1. Was wole mer saan mit te wërter “ti woerheet”?

“WII host tuu ti woerheet kelërnt?” “Pist tuu in te woerheet tsayt tuu uf te welt khom pist?” “Wii lang pist tuu in te woerheet?” Fiilaycht, host tuu xon tiise frooche keheert — orer, tuu host tii fer anere kemacht. Was wole mer saan mit te wërter “ti woerheet”? Ti meyerst tsayt, tas hot se tuun mit was mer klaape, was mer mache fer Kot aan peete un ti aat wii mer leepe. Ti layt woo in “te woerheet” sin, wise was ti Piipel in lërnt un leepe tëm noo sayn printsiipye. Tes weeche, sin se fray fon te relichyeese liieray un hon tas peste leepe woo een imperfëkt mënx hon khan. (João 8:32)

2. Tëm noo João 13:34, 35, was khan yemant, am aanfang, tsu te woerheet aan tsiie?

² Am aanfang, was hot tich tsu te woerheet aan ketsoo? Fiilaycht, es waar ti kuut aanxtelung fon Yeehoowa sayn Tsayer. (1 Ped. 2:12) Orer, im xtant, es waar ti liip woo se ketsaycht hon. Fiile woo tsu een fersamlung tas eyerste mool khome, tuun tiise liip xpiire, un fon tëm sich erinere mee wii fon was ti priiter ufm palk kexprooch hon. Tas ferwunert uns net, wayl Yeesus hot kesaat tas sayn tisipele teete kekhënt wëre torich ti liip woo se tswixich tëne hon. (Lees João 13:34, 35.) * Awer, ploos ti liip is net kenuuch fer uns fest im klaape hale. Es is neetich mee mache.

3. Was khan pasiire wën mer unser klaape xtaype ploos in te liip woos kept tswixich ti priiter?

³ Meyer sole net unser klaape xtaype ploos in te liip woos tswixich Kot sayn folek kept. Warom net? Iwerlee tich tas yemant in te kemaynt — soo kaar eene elteste orer een pioneer  — een xweyer sint macht. Orer tas yemant in tayn kemaynt tich traurich lost. Orer noch, tas eene pruuter een aphostata wërt un fangt aan se saan tas meyer net ti woerheet hon. Was teest tuu mache? Teest tuu xtolpere un noo lose Yeehoowa tiine? Ti lisyoon fer uns is: tayn klaape uf paue iwer ti aanxtelung fon te anere un net iwer tayn froyntxaft mit Yeehoowa, is tas selwiche wii een haus uf paue ufm pootem woo net fest is. Un tayn “haus” fom klaape khan net uf kepaut wëre ploos mit materyaale woo laycht sin, wii xpiirunge un emotsyoone. Tii praucht aach xtarke materyaale, wii fakte un loxik ferxtant. Tuu prauchst fer tich selepst pewayse tas ti Piipel ti woerheet iwer Yeehoowa hot. (Rom. 12:2)

4. Soo wii in Mateus 13:3-6, 20, 21 xteet, was pasiirt mit etliche woo keproopt sin?

⁴ Yeesus hot kesaat tas etliche teete ti woerheet “mit frooheet” aan nëme, awer teete sayn klaape ferliire wën se keproopt weyere. (Lees Mateus 13:3-6, * 20, 21. *) Fiilaycht hon se net ferxtan tas tii woo Yeesus noo keen, teete xwiirichkheete mit mache. (Mat. 16:24) Orer fiilaycht hon se ketenkt tas se khee propleeme hëte, ploos seechen kriin teete. Awer in tiise imperfëkt welt, tuun mer al propleeme hon. Un etliche ënerunge woo in unser leepe pasiire, khene unser frooheet fer een tsayt xteele. (Sal. 6:6; Ecl. 9:11)

5. Was tsaycht tas ti meyerste priiter un xwestere sicher sin tas se ti woerheet kefun hon?

⁵ Unser meyerste priiter un xwestere hon khee tswayfel tas se ti woerheet kefun hon. Warom khene mer tas saan? Wayl niks macht sayn sicherheet waklich, soo kaar wën eene krist tëne traurich lost orer een xweyer sint macht. (Sal. 119:165) Yeete proop macht tëne sayn klaape xtërker, net xwacher. (Tia. 1:2-4) Was khan tich helfe soo eene xtarke klaape hon?

