Ti pewaysunge tsayche tas Yeesus is Heechste Priister kep im yoer 29, wii eyer ketaaft kep is. Wii wise mer tas? In sayn taaf, hot eyer ketsaycht tas eyer wilich waar fer sayn leepe ap kepe im simpoolix altar, woo Yeehoowa sayn ‘wile’ petayt. (Gál. 1:4; Heb. 10:5-10) Tiise simpoolix altar is in Yeesus sayn taaf tsum foer xayn khom. Wayl te altar een wichtiche teel fom tempel waar, is te kaystliche tempel, woerxaynlich, aach in Yeesus sayn taaf tsum foer xayn khom. Tiise kaystliche tempel is ales was Yeehoowa am mache is, torich Yeesus sayn opfer, tas ti layt khene in een phuer aat Yeehoowa aan peete. (Mat. 3:16, 17; Heb. 5:4-6)

Soo wii te tempel fon te friirixe tsayte, te kaystliche tempel praucht aach een Heechste Priister. Tas Yeesus tiise flicht erfiile khent, hot Yeehoowa tëm mit ‘hayliche kayst un macht’ kesalpt. (Atos 10:37, 38; Mar. 1:9-11) Awer, wii khene mer sicher sin tas Yeesus is in sayn taaf wii Heechste Priister in kesetst kep, eep eyer kextorep un uf kextii is? Tas payxpiil fon Aran un ti Heechste Priister woo noo tëm khom sin, tuut uns helfe tiise frooch antworte.

Tëm noo tas Kesets woo Yeehoowa fer Mooses kep hot, ploos te Heechste Priister khont in te Ale Haylichste apteelung fom tapernakel, un xpeeter, in te Ale Haylichste apteelung fom tempel, rin keen. Tiise apteelung is fon te Hayliche apteelung, torich een foerhang, aus naner kemacht kep. Te Heechste Priister is ploos am Taach fer ti Sinte Teke torich tiise foerhang kang. (Heb. 9:1-3, 6, 7) Aran un anere troye mëner noo tëm, sin wii Heechste Priister kesalpt kep eep se torich te foerhang fom tapernakel kang sin un in te Ale Haylichste rin kang sin. In te selwich aat, khene mer saan tas Yeesus is in kesetst kep wii Heechste Priister fon tëm kaystliche tempel eep sayne toot. Ploos tan, khont eyer te foerhang — tas is, sayn flayx — torich keen un im himel rin keen. (Heb. 10:20) Weeche tas, hot te aphostel Phaul iwich Yeesus kesaat: ‘Wii heechste priister . . . is eyer in een kreeser un perfëkter tapernakel, woo net fon mënxliche hënt kemacht kep is’, un ‘in tëm aychne himel’ rin kang. (Heb. 9:11, 24)

Es kept khee unerxiit tswixich wan te naye pakt hot aan kefang se kile un wan tee in kewayt kep is. Warom net? Wii Yeesus tsurik tsum himel kang is, hot eyer fer Yeehoowa keopfert tas weyert fon sayn perfëkt mënxliche leepe fer uns rete. Wii eyer tas kemacht hot, hot eyer tswaay fon tray xrite kep tas te naye pakt aan fange se kile khent. Tiise selwiche tray xrite hon aach te naye pakt in kewayt. Awer, was fer waare tiise tray xrite?

Eyerst, Yeesus is foer Yeehoowa khom. Tsweet, eyer hot fer Yeehoowa tas weyert fon sayn perfëkt mënxliche leepe keopfert. Trit, Yeehoowa hot tas weyert fon Yeesus sayn auskexitne pluut aan kenom. Te naye pakt hot ploos aan kefang se kile noo tas tiise tray xrite kep waare.

Ti Piipel tuut net kenau saan wan Yeehoowa tas weyert fon Yeesus sayn opfer aan kenom hot. Soo, khene mer net kenau saan in was fer spetsiifixe taach is te naye pakt in kewayt kep un hot aan kefang se kile. Awer, meyer sin sicher tas Yeesus is 10 taache foer te Phinkste tsurik tsum himel kang. (Atos 1:⁠3) In een xtun tswixich tiise khorts tsayt, hot Yeesus tas weyert fon sayn leepe keop­fert un Yeehoowa hot es aan kenom. (Heb. 9:⁠12) Een taytlich pewaysung tas te naye pakt hot aan kefang se kile, woo al siin khonte, is in te Phinkste fom yoer 33 pasiirt. (Atos 2:⁠1-⁠4, 32, 33) Oone tswayfel, hat te naye pakt xon aan kefang se kile.

In khortse wërter, te naye pakt hot aan kefang se kile un is aach in kewayt kep wii Yeehoowa tas weyert fon Yeesus sayn auskexitne pluut aan kenom hot un ti kesapte in tiise pakt rin ketuun hot. In tiise tsayt, hot te naye pakt aan kefang se kile mit te Heechste Priister Yeesus wii sayn Mitler. (Heb. 7:25; 8:1-3, 6; 9:13-15)