Ich sin im yoer 1954 uf te welt khom, in te Saint Paul xtat, Minnesota, Fereenichte Xtaate fon Amërika. Ich sin fon een katoolix familye khom, woo net raych un net aarm waar. Ich sin te tsweet fon finef khiner. Wii ich een khint waar, sin ich tsu een katoolix xuul kang un hon ich te phaater in te mes keholef. Awer, ich wust kans weenich fon te Piipel. Opwool hon ich keklaapt tas een Kot kept woo ales kemacht hot, hon ich mayn klaape aan te khërich kans ferloer.

In mayn eyerste yoer in tëm Rechts Uniwersiteet William Mitchell, Yeehoowa sayn Tsayer hon mich tehëm pesuucht. Wayl ich waar am mayn tsaych wexe, hot te pheyerche liiplich aan kenom in anere xtun tsurik khome. Wën tii retuer khom sin, hat ich tswaay frooche: “Warom tuun ti kuute layt net in te welt forem keen?” un “Wii khene ti layt wërklich froo sin?” Ich hon aan kenom tas puuch A Verdade Que Conduz à Vida Eterna un een Tradução do Novo Mundo das Escrituras Sagradas, woo een plinklich kriin farp hat. Ich hon aach een Piipel xtuutyum aan kenom. Tas hot  wërklich mayn aue uf kemacht. Ich hon mich ferwunert wën ich tsu wise kriit hon tas Kot sayn Raych is ti eensich rechiirung woo khan ti propleeme fon te mënxe in te ray tuun. Ich hon kemërkt tas ti mënxliche rechiirunge hon wërklich net pariirt un tas tii hon ti welt fol mit phayn, xwiirichkheete un unkerechtichkheet kelos.

Am aanfang fon 1982, hon ich mich tsu Yeehoowa tetikiirt, un phaar moonate tëm noo, hon ich mich ketaaft im konkrës “A Verdade do Reino”, in een ewënte plats fon Saint Paul xtat. In te neekst woch, sin ich tsu tëm selwich plats kang, fer een tëst mache fer atwokaat wëre. Am aanfang fon Oktooper, hon ich tsu wise kriit tas ich sin kuut in te tëst kang un khont yets wii atwokaat xafe.

In tëm konkrës “A Verdade do Reino”, hon ich Mike Richardson kekhënt. Tee hot im Petël fon Brooklyn kexaft un hot mich aus keleet tas een rechts apteelung in tëm haupst sets in kesetst waar. Ich hon mich erinert fon te etyoopixe eunuuk sayn wërter woo in Atos 8:36 xteet, un hon mich kefroot: ‘Was hinert mich in te Rechts Apteelung xafe?’ Tan, hon ich een petitsyoon fer Petël aus kefiilt.

Mayn eltere waare net froo tas ich een Yeehoowa sayn Tsayer kep sin. Mayn fater hot mich kefroot ep fer Petël xafe teet etwas nutslich fer mayn aarwayt wii atwokaat pringe. Ich hon aus keleet tas mayn aarwayt teet fraywilich sin, un ich teet 75 tolare yeete moonat kriin, woo waar tas hilef woo ti petelite kriit hon.

Noo tas ich hon mayne flichte in mayn aarwayt in te kericht erfiilt, hon ich aan kefang mayn tiinst im Petël fon Brooklyn, Nay York, in 1984. Ich teet in te Rechts Apteelung xafe. Ti speriëns woo ich in mayn friirix aarwayt kriit hat, hot mich foer perayt fer was noch khome teet.

Te Stanley Saal, woo in Jersey Xtat, Nay Jersey xteet, waar in Nofemper fon 1983 kekhaaft. Ti priiter hon ti erlaupnis ferlangt fer noch mool wii nay lose ti elëtrix un hitraulix teele fon tëm kepay. Wën tii hon sich mit te autoriteete fon te xtat aan ketrof, ti priiter hon aus keleet tas tii wolte te Stanley Saal penutse wii een konkrës saal fer ti Yeehoowa sayn Tsayer. Awer, tas hot een propleem keprung. Ti kesetse fon te Jersey Xtat iwer wii solte ti kepaye penutst wëre, hon kesaat tas ti aanpeetung kepaye khente ploos in woonunge nochperxaft plaype. Awer, te Stanley Saal waar in een kexeft nochperxaft. Tes weeche, hon ti autoriteete net ti erlaupnis kep. Ti priiter hon ferlangt fer ti autoriteete te prosës noch mool noo kuke, awer tii hon tas net aan kenom.

