1. Was fer aanreet kept Filipenses 2:3, un warom is es nutslich tas aan wëne?

MIT TEEMUUT, tuun meyer Yeehoowa aan heere wayl meyer ferxteen tas eyer imer wees was peser fer uns is. (Efé. 4:22-24) Wën meyer teemuutich sin, tenke meyer tas was Yeehoowa wil, is wichtichter wii was meyer wole, un tas ti anere kreeser sin wii meyer. Te resultaat is tas meyer een kuut froyntxaft hon mit Yeehoowa un unsere priiter. (Lees Filipenses 2:3.) *

2. Was hot te aphostel Phaul erkhënt, un was tuun mer in tiise artikel siin?

² Awer, wën mer net uf phase, meyer khene influëntsiirt wëre fon te mënxe in Satanaas sayn welt, woo hoochmuutich un ekoiistix sin. * Tas siit aus tas es waar am pasiire mit etliche kriste in te eyerst yoer hunert, wayl te aphostel Phaul hot fer te romaanixe kexrip: “Ich saan fer yeete eene fon aych, tas teyer net fon aych selepst mee tenkt wiis neetich is, awer tas yeete eene tenkt in een aat woo ferninftichkheet tsaycht.” (Rom. 12:3) Phaul hot erkhënt tas meyer prayche weyert fer uns selepst kepe. Awer, ti teemuut tuut uns helfe aanmeesich sin. In tiise artikel, tuun mer siin wii ti teemuut khan uns helfe net tsu fiil aan uns selepst tenke in tray situatsyoone: (1) unser hayrat, (2) unser priwilëje in Yeehoowa sayn orkanisatsyoon un (3) ti aat wii meyer ti sotsyaale weepe penutse.

3. Warom khene propleeme in te hayrat foer khome, un wii tuun etliche mit tii um keen?

³ Yeehoowa hot ti hayrat kepleent tas ti mëner un fraae froo weyere. Awer nimant is perfëkt, soo tuun se fiilaycht net in ales xtime. Wërklich, Phaul hot kexrip tas tii woo sich hayrate, teete propleeme mit mache. (1 Cor. 7:28) Etliche mërke tas tii imer am xtrayte sin mit sayn man orer fraa. Tes weeche, tuun se fiilaycht tenke tas es peser weyer wën se sich net ferhayrat hëte. Wën se sich lose fon te welt influëntsiire, tuun se klaych tenke tas ti tiwors te pest ausweech is. Tii tuun tenke tas sayn aychne frooheet suuche is tas haupste.

4. Mit was mise mer uns uf phase?

⁴ Meyer mise uns uf phase fer net untsufriitich mit unser hayrat wëre. Meyer wise tas ti Piipel erlaupt ti tiwors ploos weeche een uersach: sëksuaal imoraaliteet. (Mat. 5:32) Soo, wën propleeme in unser hayrat foer khome, sole mer net hoochmuutich sin un aan fange se tenke: ‘Tiise hayrat tuut mich net tsufriite lose. Ich tuun net ti liip kriin woo ich fertiine. Ich tuun kreeser frooheet fine mit een aner persoon.’ Wën mer soo tenke, meyer tuun ploos aan uns selepst tenke, un net aan unser man orer fraa. Ti kluucheet fon te welt saat tas tuu solst tayn hërts noo keen un mache was tich froo lost, soo kaar wën tas petayt tayn hayrat tsum ën pringe. Im keeche teel, Kot saat tas tuu ‘solst net ploos tayn aychne interese suuche, awer aach ti interese fon te anere’. (Fil. 2:4) Yeehoowa wil tas tuu tayn hayrat halst, un net tas tuu tii tsum ën pringst. (Mat. 19:6) Es is wichtich eyerst aan Yeehoowa tenke, un net aan tich selepst.

5. Soo wii in Efésios 5:33 xteet, wii sole te man un sayn fraa sich naner pehantele?

⁵ Eene man un sayn fraa sole sich naner mit liip un respëkt pehantele. (Lees Efésios  5:33) * Ti Piipel lërnt in tas mer sole uns traan hale aan kepe, xtats aan kriin. (Atos 20:35) Was fer kwaliteet tuut een pheyerche helfe liip un respëkt tsayche? Ti teemuut. Mëner un fraae woo teemuutich sin, tuun net sayn aychne interese suuche, awer ‘ti interese fon tëm aner persoon’. (1 Cor. 10:24)

6. Was lërne mer fon was Steven un Stephanie kesaat hon?

⁶ Ti teemuut heleft fiile kristliche pheyerche kreeser frooheet in sayn hayrat fine. Tsum payxpiil, eene man, woo Steven heest, saat: “Wën teyer een tiim sayt, tuut teyer mitsamer xafe, haupstsechlich wën propleeme foer khome. Xtats tenke: ‘Was is peser fer mich?’, tuust tuu tenke: ‘Was is peser fer uns?’” Tëm sayn fraa, Stephanie, tuut tas selwiche tenke. Tii saat: “Nimant wil mit een keechner leepe. Wën mer net in etwas xtime, fersuuche mer ti uersach fine. Tan, tuun mer peete, unersuuche un iwer tas xpreche. Meyer tuun keeche te propleem keen un net keeche te anere.” Mëner un fraae wëre frooer, wën se net aan sich selepst mee tenke wiis neetich is.

