarwayt woo fërtich wërt kraat foer tas ën fon te kroos tripulatsyoon. (Mat. 25:32; Mar. 13:27) Tee lenkt aach te troye sklaaw fer uns wayter fersoriche was mer prayche fer troy tsu Yeehoowa plaype torich tiise letste taache. (Mat. 24:45) Un torich sayn Tausent Yoore Rechiirung tuut eyer wayter xafe fer uns helfe. Yeehoowa hot sayn Soon fer uns kep, net ploos tas eyer fer uns xtërpe teet, awer tas eyer noch fiil mee fer uns mache teet. f
TUU WAYTER NAYE TINGE LËRNE
13. Was tuut tich helfe triwer noo tenke iwer ti liip woo Yeehoowa un Yeesus tsu uns hon?
13 Tuu khanst wayter lërne iwer ti liip woo Yeehoowa un Yeesus tsu uns hon wëns tuu wayter too triwer noo tenkst. Im xtant in te woche foer un noom Aantenke, khanst tuu eene orer mee Ewankeelye mit acht leese. Fersuuch net fiile kapitele uf een mool leese. Xtats tas, lees mit ketult un suuch anere uersache warom mer Yeehoowa un Yeesus liipe sole. Xprech aach mit te anere iwer was tuu lërnst.
14. Wii khene mer naye tinge lërne iwer tas fray khaaf opfer un anere inlërnunge? (Psalm 119:97 un noote; kuk aach tas pilt.)
14 Wëns tuu xon haufe yoore in te woerheet pist, fiilaycht tuust tuu tich frooe ep es noch naye tinge sin woos tuu lërne khanst iwer Yeehoowa sayn kerechtichkheet, liip un tas fray khaaf opfer. In woerheet, kepts imer naye tinge fer se lërne iwer tiise un anere sache. Soo, was khanst tuu mache? Lees un xtutiir ti xeene informatsyoone in unser puplikatsyoone. Wëns tuu etwas in te Piipel leest woos tuu net kenau ferxteest, mach unersuuchunge. Tan, torich te taach, tenk triwer noo iwer was tuu kelërnt host iwer Yeehoowa, sayn Soon un tëne sayn liip tsu tich. (Lees Psalm 119:97 un noote.) g
Soo kaar wën mer xon haufe yoore in te woerheet sin, khene mer noch petanklicher wëre fer tas fray khaaf opfer (Kuk te apsats 14.)
15. Warom is es wichtich wayter fersuuche naye tinge in te Piipel lërne?
15 Say net oone muut wëns tuu net imer was nayes orer interesantes finst wëns tuu ti Piipel leest orer unersuuchung machst. Tenk iwer tich selepst wii yemant woo kolt suucht. Ofts, yemant woo kolt suucht mus fiile xtune orer taache xafe pis eyer kolt fint. Awer tee kept net uf un tuut wayter mit ketult suuche. Tee wees tas yeete xtik kolt woo eyer fint, soo kaar wën tas kleen is, hot fiil weyert. Yeete naye tings woo mer in te Piipel lërne, hot mee weyert wii kolt. (Psal. 119:127; Xpr. 8:10) Soo, say ketultich un tuu wayter ti Piipel leese. (Psal. 1:2)
16. Wii khene mer Yeehoowa un Yeesus noo mache?
16 Wëns tuu xtutiirst, suuch aate fer aan wëne was tuu lërnst. Tsum payxpiil, soo wii Yeehoowa, say kerecht un mach khee unerxiit tswixich ti layt. Mach aach Yeesus sayn liip tsu Yeehoowa un ti anere noo. Say wilich fer se layte weeche Yeehoowa sayn naame un helf tayn priiter, soo kaar wën tas xweyer is. Tuu khanst aach Yeesus noo mache wëns tuu preetiche keest. Soo khene ti layt aach ti xans kriin fer klaape uf tëm fray khaaf opfer tsayche.
17. Was tuun mer im neekste artikel siin?
17 Woo mee mer iwer tas fray khaaf opfer lërne, woo kreeser wërt unser liip tsu Yeehoowa un Yeesus. Un wayl unser liip tsu tëne kreeser is, tuun se uns noch mee liipe. (Yoo. 14:21; Tya. 4:8) Soo, tuu wayter kuut penutse was Yeehoowa uns fersoricht fer wayter iwer tas fray khaaf opfer lërne. Im neekste artikel, lërne mer mee iwer ti seechen woo mer kriin weeche tas fray khaaf opfer un wii mer petanklichkheet tsayche khene weeche Yeehoowa sayn liip.
LIIT 107 Yeehoowa tsaycht uns wii liipe
a TUU PESER FERXTEEN: “Triwer noo tenke” petayt iwer een sache mit acht tenke un mee kleenichkheete too triwer lërne fer tas peser ferxteen.
b (1 Yoohan 4:9, 10) Torich tas, is Kot sayn liip tsu uns taytlich: Kot hot sayn eensiche kepoerne Soon uf te welt kexikt, tas mer torich tee leepe kreechte. 10 Ti liip halt sich net tas meyer Kot keliipt hon, awer tas eyer uns keliipt hot un hot sayn Soon kexikt wii een opfer fer unser sinte teke.
c (Romaaner 8:32) Wën eyer noch net mool sayn aychne Soon kexoont hot, awer hot iim fer uns al ap kep, meecht eyer, mit sayn Soon, net kuuthërtslich al ti anere tinge fer uns kepe?
d (Romaaner 8:38, 39) Wayl ich sin mich sicher tas khee toot orer leepe, khee engel orer rechiirung, niks woos hayt kept orer woo noch khomt, khee kraft, 39 khee heech orer tiif, orer kwalkee aner kriatsyoon khan uns fon Kot sayn liip aus naner mache, woo in Yeesus Kristus, unser Hër, is.
e (Yoohan 13:1) Foer tas Fest fom Oostre, Yeesus wust tas ti tsayt khom is fer tiise welt lose un tsu sayne Fater keen. Soo, wayl eyer keliipt hot tii woo tsu tëm keheert hon, woo in te welt waare, hot eyer tëne pis aans ën keliipt.
f In Ëfeser 1:10, xprecht Phaul iwer “ti tinge im himel” samele. In Matheus 24:31 un Markus 13:27, xprecht Yeesus iwer ti “rauskesuuchtne” samele. Wii Phaul un Yeesus iwer samele kexproch hon, waare se iwer unerxiitliche tinge am xpreche. Phaul waar am xpreche iwer ti tsayt wën Yeehoowa raus suucht tii woo mit Yeesus rechiire tuun un tëne mit hayliche kayst salpt. Awer Yeesus waar am xpreche iwer ti tsayt wën ti kesalpte woo noch uf te eyert sin, tsum himel kenom wëre torich ti kroos tripulatsyoon.
g (Psalm 119:97) Wii aarich liipe ich tayn kesets! Te kanse taach tuun ich too triwer noo tenke (orer: “tas xtutiire”).