6. Iwer was hon ti eyerste kriste sayn klaape kepaut?

⁶ Ti eyerste kriste hon sayn klaape kepaut iwer te khëntnis fon te Xrifte un ti inlërnunge fon Yeesus Kristus, tas is, ‘ti woerheet fon te kuute oter’. (Gál. 2:5) Tiise woerheet hot se tuun mit ales woo ti kriste klaape, tepay ti fakte iwer Yeesus sayn fray khaaf opfer un sayn ufxtaye fom toot. Te aphostel Phaul waar sicher tas tiise inlërnunge woer waare. Warom khene mer tas saan? Wayl eyer hot ti Xrifte penutst fer pewayse, ‘tëm noo was kexrip kep waar, tas es neetich waar tas te Kristus layte teet un fon te toote uf keruuft weyer’. (Atos 17:2, 3) Ti eyerste kriste hon tiise inlërnunge aan kenom un hon ketraut aan tëm hilef fom hayliche kayst fer Kot sayn Wort ferxteen. Tii hon fer sich selepst pewayst tas tiise inlërnunge sich in te Xrifte kehal hon. (Atos 17:11, 12; Heb. 5:14) Tii hon net sayn klaape kepaut ploos iwer xpiirunge un emotsyoone, un tii hon net Yeehoowa ketiint ploos weeche ti froyntxaft mit te anere in te kemaynt. Xtats tas, tii hon sayn klaape kextaypt in te ‘kenaue khëntnis fon Kot’. (Col. 1:9, 10)

7. Was tuut te klaape in te piiplixe woerheete fer uns mache?

⁷ Ti woerheete fon Kot sayn Wort tuun sich nii ënere. (Sal. 119:160) Tsum payxpiil, tii  plaype ti selwiche aach wën yemant uns pelayticht orer een xweyer sint macht. Un tii sin wayter ti selwiche wën meyer xwiirichkheete mit mache. Tes weeche, prayche mer ti inlërnunge fon te Piipel kuut khëne un sicherheet hon tas tii woer sin. Te klaape woo sich halt in piiplixe woerheete, tuut uns helfe fest plaype wën mer proope mit mache. Tii wërt wii een anker, woo een xif fest halt torich een xtorem. Wii khanst tuu ti sicherheet ferxtërke tas tuu ti woerheet host?

8. Noo 2 Timóteo 3:14, 15, was hot Timoteo ti sicherheet kep tas eyer ti woerheet hat?

⁸ Timoteo waar sich sicher tas eyer ti woerheet hat. Was hot tëm tiise sicherheet kep? (Lees 2 Timóteo 3:14, 15.) * Eyer hot ti “hayliche xrifte” kekhënt mit tëm hilef fon sayn mama un sayn wowo. Awer, oone tswayfel, hot eyer tsayt un kraft penutst fer tiise xrifte xtutiire. Tas hot tëm ti sicherheet kep tas tiise xrifte ti woerheet hate. Xpeeter, Timoteo, sayn mama un sayn wowo hon ti inlërnunge fon te kristyanismus tsu wise kriit. Oone tswayfel, Timoteo hot sich ferwunert mit te liip woo Yeesus sayn nookeener ketsaycht hon, un wolt mit sayn kristliche priiter sin un tëne uf phase. (Fil. 2:19, 20) Awer, tëm sayn klaape waar uf kepaut, net iwer sayn xpiirunge fer ti anere, awer iwer fakte woo tëm tichter tsu Yeehoowa kenom hon. Wëns tuu ti Piipel leest, must tuu in een loxik aat triwer noo tenke. Tas tuut tich helfe sicher sin, tas was tuu iwer Yeehoowa kelërnt host, woer is.

9. Was fer tray wichtiche woerheete prauchst tuu fer tich selepst pewayse?

⁹ Fer aan fange, prauchst tuu fer tich selepst am weenichsts tray wichtiche woerheete pewayse. Eyerst: Yeehoowa is te Kriatoer fon ales. (Êxo. 3:14, 15; Heb. 3:4; Apo. 4:11) Tsweet: ti Piipel is Kot sayn pexeet fer ti  mënxe. (2 Tim. 3:16, 17) Un trit: Yeehoowa hot een orkanisiirt folek woo tëm aan peet unich Yeesus sayn fiirung, un Yeehoowa sayn Tsayer sin tiise folek. (Isa. 43:10-12; João 14:6; Atos 15:14) Fer tiise wichtiche woerheete fer tich selepst pewayse, prauchst tuu net ales iwer ti Piipel wise. Tayn opjetiiw sol sin tayn ‘kapasiteet fer triwer noo tenke’ penutse fer ti sicherheet ferxtërke tas tuu ti woerheet host. (Rom. 12:1)