 In mayn eyerst woch in Petël, ti orkanisatsyoon hot tiise prosës fer ti kerichte kenom. Wayl ich hat tswaay yoer kexaft in tëm kericht fon Saint Paul, Minnesota, waar ich keweent mit tiise sorte prosëse. Eene fon unser atwokaate hot kesaat tas te Stanley Saal waar xon penutst kep fer unerxiitliche puuplixe ewënte hale, soo wii fiilme un musike foerxtelunge. Tan, warom waar tas ferpoot relichyeese ewënte tat hale? Te kericht hot ti sache noo kekukt un hot ëntxlist tas ti Jersey Xtat hat unser relichyeese frayheet net respëktiirt. Ti richter hon ti xtat kexikt ti erlaupnis kepe. Ich hon aan kefang se siin tas Yeehoowa waar am seechne ti aarwayt fon te Rechts Apteelung fon te orkanisatsyoon. Ich waar aarich froo tas ich khont een teel in tas hon!

Ti priiter hon aan kefang een kroos projëkt fer te Stanley Saal noch mool wii nay lose. In 8^te Septemper fon 1985, weenich tan een yoer tas mer ti aarwayt aan kefang hon, waar es meechlich tas formatuer fon te 79^te klas fon Xileat tat hale. Ich waar wërklich froo tas ich khont in tiise aarwayt fer Yeehoowa helfe. Tas hot mich fiil frooer kelos wii ti aarwayt fon atwokaat woo ich foer Petël hat. Ich khont mich net foer xtele wii fiil anere priwilëje teet Yeehoowa fer mich im futuer kepe.

Um rom 1980, hon ti toktere un ti krankehayse eftas net ti winxe respëktiirt fon folyëriche Yeehoowa sayn Tsayer woo wolte khee pluut aan nëme. Fer tii woo xwang waare, tas waar noch xlimer, wayl ti richter hon eftas kemënt tas ti fraae hate net ti recht fer ëntxlise tas pluut net aan nëme. Ti richter hon kesaat tas wën ti muter net pluut aan nëme teet, khent se xtërpe un een nëneche oone sayn muter lose.

In 29^te Teetsemper fon 1988, hot ti xwester Denise Nicoleau fiil pluut ferliirt wën se hot sayn khint kriit. Wayl es hot aus kesiin tas sayn leepe ins kefoer waar, te tokter wolt tas se pluut aan nëme teet. Ti xwester Denise hot tas net aan kenom. Te neekst moynt, te krankehaus hot fer een richter ferlangt ti erlaupnis fer pluut aan tëne tuun. Te richter hot net fer ti xwester Denise orer sayn man te keleechenheet kep fer sayn mënung aus leye, un tee hot soo kaar net fer tëne pekhant kemacht tas tee hat te krankehaus erlaupt pluut aan ti xwester tuun.

Am fraytaach, 30^te Teetsemper, te krankehaus hot pluut aan ti xwester Denise ketuun. Tii hon tas kemacht opwool sayn man un anere parente woo tat waare, hon sich taytlich keeche tas kextelt. In te nacht, fiile fon Denise sayn parente un etliche elteste waare in kexpërt. Ti akusatsyoon waar tas tii hate sich um rom Denise sayn pet kextelt fer ti transfutsyoon um hale. Im  neekste taach, waar tas xon in te notisye fon Nay York un Long Island.

Am moontaachs frii, hon ich mit Milton Mollen kexprooch, woo een richter fon een heecher kericht waar. Ich hon ti kleenichkheete fon tëm prosës aus keleet, un foer keprung tas te aner richter hot te transfutsyoon erlaupt, opwool eyer hot net mim pheyerche kexprooch. Te richter Mollen hot mich ferlangt fer xpeeter tsu sayn skritoryum tsurik khome fer mee iwer ti sache xpreche un iwer ti kesetse woo mit tas se tuun hate. Am oomts, ich un Philip Brumley, woo hot mit mich in Petël kexaft, sin pis te skritoryum fom richter Mollen kang. Te richter hot aach te krankehaus sayn atwokaat in kelaat fer mit uns sin. Unser kexpreech is ërnst kep. Am een xtun, hot te pruuter Philip mich een tsetelche kexrip: “Peruych tich.” Tas waar een kuut aanreet, wayl ich waar xon am pees wëre wii ich fersuucht hon se pewayse tas te krankehaus sayn atwokaat ferkheert waar.

Unkefeer een xtun tëm noo, hot te richter Mollen kesaat tas tiise prosës teet te eyerst sin woo eyer im neekste taach uf phase teet. Wii mer ausm sayn skritoryum kang sin, hot te richter Mollen kesaat: “Te krankehaus sayn atwokaat tuut moye een xweyer aarwayt hon.” Tas hot petayt tas es weyer net laycht fer te atwokaat sayn sayt xitse. Ich hon kexpiirt tas Yeehoowa mich am saan waar tas mer hate eene kuute xans fer se kewine. Es waar wunerlich siin wii Yeehoowa uns am penutse waar fer sayn wile mache.