7. Wii sol eene pruuter sich aan xtele wën eyer een priwilëj kriit?

⁷ Fer uns, is es een priwilëj Yeehoowa tiine, een tuun was mer mache. (Sal. 27:4; 84:10) Wën eene pruuter wilich is fer mee in Yeehoowa sayn orkanisatsyoon mache, tas is iwer kuut. Ti Piipel saat: “Wën eene man sich aan xtrengt fer superintentent sin, tuut eyer kuut tings winxe.” (1 Tim. 3:1) Awer, wën eyer een priwilëj kriit, tee sol net mee tenke fon sich selepst wiis neetich is. (Luc. 17:7-10) Tëm sayn tsiil sol sin ti anere mit teemuut tiine. (2 Cor. 12:15)

8. Was lërne mer mit te payxpiile fon Tiotrefes, Usiias un Apsaloon?

⁸ Ti Piipel xprecht iwer mëner woo tsu fiil aan sich selepst ketenkt hon. Tiotrefes waar net ferninftich. Eyer hot ‘tas eyerste plats’ in te kemaynt kesuucht. (3 João 9) Weeche hoochmuut, hot Usiias fersuucht een aarwayt mache woo Yeehoowa net fer tëm kep hat. (2 Crô. 26:16-21) Apsaloon wolt kheenich sin, soo hot tee kemacht wii wën eyer ti layt keliipt hët, fer tëne sayn unerxtitsung kriin. (2 Sam. 15:2-6) Wii tiise piiplixe kexichte taytlich tsayche, Yeehoowa is net froo mit layt woo sayn aychne eere suuche. (Pro. 25:27) Mit te tsayt, hoochmuut un kroose tinge suuche, tuun ploos tsum unklik nëme. (Pro. 16:18)

9. Was fer payxpiil hot Yeesus kep?

⁹ Im keeche teel mit tiise payxpiile, kuk mool Yeesus sayns: “Opwool eyer waar wii Kot, hot eyer net ketenkt Kot sayn plats fer sich neme, in anere wërter, sich kraat soo wii Kot mache.” (Fil. 2:6) Opwool ploos Yeehoowa mechticher wii Yeesus is, tuut Yeesus net aan sich selepst mee tenke wiis neetich is. Tee hot fer sayn tisipele kesaat: “Wayl tee woo sich aan xtelt wii te kleenste unich aych, is tee woo kroos is.” (Luc. 9:48) Es is iwer kuut xafe mit pioneere, ministeriaale tiiner, elteste un sirkuyt superintentente woo teemuutich sin, soo wii Yeesus! Wën mer teemuutich sin, tuun mer mee liip eene fer ti anere tsayche. Un Yeesus hot kesaat tas tiise liip teet Kot sayn woer orkanisatsyoon itentifitsiire. (João 13:35)

10. Was solst tuu mache wëns tuu tenkst tas ti elteste net ti propleeme in te kemaynt kuut uf phase?

¹⁰ Khan sin tas tayn kemaynt etliche propleeme hot, un tuu mënst tas ti elteste tuun se net kuut uf phase. Was solst tuu mache? Xtats sich pexweere, say teemuutich un xtits tii woo ti kemaynt fiire. (Heb. 13:17) Fer tich helfe tas mache, froo tich: ‘Sin tiise propleeme wërklich  soo kroos, tas se mise in te ray ketuun wëre? Is tas ti richtich tsayt fer tii in te ray xtele? Is tas mayn flicht tii in te ray xtele? Mit eerlichkheet, tuun ich suuche ti kemaynt eenich mache, orer mich selepst kroos mache?’

11. Soo wii in Efésios 4:2, 3 xteet, was sin ti resultaate wën mer Yeehoowa mit teemuut tiine?

¹¹ Fer Yeehoowa, teemuutich sin hot mee weyert wii apiliteete hon, un eenich sin, wii ales perfëkt mache. Tes weeche, mach tayn pestes fer Yeehoowa mit teemuut tiine. Wëns tuu tas machst, tuust tuu ti eenichkheet fon te kemaynt suuche. (Lees Efésios 4:2, 3.) * Preetich wii fiil wiis tuu khanst. Suuch keleechenheete fer ti anere tiine un kuute tinge fer tëne mache. Nëm al kuut aan, tepay tii woo net een ekstra priwilëj in te kemaynt hon. (Mat. 6:1-4; Luc. 14:12-14) Wëns tuu teemuutich mit te kemaynt xafst, tuun ti anere net ploos tayn apiliteete mërke, awer aach tayn teemuut.