10. Noo tas tuu sicher fon te woerheet pist, was prauchst tuu mache?

¹⁰ Noo ti tray wichtiche woerheete woo mer kexprooch hon fer tich selepst pewayse, prauchst tuu wise wii ti Piipel penutse fer tiise woerheete fer ti anere pewayse. Warom? Wayl, als kriste, hon meyer een flicht: ti woerheete in lërne woo mer kelërnt hon fer tii woo uns heere wole. * (1 Tim. 4:16) Un wën mer fersuuche ti piiplixe woerheete fer ti anere pewayse in een aat tas se sicherheet hon, tuut unser aychne sicherheet xtërker wëre.

11. Wii khene mer Phaul noo mache wën mer ti anere in lërne?

¹¹ Wii te aphostel Phaul ti layt in kelërnt hot, hot eyer fersuucht ‘tëne iwer Yeesus in reete, tëm noo Mooses sayn Kesets un ti Profeete.’ (Atos 28:23) Wii khene mer Phaul noo mache? Wën mer in lërne, mise meyer mee mache wii ploos fakte xpreche. Meyer mise unser xtutënte helfe ti Piipel penutse fer triwer noo tenke, tas se khene ticht pay Yeehoowa khome. Meyer wole tas se ti woerheet aan nëme, net ploos wayl se uns respëktiire. Awer, tas tii aus sich selepst pewayse khene tas was se am lërne sin iwer unser liipliche Kot, ti woerheet is.

12-13. Wii khene ti eltere sayn khiner helfe wayter in te woerheet keen?

¹² Eltere, es is sicher tas teyer wolt tas ayre khiner wayter in te woerheet keen. Fiilaycht tenkt teyer tas, wën ayre khiner kuute froynte in te kemaynt hon, tuun se kaystlich forem keen. Awer ploos kuute froynte hon, is net kenuuch fer ayre khiner sicher lose tas se ti woerheet hon. Tii prayche een froyntxaft mit Kot hon un fer sich selepst pewayse tas ti piiplixe inlërnunge woer sin.

¹³ Ti eltere mise mee mache wii ploos sayn khiner ti woerheet iwer Kot in lërne. Es is neetich te payxpiil kepe als kuute xtutënte fon te Piipel. Ti eltere prayche tsayt hoole fer triwer noo tenke aan was se lërne. Soo, wërts laychter sayn khiner in lërne tas selwiche mache. Tii prayche fer sayn khiner tsayche wii ti feramente fer ti Piipel xtutiire penutse, soo wii se teete mit een xtutënt mache. In tiise  aat, tuun se sayn khiner helfe Yeehoowa liipe un traue tas eyer “te troye un ferninftiche sklaaw” penutst fer kaystliche esmitel kepe. (Mat. 24:45-47) Eltere, tenkt net tas ploos keweenliche woerheete fer ayre khiner in lërne, kenuuch is. Fer tëne helfe een xtark klaape ëntwikele, is es neetich aach “ti tiife tinge fon Kot” in lërne, tëm noo wii alt se sin un sayn kapasiteet.

14. Warom sole mer ti profetsiie fon te Piipel xtutiire? (Kuk aach te khaste “ Khanst tuu tiise profetsiie aus leye?”)

¹⁴ Ti piiplixe profetsiie sin een wichtich teel fon Kot sayn Wort. Tii tuun uns helfe unser klaape aan Yeehoowa ferxtërke. Was fer profetsiie hon xon tayn klaape ferxtërkt? Fiilaycht, tuust tuu klaych tenke aan te profetsiie iwer ti “letste taache”. (2 Tim. 3:1-5; Mat. 24:3, 7) Awer, was fer anere profetsiie, woo sich xon erfiilt hon, khene tayn klaape ferxtërke? Tsum payxpiil, khanst tuu aus leye wii ti profetsiie woo in Daniel kapitel 2 orer in Daniel kapitel 11 xteen, sich xon erfiilt hon un sin sich noch am erfiile? * Te klaape woo sich fest aan ti Piipel xtaypt, khan net ferproch wëre. Tenk aan te payxpiil fon unsere priiter, woo xweyer yachtung mit kemacht hon in Taytxlant, torich te Tsweete Welt Kriich. Opwool tii net ti piiplixe profetsiie iwer ti letste taache kans ferxtan hon, hate se eene xtarke klaape in Kot sayn Wort.