Meyer hon pis xpeeter kexaft fer in richte was mer teete im neekste taach saan fer unser sayt xitse. Wayl tas kericht ticht fom Petël fon Brooklyn waar, ti meyerste priiter fon unser kleen Rechts Apteelung is pis tat kelaaft. Noo tas een krup fon fier richter uns keheert hon, hon se ëntxlist tas te krankehaus selt aan sich net te transfutsyoon mache. Tii hon kextelt tas es weyer keeche ti rechte woo yeete mënx hot soo was xike oone te pasyent sayn mënung heere.

Khorts tsayt tëm noo, te Heechste Kericht fon Nay York hot kextitst te ëntxlus tas ti xwester Denise te recht hat fer een tratamënt hon, woo khee pluut penutst. Es waar te eyerste fon fier ëntxlise woo mit pluut se tuun hate, woo sin fon te hooche kerichte in unerxiitliche xtaate kemacht kep, un woo ich te priwilëj hat fer mit helfe. (Kuk te khaste “ Ti kewine in xtaate Heechste  Kerichte”.) Ich hon aach kexaft mit anere atwokaate fon Petël in prosëse woo hate se tuun mit te recht fer een khint uf phase, tiwors un kesetse iwer wii ti lënter un kepaye penutse.

Wën ich mayn fraa Dawn khëne kelërnt, waar se tiworsiirt un waar tray khiner am tsiie. Tii waar een pioneerin un hot aach kexaft. Tii hot fiil in sayn leepe mit kemacht un ich hon mich ferwunert mit sayn pextimung fer Yeehoowa tiine. Im yoer 1992, hon mer te konkrës “Portadores de Luz” in Nay York kekukt, un ich hon se ferlangt op se wolt mayn xetsye sin. Een yoer tëm noo, hon mer uns kehayrat. Dawn is een kexenk fon Yeehoowa — tii tuut imer Yeehoowa im eyerste plats tuun un is een xamant persoon. Dawn tuut mich wërklich mit tëm kuutes peloone yeete taach fon unser leepe paysamer. (Pro. 31:12)

Wën meyer uns kehayrat hon, ti khiner waare 11, 13 un 16 yoer alt. Ich wolt eene kuute fater fer tëne sin; tan, hon ich mit acht keleest un aan kewënt ales was unser puplikatsyoone saan iwer wii eene xtif fater sin. Torich ti yoere, hon mer phaar xwiirichkheete mit kemacht, awer es frayt mich tas ti khiner hon mich aan kenom wii een froynt woo se traue khene un wii een liipliche fater. Unser khiner sayn froynte waare imer hërtslich wilkhome in unser haus, un meyer hate imer kërn tas tiise yunge, fol mit muut, um uns rom waare.

Im yoer 2013, hon ich un Dawn uns kewanert fer unsere eltere uf phase, woo xon alt waare. Es hot mich ferwunert tas mayn tiinst fer Petël is net tsum ën kang. Ich sin in kelaat kep fer eftas tsu Petël keen un wayter ti Rechts Apteelung helfe.

In Septemper fon 2018, hon ich kemërkt tas ich hon tsu eftas kehust foer se xpreche. Mayn tokter hot mich noo kekukt, awer khont net raus fine te uersach fon te huste. Nochter, in Yanuer fon 2019, een aner tokter hot mich kesaat tas ich fiilaycht een unkeweenlich neuroloxik krankheet hat woo teet, mit te tsayt, mayn kanse khërper xroo petrefe.

Tray taache tëm noo, wii ich mayn liipste sport am xpiile waar, sin ich kefal un hon mayn rechts puls ferproch. Tan, hon ich kemërkt tas ich ti apiliteete fer mayn muskele kontroliire am ferliire waar. Es hot mich ferwunert wii xnel is mayn krankheet xlechter kep. Es is xweyerer fer mich kep se xpreche, fon een plats noom aner laafe un unerxlike.

Ich sin aarich froo tas ich khan Yeehoowa sayn orkanisatsyoon helfe mit mayn speriëns als atwokaat. Un ich sin froo tas ich khont fiile artikele fer piichelche xraype, woo sin fon toktere, atwokaate un richter keleest. Ich hon aach reete uf te kans welt kehalt, fer te recht fon Yeehoowa sayn folek xitse fer operatsyoone un tratamënte kriin, woo khee pluut penutse. Soo wii soo, tuun ich saan tas selwiche woo in Lucas 17:10 xteet: ‘Ich sin een unutsliche sklaaw. Ich hon ploos kemacht was ich mache selt.’