12. Was tuut ti Piipel saan iwer froynte hon?

¹² Yeehoowa wil tas meyer uns fraye wën mer mit unser froynte un familye sin. (Sal. 133:1) Yeesus hat kuute froynte. (João 15:15) Ti Piipel xprecht iwer warom is es nutslich woere froynte hon. (Pro. 17:17; 18:24) Un tii saat aach tas es net kuut is, uns wayt fon te anere hale. (Pro. 18:1) Fiile tenke tas ti sotsyaale weepe sin een aat fer fiile froynte hon, un fer net sich aleen xpiire. Awer, meyer mise uf phase wën mer ti sotsyaale weepe penutse.

13. Warom tuun etliche woo sotsyaale weepe penutse sich aleen un tiifsinich xpiire?

 ¹³ Unersuuchunge tsayche tas ti layt woo fiil tsayt fertraype fer pilter un komentaare fon anere in sotsyaale weepe kuke, khene sich am ën, tiifsinich un aleen xpiire. Warom? Fiilaycht, wayl ti pilter woo ti layt in te sotsyaale weepe tuun, in te meyerst tsayt, tsayche ploos ti peste xtune fon sayn leepe. Tii suuche raus ti peste pilter fon sich selepst, fon sayn froynte un fon te wunerliche pletse woo se waare. Een persoon woo tiise pilter kukt, khan fiilaycht sich mit tas ferklayche, un soo tenke tas sayn leepe niks ekstras hot. Een xwester mit 19 yoer erkhënt: “Ich hon aan kefang nayt xpiire, wën ich ti anere kesiin hon am ën fon te woch sich ferkniiche, un ich hat tehëm niks se tuun.”

14. Wii tuut ti aanreet fon 1 Pedro 3:8 uns helfe ti sotsyaale weepe mit kluucheet penutse?

¹⁴ Es is sicher tas ti sotsyaale weepe khene nutslich sin — tsum payxpiil, fer mit unser familye un froynte xpreche. Awer, host tuu xon kemërkt tas etliche tinge woo ti layt in te sotsyaale weepe tuun, sin ploos fer sich proose? Es siit aus tas tii wole saan: “Kuk tsu mich!” Etliche tuun soo kaar krop un eekliche wërter penutse fer komentaare mache iwer sayn aychne pilter un ti pilter fon te anere. Tas keet keeche ti kwaliteete woo ti Piipel ti kriste uf muute tuut fer se ëntwikele: teemuut un empatii. (Lees 1 Pedro 3:8.) *

15. Wii khan ti Piipel uns helfe net inkepilt sin?

¹⁵ Wëns tuu ti sotsyaale weepe penutst, froo tich: ‘Torich mayn pilter, wiiteos un komentaare, siits aus tas ich mich proose? Khente se ti anere naytich lose?’ Ti Piipel saat: “Ales was uf te welt is — te wunx fom flayx, te wunx fon te aue un sich proose weeche was te mënx hot — is net fom Fater kemacht kep.” (1 João 2:16) Ti wërter “sich proose weeche was te mënx hot”, waare in een aner Piipel soo iwerkesetst: “wil sich wichtich aus siin”. Ti kriste prauche net inkepilt sin. Tii tuun ti piiplix aanreet noo keen: “Wole mer uns net kroos fine, net xtrayt uf hetse fer siin weer te  pest is, un net nayt tswixich uns hon.” (Gál. 5:26) Ti teemuut tuut uns helfe net influëntsiirt wëre fon tëm hoochmuutiche kayst fon tiise welt.

16. Warom sole mer net hoochmuutich sin?

¹⁶ Meyer sole teemuutich sin, wayl ti hoochmuutiche layt hon khee “ferninftichkheet”. (Rom 12:3) Hoochmuutiche persoone sin xtraytich un ekoiistix. Oft, tuun sayn ketanke un aktsyoone wee fer sich selepst un ti anere mache. Wën se net uf phase, tuut Satanaas sayn ferxtant plint mache un fersaue. (2 Cor. 4:4; 11:3) Uf een aner sayt, een teemuutiche persoon is ferninftich. Tee tuut sich selepst in een aanmeesich aat siin, un erkhënt tas ti anere kreeser wii tee sin, in fiile aate. (Fil. 2:3) Un tee wees tas “Kot xtelt sich keeche ti hoochmuutiche, awer tee xenkt unfertiint kuutheet fer ti teemuutiche”. (1 Ped. 5:5) Een ferninftiche persoon wil net Yeehoowa wii een faynt hon.

17. Was mise mer mache fer wayter teemuutich sin?

¹⁷ Fer wayter teemuutich sin, mise mer tiise piiplix aanreet aan wëne: ‘Tuut ti alt personaliteet mit sayn kewoonheete aus tuun, un tuut ti nay personaliteet aan tsiie.’ Tas ferlangt fiil aanxtrengung. Meyer prauche Yeesus sayn payxpiil xtutiire un fersuuche tëm noo keen, soo ticht wiis meechlich is. (Col. 3:9, 10; 1 Ped. 2:21) Awer, unser aanxtrengung loont sich. Wën mer ti teemuut ëntwikele, wërt unser familye frooer, tuun mer ti eenichkheet fon te kemaynt suuche un tuun mer net ti sotsyaale weepe penutse fer uns proose. Un iwer ales, tuun mer Yeehoowa kefale un sayn seechen kriin.