15-17. Wii ti Piipel xtutiire hot unser priiter ferxtërkt, woo keyacht waare fon te Nasiste?

¹⁵ Unich ti Nasist rechiirung in Taytxlant, tausente fon unsere priiter un xwestere waare tsu konsentratsyoon khampe kexikt. Hitler un Heinrich Himmler, een wichtich ofitseer, hon Yeehoowa sayn Tsayer kehast. Tëm noo een xwester, Himmler hot fer een krup fon xwestere in een konsentratsyoon khamp kesaat: “Ayre Yeehoowa khan im himel rechiire, awer hiir uf te eyert, rechiire meyer! Meyer tuun fer aych tsayche weer lënger playpt, teyer orer meyer!” Was hot Yeehoowa sayn folek keholef wayter troy plaype?

 ¹⁶ Tiise Piipel xtutënte wuste tas Kot sayn Raych hot im yoer 1914 aan kefang se rechiire. Tii hon sich net ferwunert wii ti yachtung foer khom is. Awer, tii waare sicher tas khee mënxlich rechiirung khënt Yeehoowa um hale sayn propoos erfiile. Hitler khënt net ti woere aanpeetung fernichte, orer een rechiirung in setse woo xtërker wii Kot sayn Raych weyer. Unsere priiter waare sicher tas, een tuun was pasiire teet, Hitler sayn rechiirung teet tsum ën khome.

¹⁷ Ti sicherheet fon tiise priiter un xwestere hat een xtark funtamënt. Phaar yoere tëm noo, is ti Nasist rechiirung tsum ën khom, un Heinrich Himmler — te man woo hat kesaat: “Hiir uf te eyert, rechiire meyer!” — is aus keris fer sayn aychne leepe rete. Wii eyer tas kemacht hot, hot eyer te pruuter Lübke ketrof, woo ënte in kexpërt waar un woo Himmler kekhënt hot als Yeehoowa sayn Tsayer. Kans ferxlaa, hot Himmler fer te pruuter Lübke kefroot: “Nayaa, Piipel Xtutënt, was pasiirt yets?” Te pruuter Lübke hot keantwort tas Yeehoowa sayn Tsayer imer wuste tas ti Nasist rechiirung teet tsum ën khome, un tas tii fray kemacht weyere. Himmler, woo soo fiil xlechte tinge iwer Yeehoowa sayn Tsayer kesaat hat, is ëntlich oone wërter keplip. Klaych tëm noo, hot eyer sich um keprung. Was is ti lisyoon? Ti Piipel xtutiire, tepay sayn profetsiie, khan uns helfe een xtarke klaape aan Kot hon un fest plaype wën mer yachtung mit mache. (2 Ped. 1:19-21)

18. Soo wii in João 6:67, 68 xteet, warom prayche mer ‘kenaue khëntnis un kans ferxtëntnis’ hon?

¹⁸ Yeete eene fon uns sol liip tsayche; tiise kwaliteet itentiftsiirt ti woere kriste. Awer, meyer prayche aach ‘kenaue khëntnis un kans ferxtëntnis’ hon. (Fil. 1:9) Wën mer tas net hon, khënte mer influëntsiirt wëre ‘fon yeete wint fon inlërnunge, fon te faale woo mëner xtele’, tepay sin ti aphostate. (Efé. 4:14) Im eyerst yoer hunert, fiile tisipele hon uf kep Yeesus noo keen. Awer, te aphostel Pheeter hot ti fest sicherheet ketsaycht tas Yeesus ‘ausxprechunge fon eewiche leepe’ hat. (Lees João 6:67, 68.) * Opwool Pheeter net ales iwer tiise ausxprechunge ferxtan hot, is eyer wayter leaal keplip wayl eyer ti woerheet iwer Kristus ferxtan hot. Tuu khanst aach tayn sicherheet in was ti Piipel in lërnt ferxtërke. Wëns tuu tas machst, tuut tayn klaape xtark plaype ekaal was pasiirt, un tuu khanst aach anere helfe een xtarke klaape hon. (2 João 1, 2)